HECHOS 4

Pedrompi, Juanampix jilïrinak nayraqatan jikxatasipxi

1Pedrompi, Juanampix jaqinakaruw parlasipkäna, ukham parlaskiriruw sacerdotenakax purinipxäna, Tatitun utap uñjirinakan jilïripampi, saduceonakampi. 2Jupanakax wali q'apisitäpxänwa, Pedrompi, Juanampin jaqinakar akham yatichatapata: “Jesusan jiwatat jaktatapax, jiwatat jaktañax utjatap uñacht'ayistu” sasa. 3Uk ist'asin jupanakar katuntapxäna; ukatsti jayp'üxatap laykuw carcelar qhipürkam jist'antapxi. 4Ukampis Diosan arunakap ist'irinakat waljaniw iyawsapxäna; iyawsirinakasti chachanakkamaki jakhutax niya phisqa waranqanïnwa.

5Qhipürusti judionakan jilïr irpirinakapampi, jilïrinakampi, kamachinak yatichirinakampix Jerusalenan tantacht'asipxäna. 6Uka tantachasïwinkarakïnwa: sacerdotenakan Anás sat jach'a jilïripa, Caifás, Juan, Alejandro, yaqha jilïr sacerdotenakampi. 7Ukatsti Pedrompiru, Juanampiruw irptayanipxäna, ukatsti jupanak taypir puriyanisin, jiskt'apxäna:

—¿Kuna ch'aman kankañampisa, jan ukax, khitin sutipxarus jumanakax akanak lurapxtaxa? —sasa.

8Pedrosti Qullan Ajayun ch'amapamp phuqt'ataw jupanakar säna:#4.8 Yatiyat arunakan phuqhasitapa, Mt 10.17-20; Mc 13.9-11; Lc 12.11-12.

—Marka apnaqir jilïrinaka, Israelankir jilïr jaqinaka, 9jumanakax nanakar mä usut jaqir aski luratat jiskt'apxistaxa, kunjämat jupan k'umarachat uñjasitap yatiñataki. 10Jumanakax yatipxam, Israelankir jaqinakas yatirakpan, jumanakan nayraqataman jikxataski uka k'umarachat jaqix, Nazaretankir Jesucriston sutiparuw k'umaraptat uñjasi, jumanakax juparuw ch'akkatapxtaxa, ukampis Diosaw jiwatanak taypit jupar jaktayi. 11Jumanakax utachirinakjamaw mä qala jaqunukupxtaxa, uka jaqunukut qalasti thurxäsir qalaruw tukuwayi. 12Janiw khiti tuqis qhispiyasiñax utjkiti, janirakiw akapachan Diosan churat yaqha sutix utjkiti, jupa tuqi qhispiyasiñasataki —sasa.

13Marka apnaqir jilïrinakasti, Pedrompir Juanampir jan axsaras parlir uñjasinxa, muspharapxiwa, jan kuna yatiñan jaqinakätap yatisa, ukatsti amuyapxarakïnwa chiqpachapuni Jesusamp chika sarnaqirïpxatapa. 14Ukhamarusa, k'umaraptayat jaqix jupanak chik sayt'atäskänwa, ukat jan kuns arsurjamäpkänti. 15Ukatsti uka tantachäwit Pedrompir Juanampirux anqaruw khithanukupxi, jupanakkam aruskipañataki. 16Sapxänwa:

—¿Aka jaqinakarux kamachañänisa? Jerusalenan jakirinakax taqiniw uka muspharkañ lurapxatap yatipxi, jiwasanakasti janiw jan yatir tukkaraksnati. 17Ukampis marka taypin jan juk'amp ukxat parlasiskañapatakisti, jupanakar axsarayañäni, akat uksar jan juk'amp khitirus Jesusan sutip aytasis parlasipkañapataki —sasa.

18Ukatsti Pedrompiru, Juanampir jawsayasinsti, Jesusan sutipat jan parlapxañapataki janirak kuns yatichapxañapatakiw sapxäna. 19Ukampis Pedrompi, Juanampix jupanakar sapxiwa:

—Jumanak pachpay amuyt'apxam, ¿Diosan nayraqatapan jupar jaysañat sipana, jumanakar jaysañat walïspaxa?#4.19 Hch 5.29. 20Nanakax janipuniw amukt'apkiristti kuntix uñjapkta ist'apkarakta ukanakat arsuñxa#4.20 Hch 22.15; 26.16. —sasa.

21Uka jilïrinakasti axsarañ churasaw apostolunakar khithanukxapxi. Markar axsarasin janiw kunjämatsa jupanakar mutuyañ jikxatapkänti, kunatix luraskatayna ukat Diosar taqin yupaychapxatap layku. 22Muspharkañ luräwi tuqi k'umarachatäkän uka jaqisti pusi tunk jila maranïnwa.

Iyawsirinakax Diosat ch'am mayipxi

23Pedrompi Juanampix antutnukut uñjasisinxa, apóstol masinakapan ukaruw sarxapxäna, purisinsti taqi kuntix sacerdotenakan jilïrinakapampi, jilïr jaqinakampix jupanakar sapkatayna uk yatiyapxäna. 24Jupanakar ist'asinsti, taqpachaniw Diosar art'asipxäna akham sasa: “Tatay, jumätaw taqi kunatix utjki ukanak lurir Diosaxa. Jumaw alaxpachsa, akapachsa, jach'a qutsa lurtaxa,#4.24 Ex 20.11; Neh 9.6; Sal 146.6. Uka mayisïwix (4.24-30), Ezequías reyin mayisitapar uñtatawa Is 37.16-20. 25jumaw Qullan Ajay tuqi David luqtirimar aka arunak arsuwaytaxa:

“¿Kunatarak markanakasti Diosar saykatasipxisti?

¿Kunatarak ñanqha amtanak amtasipkisti?

26Akapach reyinakax mayacht'asipxiwa,

jilïr jaqinakax mä amtañaruw puripxi,

Tatitumpiru, ajllit Cristompir qallkatañataki”#4.25-26 Sal 2.1-2. sasa.

27“Chiqpachansa, aka markan mayachasipxi Herodesampi, Poncio Pilatompi,#4.27 Herodes: Lc 23.7-11. Pilato: Mt 27.1-2. romano jaqinakampi, Israel markampi qullan Jesús luqtirimar jiwayañataki, khitirutix nanakan reyixatak ajlliskta ukaru. 28Ukham lurasaw jupanakax phuqhapxi, taqi kuntix jumax lurasiñapatak nayratpach amtkatäta ukhamarjama. 29Jichhasti Tatay, uñtamay nanakar axsarayatanakapa, arkirinakamarusti ch'amamay churapxita, juman arunakam jan axsaras arsupxañaxataki. 30Yanapt'apxarakitaya, jach'a ch'amamampi usutanakar qullañataki, ukhamarak uñacht'äwinaksa, muspharkay luräwinaksa, qullan Jesús Yuqaman sutipar lurapxañaxataki” sasa.

31Tatitur mayisiñ tukuyasinsti, tantachasipkän ukawjax khathatïnwa;#4.31 Khathatïnwa: Ukasti mä chimpuwa, mayisitanakap Diosan ist'atapat uñacht'ayi; Ex 19.18; Is 6.4. taqiniw Qullan Ajayumpi phuqt'at uñjasipxäna,#4.31 Pentecostés uruna (Hch 2.2-4). ukatsti jan axsarasaw Diosan arup yatiyapxäna.

Jesusan arkirinakapan sarnaqäwipa

32Diosar iyawsirinakax waljanïnwa, jupanakasti mä chuymakïpxänwa, mä amtañanikïpxarakïnwa. Utjir yänakapax taqininkänwa, ukanakat janiw khitis: “Nayankituwa” siskänti. 33Apostolunakasti jach'a ch'amampiw Tatit Jesusan jiwatat jaktatapat qhanañchasipkakïna, Diosasti aski waxt'äwinakap jupanakxar warxatanïna. 34Janiw jupanak taypin pist'ayasirinakax maynis utjkänti,#4.34 Dt 15.4. uraqininakasa, utaninakasa, ukanak aljapxäna, uka aljat qullqsti, 35apostolunakaruw churapxäna, sapaqat maynir pist'ayasitaparjam lakiñataki.#4.34-35 Hch 2.45. 36Jupanak taypin Chipre wat'ankir levita jaqiw utjäna,#4.36 Chipre: Mediterráneo sat jach'a qutankir wat'a, ukansti judío aytat tamaw utjäna (Hch 11.19). José sata, juparusti apostolunakax Bernabé sasaw sutichapxäna (uka sutisti “chuymachiri” sañ muni). 37Uka jaqix mä uraqinïnwa, uraqip aljasinsti, apostolunakaruw uka qullqi churxäna.

Currently Selected:

HECHOS 4: AYOPD

Highlight

Copy