SAN LUCAS 21

Wajcha viudaj ofrendan

(Mr 12.41-44)

1Templopitaj Jesusqa qhawarispa rikorqa qhapajkuna qolqeta churajta ofrenda churanasman. 2Rikullarqataj uj wajcha viudatapis, iskay phisusninta churaykojta. 3Nerqataj: Cheqamanta niykichej kay wajcha viudaqa, tukuymanta astawan churan. 4Tukuy chaykunaqa puchoj qolqellankumanta qonku Diospaj ofrendata; kay viudataj wajcha kayninwan, kausanampaj chay k'ata kapusqanta churaykun.

Temploj urmananmanta

(Mt 24.1-2; Mr 13.1-2)

5-6Wakinkuna parlarqanku, temploqa k'acha sumaj rumiswan k'achanchasqa kasqanta; ofrendas qosqamanta ima. Paykunamantaj Jesús nerqa: Chayamonqa uj p'unchay, maypachachus kay tukuy ima rikusqaykichej t'unasqa kanqa; manataj uj rumillapis waj rumi patapi qhepakonqachu.

Manaraj mundo tukukushajtin señales kanqa

(Mt 24.3-28; Mr 13.3-23)

7Paykunataj taporqanku: Maestro, jayk'ajtaj kay tukuy imas kanqa? Ima señaltaj kanqa kay tukuy ima kanampajri?

8Jesustaj nerqa: Allinta qhawakuychej, amataj ch'aukiyachikuychejchu, imaraykuchus ashkhas sutiypi jamonqanku, noqa Cristo kani, nispa. Kunanqa tiempoman qayllaña. Ama ari, qhepankuta riychejchu. 9Guerrasmanta, oqharikuykunamantawan parlajta uyarispa, ama mancharikunkichejchu; kay tukuy imas ñaupajta kanampuni tiyan; chaywampis manaraj tukukuychu.

10Chantá nillarqataj: Uj nación waj naciompa contranta oqharikonqa; uj reinopis waj reinoj contranta. 11Kallanqataj manchay jallp'a kuyuykuna, yarqhaykuna, imaymana onqoykuna ima tukuynejpi; cielomanta jatuchaj señales, mancharikuykuna ima kanqanku.

12Kay tukuy imaspa ñaupaqentataj, qankunata jap'isonqachej, qhatiykachasonqachejtaj. Chantá pusasonqachej sinagogasman; carcelmantaj wisq'asonqachej; chaymantataj reyesman, kamachejkunaman ima pusasqas kankichej noqaj sutiyrayku. 13Kay tukuytaj allin kanqa noqamanta runasman willanaykichejpaj. 14Ñaupajtaqa sonqoykichejpi ama yuyaychejchu, imatachus kutichikunaykichejmanta. 15Noqa yachayta qosqaykichej parlanaykichejpaj; chay parlasqaykichejtataj enemigosniykichejqa, mana atipayta, nitaj kutichikuytapis atenqankuchu. 16Chaywampis pusasonqachej tatasniykichejwan, wauqesniykichejwan, allusniykichejwan, kausaqesniykichejwan ima. Qankunamanta wakintataj wañuchenqanku. 17Tukuypa chejninantaj kankichej noqaj sutiyrayku. 18Umaykichejmantapis mana uj chujchallapis chinkanqachu. 19Pacienciaykichejwan almasniykichejta salvankichej.

20Jerusalén llajtata soldadoswan muyurisqata rikuspa, loqhekuynin chayamusqanta yachankichej. 21-22Chaypacha Judeapi kajkuna orqosman ayqechunku; Jerusalempi kajkuna llajtamanta llojsichunku; chajraspi kajkunataj ama llajtaman kutirimuchunkuchu, imaraykuchus ñak'ariy p'unchaykuna, kanqa tukuy escribisqa junt'akunampaj. 23Ay, chaypacha wijsayoj warmispaj, ñuñoj wawayojkunapajpis, imaraykuchus jatun ñak'ariy kay mundopi kanqa; jinallataj Diospa phiñakuynimpis chay llajtapaj. 24Wakenqa guerrapi wañuranqanku; wakintataj presochasqasta apanqanku tukuy nacionesman. Gentilestaj Jerusalenta saruranqanku, paykunaj p'unchayninku junt'akunankama.

Runaj Churimpa kutimuynin

(Mt 24.29-35, 42-44; Mr 13.24-37)

25Chaypacha intipi, killapi, qoyllorkunapi ima, señales kanqa. Jallp'a patapitaj kanqa runakuna ukhupi manchay llakiy, ñak'ariy ima; musphaykachanqankutaj mancharisqas, mar qhollchoqeyaspa yaku moqos oqharikusqanmanta. 26Runakuna uj jinayanqanku manchariywan, imachus kay mundopi kasqanmanta, imaraykuchus janaj pacha atiykuna chaypacha kharkatirenqanku. 27Chaypacha rikonqanku Runaj Churinta phuyupi, manchay atiywan, jatun k'anchayninwantaj uraykamushajta. 28Kay tukuy ima ruwakuyta qallarejtin, sayaykukuychej umaykichejta oqharispa. Qayllamushanña kacharisqa kanaykichej p'unchayqa.

29Nillarqataj kay rijch'anachinata: Qhawariychej higo sach'ata, chayrí mayqen sach'allatapis. 30Q'omeryajta rikuspa yachankichejña q'oñi tiempo qayllapiña kasqanta. 31Jinallatataj qankunapis, kay tukuy imasta rikuspa, yachaychej Diospa reinon qayllapiña kasqanta.

32Cheqamanta niykichej kay tukuy imas kananta, manaraj kunan tiempo runakuna wañushajtinku. 33Cielowan kay mundowanqa tukukonqanku; palabrasniyrí mana tukukonqankuchu.

34Qhawarikuychej, pajtataj sonqoykichej atipachikunman mikhunawan, machaykuywan, kay mundoj kusiyninwan ima. Jinallapitaj juicio p'unchay taripasunkichejman. 35Chay p'unchayqa uj tojlla jina jamonqa tukuy kay mundopi kausajkunaman. 36Qhawarikuychej ari, Diosmanta mañarikuspa tukuy tiempopi, kay tukuy ima jamojmanta ayqenaykichejpaj; allimpi rikhurinaykichejpajtaj Runaj Churimpa ñaupaqempi.

37Jesusqa templopi p'unchay yachachej, tutataj llojsispa Olivos sutiyoj orqopi kamoj. 38Tukuy runakunataj tutamantapacha jamorqanku, templopi payta uyarinankupaj.

Currently Selected:

SAN LUCAS 21: QCHSB

Highlight

Copy