SAN LUCAS 20

Jesuspa atiynin

(Mt 21.23-27; Mr 11.27-33)

1Uj p'unchay Jesús templopi yachachisharqa runasman, evangeliomanta willaspa. Jinallapi chayamorqanku jatun sacerdotes, leymanta yachachejkuna, kurajkunawan ima. 2Jesusmantaj nerqanku: Niwayku ari, ima atiywantaj qan kay imasta ruwanki? Chayrí, pitaj kay atiyta qosunki?

3-4Kutichispataj nerqa: Kunanqa, noqapis ujta tapurillasqaykichejtaj; kutichiwaychej: Juampa bautismonqa Diosmantachu, chayrí runasmantachu?

5Chaypacha paykunapura siminakuyta qallarerqanku, nispa: Janaj pachamanta nisunman chayqa, payqa niwasun. Jina kajtenqa, imaraykutaj Juanta mana creerqankichejchu?, nispa. 6Runasmanta nisunman chayrí, tukuy llajtantinñataj rumiswan ch'anqawasunman, imaraykuchus paykunaqa Juanta profetapaj rejserqanku. 7Runastaj kuticherqanku, mana yachaykuchu, Juampa bautismonqa maymantachus kampis, nispa. 8Chaymantataj Jesús nerqa: Nillataj noqapis niykichejmanchu ima atiywanchus kay tukuy imata ruwasqayta.

Sajra llank'ajkunamanta

(Mt 21.33-44; Mr 12.1-11)

9Runakunaman Jesús parlayta qallarerqa kay rijch'anachinamanta: Uj kuti, uj runa karqa. Paytaj uvasta plantarqa jallp'ampi. Llank'ajkunaman arriendaspataj ch'usarqa unaypaj. 10Uvas pallay tiempotataj, kachamorqa uj kamachinta, patrompata kajta mañanankupaj llank'ajkunamanta; paykunataj maqaykuspa ch'usajpachata kachaporqanku. 11Chantá patronqa waj kamachintañataj kacharqa. Chay kajtapis, asipayaykuytawan maqaspa kachapullarqankutaj ch'usajpachata. 12Kinsa kaj kamachintañataj patronqa kacharqa; chay kamachintapis llank'ajkunaqa qharqollarqankutaj, yawar puruta maqaykuspa.

13Chantá uvas huertayojqa nerqa: Imanasajtaj kunanri? Munasqa wawaytañataj kachasaj; ichapis paytaqa respetanqanku. 14Chaywampis llank'ajkunaqa, paykuna yachachinakuspa nerqanku: Kayqa chayaqeta jap'ej runa; wañuchinachej ari, noqanchejpajtaj chayaqe qhepakunampaj, nispa. 15Chantá, chajramanta jawaman orqhoytawan wañurparicherqanku.

Chaymantataj, Jesús taporqa paykunata: Imananqataj llank'ajkunata uvas huertayojri? 16Jamonqa ari, wañurkachenqataj chay llank'ajkunata. Jallp'antataj waj llank'ajkunaman qonqa.

Chayta uyarispataj nerqanku: Ama chaytaqa Dios munallachumpischu!

17Jesustaj qhawarispa nerqa: Ima niytataj munan kay escribisqari: Wasi ruwajkunaj qhesachasqanku rumeqa, wasi esquina rumi kapun, nispari? 18Pillapis chay rumi pataman urmaykojqa, t'unasqa kanqa; chantá pejpa patanmanchá chay rumi urmaykuspapis, phirita ruwanqa.

Impuestomanta

(Mt 21.45-46; 22.15-22; Mr 12.12-17)

19Jatun sacerdotes, leymanta yachachejkuna ima Jesusta chay kikimpi jap'iykuyta munarqanku. Paykunaqa umachakorqanku contrankuta nisqanta chay rijch'anachinawan; chaywampis manchachikorqanku runasta.

20Chantá Jesusta wateqaspa, allinman tukoj puraj uyasta kacharqanku; jinamanta Jesusta, ima parlasqallampipis jap'ispa, kamachejpa atiyninman entregaykunankupaj. 21Paykuna taporqanku: Maestro, yachayku allinta nisqaykita, cheqantataj yachachisqaykita; manataj runaj rijch'asqanman jinachu ruwanki; chantapis Diospa ñanninta cheqata yachachinki. 22Ima ninkitaj: Allinchu kanman impuestota Cesarman qona, manachu?

23-24Jesustaj paykunaj sajra yuyayninkuta yachaspa, nerqa: Rikuchiwaychej uj qolqeta. Pejpa uyantaj, chantá pejpa sutintaj?, nispa.

Paykunataj nerqanku: Cesarpata, nispa.

25Chantá Jesús paykunaman nerqa: Jina kajtenqa, Cesarpata kajtaqa Cesarman qopuychej; Diospata kajtataj Diosman.

26Manataj imaynamantapis parlasqampi pantachiyta aterqankuchu runaspa ñaupaqempi; astawanqa t'ukorqanku kutichikusqanmanta, ch'inyarqankutaj.

Kausarimuymanta tapunku

(Mt 22.23-33; Mr 12.18-27)

27-28Chaymantataj, wakin saduceos rerqanku Jesuswan parlaj. Saduceosqa mana creerqankuchu wañusqakunamanta kausarimuy kasqanta; Jesustataj taporqanku, nispa: Maestro, noqaykupajqa Moisés escribisqata saqerqa: Sichus pi runapis wañupuspa warminta saqen mana wawasniyojta chayqa, wauqen casarachun chay viudawan, wañoj wauqempa miraynin rikhurinampaj. 29Qanchis wauqes karqanku; ñaupaj kajqa casarakuspa mana wawasniyoj wañuporqa. 30Qhepa kaj casarakullarqataj chay viudawan. Paypis wañupullarqataj mana wawasniyoj. 31Chantá kinsa kajñataj casararqa chay warmiwan. Ajinamanta qanchisnintin wañuporqanku, mana mayqenninkupis wawasta saqespa. 32Tukuyninkoj qhepantataj chay warmipis wañupullarqataj. 33Chantá, kausarimuypeqa, mayqenninkoj warmintaj kanqa, qanchisnintin kausarimojtinkuri? Qanchisnintinwan casarakorqaqa.

34Chantá Jesusqa kuticherqa paykunaman: Kay mundopi runasqa casaranku, casarachinkutaj. 35Wañusqakunamanta kausarimuspa janaj pachaman chayayta atejkunaqa, manaña casaranqankuchu, nitaj casarachenqankuchu. 36Manañataj wañonqankuchu. Paykunaqa ángeles jinallaña Diospa wawasnin kanqanku, wañusqakunamanta kausarimusqankurayku. 37Wañusqas kausarimunankumantaqa, Moisesña yachacherqa zarza larwajpi, Señorqa kasqanta Abrahampata, Isaacpata, Jacobpata ima Diosnin. 38Diosqa mana wañusqaspa Diosninchu, manachayqa kausajkunajta. Paypajqa tukuy kausashanku.

39Chantá, leymanta yachachejkunamanta wakinkuna nerqanku: Maestro, manchay sumajta kutichinki, nispa.

40Chaymantataj manaña imatapis taporqankuchu.

Pejpa wawantaj Cristori?

(Mt 22.41-46; Mr 12.35-37)

41Chaypacha Jesús nerqa paykunaman: Imaraykutaj Cristota Davidpa wawan kasqanta ninku? 42-43Davidllataj Salmos libropi nin: Señor nerqa Señorniyman: Tiyakuy pañaypi, enemigosniykita chakisniyki uraman churanaykama. 44Chantá, imaraykutaj Davidpa Churin kanman Cristori, Davidllataj Señor nishaspari?

Jesús ch'atan leymanta yachachejkunata

(Mt 23.1-36; Mr 12.38-40; Lc 11.37-54)

45-46Tukuy runa uyarishajtintaj yachachisqasninman nerqa: Leymanta yachachejkunamanta qhawakuychej. Paykunaqa qhoysu p'achaswan puriyta munanku. Plazaspi napaykuchikuyta, sinagogaspipis sumaj tiyanasta mask'anku. Jatun mikhuykunaspipis ñaupajpipuni tiyayta munanku. 47Viudasmantapis kapuyninkuta suwanku, unay unayta Diosmanta mañakoj tukuspa; chaynejta aswan juchachasqas kanqanku.

Currently Selected:

SAN LUCAS 20: QCHSB

Highlight

Copy