SAN LUCAS 11

Jesús yachachin Diosmanta mañakuyta

(Mt 6.9-15; 7.7-11)

1Uj kuti, ujnejpi Jesúsqa, Diosmanta mañakusharqa, tukojtintaj ujnin yachachisqan nerqa: Señor, yachachiwayku Diosmanta mañakuyta, imaynatachus Juampis yachachisqasninman yachacherqa, ajinata.

2Jesustaj paykunaman nerqa: Diosmanta mañakuspaqa niychej: [Janaj pachapi kashaj] Tatayku, sutiyki yupaychasqa kachun. Reinoyki jamuchun. [Munayniyki ruwasqa kachun, imaynatachus janaj pachapi, ajinallatataj kay pachapipis.] 3Sapa día t'antaykuta kunan kopuwayku. 4Juchasniykuta pampachapuwayku, imaynatachus noqaykupis juchallikuwajniykuta perdonayku, ajinata. Amataj saqeychu supay, juchaman urmachinawaykuta; [astawanqa jark'awayku sajramanta.]

5-6Nillarqataj: Pitaj qankunamanta, uj kausaqen kajtin, rinman chaupi tutata, nej: Kausaqéy, mañariway kinsa t'antata; uj kausaqey karumanta chayamun, nitaj jaywarinaypaj ni ima kanchu. 7Chay kausaqentaj wasi ukhumanta nimunman: Ama umayta nanachiwaychu, punku wisq'asqaña, wawasniypis noqawan camapiña kanku, mana jatarimuymanchu qosunaypaj. 8Niykichej, amapis jatarimuchunchu qonampaj, kausaqen kasqanrayku; chaywampis kasunan tiyan, anchata mañakusqanrayku. Jatarimuspataj qonqa imatachus mañasqanta. 9Chaynejta niykichej: Mañakuychej, qosonqachejtaj; mask'aychej, tarinkichejtaj; punkuta takaychej, kicharimusonqachejtaj. 10Pichus mañakojqa jap'in, mask'aj tarin; punkuta takajtapis kicharinku.

11Mayqen tatataj kanman qankunamanta, wawan [t'antata mañajtin rumita qojri?] challwata mañajtin katarita qojri? 12Chayrí, runtuta mañajtimpis, atoj atojtachu qonman? 13Chayrayku, qankunachus sajra runas kashaspa, allin kajta wawasniykichejman qoyta yachankichej chayqa, mashkhatarajchus janaj pachapi kaj Tataykichejqa Santo Espirituta qonqa mañakojkunaman.

Jesusta supayniyoj kasqanta ninku

(Mt 12.22-30; Mr 3.19-27)

14Jesús, opayachej supayta uj runamanta qharqorqa. Supay llojsejtinkamataj, opaqa parlayta qallarerqa, runakunataj t'ukorqanku. 15Paykunamantataj wakin nerqanku: Kay runaqa supaykunaj kurajnin, Beelzebúj atiyninwan supaykunata qharqon, nispa.

16Wajkunataj, Jesusta pantachiyta munaspa uj señalta ruwananta munarqanku. 17Yuyasqankuta yachaspa nerqa: Ima reinollapis, t'aqanasqa kaspa, ujkuna ujkunawan maqanakuspaqa tukuchinakunku. Ajinallatataj uj t'aqasqa waseqa urmallantaj. 18Ajinallatataj, Satanaschus pay kikillantaj t'aqakunman chayqa, imaynatataj reinon sayallanqapuniri? Kayta niykichej, Beelzebunejta supaykunata qharqosqayta niwasqaykichejrayku. 19Sichus noqa Beelzebunejta supaykunata qharqoni chayqa, wawasnikichejrí, pinejtataj qharqonku? Chayrayku, paykuna juecesniykichej kanqanku. 20Sichus diospa atiyninwan, noqa supaykunata qharqoni chayqa, cheqamanta niykichej, Diospa reinonqa chayamunña qankunaman.

21Kallpasapa runa, sumaj armasqa wasinta qhawajtenqa, tukuy imasnin sumaj waqaychasqa kakun. 22Wajchus, paymanta aswan kallpayoj jamuspa atipanman chayqa, qhechun tukuy maqanasninta, mayqempichus atienekusqanta; rak'intaj chay qhechusqanta.

23Pichus mana noqawan kajqa, contraypi; pitajchus noqawan mana pallajpis, t'akan.

Ch'ichi kutin

(Mt 12.43-45)

24Ch'ichi supay, runamanta llojsejqa ch'aki jallp'asnejta purin samakunata mask'aspa; mana tarispataj nin: Kutipusaj, maymantachus llojsimorqani chay wasiyman. 25Chayaspataj payqa pichasqata tarin, k'achanchasqatataj. 26Chantaqa, llojsispa qanchis supaykunatawan pusaykun, paymanta aswan ch'ichista; yaykuspataj, chaypi tiyanku. Chay runataj, ñaupaj kasqanmanta nisqaqa, aswan millayman tukun.

Kusiyniyojkuna

27Chayta Jesús ninankamataj, uj warmi, runakuna chaupipi qhaparispa nerqa: Kusikuyniyoj kanan tiyan pi warmichus wijsampi apasorqa, pejpa ñuñuntachus ñuñorqanki, chay.

28Jesustaj kuticherqa: Diospa palabranta uyarispa kasojkunarajmá aswan kusikuyniyojqa kanqanku.

Sajra runakuna milagrota mañanku

(Mt 12.38-42; Mr 8.12)

29Runas k'iskikamojtintaj, parlayta qallarerqa nispa: Kunan tiempo runaqa sajra, chayrayku señalta mañan; manataj waj señalta paykunaqa rikonqankuchu, manachayqa Jonaspa señalnillanta. 30Imaynatachus Jonás señal karqa Nínive runasman, ajinallataj Runaj Churimpis kanqa, kay tiempo runasman. 31Uranejmanta reina, juicio p'unchaypi rikhurimonqa kay tiempo runasman, paykunataj juchachanqa; imaraykuchus pay jamorqa karu jallp'asmanta, Salomompa yachayninta uyarej. Kaypitaj kashan Salomonmanta aswan yachayniyoj. 32Ninivemanta runas jatarimonqanku juicio p'unchaypi, kunan tiempo runaswan, juchachanqankutaj; imaraykuchus Jonás predicajtinkama, Diosman kutirikorqanku; kaypitaj kashan Jonasmanta aswan kuraj.

Ñaweqa cuerpota k'anchaykun

(Mt 5.15; 6.22-23)

33Mana pipis pakanchu, k'ancha jap'ichisqata, nitaj wich'iwan k'umpuykunchu; manachayqa pataman churan, wasiman tukuy yaykojkuna k'anchayta rikunankupaj. 34Ñaweqata cuerpota k'anchaykun. Ñawiyki allin kajtenqa, tukuy cuerpoykipis k'anchayniyoj kanqa; ñawiyki mana allin kajtinrí, tukuy cuerpoyki laqhapi kanqa. 35Pajtataj qampi kaj k'anchay, laqhaman tukunman. 36Chayrayku, tukuy cuerpoykichus k'anchaywan junt'a kashan chayqa, ni ima laqhayaj kanqachu, tukuynin cuerpoykitaj k'anchayniyoj kanqa, imaynatachus uj k'anchaypa lliphipiynin k'anchaykusunki ajinata.

Jesús ch'atan fariseosta leymanta yachachejkunatawan

(Mt 23.1-36; Mr 12.38-40; Lc 20.45-47)

37Jesús parlayta tukojtintaj, uj fariseo wajyarqa, wasimpi paywan mikhunampaj. Wasinman yaykuspataj, mikhunampaj tiyaykorqa. 38Fariseotaj t'ukorqa rikuspa, Jesús ñaupajta makisninta mana mayllakusqanmanta mikhunampaj. 39Señortaj nerqa: Qankuna fariseosqa, vasojta, chuwajta ima jawallanta mayllankichej; ukhuykichejtaj suwanamanta, sajrata ruwanamantawan junt'a kashan. 40Wampus, manachu jawanta ruwajqa, ukhuntapis ruwallarqataj? 41Kapuyniykichejmanta wajchasman qoychej. Tukuy imaykichejtaj llimphu kanqa.

42Ay, qankunamanta fariseos! Qankunaqa diezmota qonkichej mentamanta, rudamanta, tukuy q'omerkunamantawan; Diospa cheqanchayninta, munakuynintawan qonqapunkichej. Kayta ruwana karqa, mana jaqayta saqespa.

43Ay, qankunamanta fariseos! Qankunaqa sinagogaspi ñaupajpipuni tiyayta munankichej, ajinallatataj callepipis napaykuchikuyta munankichej.

44Ay, qankunamanta leymanta yachachejkuna, fariseos puraj uyas! Qankunaqa mana rikukoj sepulturas jina kankichej; chay sepulturas patatataj runas purinku mana yachaspalla.

45Leymanta yachachejkunamanta ujnintaj, kutichispa nerqa: Maestro, kayta nispaqa, p'enqaypi rikhurichiwayku noqaykutapis.

46Paytaj kuticherqa: Ay, qankunamantapis leymanta yachachejkuna! Mana apay atina q'epista runaswan q'epichinkichej, qankunataj mana dedollaykichejwampis yanapaykurinkichejchu.

47Ay, qankunamanta, profetaspaj sepulturasta ruwajkuna; tatasniykichejtaj paykunata wañucherqanku! 48Qankunaqa, tatasniykichejpa ruwasqanta yachaspapis, walej ninkichej; paykunaqa cheqamanta profetasta wañucherqanku. qankunatajrí, sepulturasta paykunapaj ruwankichej.

49Chaynejta Diospa yachaynenqa nerqa: Noqa kachamusqaykichej profetasta, apostolesta ima; paykunatataj wakinta wañuchenqanku, wakintataj ñak'arichenqanku. 50-51Kay runaj mirayninmanta tukuy profetaspa yawarnin mañasqa kanqa, mayqenkunachus mundoj qallariyninmantapacha jich'arqanku, chayta; Abelpa yawarninmantapacha, Zacariaspa yawarninkama; pitachus templopi wañucherqanku altarnejpi. Arí niykichej, kay runaj mirayninmanta chay yawar mañasqa kanqa.

52Ay, qankunamanta leymanta yachachejkuna! Yachaypa llaventa jap'ikapojkuna. Qankuna mana yaykunkichejchu, yakojtapis jark'ankichej.

53-54Jesús kay imasta nejtintaj, leymanta yachachejkuna, fariseoswan phiñarikuspa, tukuy imamanta tapuraspataj parlananta munarqanku, imaymanamanta jap'iyta munaspa, ima nisqallampipis ch'ataykunankupaj.

Currently Selected:

SAN LUCAS 11: QCHSB

Highlight

Copy