SAN LUCAS 22

Jesusta wañuchiyta munanku

(Mt 26.1-5, 14-16; Mr 14.1-2, 10-11; Jn 11.45-53)

1Qayllaña karqa mana levadurayoj t'anta mikhuna Pascuaman. 2Jatun sacerdotes, leymanta yachachejkuna ima, Jesusta mask'asharqanku imaynamantachus wañuchinankuta, imaraykuchus runasta manchachikorqanku.

3Satanastaj yaykorqa Judas Iscariote sutiyojman. Payqa Jesuspa chunka iskayniyoj yachachisqasninmanta ujnin kaj karqa. 4Judasqa, riytawan parlamorqa jatun sacerdoteswan, templota qhawajkunawan ima. Tukuyninkuwan parlarqa imaynatachus Jesusta jap'ichinanmanta. 5Paykunataj kusikorqanku, parlarqankutaj qolqeta Judasman qonankupaj. 6Paytaj, arí nispa, mask'ayta qallarerqa, imaynamantachus mana runaj rikusqanta Jesusta jap'ichinampaj.

Señorpa Cenan

(Mt 26.17-29; Mr 14.12-25; Jn 13.21-30; 1 Cor 11.23-26)

7Chayamorqa chay mana levadurayoj t'anta mikhuna p'unchay. Chaypacha Pascua corderota wañuchinanku karqa. 8Jesustaj kacharqa Pedrota, Juantawan, nispa: Riychej wakichej Pascua mikhuyta mikhunanchejpaj.

9Paykunataj taporqanku: Maypitaj munanki wakichinaykuta?

10Jesustaj kuticherqa: Llajtaman yaykoj jina tinkunkichej yaku p'uyñuta apashaj runawan. Paywantaj riychej may wasinmanchá yaykonqa chaykama. 11Wasiyojmantaj niychej: Maestro nichimusunki: Maypitaj kashan chay wasi yachachisqasniywan Pascua cenata mikhunaypaj? 12Chantataj pay rikuchisonqachej k'uchunchasqata uj jatun cuartota alto patapi; chaypitaj wakichinkichej.

13Rispataj paykunaqa, imaynatachus Jesús nisqanman jina tariparqanku; chaypitaj wakicherqanku Pascua mikhuyta.

14Mikhuna horaña kajtintaj, Jesús mesaman tiyaykukorqa yachachisqasninwan. 15Chaypitaj nerqa: Maytapuni munarqani kay Pascuata qankunawan mikhuyta, manaraj ñak'arishaspa. 16Noqaqa niykichej, manaña ujtawan Pascuata qankunawan mikhusajñachu, kay mundopi Diospa reinon junt'akunankama.

17Chantá copata oqharispataj, graciasta qospa nerqa: Jap'iychej, sapa ujniykichejtaj kaymanta ujyaychej. 18Nillaykichejtaj manaña ujtawan ujyasajchu uvas poqoymanta, Diospa reinon chayamunankama. 19Chaymantaqa, t'antata oqharispañataj graciasta qorqa, partispataj paykunaman jaywarqa, nispa: Kayqa cuerpoymin, qankunarayku qosqa. Kayta ruwaychej noqamanta yuyarikuspa.

20Jinallatataj, cenaytawankama copata oqharispa nerqa: Kay copaqa yawarniypi mosoj tratomin, qankunarayku jich'asqa kanqa. 21Chay tukuywampis, kunanqa jap'ichiwajniypa makin noqawan mesapi kashan. 22Cheqamanta Runaj Churenqa rishan, ñaupajmantapacha kamachisqa kasqanman jina; chaywampis, ay, chay runamanta, piraykuchus jap'ichisqa kanqa!

23Chaymanta paykunapura tapunakuyta qallarerqanku, mayqenchus paykunamanta chayta ruwaj kanman chayta yachanankupaj.

Pitaj aswan jatun kanman?

24Jesuspa yachachisqasnintaj churanakusharqanku mayqenninkuchus aswan kuraj kananmanta. 25Paytaj nerqa: Reyesqa nacionesta kamachinku; chay nacionesta kamachejkunatataj, sumaj ruwajkuna nispa sutichanku. 26Qankuna ukhupitaj mana ajinachu kanqa; qankunamanta kuraj kajqa, sullk'a jina kachun, kamachejtaj kamachi jina kachun. 27Ajina kajtenqa, mayqentaj aswan kuraj: Pichus mesaman tiyaykojchu, chayrí kamachi kajchu? Manachu mesaman tiyaykoj? Noqarí qankuna ukhupi kamachi jina kashani.

28Qankunataj ñak'ariykunasniypi noqawan karqankichej. 29-30Chaynejta qoykichej uj reinota, imaynatachus Tatay qowarqa ajinata; reinoypi mesapi mikhunaykichejpaj, ujyanaykichejpaj ima. Ajinallatataj tronospi tiyaykunkichej Israelpa chunka iskayniyoj ayllusninta juzganaykichejpaj.

Jesús willan Pedro qhesachananta

(Mt 26.31-35; Mr 14.27-31; Jn 13.36-38)

31Nillarqataj Señorqa: Simón, Simón, Supayqa mañan trigota jina thalanasuykichejta. 32Noqataj mañakuni feniyki ama pisiyanampaj. Qantaj noqaman kutirimuspa kallpachay wauqesniykita.

33Simontaj kuticherqa: Señor, qanwanqa mana carcelllamanchu rinaypaj wakichisqa kani, astawanqa wañuykama.

34Paytaj kuticherqa: Pedro kunan niyki, manaraj gallo waqashajtin, kinsa kutita qanqa mana rejsinichu niwanki.

Ñak'ariy horamanta

35Jesús taporqa paykunata: Maypachachus kacharqaykichej, mana ch'uspayojta, mana wayaqayojta, nitaj ujut'asniyojta chaypacha, pisisorqachejchu imallapis?

Paykunataj, mana imapis pisiwarqaykuchu, nerqanku.

36Jesustaj nerqa: Kunanqa, ch'uspan kajtenqa apachun, jinallatataj wayaqatapis. Mana espadayojtaj rantikuchun p'achanta vendespa. 37Noqaqa niykichej: Chay escribisqaqa noqapiraj junt'akunan tiyan: Juchasapaswan yupasqa karqa; noqamanta escribisqaqa junt'akushanña.

38Chaypacha paykuna nerqanku: Señor, kaypi tiyan iskay espadas. Paytaj kuticherqa: Jinallaña kachun, nispa.

Jesús Getsemanipi

(Mt 26.36-46; Mr 14.32-42)

39Jesusqa, usunman jina Olivos orqoman llojserqa, yachachisqasnimpis qhepanta rillarqankutaj. 40Jaqayman chayaspataj, paykunaman nerqa: Mañaykuychej ama juchaman urmanaykichejpaj.

41-42Paykunamantataj karunchakorqa, uj rumi choqayman jina; qonqoriykukuspataj mañakorqa: Tatáy, munanki chayqa, kay ñak'arinaymanta jark'away; chaywampis, ama noqaj munasqaychu ruwakuchun, manachayqa qampallata. [

43Uj angeltaj janaj pachamanta rikhurerqa Jesusman, kallpachanampaj. 44Anchatañapuni ñak'arishaspataj, aswan sinch'ita mañakorqa, jump'iynintaj jatuchaj yawar sut'iykuna jina pampaman sut'orqa.]

45-46Diosmanta mañakusqanmanta sayarispataj, qayllaykorqa yachachisqasninman, tariparqataj llakiy jawa puñurashajta; nerqataj: Imaraykutaj puñushankichej? Jatariychej, mañakuychej ama juchaman urmanaykichejpaj.

Jesusta presochanku

(Mt 26.47-56; Mr 14.43-50; Jn 18.2-11)

47Jesús parlashajtillanraj, ashkha runas chayamorqanku; Judas sutiyojtaj, ujnin kaj, chunka iskayniyoj yachachisqasninmanta, risharqa paykunaj ñaupaqenkuta; qayllaykuspataj Jesusta much'aykorqa. 48Chaypi Jesús nerqa: Judas, ujta much'aykuspachu Runaj Churintaqa jap'ichinki?

49Paywan kajkuna imachus kananta yachaspa, nerqanku: Señor, espadawanchu wajtasqayku?

50Paykunamanta ujnin kajtaj, ujta wajtaspa, jatun sacerdotej kamachimpa paña ningrinta qholurparerqa. 51Jesustaj nerqa: Amaña, saqeychej, nispa.

Ningrinta llankhaykuspataj k'askaykuchiporqa. 52Kuraj sacerdotesman, templota qhawajkunaman, kurajkunaman ima, pikunachus jamorqanku apanankupaj chaykunaman Jesús nerqa: Espadaswan, k'aspiswan imachu llojsimorqankichej, suwapis noqa kayman jina? 53Sapa p'unchay qankunawan templopi kashajteyqa, mana jap'ichiwarqankichejchu. Kunanqa chayamun horaykichej, laqhayaypa atiynin ima.

Jesusta Pedro qhesachan

(Mt 26.57-58, 69-75; Mr 14.53-54, 66-72; Jn 18.12-18, 25-27)

54Presochaspataj Jesustaqa pusarqanku jatun sacerdotej wasinman. Pedrotaj qhatisharqa karu qhepallata. 55Chaypi, chaupi patiopi ninata jap'icherqanku, muyuyninmantaj tiyaykorqanku. Pedropis tiyaykullarqataj paykunawan khuska. 56Uj imillataj, Pedrota nina qayllapi tiyashajta rikuspa, allinta qhawarispataj nerqa: Kay runapis Jesuswan kasharqa.

57Pedrotaj nerqa: Warmi, mana payta rejsinichu.

58Qhepatataj wajñataj rikuspa nerqa: Qampis paykunamanta kanki. Pedrotaj kuticherqa: Runa, mana paykunamantachu kani.

59Uj horanmantaj, wajñataj nisharqa: Cheqatapuni kaypis Jesuswan kasharqa; imaraykuchus Galileamanta paypis.

60Pedrotaj nerqa: Runa, mana yachanichu imatachus nisqaykita, nispa. Kikimpachataj, Pedro parlashajtillanraj gallo qhaparerqa. 61Chantá, Señorqa kutirikuspa Pedrota qhawarerqa. Pedrotaj yuyarikorqa Señorpa nisqanmanta: Manaraj gallo waqashajtin, kinsa kutita mana rejsinichu niwanki, nisqanta. 62Jawaman llojsispataj Pedroqa sonqo nanayta waqarqa.

Jesusta asipayanku

(Mt 26.67-68; Mr 14.65)

63Jesusta qhawajkunataj, asipayaspa maqarqanku. 64Ñawisninta qhataykuspa uyampi laq'arqanku, taporqankutaj: Diospa sutimpi parlay ari, pitaj maqasunki?, nispa.

65Chantá k'amispa ashkha imastawanraj nerqanku.

Jesús juntaj ñaupaqempi

(Mt 26.59-66; Mr 14.55-64; Jn 18.19-24)

66-67P'unchay tantakorqanku kurajkuna, kuraj sacerdotes, leymanta yachachejkuna ima. Jesustataj juntaman pusamorqanku, nispa: Niwayku, qanrí Cristochu kanki?

Paytaj kuticherqa: Arí, nisqaykichej chayqa, mana creewankichejchu. 68Tapojteyqa mana kutichiwankichejmanchu. 69Chaywampis, kunanmantapacha Runaj Churenqa tiyaykukonqa, jatun atiyniyoj Diospa pañanman.

70Chantá tukuyninku taporqanku: Qanqa Diospa Churinchu kanki? Paytaj kuticherqa: Qankuna nishankichej noqa kasqayta, nispa.

71Chaymanta paykuna nerqanku: Imapajña astawan testigosta munanchej? Noqanchej kikinchej uyarinchej paypa siminmanta.

Currently Selected:

SAN LUCAS 22: QCHSB

Highlight

Copy