SAN LUCAS 13

Diosman kutirikuychej

1Chaypachallataj wakin runas Jesusman qayllaykorqanku, willarqankutaj payman Galilea llajtayoj runasmanta, imaynatachus paykunaj yawarninta Pilato chajrusqanta sacrificio yawarwan. 2Kutichispataj Jesús nerqa: Yuyankichejchu chay galileos ajinata ñak'arisqankurayku, chay tukuynin galileosmanta astawan juchasapas kasqankuta? 3Niykichej mana jinachu kasqanta; manachus qankuna Diosman kutirinkichej chayqa, qankunapis tukukullankichejtaj. 4Chayrí, jaqay chunka pusajniyoj runas, pikunatachus Siloepi torre urmaykuspa wañuracherqa, yuyankichejchu paykuna aswan juchasapas kasqankuta Jerusalempi tiyakojkunamanta? 5Nillaykichejtaj mana jinachu kasqanta; manachus Diosman kutirinkichej chayqa, ajinallatataj qankunapis tukukunkichej.

Mana poqoj higo sach'a

6Nillarqataj uj rijch'anachinata: Uj runajta uj higo sach'an karqa uvas huertampi; poqoyninta pallaj rispataj, mana poqoyniyojta tariparqa. 7Chantá huerta qhawajninman nerqa: Kinsa watataña jamuni kay sach'api higosta mask'aj, manataj poqoyta tarinichu; urmarparichiy ari; imapajtaj qhasi mana qajta jallp'ata usuchenqa? 8Qhawajnintaj nerqa: Patrón, manachu kay watatawan kallanmanraj? Muyuyninta allayman, wanutataj churayman. 9Poqonqa chayqa allin kanqa; manapuni poqojtinrí, k'utuchipunki, nispa.

Samakuna p'unchaypi uj warmita thañichin

10Uj sinagogapi Jesús yachachisharqa samakuna p'unchaypi. 11Chaypitaj uj warmi kasharqa. Payqa k'umullamantaña purej. Nitaj imaynamanta cheqanyakuyta atejchu, chunka pusajniyoj watataña sajra espíritu onqochisqanrayku. 12Rikuytawantaj Jesusqa wajyaspa nerqa: Warmi, onqoyniykimanta kacharisqaña kanki.

13Makisninta patanman churaykorqa; kikimpachataj warmeqa cheqanyakuspa Diosta yupaycharqa. 14Sinagogapi kuraj runataj phiñakorqa, Jesús samakuna p'unchaypi chay warmita thañichisqanmanta; runakunamantaj nerqa: Sojta p'unchay tiyan imallatapis ruwanapaj; chaykunapi jamuychej jampichikoj, ama samakuna p'unchaypeqa.

15Señortaj payman kuticherqa: Puraj uyas! Manachu sapa ujniykichej samakuna p'unchaypi, uywa kanchamanta wakaykichejta, chayrí burroykichejtapis phaskaraspa yakuta ujyachimunkichej? 16Abrahampa kay warmi wawantaqa, manachu samakuna p'unchaypi phaskarana karqa, chunka pusajniyoj watataña onqoywan supay watasqanmanta?

17Chay imasta Jesús nisqanraykutaj, tukuy payta chejnejkuna p'enqaypi rikhurerqanku; chaywampis, runasqa kusikorqanku tukuy jatuchaj imasta Jesús ruwasqanrayku.

Mostaza mujumanta

(Mt 13.31-32; Mr 4.30-32)

18Jesustaj nerqa: Imamantaj rijch'akun Diospa reinonri, imamantaj rijch'achiymanri? 19Rijch'akun ari uj mostaza mujuman, mayqentachus uj runa jallp'ampi tarporqa chayman, wiñarqataj sach'ayanankama; p'isqospis thansasnimpi thapachakorqanku.

Levaduramanta

(Mt 13.33)

20Ujtawan Jesús nillarqataj: Imamantaj rijch'achisaj Diospa reinontari? 21Rijch'akun ari levaduraman, mayqentachus uj warmi, kinsa tupu jak'uman chajruykun, tukuynin masataj poqon, chayman.

K'ullku punku

(Mt 7.13-14, 21-23)

22Jesús llajtanejta, ranchosnejta ima yachachispa Jerusalenman risharqa. 23Uj runataj nerqa: Señor, pisischu kanku salvakojkunaqa?, nispa.

Paytaj kuticherqa: 24K'ullku punkunejta yaykunaykichejpaj kallpakuychej; imaraykuchus ashkhas munanqanku yaykuyta, manataj atenqankuchu. 25Wasiyoj jatarikuspa punkuta wisq'ajtinña, qankunaqa jawapi rikhurispa punkuta takankichej: Señor, kichaririwayku!, nispa. Kutichispataj nisonqachej: Mana rejsiykichejchu maymantachus kasqaykichejta. 26Chaypacharaj qankunaqa qallarinkichej niyta: Qanwan khuska mikhorqayku, ujyarqaykutaj; plazasniykupipis yachacherqanki. 27Chantá nillasonqachejtaj: Mana yachanichu maymantachus kasqaykichejta. Riychej kaymanta tukuy sajrata ruwajkuna. 28Chaypimá waqayqa, kiru k'arukuypis kanqa. Chaypacha rikunkichej Abrahamta, Isaacta, Jacobta, tukuy profetastawan Diospa reinompi; qankunataj t'aqasqas qhepakunkichej. 29Runas jamonqanku inti llojsimuynejmanta, inti yaykuynejmanta, patanejmanta, uranejmanta ima. Mikhojtaj tiyaykonqanku Diospa reinompi. 30Qhawaychej, qhepapi kajkuna ñaupajpi rikhurenqanku; ñaupajpi kajkunataj qhepapi.

Jesús waqan Jerusalenmanta

(Mt 23.37-39)

31Chay p'unchayllapitaj fariseos chayamorqanku, Jesusman nej: Llojsiy, ripuy kaymanta, Herodes wañuchiyta munashasunki, nispa.

32Jesustaj kuticherqa: Rispa willamuychej jaqay atojman. Noqaqa supaykunata qharqoni, onqosqastataj thañichini kunan, q'ayapis; minchhataj tukusaj ruwanayta. 33Chaywampis purinayraj tiyan kunan, q'aya, minchhatawan. Profetaqa mana wañuyta atinmanchu Jerusalenmanta jawapeqa.

34Jerusalén, Jerusalén, profetasta wañuchej llajta; qanman kachamusqastapis rumiswan ch'anqarqanki! Mashkha kutita, wawasniykita tantayta munarqani, imaynatachus wallpa chillwisninta lijrasnin uraman tantaykun ajinata, qantaj mana munarqankichu! 35Qhawariychej, wasiykichejqa ch'impacha qhepakonqa; kunantaj niykichej: Manaña ujtawan rikuwankichejchu: Kausachun Señorpa sutimpi jamojqa, ninaykichejkama.

Currently Selected:

SAN LUCAS 13: QCHSB

Highlight

Copy