GÉNESIS 23
23
Sara warmin jiwxatapa
1Sara warmix patak pä tunk paqallqun maraw jakäna, 2jupasti Quiriat-arbá sat chiqan jiwxäna, Hebrón markana, Canaán uraqina. Abrahamasti warmipan jiwatap amtasax wal jachäna. 3Ukatsti kawkhankkäntix Sara warmin jiwat amayapax, uka chiqat mistunisasti, uka uraqin jakir hitita jaqinakamp parliriw saräna, jupanakarusti sarakïnwa:
4—Nayax jumanak taypin yaqha markat jutir jaqikïkta ukasa, amay imäwi uraqi aljt'apxita, warmixan jiwat amayap imt'xañataki#23.4 Khä urunakan mä uraqix wila masinakan amayanakap uka chiqan imt'atäñapatakix wakisipunïnwa, ukhamat nayra awkinakapamp chika ukkhan amayanakapan samart'añapataki, ukat Abrahamax mä uraq alañar uskusïna (Gn 49.29-32; 1 R 13.22; Hch 7.16). —sasa.
5Hitita jaqinakasti Abrahamarux sapxänwa:
6—¡Tata, ist'apxita! Jumax nanak taypin Diosan ajllit wawapätawa. Kawkharutix munkta uka chiqar warmiman amayap imt'askakim, janiw nanakat khitis jark'apkätamti —sasa.
7Abrahamasti sayt'asisin, hitita jaqinak nayraqatan wali yäqañampiw alt'asïna, 8ukatsti jupanakar sarakïnwa:
—Chiqpachapuni jumanakaxa, nayan aka chiqar warmixaru imt'asiñax munapxsta ukaxa, Sóhar chachan Efrón yuqaparuy sarapipxita, 9Macpelá chiqankki uka putup nayar aljañapataki, uraqinakap thiyankki uka. Nayasti uka putun alapxa churaskäwa, ukhamat aka chiqan amay imäwix nayan utjani —sasa.
10Efrón sata hitita chachasti uka jaqinak taypin qunt'atäskänwa, ukat Abrahamar jach'at arusxatäna, ukhamat kawkïri jilïr hitita jaqinakatix qunt'atäsipkäna ukanakan ist'añapataki:
11—¡Tata, ist'ita, janiw aljkirismati! Nayax uka uraqi inakiw churäma, uka uraqinkkis uka putupamppacha. Marka masinakaxas uka arsutax ist'asipkituwa. Warmiman jiwat janchip uka chiqar imt'asiskakim —sasa.
12Abrahamasti hitita jaqinak nayraqatan wali yäqañampiw wasitat alt'asïna, 13Efrón chacharusti taqi jaqinak nayraqatan sarakïna:
—¡Tata, ist'akitaya! Kuna qullqtix uka uraqit churäma sisksma ukxa katuqt'akitaya, ukat warmixan jiwat amayap uka chiqar imt'asxä —sasa.
14Ukxaruw Efronax sarakïna:
15—Ist'ita, tata. Uka uraqin alapax pusi patak qullqiwa. Janiw jichhax uka qullqit ch'axwkañäniti, ukhamasti warmiman jiwat amayap imt'asiskakim —sasa.
16Abrahamasti Efrón chachan mayitaparux jaysarakïnwa, ukatsti hitita jaqinak nayraqatan jupax phuqhatpach qullqi jakt'äna. 17Ukhamat Efronan uraqipaxa, kawkïritix Macpelá chiqan jikxataskäna, Mamré ch'umi inti jalsu uñkatasina, uka uraqin utjir putumppacha, quqanakamppachasa, 18Abrahaman uraqipäxänwa. Uka uraqsti hitita jaqinakan jilïrinakapan uñjkañaw jupax alasïna.
19Uka qhipatsti Abrahamax Macpelá uraqinkir puturuw Sara warmipan jiwat amayap imt'xäna, Mamré ch'umit inti jalsu tuqiru, Hebrón satäkaraki uka chiqaru, ukasti Canaán uraqinkiwa.#23.19 Macpelá sat putu: Abrahamax uka uraq alatayna, ukar Sara warmiparu, pachpa Abrahamaru (Gn 25.9-10), Isaacaru (Gn 35.29), Rebecaru, Liaru, ukhamarak Jacobur (Gn 49.31; 50.13) imt'xañataki. 20Ukhamaw jupax uka chiqan utjkatayna uka uraqimpi, uka putumpi katusxäna, kuna uraqtix hitita jaqinakax amay imt'añatak aljkatayna uka.
Currently Selected:
GÉNESIS 23: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
