HECHOS 15

3. Jerusalén markan tantachasïwi

(15.1-35)

Apostolunakampina, jilïr jaqinakampin amtäwipa

1Uka urunakansti yaqhip jaqinakaw Judea chiqat Antioquía markar puripxatayna. Uka jaqinakasti jilatanakaruw yatichañ qalltapxäna: “Qhispiyasiñatakix wakisiw Moisesan kamachiparjam circuncisión katuqañaxa” sasa. 2Pablompi Bernabeampisti ukxat uka jaqinakamp wal ch'axwapxäna. Ukat Antioquía iglesiankirinakax Pablompiru, Bernabeampir mayipxäna Jerusalenar sarapxañapataki, uka tuqit apostolunakampi uka markankir iglesian jilïr jilatanakamp qhanañchasiñapataki.

3Jerusalenar sarkasinsti, jupanakax Fenicia, Samaria chiqanak sarakipawayapxäna. Ukawjanakansti kunjämtix jan judiöpkis ukanakax nayra iyawsäwinakap apanukusin Diosar arkapkäna ukanak yatiyapxäna. Uk ist'asinsti jilatanakax wal kusisipxäna.

4Pablompi Bernabeampix Jerusalenar puripkän ukapachasti, iglesiankirinakasa, apostolunakasa, jilïr jilatanakas jupanakarux sum katuqäna. Pablompi Bernabeampisti taqi kuntix Diosax jupanak tuqi lurkatayna ukanak yatiyapxarakïna. 5Ukampis Tatitur iyawsir yaqhip fariseonakax, sayt'asisin sapxäna:

—Wakisiw jan judiöpkis uka iyawsirinakar Moisesan kamachiparjam phuqhas circuncisión katuqayañaxa —sasa.

6Ukat apostolunakampi jilïri jilatanakampix tantacht'asipxäna ukxat sum amuykipt'añataki. 7Wali jaya ukxat aruskipasinsti, Pedrox sayt'asisin jupanakar säna:

—Jilatanaka, jumanakax yatipxtawa, nayratpach Diosax jumanak taypit nayar ajllisitu jan judiöpkis uka jaqinakar nayan yatiyañaxataki Tatit tuqi qhispiyasiñan utjatapata, ukhamat jupanakan iyawsapxañapataki.#15.7 Hch 10.1-43. 8Jaqinakan chuymap uñt'ir Diosasti jan judiöpkis uka jaqinakar katuqatap uñacht'ayiwa, jupanakar Qullan Ajayu churasa, kamisatix jiwasanakar churkistu ukhamarak jupanakar churi.#15.8 Hch 10.44-47; Hch 2.4. 9Diosax janiw jupanakarusa, jiwasanakarus yaqha yaqha uñjkistuti. Jupax jupanakan chuymanakap iyawsäwi tuqiw q'umacharaki. 10Jichhasti, ¿kunatarak Diosar yant'apxtasti, jan phuqkay kamachinak iyawsirinakar wayt'añ munasinsti, kuntix jiwasasa, nayra awkinakasas jan phuqhirjamäpktan ukanaksti?#15.10 Mt 23.4; Lc 11.46; Gl 5.1-3. 11Ukatsipana, jupanakjamarakiw, jiwasax Tatit Jesusan khuyapayasiñapat qhispiyat uñjasipxtan —sasa.

12Jupanakasti taqiniw amukt'apxäna. Ukatsti Bernabeampiru, Pablompiruw ist'apxarakïna, jupanakasti kunjämtix Diosax jupanak tuqi uñacht'äwinaksa muspharkay luräwinaksa jan judiöpkis uka jaqinak taypin lurkatayna ukanak yatiyapxäna. 13Arsuñ tukuyxasinsti, Jesusan jilapa Santiagow taqpachanir säna:

—Jilatanaka, ist'apxita. 14Simón Pedrox kunjämsa Diosax qalltatpach jan judiöpkis jupanakar sum uñjkäna, jupan markapatak jupanakar ajlliskarakïna ukanak yatiyistu. 15Akasti profetanakan qillqataparjamaw phuqhasiski, Qillqatan siwa:

16“Aka qhipat kuttanïwa,

Davidan tinkut utap wasitat sayt'ayä.

Laqay pirqanakapsa askichthapirakïwa.

17Ukapachasti,

yaqha markankir jaqinakaw nayan ukar jutani,

jupanakasti nayan ajllitanakaxäniwa.

18Nayaw Tatit Diosamätxa.

Nayaw nayratpach taqi ukanak arsuwayta” sasa.

19Santiagosti saskakïnwa: “Uka arunakarjamax amuyataxat janiw wakiskit Diosar kutikipstir jan judío jaqinakar mayjt'ayañaxa. 20Jan ukasti jupanakar mä qillqat apayañaw wakisispa: ‘Idolonakar luqtat manq'anak jan manq'apxañapataki. Janirak axskatas jiwat uywanak manq'apxañapataki, wilan aycha jan manq'apxañapataki. Ukhamarusa, Moisesan kamachipan jark'atäki uka wachuq jucha lurañanak apanukupxañapataki.’ 21Nayratpach Moisesan kamachipat parlirinakax taqi markanakan utji, uksti sinagoganakan sapa sábado urun yatichapxi” sasa.

Jan judiöpkis uka iyawsirinakar qillqat apayata

22Ukatsti apostolunakampi, jilïrinakampi, iglesiankirinakampix, taqpachaniw amtapxäna jupanak taypit mä qawqhanir ajlliña, Antioquía markar Pablompi, Bernabeamp chika khithañataki. Jupanakasti paniniruw ajllipxäna, Barsabás sat Judasampiru, Silasampiru. Jupanakax jilatanak taypin jilïrit uñt'atäpxänwa, 23jupanakaruw aka qillqat apayapxäna:

“Nanak apostolunakampi, Jerusalén iglesian jilïrinakapampi, jilatanakampix taqi jumanakar munasiñampiw aruntanipxsma, Antioquía, Siria, Cilicia chiqanakan jakasir jan judiökasin Jesusar iyawsir jilatanakaru. 24Nanakax yatipxtwa yaqhip jaqinakan nanakan jan kamskat akat sarapxatapa. Uka jaqinakan jumanakar yatichäwinakapamp mayjt'ayatapa. [Akham arunakapampi pächasiyasa: ‘Wakisiw jumanakan circuncisión luräwi katuqapxañamaxa, Moisesan kamachiparjam phuqhapxañamasa’ sasa.] 25Ukham yatisin, nanakax amtapxta nanak taypit mä qawqhanir jumanakar uñjir khithaniña, Bernabeampi Pablompi, nanakan wali munat jilatanakamp chika. 26Jupanakax Jesucristo Tatitusan sutip laykux niyapuniw jakañanakap apt'asipxi. 27Ukhamasti jichhax Judasampiru, Silasampiruw khithanipxta. Jupanakaw taqi kun juk'amp qhanañcht'apxätam. 28Qullan Ajayutakisa, nanakatakis waljamakiw amuyasi, kunatix lurañax wakiski ukanakxar jan juk'amp jumanakar yaqha lurañanakamp apxataskañaxa: 29Idolonakar luqtat animalanakan aychap jan manq'apxamti; janirak wilsa manq'apxamti, kunkat jaychjat jiwayat uywanaksa jan manq'apxamti, Moisesan kamachipan jark'atäki uka wachuq jucha lurañanak apanukupxam. Uka lurañanaktix apanukupxätaxa, walikisipkätawa. Ukhamasti aruntanipxsmawa” sasa.

30Ukhamasti Bernabeampi, Pablompi, Judasampi, Silasampix Antioquiaruw sarapxäna. Ukar purisinsti iglesiankir jilatanak jawsthapisin qillqat katuyapxäna. 31Qillqat ullart'asinsti, taqpachaniw wal kusisipxäna, ukham jupanakar chuymacht'apxatapata. 32Judasampi Silasampix, Diosan profetanakaparakïnwa, arunakapampiw jilatanakar wal chuymacht'apxäna ch'amañcht'apxarakïna. 33Mä qawqha urunak jilatanakamp qamaratatsti, jilatanakax aruntanak apayasaw khitxapxäna. 34-35Ukampis Silasampi, Pablompi, Bernabeampix pachpa Antioquiaruw qhiparapxäna, ukansti jupanakax yaqhanakamp chikaw Tatitun suma arunakap yatichasipkakïna.

4. Pablon payïr kuti Diosan arunakap yatiyir saratapa

(15.36—18.22)

Pablompi Bernabeampix jaljtañaruw puripxi

36Ukat mä qawqha pachatsti Pablox Bernabearuw säna:

—Kawkha markanakantix Tatitun arunakap yatiyanktan uka jilatanakar tumpt'ir wasitat sarañäni, kunjamäsipkpachas jupanakax uk yatiñataki —sasa.

37Bernabeasti Juan Marcosaruw jupanakamp chik irpañ munäna. 38Ukampis Pablox janiw Juan Marcosarux irpañ munkxänti, nayra saräwin jupanakamp sarkasin jupax Panfiliat kuttanxatayna,#15.38 Hch 13.13. janiw jupanakamp chik irnaqirix sarkxataynati uka layku. 39Pablompi Bernabeampisti ukxat mayjt'asipxäna, ukat jaljtañar puripxäna. Bernabeax Marcosar irpxarusisin Chipre wat'aruw botet sarawayxäna. 40Pablosti Silasaruw jupamp chik sarañapatak ajllirakïna. Antioquía iglesiankir jilatanakasti jupanakarux sum khitxapxäna, Tatitur achikt'asa jupanakar munasiñapamp imañapataki. Pablompi Silasampix ukawjat mistuwayapxäna, 41Siria, Cilicia chiqa sarkasasti ukan utjir iglesianakan jilatanakaruw ch'amañcht'awayapxäna.

Currently Selected:

HECHOS 15: AYOPD

Highlight

Copy