SAN JUAN 11

Lázaroj wañuynin

1Uj runa Lázaro sutiyoj, onqosqa kasharqa. Pay karqa Betaniamanta. Chaytaj llajtanku karqa Mariajta, ñañan Martajtawan. 2Chay onqosqa Lázaroj panan Mariaqa, uj kuti Señorta k'acha q'apaj jawinawan jawerqa, chantá chujchasninwan chakisninta ch'akicherqa. 3Lázaroj panasnintaj Jesusman willachimorqanku: Señor, munakusqaykeqa onqosqa kashan, nispa.

4Jesustaj chayta uyarispa nerqa: Chay onqoyqa mana wañunampajchu; astawanqa, Diosta yupaychanapaj, chay onqoynejta Diospa Churimpis jatunchasqallataj kanampaj.

5Jesustaj anchata munakoj, Martata, ñañanta, Lazarotapis. 6Lázaroj onqosqanta yachaspa, iskay p'unchaytawanraj Jesús qhepakorqa maypichus kasharqa chaypi. 7Chaymantataj yachachisqasninman nerqa: Uj kutitawan Judeaman risunchej.

8Yachachisqastaj nerqanku: Maestro, qanimpalla judiosqa rumiwan ch'anqayta munasorqanku; ujtawanchu jaqayman riyta munashallankitaj?

9Jesús paykunaman kuticherqa: Manachu uj p'unchayqa chunka iskayniyoj horasniyoj? P'unchaypi purejqa mana misk'anchu, imaraykuchus kay mundoj k'anchayninta rikun. 10Tutapi purejtaj misk'an, paypi k'anchay mana kasqanrayku.

11Chayta niytawan yachachisqasninman nerqa: Lázaro kausaqenchejqa puñushan. Kunan risaj payta rijch'arichimoj.

12Chantá yachachisqasnin nerqanku: Señor, puñushallan chayqa, walejyaponqachá, nispa.

13Jesustaj chayta nerqa Lázaroj wañusqanmanta; yachachisqastaj yuyarqanku puñurparisqallanmanta parlasqanta. 14Chaymanta Jesús sut'incharqa Lázaro wañupusqanta. 15Nerqataj: Kusikuni qankunarayku, mana chaypi kasqaymanta, astawan noqapi creenaykichejpaj; kunan jaku watukamuna.

16Chaypachataj, Tomás, mellizo nisqa, nerqa yachachisqa masisninman: Noqanchejpis rinallataj paywan khuska wañunanchejpaj.

Jesusqa, kausarimuy kausaytaj

17Jesús chayamunampajtaj Lazaroqa tawa p'unchaytaña p'ampasqa karqa. 18Betaniataj, Jerusalén qayllapi khuskan leguapi jina karqa. 19Ashkha judiostaj jamusqanku Martata, Mariatawan watukoj, turan wañusqanrayku, paykunata sonqochayta munaspa. 20Martaqa, Jesús chayamushasqanta yachaytawan, payta taripaj llojserqa; Mariataj wasipi qhepakorqa. 21Martataj Jesusman nerqa: Señor, kaypichus kawaj karqa chayqa, turay mana wañunmanchu karqa. 22Chaywampis noqa yachani, tukuy imata Diosmanta mañakunki chayqa, pay qosonqa.

23Jesustaj payman nerqa: Turayki kausarimponqa.

24Martataj nerqa: Arí, noqa yachani kausarimunanta qhepa p'unchaypi, wañusqas kausarimonqa chaypacharaj.

25Jesustaj payman nerqa: Noqa kani kausarimuy, kausaytaj; pichus noqapi creejqa, wañuchumpis kausanqa. 26Pillapis kausashaspa noqapi creejqa, mana wiñaypaj wañonqachu. Chayta creenkichu?

27Martataj nerqa: Arí, Señor, noqa creeni qan Cristo kasqaykita, Diospa Churin, kay pachaman jamusqaykita.

Jesús waqan Lázaroj sepulturampi

28Chayta niytawan Marta rerqa María ñañanta wajyaj. Pakayllapi payman nerqa: Maestroqa kaypiña, wajyasunkitaj.

29Mariataj chayta uyarispa, usqhayta sayariytawan Jesusta taripaj rerqa. 30Jesús manaraj llajtaman yaykorqachu. Maypichus Marta tariparqa chayllapiraj kasharqa. 31Wasipi kajkuna judíos, Martata sonqochasharqanku. Mariata usqhayta sayariytawan llojsejta rikuspataj, nerqanku: Sepulturaman waqaj rishan, nispa. Qhepantataj rerqanku.

32Chantá Mariaqa, maypichus Jesús kasharqa chayman chayaspa, payta rikuytawan ñaupaqenman qonqoriykukuspa, nerqa: Señor, qanchus kaypi kawaj karqa chayqa, turay mana wañunmanchu karqa.

33Jesustaj chaypacha, Mariata waqajta rikuspa, paywan jamoj judiostapis waqajllatataj rikuspa; payqa sinch'ita phutikorqa sonqontaj wawayarqa. 34Nerqataj: Maypi p'amparqankichej? Paykunataj nerqanku: Señor, jamuy ari, qhawaytaj.

35Jesustaj waqarqa. 36Chantá judíos nerqanku: Qhawariychej, chay jinatapuni payta munakusqa.

37Wakin judiostaj nisharqanku: Kay runaqa ciegoj ñawisninta kicharerqa. Kunanqa Lázaro ama wañunampaj, manachu imatapis ruwayta atinman karqa?, nispa.

Lázaroj kausariynin

38Jesús uj kutitawan, sonqompi ancha phutisqa sepulturaman qayllarqa. Chay sepulturataj chhankapi ruwasqa karqa, uj rumiwan wisq'asqataj. 39Jesús nerqa: Chay rumita oqhariychej. Wañusqaj panan Martataj nerqa: Señor, asnashanña, tawa p'unchayña p'ampasqa.

40Jesustaj payman nerqa: Manachu nerqayki, creenkichus chayqa Diospa jatun kayninta rikunki?, nispa.

41Chantá rumita oqharerqanku, maypichus wañusqa churasqa karqa chaymanta. Jesustaj janaj pachata qhawarispa nerqa: Tatáy, graciasta qoyki uyariwasqaykimanta. 42Noqa yachanipuni uyariwasqaykita. Kunantaj, kay muyuyniypi kajkunaj uyarisqanta mañakorqayki, qan kachamuwasqaykita creenankupaj.

43Jinata niytawantaj, sinch'ita qhaparerqa: Lázaro, llojsimuy chaymanta, nispa.

44Wañusqa Lazarotaj llojsimorqa, makisnin, chakisnintaj vendaswan mayt'usqas, uyantaj uma pañowan qhatasqa. Jesús paykunaman nerqa: Phaskaraychej, saqeychejtaj ripunanta.

Jesusta wañuchinankupaj yachachinakunku

[Mt 26.1-5; Mr 14.1-2; Lc 22.1-2]

45Chaypacha Mariata watukoj judiosmanta ashkha creerqanku Jesuspi, chay ruwasqanta rikuspa. 46Wakin judiostaj, rispa fariseosman, Jesuspa ruwasqanta willarqanku. 47Chaypacha kuraj sacerdotes, fariseos ima, jatun juntapi nerqanku: Imatataj ruwasunri? Kay runaqa ashkha milagrostaña ruwan, nispa. 48Jinata ruwajta saqellasun chayqa, tukuy runas paypi creenqanku. Romanostaj jamuspa, kay templonchejta, llajtanchejta ima chinkachenqanku.

49-50Paykuna ukhupeqa, Caifás, chay watapi kuraj sacerdote karqa. Paytaj nerqa: Qankuna mana imatapis yachankichejchu; manataj imatapis allinta unanchankichejchu. Noqanchejpajqa allin kanman uj runalla runakunarayku wañunan, tukuy aylluntin chinkananmantaqa.

51Caifastaj mana payllamantachu kayta nerqa: Astawanqa chay watapi kuraj sacerdote kasqanrayku sut'incharqa, Jesús wañunanta ayllunrayku. 52Mana chay ayllunraykullachu wañunan karqa, astawanqa, Diospa wawasnin tukuynejpi ch'eqerasqas kajkunata ujllaman tantaykunampaj. 53Chay p'unchaymantapacha, tukuyninku uj yuyaylla karqanku, Jesusta wañuchinankupaj.

54Chayrayku Jesusqa, manaña tukuypa rikusqantachu purerqa judíos ukhupi. Astawanqa pay riporqa ch'innejman, Efraín llajtaman; chaypitaj yachachisqasninwan qhepakorqa.

55Judiospa Pascuan qayllaña karqa; ashkha runataj llajtamanta Jerusalenman wicharerqanku Pascua ñaupajta llimphuchakunankupaj. 56Chaykama Jesusta mask'arqanku, templopi kashaspataj paykunapura ninakorqanku: Imaynataj rijch'asunkichej? Manachu Pascuaman jamunman?

57Kuraj sacerdotestaj, fariseos ima, runasta kamacherqanku maypichus Jesús kasqanta yachaytawan paykunaman willanankuta, presochaykunankupaj.

Currently Selected:

SAN JUAN 11: QCHSB

Highlight

Copy