SAN JUAN 10
10
Oveja t'aqamanta yachachiy
1Cheqamanta, cheqamanta niykichej: Pichus oveja kanchaman mana punkuntachu yaykun, wajnejta wasaykun chayqa, suwa saltea. 2Pichus oveja kanchaman punkunta yaykun chayqa, chaymá ovejasta michejqa. 3Kancha punkuta qhawajtaj paypaj punkuta kicharin. Ovejastaj michejpa vozninta rejsinku; paytaj sutisninmanta wajyaspa kanchamanta orqhon. 4Tukuy ovejasninta qharqoytawantaj, michejqa ovejaspa ñaupaqenta rin; ovejastaj qhepanta rinku, vozninta rejsisqankurayku. 5Mana rejsisqatarí, mana qhatinkuchu, astawanqa paymanta ayqenku, wajkunaj parlasqanta mana rejsisqankurayku.
6Jesusqa chay rijch'anachinawan parlarqa; paykunataj mana entiendeyta aterqankuchu, paykunaman nisharqa chayta.
Sumaj michejqa Jesús
7Jesús uj kutitawan paykunaman nillarqataj: Cheqamanta, cheqamanta niykichej: Noqa punku kani. 8Noqamanta ñaupajta jamorqanku chay tukoyqa, suwas karqanku, salteajkunataj; ovejastaj paykunata mana uyarerqankuchu. 9Noqa punku kani: Noqanejta yaykojqa salvasqa kanqa; yaykonqataj, llojsenqataj, pastostataj tarenqa.
10Suwaqa jamun suwanallampaj, wañuchinampaj, chinkachinampajtaj. Noqarí jamuni kausayniyoj kanankupaj, aswan junt'a kausayniyoj kanankupajtaj. 11Noqa sumaj michej kani. Sumaj michejqa kausayninta qon ovejasrayku. 12Qolqeraykulla michejqa mana cheqa michejchu. Ovejas mana paypata kasqanrayku, atoj jamojtinkama ayqepun, atojtaj ovejasta jap'iraspa ch'eqerachin. 13Ajinata qolqeraykulla michejqa ayqen, manataj ovejasta allinta michinchu.
14Noqa sumaj michej kani: Ovejasniyta rejsini, noqajta kajkunataj rejsiwanku. 15Imaynatachus Dios Tata rejsiwan, ajinallatataj noqapis payta rejsini; kausayniytataj ovejasrayku churani. 16Waj ovejas tiyapullawantaj. Chaykunaqa mana kay t'aqamantachu kanku. Chay ovejastapis pusamunallaytaj tiyan. Paykunata wajyajtiy uyariwanqanku. Uj t'aqalla kanqanku, uj k'ata michejniyojtaj.
17Chayrayku Dios Tata munakuwan. Noqa kausayniyta qoni watejmanta jap'ikapunaypaj. 18Kausayniytaqa mana pipis qhechuwanmanchu, astawanqa noqa kikiymanta qoni. Atiyniy tiyan kausayniyta qonaypaj, jinallataj watejmanta jap'ikapunaypaj. Kay kamachiytaqa Tataymanta jap'erqani.
19Judiostaj chay nisqanta uyarispa, ujtawan paykunapura churanakorqanku. 20Paykuna ukhupi ashkhas nerqanku: Kay runaqa supayniyoj, manataj paypichu kashan, imapajñá uyarishankichejri?, nispa.
21Wakinkunataj nerqanku: Kay palabrasqa mana supayniyojpatachu. Atinmanchu supayqa ciegospa ñawinta kichariyta?
Judiosqa Jesusta qhesachanku
22Jerusalempitaj temploj diachakunta ruwasharqanku; chiri tiempoñataj karqa. 23Chaypacha Jesús puriykachasharqa templonejta, Salomón punkupi. 24Judiostaj payta muyuykuspa nerqanku: Mayk'ajkamataj sonqoykuta iskayrayachinki? Cristo kanki chayqa, sut'ita willawayku.
25Jesustaj kutichispa nerqa: Willarqaykichejña, qankunataj mana creenkichejchu. Tataypa sutimpi milagrosta ruwasqasniy, pichus noqa kasqayta sut'inta willasunkichej. 26Qankuna mana creenkichejchu imaraykuchus mana ovejasniymantachu kankichej. 27Noqa ovejasniyta rejsini, paykunataj vozniyta uyariwanku, qhepaytataj jamunku. 28Noqa paykunaman wiñay kausayta qoni; manataj jayk'ajpis chinkanqankuchu, makisniymantapis mana pipis qhechuwanqachu. 29Chay ovejasta qowaj Tatayqa, tukuymanta aswan jatun. Tataypa makinmanta mana pipis qhechuyta atinmanchu. 30Noqawan, Dios Tatawanqa ujlla kayku.
31Chaypi judíos ujtawan rumista oqharikorqanku, Jesusta ch'anqaykunankupaj. 32Jesustaj paykunaman kuticherqa: Tataypa ashkha sumachaj ruwasqasninta rikucherqaykichej; kunanqa, mayqenmantataj ch'anqawankichej?
33Judiostaj kuticherqanku: Allin ruwasqasmantaqa mana ch'anqasqaykuchu, manachayqa Dios jina parlasqaykimanta; runa kashaspa Dioswan khuskachakusqaykimantataj.
34Jesustaj kuticherqa: Leyniykichejpi Diospa palabran escribisqa kashan: Noqa nini dioskuna kasqaykichejta. 35Sichus paykunata dioskuna nispa suticharqa chayqa, pikunamanchus Diospa palabran jamorqa chay Escrituraqa, mana pantanmanchu. 36Pitachus Dios Tata ajllarqa, kay pachamantaj kachamorqa; qankunataj ninkichej Dios jina parlan, nispa. Chaytaqa Diospa Churin kani nisqayraykuchu niwankichej? 37Sichus Tataypa ruwanasninta mana ruwanichu chayqa, ama creewaychejchu. 38Chaykunatachus ruwashani chayrí, amapis noqapi creeychejchu, ruwasqasnillayta creeychej; yachanaykichejpaj, rejsinaykichejpaj taj Dios Tata noqapi kasqanta, noqataj Dios Tatapi.
39Chantá ujtawan jap'iykuyta munarqanku; Jesustaj makisninkumanta riporqa.
40Chaymanta uj kutitawan rerqa Jordán mayu chimpaman, maypichus ñaupajta Juan bautizasharqa chaynejman; chaypitaj qhepakorqa. 41Payta watukojtaj ashkhas rerqanku, nerqankutaj: Cheqamanta Juanqa mana ima milagrostapis ruwarqachu; Jesusmanta nisqantaj cheqa karqa.
42Chaypitaj ashkhas Jesuspi creerqanku.
Currently Selected:
SAN JUAN 10: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
