SAN LUCAS 9

Jesús kachan yachachisqasninta

(Mt 10.5-15; Mr 6.7-13)

1Jesustaj chunka iskayniyoj yachachisqasninta tantaykuspa, paykunaman atiyta qorqa, kamachiytawan; tukuy laya sajra espiritusta wijch'unankupaj, onqosqastapis thañichinankupaj. 2Chantá kacharqa Diospa reinonmanta predicajta, onqosqastataj thañichejta. 3Nerqataj: Ama imatapis ñan puriypaj apakuychejchu, ni tojnuta, ni wayaqata, ni t'antata, nitaj qolqeta, nillataj iskay p'achastapis. 4Mayqen wasiman yaykuspapis, chaypi kakuychej ripunaykichejkama. 5Mayllapipis mana wajyarisojtiykichejqa, ripuychej chay llajtamanta, chakisniykichejmanta jallp'ata thalarakuspa; ajinamanta sajra kasqankuta yachanankupaj.

6Chaymanta llojsispataj, rerqanku tukuy ranchosta, salvacionmanta willaspa, tukuynejpitaj onqosqasta thañichispa.

Juan Bautistaj wañuyninmanta

(Mt 14.1-12; Mr 6.14-29)

7Kamachej Herodesqa, tukuy imasta Jesús ruwasqanta yachaspa, mana imanakuyta aterqachu, imaraykuchus wakinkuna nisharqanku: Juan Bautista kausarimun wañusqakunamanta, nispa. 8Wajkunataj, profeta Elías ujtawan rikhurimun, nerqanku. Wajkunatajrí nerqanku: Mayqen ñaupa profetachá kausarimun, nispa. 9Herodestaj nerqa: Juantaqa noqa umanta qholucherqani; pitaj kay kanmanri, chay jinatapuni kay imasta paymanta uyarinaypajri?

Chaynejta Herodesqa, payta rikuytapuni munasharqa.

Jesús phishqa waranqa runasman mikhuchin

(Mt 14.13-21; Mr 6.30-44; Jn 6.1-14)

10Kutipuspataj apostolesqa Jesusman willarqanku tukuy imata ruwasqankumanta. Paykunata pusarikuspataj, Jesusqa Betsaida llajtapi uj ch'innejman rerqa. 11Runakunarí qhaterqanku chayta yachaspa; paykunamantaj Diospa reinonmanta parlarqa. Onqosqastataj thañicherqa.

12Inti yaykuynejtataj, chunka iskayniyoj apostolesnin qayllaykuspa nerqanku: Kachapullayña runasta, ripuchunku kay muyuypi ranchosman, wasisman ima wajyachikunankupaj, mikhunatapis rantikamunankupaj, imaraykuchus kaypeqa ch'impi kashanchej.

13Paytaj kuticherqa: Qankuna qoychej ari mikhunataqa.

Paykunataj kuticherqanku: Phishqa t'antawan, iskay challwallawan kapuwayku; noqayku riykuman chaypuni chay chhika runapaj mikhunata rantej.

14Tukuyninkupitaj, phishqa waranqa jina qharis karqanku. Jesustaj nerqa yachachisqasninman: Runasta tiyaykuchiychej phishqa chunkamantakama.

15Ajinata ruwarqanku, tukuyninkuta tiyaykuchispa. 16Jesustaj chay phishqa t'antasta, iskay challwasta ima makimpi jap'ispa, patata qhawarispa Diosman graciasta qorqa. Partispataj jaywarqa yachachisqasninman runasman rak'inankupaj. 17Tukuyninku mikhorqanku, sajsakorqankutaj. Puchoj t'antastataj oqharerqanku chunka iskayniyoj canastapi.

Pedro nin Jesusqa Cristo kasqanta

(Mt 16.13-19; Mr 8.27-29)

18Uj kuti, Jesús mañakusharqa Diosmanta karunejpi. Paywan kasharqanku chay yachachisqasnin. Qayllaykojtinkutaj taporqa: Runasqa pi kasqaytataj ninkuri?, nispa.

19Paykunataj kuticherqanku: Wakenqa ninku Juan Bautista kasqaykita. Wakintaj, Elías nisunku. Wakintajrí, mayqen profetachá kausarimpun, nisunku.

20Paytaj nerqa: Qankunarí, pi kasqaytataj ninkichej?

Pedrotaj kutichispa nerqa: Qanqa Diospa Criston kanki.

Wañuyninmanta Jesús willan

(Mt 16.20-28; Mr 8.30–9.1)

21-22Chantá Jesusqa allinta kamacherqa amapuni kayta ni piman willanankuta, nispa: Runaj Churenqa anchata ñak'arinan tiyan, qhesachanqankutaj kuraj runas, jatun sacerdotes, leymanta yachachejkuna ima. Wañuchenqanku, kinsa p'unchayninmantaj kausarimonqa.

23Tukuy runamantaj nerqa: Pillapis qhepayta jamuyta munajqa, pay kikinta qhesachakuchun; cruzninta oqharispataj sapa p'unchay qhatiwachun. 24Tukuy kausayninta salvayta munajqa chinkachenqa; pichus kausayninta noqarayku chinkachejtajrí, salvanqa. 25Ima allintaj kanman runapaj, sichus mundontin paypata kanman, kausaynintataj chinkachinman chayri? 26Pillapis noqamanta, palabrasniymantawan p'enqakunman chayqa; paymantapis Runaj Churenqa p'enqakullanqataj, maypachachus lliphipej k'anchaynimpi jamuspa, chantá Tatampa k'anchaynimpiwan, ajllasqa angelespapiwan. 27Cheqamanta niykichej: Kaypi kajkunamanta wakenqa mana wañonqankuchu, Diospa reinonta rikunankukama.

Jesús waj jinaman tukun

(Mt 17.1-8; Mr 9.2-8)

28Kay nisqanmanta pusaj p'unchayninmantaj, Jesús wicharerqa orqoman Diosmanta mañakoj, pusariykukuspa Pedrota, Santiagota, Juantawan. 29Jinapi Diosmanta mañakushajtin, uyampa rijch'aynin waj jinaman tukorqa; p'achampis yuraj lliphipejman tukorqa. 30Iskay qharis rikhurimuspa parlasharqanku Jesuswan; paykunaqa karqanku Moisés, Eliaswan. 31K'anchay ukhupitaj Jerusalempi Jesús wañunanmanta parlasharqanku. 32Pedro, paywan kajkuna ima, puñuywan atichikushaspapis mana puñorqankuchu; rikorqankutaj Jesuspa k'anchayninta, chay iskay runas Jesuswan kajkunatawan. 33Moiseswan, Eliaswan karunchakusqankutawantaj, Pedro nerqa Jesusman: Maestro, walej kanman kaypi qhepakunanchej. Kinsa ch'ujllasta ruwasqayku: Ujta qampaj, ujta Moisespaj, ujtataj Eliaspaj.

Chayta parlarqa, imatachus nisqanta mana yachaspa. 34Jinata parlanankamataj, phuyoqa paykunata pakaykorqa; mancharerqankutaj chay phuyu ukhupi rikhurispa. 35Phuyu ukhumantataj, Dios Tataj nisqan uyarikorqa: Kaymin munasqa Chureyqa, payta uyariychej.

36Chay parlamoj ch'inyapojtintaj, Jesusllataña rikorqanku. Ch'intaj paykunaqa kakorqanku, rikusqankumanta mana piman imatapis willaspa.

Supayniyoj waynata Jesús thañichin

(Mt 17.14-21; Mr 9.14-29)

37Q'ayantintaj, orqomanta uraykamusqantawan, ashkha runas payta taripaj jamorqanku. 38Paykunaj chaupinmantataj, uj runa qhaparispa nerqa: Maestro, qhawaripuway kay wawayta. Pay k'atalla kapuwan. 39Supaytaj jap'in, qhaparichintaj; sinch'ita thalaspataj siminmanta phosoqota ajtuchin. Mana kachariyta munaspa ñak'arichin. 40Nerqani yachachisqasniykita supayta qharqonankuta, manataj aterqankuchu.

41Jesús kuticherqa: Ay, mana feniyoj sajra runaj miraynin! Mayk'ajkamataj qankunawan kasajri? Kayman pusamuy chay wawaykita.

42Wayna qayllaykushajtintaj, supayqa chhallmaspa pampaman urmacherqa. Jesustaj k'amerqa sajra espirituta, waynataj thañikaporqa; tatanmantaj Jesusqa waynata kutichiporqa. 43Tukuy runastaj t'ukorqanku, Diospa chay jina jatun atiyninmanta.

Jesús ujtawan willan wañuyninmanta

(Mt 17.22-23; Mr 9.30-32)

Chay jina kashajtinkutaj Jesusqa yachachisqasninman nerqa: 44Allinta uyarichej kayta, amataj qonqaychejchu. Runaj Churinta enemigosnin runaswan jap'ichenqanku.

45Paykunataj mana entienderqankuchu kay nisqantaqa, imaraykuchus paykunapajqa mana sut'ichu karqa, manchachikorqankutaj tapukuytapis.

Pitaj aswan kurajri?

(Mt 18.1-5; Mr 9.33-37)

46Chaymantataj, churanakuyta qallarerqanku, mayqenninkuchus kuraj kananmanta. 47Sonqonkupi yuyasqankuta yachaspataj, Jesusqa uj wawata oqharispa ladonman sayacherqa. 48Nerqataj: Pillapis kay wawata sutiypi jap'ejqa, noqata jap'iykuwan; jinallatataj, noqata jap'iwajpis kachamuwajniyta jap'in. Qankunamanta aswan juch'uy kajqa aswan jatun kanqa.

Mana contranchejpi kajqa noqanchejwan

(Mr 9.38-40)

49Juantaj kutichispa nerqa: Maestro, uj runata rikuyku sutiykipi supaykunata qharqojta. Paytataj jark'arqayku qharqonanta, mana noqanchejwan kasqanrayku.

50Jesustaj nerqa: Ama jark'aychejchu. Pichus mana contranchejpi kajqa noqanchejwan kashan.

Jesús k'amin Santiagota Juantawan

51Jesusqa janaj pachaman rinan tiempo qayllamojtin, kallpachakorqa Jerusalenman rinampaj. 52Kachastataj ñaupacherqa, paykunataj rerqanku Samariapi uj ranchoman uraykamunampaj wakichipunankupaj. 53Manataj samaritanosqa uyariyta munarqankuchu, Jerusalenman rishasqanta yuyaspa. 54Yachachisqasnin Santiagowan, Juanwantaj kayta rikuspa, nerqanku: Señor, munankichu kamachinaykuta cielomanta nina uraykamuspa paykunata q'olananta; [imaynatachus Elías ruwarqa ajinata?]

55Kutirispataj paykunata k'amerqa: [Qankunaqa mana yachankichejchu ima espiritumantachus kasqaykichejta.] 56[Runaj Churenqa, mana runaspa kausayninkuta chinkachejchu jamun, manachayqa salvaj.] Chaymantataj waj ranchoman riporqanku.

Jesuswan riyta munajkuna

(Mt 8.19-22)

57Rishaspataj, ñampi ujnin nerqa: Señor, qanta qhatisqayki maymanchus rishanki chayman. 58Jesustaj nerqa. Atojkunajtaqa qaqapi jusk'usnin tiyan, p'isqospis thapasniyoj; Runaj Churimpatarí, mana maypi umanta churaykuspa samarikunallampajpis kanchu.

59Wajmantaj nerqa: Qhatiway.

Paytaj kuticherqa: Señor, ñaupajtaqa tataytaraj p'ampaykamusaj ari, nispa.

60Jesustaj payman nerqa: Saqey wañusqas wañusqasninkuta p'ampajta; qantaj rispa Diospa reinonmanta willamuy.

61Chantá ujpis nillarqataj: Noqaqa qhatisqayki Señor, chaypajrí saqeway ari wasiypi kacharpayata ruwamunaypaj.

62Jesustaj payman nerqa: Pillapis, llank'ashaspa aradoj manceranta jap'ispaña qhepata qhawajqa, mana Diospa reinompaj jinachu.

Currently Selected:

SAN LUCAS 9: QCHSB

Highlight

Copy