SAN LUCAS 10

Jesús kachan qanchis chunkata

1Chaymanta qhepamantaj, Señorqa ajllallarqataj qanchis chunka [iskayniyoj] runasta. Paykunatataj iskaymanta iskay kacharqa, paypa ñaupaqenta rinankupaj tukuy llajtasman, ranchosman ima, maykunamanchus rinan karqa chaykunaman.

2Jesustaj nerqa: Cheqamanta cosechanaqa ashkha, oqharejkunataj pisi. Mañakuychej Señormanta astawan oqharejkunata cosechanman kachamunampaj. 3Riychej ari, noqa kachashaykichej corderosta jina atojkunaj chaupinman. 4Ama apaychejchu qolqe churanata, wayaqata, nitaj ujut'astapis. Ama pitapis napaykuychejchu ñanta rishaspaqa. 5Mayqen wasiman yaykuspapis, ñaupajta napaykuychej: Sonqo tiyasqa kay kachun kay wasipi, nispa. 6Chaypitajchus sonqo tiyasqa runa kanman chayqa, napaykusqaykichej paypi samakonqa. Mana chayrí, qankunaman kutimponqa. 7Chay wasipi qhepakuychej mikhuspa, ujyaspa imatachus qosusqaykichejta. Llank'aj runaqa pagoyoj kanan tiyan. Amataj wasimanta wasi puriychejchu. 8May llajtallamampis yaykojtiykichej, wajyarisunkichejmantaj chayqa, mikhuychej imatachus jaywarisunkichej chayta. 9Chaypi onqosqas kajkunata thañichiychej, niychejtaj: Qankunaman Diospa reinon qayllamunña, nispa. 10-11Sichus may llajtaman yaykojtiykichej mana wajyarisunkichejmanchu chayqa, callesman llojsispa niychej: Llajtaykichejmanta chakisniykuman jallp'a k'askajtapis contraykichejpi thalarakuyku. Chantapis yachaychej, qankunaman Diospa reinon qayllamusunkichejña. 12Chaynejta niykichej: Jaqay juicio p'unchaypeqa, Sodoma llajtaraj aswan pisita ñak'arenqa chay llajtamanta nisqaqa.

Mana kasukoj llajtas

(Mt 11.20-24)

13Ay, qanmanta Corazín llajta! Ay, qanmantapis Betsaida llajta! Sichus Tiropi, Sidompi ima, milagros ruwakunman karqa qankuna ukhupi jina chayqa, maypachaña chaypi tiyakojkunaqa Diosman kutirikunkuman karqa, ushpharara qhashqa p'achata churakuspa. 14Chaynejta niykichej: Juicio p'unchaypeqa, aswan pisi ñak'ariy kanqa Tiropaj, Sidompaj ima, qankunamanta nisqaqa. 15Qanrí, Capernaum llajta! Cielokama oqharisqachu kayta munanki? Qanqa infiernokama uraykunki.

16Pichus qankunata uyarejqa, noqata uyariwan; pitajchus qankunata qhesachajqa, noqata qhesachawan; noqata qhesachawajrí, kachamuwajniyta qhesachan.

Kachasqas kutimunku

17Qanchis chunka iskayniyoj kachasqa kusisqas kutimorqanku, nerqankutaj: Señor, supaykunapis kasuwayku sutiykipi.

18Paytaj nerqa: Noqaqa supayta rikorqani, lliuj lliuj jina cielomanta urmamojta. 19Kunanqa atiyta qoykichej, catarista, atoj atojkunatapis sarunaykichejpaj; enemigoj tukuy kallpantapis atipanaykichejpaj; manataj imapis imanasonqachejchu. 20Chaywampis, ama kusikuychejchu supaykuna kasusojtiykichej, astawanqa kusikuychej janaj pachapi sutiykichej escribisqa kasqanmanta.

Jesús kusikun

(Mt 11.25-27; 13.16-17)

21Chay kikimpachataj, Jesusqa Santo Espiritunejta may kusisqa kaspa nerqa: Tatáy, janaj pachajta kay pachajtawan Señornin, yupaychayki kay imasta pakasqaykimanta, yachayniyojkunamanta yuyayniyojkunamantawan; wawasmantaj kay imasmanta willasqaykimanta. Arí Tatáy, ajinata qanqa munarqanki.

22Tukuy imata Tatay qowarqa. Mana pipis yachanchu pichus Churi kasqanta. Chaytaqa Dios Tatalla yachan. Nitaj pipis yachanchu pichus Tata kasqanta, manachayqa Churilla yachan; pimantajchus Churi rejsichiyta munan chaylla.

23Yachachisqasninman kutirispataj, wajnejpi sapankupi nerqa: Kusikuyniyoj kanku imastachus rikusqaykichejta rikojkunaqa. 24Ashkha profetas, reyes ima rikuyta munarqanku qankunaj rikusqaykichejta, manataj rikorqankuchu; uyarisqaykichejtapis uyariyta munarqanku, nillataj uyarerqankuchu.

Samaritanoj allin ruwasqan

25Chantá uj runa leymanta yachachej, Jesusman qayllaykuspa pantachiyta munaspataj, taporqa: Maestro, imata ruwaspataj wiñay kausayniyoj kasajri?, nispa.

26Paytaj nerqa: Imataj leypi escribisqa kashan? Imatataj leenki?

27Paytaj kuticherqa: Señor Diosniykita munakunki tukuy sonqoykiwan, tukuy almaykiwan, tukuy kallpaykiwan, tukuy yuyayniykiwan ima; runa masiykitataj qan kikiykita jina munakunki.

28Jesustaj nerqa: Allinta kutichinki, ajinata ruway, kausankitaj, nispa.

29Paytaj allinman rijch'ayta munaspa kuticherqa: Pitaj runa masiyri?, nispa.

30Jesustaj nerqa: Uj runa, Jerusalenmanta Jericoman uraykushaspa, suwaspa makinman urmarqa. Tukuy imanta, p'achantawan qhechuspataj, suwasqa sumaj maqasqata, parte wañusqatataj saqerparerqanku. 31Chantá uj sacerdote chay ñannejta uraykushallarqataj, rikuspataj pasapullarqa. 32Jinallatataj, uj levita chay qayllanta rej jina, rikuspa pasallarqataj. 33Chantá uj samaritanoñataj chaynejta rishaspa, qayllaykorqa, rikuspataj mayta khuyarqa. 34Nanasqasninta jampiykorqa aceitewan, vinowan ima. Chantá, animalninman wicharichispa tamboman pusarqa, chaypitaj allinta qhawacherqa. 35Q'ayantintaj samaritanoqa, manaraj ripushaspa iskay denario qolqeta orqhokuspa tamboyojman pagarqa: Qhawaripuway kay onqosqata, tukuy gastasqaykitataj kutimuspa qopusqayki, nispa. 36Kunanqa niway: Kay kinsamanta mayqentaj rijch'asunki runa masin kasqanta, chay suwaswan ch'allpachikojpatari?

37Paytaj nerqa: Mayqenchus khuyakorqa, chay.

Jesustaj nerqa: Riy, chay kikinta qampis ruwamuy, nispa.

Jesús watukun Martata Mariatawan

38Ñanta rishaspallapuni, Jesús chayarqa uj ranchoman. Chaypitaj uj warmi Marta sutiyoj wasinman wajyakorqa. 39Martajtataj uj ñañan karqa María sutiyoj; paytaj Jesuspa ñaupaqenman tiyaykuspa yachachisqanta uyarej. 40Martaqa ashkha ruwanasninwan musphasharqa, chaynejta Jesusman qayllaykuspa nerqa: Señor, manachu rikunki ñañay mana ruwaysiwasqanta? Niy ari yanapanawanta.

41Jesustaj kuticherqa: Marta, Marta, ancha uma muyusqa kashanki; musphashankitaj chay chhika ruwanaswan. 42Ujllamin aswan walejqa. Mariaqa ajllakun allin kajta. Chaytaqa mana pipis qhechonqachu.

Currently Selected:

SAN LUCAS 10: QCHSB

Highlight

Copy