SAN JUAN 5

Jesús thañichin tunuyasqa runata

1Kay imas qhepata judiospa qhochukun karqa; Jesustaj Jerusalenman kutiporqa. 2Jerusalempi, oveja punku nisqa qayllapi, uj estanque karqa; hebreo parlaypi Betzata sutiyoj; chay estanquetaj phishqa punkuyoj karqa. 3Chay punkunejpi ashkha onqosqas, pampapi sirisqas kasharqanku ciegos, suchus, tunuyasqa onqoyniyoj ima. [Paykunataj yaku kuyurinanta suyaj kanku. 4Unaymanta unay, uj ángel uraykamuspa yakuta kuyurichej; ajinapi pichus ñaupajta estanqueman yaykojqa, ima onqoyllamantapis thañikapoj.] 5Chaypitaj uj runa kinsa chunka pusajniyoj watataña onqosqa karqa. 6Jesustaj sirisqata rikuspa, unayña chay onqoyniyoj kasqanta yachaspataj, taporqa: Munankichu thañikapuyta?, nispa.

7Onqosqataj kuticherqa: Señor, mana piniypis tiyapuwanchu, estanquepi yaku kuyurejtin ichuykunawampaj. Sapa kuti yaykuyta munashajtiy, wajllapuni ñaupajta yaykun.

8Jesustaj payman nerqa: Sayarikuy, puñunaykita oqhariytawan ripuy.

9Chay kikimpacha, chay runaqa thañikaporqa, puñunanta oqharispataj puriyta qallarerqa. Chaytaj samarina p'unchaypi karqa. 10Chayraykutaj judiosqa thañisqa runaman nerqanku: Kunan samarina p'unchay kasqanrayku, mana atinkichu puñunaykita apakapuyta.

11Paytaj kuticherqa: Pichus thañichiwaj niwarqa: Puñunaykita oqharikapuy, ripuytaj, nispa.

12Chaypacha taporqanku: Pitaj chay karqa, puñunaykita oqharikuspa ripuy, nisojri?

13Chay thañisqa runataj mana yacharqachu mayqenchus kasqanta. Jesustaj chaypajqa riporqaña, imaraykuchus ashkha runa chaypi kasharqa. 14Jesustaj chay runata templopi tariparqa, nerqataj: Thañisqaña kanki; amaña astawan juchallikuychu, amaña imapis astawan jamusunampaj.

15Chay runataj ripuspa judiosman willamorqa, payta thañichejqa Jesús kasqanta. 16Chayrayku, judiosqa Jesusta qhatiykacharqanku wañuchinankupaj, chay imasta samarina p'unchaypi ruwasqanrayku. 17Jesustaj kutichispa nerqa: Tatayqa kunankama ruwashan, noqapis ruwashallanitaj.

18Chaymanta judiosqa Jesusta wañuchiytapuni munasharqanku, samakuna p'unchayta mana waqaychasqanrayku, astawanqa, Diosqa tatay nisqanrayku paywan kikinchakuspa.

Diospa Churimpa atiynin

19Chaypacha Jesús kutichispa nerqa: Cheqamanta, cheqamanta niykichej: Diospa Churenqa, sapallanmanta mana imatapis ruwayta atinchu. Astawanqa imatachus Dios Tatata ruwajta rikun, kikillantataj Chureqa ruwan. 20Dios Tataqa Churita munakun, chayrayku imatachus ruwan chay tukuyta Churiman rikuchin. Aswan jatun ruwanastaraj rikuchenqa, qankunataj chayta rikuspa t'ukunkichej. 21Imaynatachus Dios Tataqa wañusqasta kausarichispa, kausayta paykunaman qon, ajinallatataj Churipis pikunamanchá qoyta munan, chaykunaman kausayta qon. 22-23Dios Tataqa mana pitapis juzganchu; imaraykuchus Churiman tukuy atiyta qorqa, pay juzganampaj; Churita tukuy runas yupaychanankupaj, imaynatachus Dios Tatata yupaychanku, ajinata. Pillapis Churita mana yupaychajqa, nillataj kachamoj Tatantapis yupaychanchu.

24Cheqamanta, cheqamanta niykichej: Pichá parlasqayta allinta uyarin, kachamuwaj Tataytapis creen chayqa, wiñay kausayniyoj; manataj juicio p'unchaypi juchachasqachu kanqa, astawanqa wañuymanta kausayman yaykun. 25Cheqamanta, cheqamanta niykichej: Horaqa chayamushanña, kunantaj chay hora, wañusqas uyarenqanku Diospa Churimpa wajyasqanta, uyarejkunataj kausanqanku. 26Imaynatachus Dios Tata pay kikimpi kausayniyoj, ajinallatataj Churinmampis qorqa pay jina kausayniyoj kanampaj. 27Juzganampajpis atiyta qollarqataj, Runaj Churin kasqanrayku. 28Ama kay nisqaymanta t'ukuychejchu. Hora chayamonqa. Chaypachataj tukuy sepulturaspi kajkuna Runaj Churimpa parlasqanta uyarenqanku. 29Allinta ruwajkunaqa, kausanankupaj jatarimonqanku; sajrata ruwajkunataj, juchachasqa kanankupaj kausarimonqanku.

Jesuspa atiyninmanta willanku

30Jesustaj nerqa: Mana imatapis noqallamanta ruwanichu, uyarisqayman jina noqa juzgani; juzgasqaytaj cheqampuni, imaraykuchus mana noqaj munayniytachu mask'ani; astawanqa kachamuwaj Tataypa munaynillanta. 31Noqa kikiymantachus willakuyman chayqa, willasqayqa mana cheqachu kanman. 32Noqamanta willajqa wajmin, yachanitaj chay willasqanqa cheqa kasqanta. 33Qankuna kacharqankichej Juanta tapojta, paytaj cheqa kajta paykunaman willarqa. 34Runaj willasqantaqa mana jap'ikunichu; kayta niykichej, qankuna salvasqas kanaykichejpaj. 35Juanqa uj k'anchana jina larwasharqa, k'ancharqataj; qankunataj chay k'anchaynimpi pisi tiempota kusikuyta munarqankichej. 36Juampa willasqanmanta aswan sumaj willajniy tiyan; Dios Tata ruwanasta qowarqa junt'anaypaj, chaykunata ruwashani; chay ruwasqasniytaj willashanku Dios Tata kachamuwasqanta. 37Kachamuwajniy Dios Tatapis noqamanta willallarqataj, qankunataj mana jayk'ajpis parlamusqanta uyarerqankichejchu, nitaj rijch'aynintapis rikorqankichejchu. 38Diospa palabrantaj mana qankunapichu kakushan, kachamusqan Churipi mana creesqaykichejrayku. 39Escriturasta allinta qhawaychej, imaraykuchus qankunamanqa rijch'asunkichej, Escriturasnejta wiñay kausayta tarinaykichej kasqanta. Chay Escriturastaj noqamanta willashanku. 40Qankuna kausayta tarinaykichejpajqa, noqaman jamuyta mana munankichejchu.

41Runakuna jatumpi qhawanawankutaqa, mana munanichu. 42Astawanqa, noqa yachani Diospa munakuynenqa qankunapi mana kasqanta. 43Noqa Tataypa sutimpi jamorqani, qankunataj qhesachawankichej. Waj runatajchus paypa sutimpi chayamusunkichejman chayqa; paytaqa mana qhesachawajchejchu. 44Imaynatataj creeyta atiwajchej, qankunapuralla jatumpi qhawanakushaspa, manachu mask'ankichej uj k'ata Diosmanta jatumpi qhawasqa kaytaqa? 45Ama yuyaychejchu noqa Tataypa ñaupaqempi qankunata ch'ataykunayta; qankunata ch'ataykojqa waj kashan, chaytaj Moisés. Paypitaj suyashankichej. 46Moisespichus creewajchej chayqa, noqapipis creellawajchejtaj; imaraykuchus noqamanta pay escriberqa. 47Moisespa escribisqantachus mana creenkichej chayqa, imaynapitaj parlasqasniyta creewajchejri?

Currently Selected:

SAN JUAN 5: QCHSB

Highlight

Copy