SAN JUAN 6

Jesús phishqa waranqa runasman mikhuchin

[Mt 14.13-21; Mr 6.30-44; Lc 9.10-17]

1Kay imas qhepata, Jesús riporqa Galilea qochaj chimpanman; chay qochallataj Tiberias nisqa karqa. 2Ashkha runataj Jesuspa qhepanta rerqanku; imaraykuchus rikorqanku onqosqasta milagrosninwan thañichejta. 3Chantá Jesús uj orqoman wicharispa tiyarikorqa, yachachisqasninwan ima. 4Pascuamantaj qayllaña kasharqa; chay qhochukutaj judiospata karqa. 5Jesustaj qhawarerqa. Ashkha runata payman jamushajta rikuspataj, Felipeman nerqa: Maymanta rantisunchej t'antata, kay tukuy runas mikhunankupajri?

6Chayta nerqa Felipej yuyayninta yachanampaj, imaraykuchus Jesús yacharqaña imatachus ruwananta. 7Felipetaj payman kuticherqa: Iskay pachaj denarios qolqewan t'antata rantimusunman chaypis, manachá sapa ujman uj chhikallatapis qoyta atisunmanchu.

8-9Yachachisqasninmanta ujnin kaj, Andrés, Simón Pedroj wauqen, nerqa: Uj yoqallito kaypi kashan. Paytaj phishqa cebada t'antata, iskay challwastawan jap'ishan; imataj chay kanman kay chhika runapajri?

10Jesustaj nerqa: Tukuy runas tiyarikuchunku, nispa. Ashkha ch'ikitaj chaynejpi karqa; phishqa waranqa jina qharistaj chaypi tiyarakorqanku. 11Jesustaj chay t'antasta jap'ispa, Diosman graciasta qorqa. Chantá, yachachisqasninman t'antasta jaywarqa. Paykunataj runasman rak'irarqanku, jinallatataj challwastapis munasqankuman jina. 12Sajsakojtinku taj, yachachisqasninman Jesús nerqa: Puchoj t'antasta oqharipuychej, ama usunampaj.

13Oqharispataj, chay phishqa cebada t'antasmanta puchojta, chunka iskayniyoj canastasman junt'acherqanku. 14Chay runakunataj, Jesuspa milagro ruwasqanta rikuspa, nerqanku: Cheqamanta kay runaqa, mundoman jamunan karqa, chay profeta.

15Jesustaj, reyninku kanampaj payta pusanankutapuni yachaspa, watejmanta sapallan orqoman riporqa.

Jesús purin yaku patata

[Mt 14.22-27; Mr 6.45-52]

16Ch'isiyashajtintaj yachachisqasnin qochaman uraykorqanku. 17Uj boteman wicharispa, qocha chimpaman risharqanku, Capernaum cheqaman. Ñapis laqhaña karqa; Jesustaj manaraj paykunata taripasqachu. 18Sinch'i wayra jatarimojtintaj, qocha oqharikusharqa. 19Uj legua kurajta jina botepi risqankumantaña, Jesusta rikorqanku yaku patanta boteman qayllaykamushajta, mancharikorqankutaj. 20Jesús paykunaman nerqa: Noqa kani, ama manchariychejchu.

21Chantá paykuna kusiywan boteman wajyarqanku; chayarqankutaj maymanchus risharqanku chayman.

Runas mask'anku Jesusta

22Q'ayantintaj qochaj chimpampi qhepakojkuna, yacharqanku yachachisqaslla ripusqankuta uj bote kasharqa chaypi; Jesustaj mana paykunawanchu risqanta. 23Chaykamaqa, Tiberias llajtamanta waj botes chayamorqanku, maypichus Señor graciasta qorqa t'antamanta, runastaj mikhorqanku chaynejman. 24Jinata runas yacharqanku Jesús yachachisqasnin ima, manaña chaypichu kasqanta. Chay botesman yaykuspataj Capernaumman riporqanku Jesusta mask'aspa.

Jesusqa kausay t'anta

25Runakunataj, qocha chimpaman chayaspa Jesusta tarerqanku, taporqankutaj: Maestro, jayk'ajtaj kayman chayamorqanki?, nispa.

26Jesustaj kutichispa nerqa: Cheqamanta, cheqamanta niykichej: Qankuna noqata mask'ashawankichej, mana milagrosta rikusqaykichejraykuchu, astawanqa t'antata mikhuspa sajsarqankichej, chayraykulla. 27Llank'aychej ari, wiñaypaj kaj t'antarayku, ama ari tukukoj t'antaraykullaqa. Chaytaqa Runaj Churillan qosonqachej; paytaqa Dios Tata ajllarqa.

28Chantá Jesusta taporqanku: Imata ruwaspataj junt'aykuman, Diospa munayninman jina ruwanasnintari?

29Jesustaj paykunaman kuticherqa: Kaymin Diospa ruwaynenqa; kachamusqan Churimpi creenaykichej.

30Kantá paykuna taporqanku: Ima milagrostataj qan ruwanki, chayta rikuspa creenaykupaj? Imata ruwankiri? 31Ñaupa tatasniykoqa, ch'in pampapi Maná nisqa t'antasta mikhorqanku. Escriturapi nishan: Dios paykunaman janaj pacha t'antata mikhucherqa.

32Jesustaj paykunaman nerqa: Cheqamanta, cheqamanta niykichej: Janaj pachamanta kaj t'antataqa mana Moiseschu qorqa; Tataymá qosunkichej janaj pachamanta cheqa kaj t'antataqa. 33Janaj pachamanta Diospa t'antan uraykamojqa, mundoman kausayta qon.

34Chantá nerqanku: Chay t'antata qowaykupuni.

35Jesustaj paykunaman nerqa: Noqa kausay t'anta kani; noqaman jamojqa mana jayk'ajpis yarqhachikonqachu; noqapi creejtaj, ni jayk'aj ch'akichikonqachu.

36Nerqaykichejña; qankunaqa rikushawaspapis, noqapi mana creerqankichejchu. 37Diospa tukuy qowasqan noqaman jamonqa; noqaman jamojtarí, mana qharqosajchu. 38Mana munayniyta ruwanaypajchu janaj pachamanta uraykamorqani, astawanqa kachamuwajniypa munayninta ruwanaypaj jamuni. 39Kachamuwajniypa munaynintaj kay jina kashan: Tukuy paypa qowasqanta mana ujtapis chinkachinaychu tiyan. Kay mundoj tukukuynin p'unchaypitaj, payta wañusqamanta kausarichimusaj. 40Tataypa munaynenqa kay: Pillapis Churita rikoj paypitaj creejqa, wiñay kausayniyoj kanqa; noqataj qhepa kaj p'unchaypi payta kausarichisaj.

41Chaymantataj judíos, Jesuspaj thutuyta qallarerqanku nisqanrayku: Janaj pachamanta uraykamoj t'antaqa noqa kani, nispa. 42Chantá nillarqankutaj: Manachu kay runaqa Josejpa Churin Jesús? Manachu rejsinchej tatantawan mamantawan. Imaraykutaj janaj pachamanta uraykamuni nishan payri?

43Jesustaj nerqa: Ama contrayta thutuychejchu, nispa. 44Mana pipis noqaman jamunmanchu, manachus kachamuwaj Tatay pusamunman chayqa, noqataj qhepa p'unchaypi payta kausarichisaj. 45Profetaspa escribisqasnimpitaj jinata nishan: Dios tukuyninman yachachenqa. Jinataj, Dios Tatamanta uyarejkuna, paymanta yachakojkunataj noqaman jamunku.

46Mana ninichu, pi runapis Dios Tatata rikusqanta; Diosmanta jamojlla rikun paytaqa. 47Cheqamanta, cheqamanta niykichej: Pillapis noqapi creejqa, wiñay kausayniyoj. 48Noqa kausay t'anta kani. 49Ñaupa tatasniykichejqa, Maná nisqa t'antata ch'in pampapi mikhorqanku, wañorqankutaj. 50Kaymin janaj pachamanta uraykamoj t'antaqa. Pillapis chaymanta mikhojqa mana wañunchu. 51Noqa janaj pachamanta uraykamoj t'antaqa kani. Pillapis kay t'antamanta mikhojqa, wiñaypaj kausanqa. Noqa qosaj chay t'antaqa aychay; chayta qoni mundo kausanampaj.

52Judiostaj paykunapura churanakorqanku: Imaynatataj pay aychanta qowasunman mikhunanchejpaj?, nispa.

53Jesustaj paykunaman nerqa: Cheqamanta, cheqamanta niykichej: Manachus Runaj Churimpa aychanta mikhunkichej, nitaj yawarnintapis ujyankichejchu chayqa, mana qankunapis kausayniyojchu kankichej. 54Pillapis aychayta mikhoj, yawarniytataj ujyajqa, wiñay kausayniyojña; noqataj payta kausarichisaj qhepa p'unchaypi. 55Aychayqa cheqa mikhunamin, jinallataj yawarniypis cheqa ujyana. 56Pillapis aychayta mikhun, yawarniytataj ujyan chayqa, noqawan kausan, noqataj paywan. 57Imaynatachus kausaj Tata kachamuwarqa, paynejtataj kausani; ajinallatataj noqata mikhuwajqa noqanejta kausanqa. 58Kaymá janaj pachamanta uraykamoj t'antaqa. Manataj tatasniykichej mikhusqanku, Maná nisqa t'anta jinachu. Paykunaqa wañorqanku, kay t'antata mikhojrí wiñaypaj kausanqa.

59Kay imasta Jesús nerqa Capernaum sinagogapi yachachispa.

Wiñay kausaymanta

60Jesuspa parlasqanta uyarispataj, ashkha yachachisqas nerqanku: Kay nisqasnenqa ancha sinch'i. Pitaj uyariyta atinmanri?

61Jesustaj chay nisqanmanta rimajta uyarispa, paykunata taporqa: Kay nisqaychu iskayrayachisunkichej? 62Ima niwajchejtaj Runaj Churinta maypichus karqa chayman wicharejta rikuspari? 63Espiritoqa kausachin, aychaqa mana imapaj walejchu. Noqa parlaykichej chay palabrasneyqa espiritumin, kausaytaj. 64Qankuna ukhupi kanraj mana creejkuna.

Jesús yacharqa qallariymantapacha pikunachus paypi mana creesqankuta, jinallatataj yacharqa pichus payta jap'ichinan kasqanta.

65Nerqataj: Mana pipis noqaman jamunmanchu, Dios Tatachus mana wajyanman chayqa.

66Chaymantapacha, ashkha yachachisqasnin ñaupa ruwanasninkuman kutirerqanku, manañataj Jesuswanchu purerqanku. 67Chaypacha Jesús chunka iskayniyoj apostolesta taporqa: Qankunapis ripuyta munankichejchu?, nispa.

68Simón Pedrotaj kutichispa nerqa: Pimantaj riykumanri? Qampallata tiyapusunki wiñay kausay palabra. 69Noqayku creeykuña, yachaykutaj Diospa ajllasqan kasqaykita.

70Jesustaj kuticherqa: Manachu chunka iskayniyojta ajllarqaykichej? Chaykunamanta ujnintaj supay kashan.

71Chayta Jesús nisharqa Simompa churin Judas Iscariotemanta, imaraykuchus payqa Jesusta jap'ichinan karqa, chunka iskayniyojmanta ujnin kashaspapis.

Currently Selected:

SAN JUAN 6: QCHSB

Highlight

Copy