GÉNESIS 49
49
Jacobpa wañupunan patapi nisqan
1Jacobqa tukuynin wawasninta wajyachispa nerqa: Qayllamuwaychej wawasníy, noqaqa nisqaykichej imaschus qankunapaj qhepaman kananta.
2Astawan qayllamuychej, uyariychej Jacobpa wawasnin, uyariychej tataykichejta.
3Qanqa Rubén kuraj waway kanki; kallpay, tukuy kallpaymanta phiwi waway, kuraj kaj runa kayniypi, kuraj kaj tukuy atiypi.
4Kunanqa manaña ñaupaj kajchu kanki, imaraykuchus qanqa ashkha corrishaj yaku jina kanki, qan puñunayta ch'ichichapuwanki, warmisaywan puñuspa.
5Simeonwan Leviwan wauqesnintin kanku, armasninkoqa juchachakuy armas kanku ujllata sakeyanapaj jina.
6Mana jayk'ajpis kayta munanichu tantakuyninkupi! Phiñasqa kashaspa runata wañucherqanku; allin sonqonkupi kashaspataj torosta cojosta saqerqanku. 7Maldicisqa kachun chay phiñakuyninku, imaraykuchus millay chay phiñakuyninkorqa. Tukuynejman ch'eqerachisaj tukuyninta Israel ukhupi.
8Judá, wauqesniykeqa mayta alabasonqanku. Enemigosniykita much'usninmanta jap'inki. Kikin wauqesniyki qanman k'umuykusonqanku.
9Qanqa, Judá wawáy. Qan kanki león uña jina; maypachachus aycha mikhunaykita qhechuyta munasunku chayqa, pampaman winkuykunki uj jatun leompis kawaj jina. Pitaj payta toreanmanri? 10Ni pi qhechonqachu Judaj atiyninta, ni makimpi kashaj chay tojnuntapis, chay tojnuyoj chayamunankama, pitachus tukuy llajtas kasonqanku.
11-12Pichus burritonta uvas chajraman watajpata, pichus uvas ch'irwasqaman p'achasninta t'ajsajpata, aswan yanas ñawisnenqa vinomanta nisqaqa, kirusnimpis aswan yurajkuna lechemanta nisqaqa.
13Zabulonqa tiyakonqa mar qochas cantosnejpi, maypichus barcos kanqanku sayanankupaj. Mojonesninkutaj Sidonkama kanqa.
14Isacarqa uj carguero burro jina kanchampi wijch'ukoj.
15Maypachachus tukuy ima allillan kajtin, sumajta samarikunapaj chay cheqa kajtin, wasanta rikucherqa cargata q'epinampaj, mana imata nispataj wata runaman tukun.
16Danqa kikin runasninta cheqanchanqa, ujnin Israel aylluta jina.
17Danqa uj katari jina kanqa, ñampi winkushaj, caballospa chakisninta khanispa, caballospi rejta urmachin.
18Señorníy, suyarqani qan salvanawaykita!
19Gadta uj t'aqa soldados maqaspa qhatiyachanqa, payri ujllata atipanqa.
20Aserqa ashkha t'antayoj kanqa, reyespa mikhunan jina.
21Neftaleqa taruka jina munasqampi purikoj, payqa k'acha uña tarukitasniyoj jina.
22Joseqa yaku cantopi kashaj sach'aj ch'illchisqan jina. Sumajtataj poqon, ramasnintaj perqa patasta ch'iparikun.
23Arcoswan flechaspa wañuchejkuna sapa kuti toreallankupuni.
24Josejtari makisnin manchay kallpasniyoj. Pay sumajta arcosta jap'in. Jacobpa atiyniyoj Diosninrayku, Israelta michejninrayku, waqaychajninraykutaj.
25Tataykej Diosnin qanta yanapasuchun, tukuy atiyniyoj Dios, bendicisuchun janaj pacha bendicioneswan, musphay ukhu mar qochaj bendicionninwan. Qanmanta mirajkuna warmis ashkha wawasniyoj kachunku.
26Qanta astawan tatayki bendicisonqa, tataypa bendiciwasqanmanta. Mana tukukuy atej orqoskama kanqa kay bendicionesqa, Josej uman patapi, pay ajllasqa karqa wauqesnin chaupimanta.
27Benjamenqa uj suwa atoj jina, tutamanta mikhun imatachus wañuchisqanta, ch'isiyaykuytataj puchuchisqasninta rak'iran.
Jacobpa wañuynin
28Kaykuna kanku chunka iskayniyoj Israel ayllus. Kaytataj tatanku sapa uj wawasninman bendicishaspa nerqa. 29Chaymantataj nerqa: Wañuy patapiña kani wawasníy, p'ampaykapuwaychej ari ñaupa tatasniywan khuska Efrón hitita jallp'api kaj cuevapi, maypichus tatasniy kashanku chaypi. 30Chayqa kashan Canaán jallp'api, niyta munan maypichus Abraham ranterqa Efrón jallp'atawan khuska, chaypi p'ampakunankupaj. Chay cuevaqa kashan Macpelapi, Mamrej chimpampi. 31Chaypi Abrahamta p'amparqanku, warmin Sarata; Isaacta, warmin Rebecata; chayllapitaj Leatapis p'amparqa. 32Chay cueva maypichus kashan chay jallp'ataqa Hetpa wawasninmanta ranterqa. 33Kay imasta wawasninman niytawantaj, Jacobqa camanman siriykuspa kikimpi wañuporqa, tatasninwan tinkumunampaj.
Currently Selected:
GÉNESIS 49: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
