SAN LUCAS 14

Punkisqa runata Jesús thañichin

1Samakuna p'unchaypi Jesús mikhoj yaykorqa uj kamachej fariseojman, wakin fariseostaj wateqasharqanku. 2Chaypitaj uj runa kasharqa Jesuspa ñaupaqempi, yaku punkiywan. 3Chantá Jesús parlarqa leymanta yachachejkunaman, fariseosman ima, nispa: Atikunmanchu thañichina samakuna p'unchaypi?

4Paykunataj ch'inlla karqanku. Onqosqatataj thañicherqa makinmanta jap'irispa; chaymantataj kachaporqa. 5Paykunamantaj nerqa: Mayqenniykichejtaj qankunamanta, wawan, chayrí wakan pujyuman urmaykojtin, manachu kikimpacha orqhonman, samakuna p'unchay kajtimpis?

6Manataj kutichiyta aterqankuchu chay nisqanman.

Casamientoman wajyasqas

7Jesustaj qhawasharqa imaynatachus wajyasqas ñaupajpi kaj tiyanasta ajllarakusqankuta; paykunamantaj yachacherqa kay rijch'anachinata: 8Casamientoman wajyasqa kaspaqa, ama ñaupajpi tiyaykuychu, pajtataj wajpis qanmanta aswan kuraj wajyasqallataj kanman. 9Chantá iskayniykichejta wajyajtaj nisunkichejman: Chay tiyanata payman qoy. Qantaj p'enqayta qhepanejman tiyaj riwaj. 10Chayrayku wajyasqa kaspaqa, qhepanejpi tiyakuy; wajyasojniyki jamuspa nisunampaj: Kausaqéy, aswan ñaupajpi tiyakamuy. Ajinapeqa allimpi rikhurinki, tukuy qanwan khuska wajyasqaspa ñaupaqempi. 11Pillapis jatunchakojqa p'enqachisqa kanqa, k'umuykojtaj jatunchasqa kanqa.

12Wajyajmampis Jesús nillarqataj: Jayk'ajllapis almuerzota chayrí cenata wakichispaqa, ama wajyakunkichu kausaqesniykita, nitaj wauqesniykita, nitaj ayllusniykita, nitaj qhapaj llajta masisniykitapis; pajtataj paykuna kikillantataj kutichisunkuman. 13Jatun mikhuyta wakichispaqa, wajyakuy wajchasta, ñuk'usta, cojosta, ciegosta ima. 14Chaywanqa aswan kusikuyniyoj kanki; imaraykuchus paykunaqa mana kutichipusuyta atenqankuchu; cheqan runaspa kausarimuynillampiña t'inkaykita jap'ikapunki.

Jatun mikhunamanta rijch'anachina

(Mt 22.1-10)

15Kayta uyarispa mesaman tiyaykojkunamanta ujnin kaj nerqa Jesusman: Kusikuyniyoj kanqa Diospa reinompi mikhojqa.

16Chaymantataj Jesús kuticherqa: Uj wiraqochi wakicherqa manchay jatun mikhuyta, ashkha runastataj wajyarqa. 17Mikhunankuña kashajtintaj, ujnin kamachinta kacharqa wajyasqasninman willamojta: Jamullaychejña usqhayta, imaraykuchus tukuy ima sumaj wakisqaña, nispa. 18Tukuyninku, ujmanta uj, mana riyta munaspa nerqanku payman: Ñaupaj kajqa qallarerqa nispa: Noqaqa kunallan jallp'ata rantikuni, rinay tiyan watukoj; ama jinachu kay, saqerillaway rejta. 19Qhepan kajtaj nerqa: Phishqa yunta rantisqayta llank'arichimunayraj tiyan; manaraj riyta aterqoymanchu. 20Chay ujnintaj nillarqataj: Kunallanraj casarakuni, chaynejta mana atinichu noqaqa, nispa. 21Kamachitaj kutimuspa willarqa kay tukuyta patronninman. Phiñakuspataj payqa nerqa kamachinman: Riy usqhayta kay llajtaj plazasninta, callesninta ima; pusaramuytaj tukuy wajchasta, ñuk'usta, ciegosta, cojosta ima. 22Kamachitaj kutimuytawan nerqa: Señor, nisqaykiman jina ruwani; chaywampis mesapi tiyanas kanraj. 23Chantataj patrón nerqa: Jina kajtenqa, riy tukuy chaki ñankunasman, jatun ñankunaman ima, usqhay usqhaytataj pusaramuy wajkunata, wasiy junt'a kanampaj. 24Noqaqa niykichej, wajyasqasmantaqa mana pipis llamenqachu mikhunaymanta.

Cristowan purinaqa ñak'arinamin

(Mt 10.37-38)

25-26Ashkha runas qhatisharqanku Jesusta, paykunaman kutirispataj nerqa:

Mana pipis yachachisqay kayta atinmanchu manachus ñaupajta pay tatanta, mamanta, warminta, wawasninta, wauqesninta, panasninta, kausaynintapis chejnenqa chayqa. 27Mana cruzninta oqharispa qhepayta jamonqa chayqa, mana yachachisqay kayta atinchu. 28Mayqennillaykichejpis uj torreta ruwayta munanman chayqa, manachu payqa tiyaykukuspa ñaupajta qhawarinman, qolqen kapunchus manachus chayta, torreta tukuychanankama? 29-30Manachayqa asipayachikunman tukuy runa rikojkunawan, cimientota churaspaña mana tukuychayta atinman chayqa; nispa: Kay runaqa, torreta qallariyta yachasqa, tukuychaytarí manataj atinchu. 31Jinallatataj, pi reypis guerraman waj reywan yaykunampajqa, manachu qhawarikunraj, atenqachus manachus tinkuyta chunka waranqallawan kaspa; chay ujnintaj iskay chunka waranqawan jamushajtin? 32Mana tinkuyta atispataj, karullapiraj chay ujnin kashajtin, kachaswan parlapayachin, allinyakapunampaj. 33Jinata ari, pillapis qankunamanta, tukuy tiyapusqanta mana saqejqa, mana yachachisqay kayta atinmanchu.

Kachi q'aymayajtin

(Mt 5.13; Mr 9.50)

34Kacheqa sumaj; q'aymayanmantajchus chayqa, imawantaj kachinchakonqa? 35Mana allinñachu jallp'apajqa, nitaj wanupajpis, manachayqa wijch'unallapajña. Uyariychej kayta, ningrisniyoj kaspaqa.

Currently Selected:

SAN LUCAS 14: QCHSB

Highlight

Copy