SAN JUAN 7

Jesuspa wauqesnin

1Chay imas qhepata Galileapi Jesús purisharqa, manataj Judeapi puriyta munarqañachu; imaraykuchus judíos payta wañuchiyta munasharqanku. 2Judiospa qhochukunman qayllaña karqa; ch'ujllas qhochuku nisqa karqa. 3Jesusmantaj wauqesnin nerqanku: Ripuy kaymanta Judeaman, yachachisqasniykipis ruwasqasniykita rikunankupaj. 4Pillapis runasman rejsichikuyta munaspaqa, mana imatapis pakayllapi ruwanmanchu. Ruwashanki chay imastaqa, tukuypa rikunanta ruway ari.

5Wauqesnimpis Jesuspi mana creerqankuchu. 6Chantá, Jesús paykunaman nerqa: Noqapajqa hora mana chayamushanrajchu; qankunapajtaj mayqen horapis walejlla kashan. 7Kay mundopi kajkunaqa, qankunata mana chejnisunkichejmanchu. Noqatarí chejniwanku, sajra ruwasqasninkuta paykunaman rikuchisqayrayku. 8Qankuna riychej chay qhochukuman. Noqaqa mana risajchu, imaraykuchus horayqa manaraj junt'akushanchu.

9Chay imasta niytawantaj, Jesús qhepakorqa Galileapi.

Jesuspis qhochukupi kasharqa

10Wauqesnin risqankutawan, Jesuspis rillarqataj chay qhochukuman, runaswan mana rikuchikuspa pakayllamanta. 11Judiosqa qhochukupi Jesusta mask'arqanku, nerqankutaj: Maynejpitaj chay runa kashanri?, nispa.

12Chay runa ukhupitaj Jesusmanta parlasharqanku. Wakin nerqanku: May k'acha chay runaqa. Wakintaj nerqanku: Mana allinchu, imaraykuchus ashkha runasta ch'aukiyashan.

13Manataj mayqempis Jesusmanta sut'ita parlajchu, judiosta manchachikuspa.

14Khuskan qhochuku kashajtinña Jesusqa temploman yaykuspa, yachacherqa. 15Judiostaj t'ukorqanku, nerqankutaj: Kay runa imaynamanta chhika yachayniyoj rikhurimunri, mana imata yachachikuspallari?

16Jesustaj kuticherqa: Yachachishani chay yachacheyqa, mana noqajtachu, kachamuwajniypata. 17Diospa munayninta ruwayta munajqa, yachachiyninta rejsenqa Diosmantachus, chayrí noqallamantachus kasqanta. 18Pillapis pay kikinmanta parlajqa, mask'an paylla runaswan jatumpi qhawachikuyta. Kachamojninta jatumpi qhawachiyta munajta, cheqanta parlan, manataj paypi ima llullapis kanchu.

19Manachu Moisés qankunaman leyta qosorqachej? Manataj mayqempis chay leyta junt'ankichejchu. Imaraykutaj wañuchiwayta munashankichejri?

20Runakunataj kutichispa nerqanku: Supayniyoj kanki; pitaj wañuchisuyta munashanri?

21Jesustaj paykunaman nerqa: Uj allin imata ruwasqayrayku qankunaqa t'ukushankichej. 22Moisés qosorqachej circuncidanapaj leyta, mana paypata kajtachu, ñaupa tatasninchejpata kajta. Chayman jinataj runata circuncidankichej samakuna p'unchaypi. 23Sichus samakuna p'unchaypi runata circuncidankichej, Moisespa leyninta mana p'akiyta munaspa chayqa, imaraykutaj noqapaj phiñakushankichej, onqosqa runata samakuna p'unchaypi thañichisqaymantari? 24Ama rijch'ayninman jinallachu juzgaychej. Cheqan kajman jina juzgaychej.

Jesús willan pichus pay kasqanta

25Wakin runas Jerusalenmanta kajkuna nerqanku: Manachu kay runata wañuchinankupaj mask'ashanku? 26Qhawariychej, tukuypa rikunanta parlashan, nitaj pipis imata nishanchu. Ichapis llajtapi kamachejkuna rejsinkuña Cristopuni kasqanta. 27Noqanchejqa yachanchej maymantachus pay jamusqanta. Cristo chayamojtintaj, ni pi yachanqachu maymantachus chayamusqanta.

28Chayta uyarispa Jesusqa, templopi yachachishaspa sinch'ita parlarerqa: Noqata rejsiwankichej, yachankichejtaj maymantachus kasqayta; manataj sapaymantachu jamuni. Kachamuwarqa chaytaj cheqapuni, qankunataj payta mana rejsinkichejchu. 29Noqarí rejsini, imaraykuchus paymanta kani, paytaj kachamuwarqa.

30Chaymantataj Jesusta presochayta munarqanku; manataj mayqempis jap'iykuyta aterqachu, imaraykuchus manaraj horan chayamusharqachu. 31Ashkha runastaj Jesuspi creerqanku, nerqankuta: Jamonqa chay Cristo, ruwanmanchu kay milagrosmanta astawan?

Jesusta presochayta munanku

32Fariseos uyarerqanku Jesusmanta runas rimasqankuta. Paykunataj kuraj sacerdotes ima, soldadosta kacharqanku Jesusta presochanankupaj. 33Chaypacha Jesús nerqa: Pisi p'unchayllatawanña qankunawan kasaj, chantá, kachamuwajniypaman kutipusaj. 34Qankunaqa mask'awankichej, manataj tariwankichejchu; imaraykuchus maypichus kasaj, chayman jamuyta mana atinkichejchu.

35Chaypacha judíos tapunakorqanku: Maymantaj kay runa renqa, noqanchej payta mana tarinanchejpajri? Ch'eqerasqa judiospamanchu renqa, gentilesman yachachimoj? 36Ima niyta munan chay jinata parlasparí: Noqata mask'awankichej, manataj tariwankichejchu; maypichus kasaj chaymantaj jamuyta mana atinkichejchu, nispari?

Kausaj yakuyoj mayu

37Qhochuku tukukuy jatun p'unchaypitaj, Jesús sayariytawan sinch'ita parlaspa nerqa: Pichus ch'akichikojqa, noqaman jamuchun, ujyachuntaj. 38Noqapi creejqa, escribisqaman jina, ukhunmanta kausay yaku mayus puririmonqanku.

39Chayta Jesús nerqa sutimpi creejpa sonqonman Santo Espíritu jamunanmanta; chaywampis Santo Espiritoqa manaraj jamorqachu, Jesús Tatampaman manaraj wicharisqanrayku.

Runakuna t'aqanakunku

40Chayta uyarispa wakin runasqa nerqanku: Cheqamanta kayqa, jamunan karqa chay profeta.

41Wakintaj nerqanku: Kaypuni Cristoqa.

Wajkunataj nerqanku: Galileamantachu Cristoqa jamunman?, nispa. 42Manachu Cristomantaqa yachanchej escribisqaman jina, Davidpa mirayninmanta, Belén llajtamantataj jamunanta?

43Ajinata ninakuspa, Jesusrayku iskayman t'aqanakorqanku. 44Paykunamanta wakin munarqanku Jesusta jap'iykuyta, manataj mayqenninkupis makisninkuta churaykorqankuchu.

Jesuspi mana creerqankuchu

45Soldadostaj kutirimorqanku, maypichus kuraj sacerdotes, fariseos ima kasharqanku chayman. Paykunataj taporqanku: Imaraykutaj chay runata mana pusamunkichejchu?

46Soldadostaj nerqanku: Mana jayk'aj pi runapis parlarqachu chay runa jinaqa!

47Fariseostaj paykunaman nerqanku: Qankunapis chay runaj ch'aukiyasqallantaj chu kankichej? 48Mayqentaj kamachejkunamanta, chayrí fariseosmanta paypi creenkuri? 49Chay runas, Moisespa leyninta mana yachajkunaqa, maldicisqas kanku.

50-51Fariseosmanta Nicodemo, pichus Jesusta tuta watukoj rerqa, chaytaj nerqa: Leyninchejman jina, mana pillatapis juchachayta atisunmanchu, manaraj parlasqanta uyarishaspaqa, nitaj ima ruwasqanta yachashaspapis.

52Chaymantaj paykuna kuticherqanku: Galileamantachu qampis kanki? Escribisqapi allinta qhaway, chaypi allinta yachanki Galileamanta ni pi profeta jatarisqanta.

[ 53Chaymantataj sapa uj wasinkuman riporqanku.

Currently Selected:

SAN JUAN 7: QCHSB

Highlight

Copy