GÉNESIS 37
37
4. Josean sarnaqäwipa
(37—50)
1Jacobux Canaán uraqin jakiriw qhiparxäna, kawkintix awkipax jaya jaqjam jakawaykatayna ukana. 2Akaw Jacobun wila masipan sarnaqäwipaxa.
Joseampi, jilanakapampi
Joseax tunka paqallqun maranïskän ukkhaxa, jilanakapamp chikaw ovejanak awatirïna, uka jilanakapasti Bilhá, Zilpá warminakan wawanakapänwa, uka warminakasti awkipan uñt'atanakapänwa. Joseasti kuna jan walinaktix jilanakapax lurapxirïkän ukanak awkiparux yatiyapunirïnwa.
3Jacobusti Josearuw maynïri wawanakapat sipan wal munasïna, wali chuyman tuqir Josean yuritapata. Ukat Joseatakix mä suma isi lurarapïna. 4Jilanakapasti awkipan Josearu sinti munasitapatsti uñisipxänwa, janirakiw aruntapxirïkänsa.
5Mä kutix, Joseax mä samka samkasitayna, uksti jilanakaparuw yatiyäna; jilanakapasti juk'amp uñisxapxäna, 6akham satapata:
—Ist'apxita, kuntix samkaskta uk yatiyapxäma. 7Samkansti jiwasanakax taqiniw pampankaskayätan trigo chullanak lurasa; ukatsti akatjamat nayan trigo chullaxax chiqak sayt'äna, jumanakan chullanakamasti nayan trigo chullaxar muyuntasin alt'asipxäna —sasa.
8Jilanakapasti ukxaruw sapxäna:
—¿Nanakan reyixar tukusati munañamar nanakar apnaqapxitäta? —sasa.
Josean ukham samkasitap jupanakar yatiyatapat juk'amp jupar uñisipxäna.
9Uka qhipatsti Joseax yaqha samkampi samkasirakïna, uksti jilanakaparux yatiyarakïnwa:
—Yaqha samka samkasirakiktwa. Ukansti intimpi, phaxsimpi, tunka mayan warawarampix nayatak alt'asiskir uñjta —sasa.
10Joseax uka samka awkiparu, jilanakaparu yatiykäna ukkhasti, awkipax Josear tuqinuqänwa:
—¿Kuna samkarak ukasti? ¿Taykamasa, jilanakamasa, nayasa, jumatakit alt'asipxiriststi? —sasa.
11Jilanakapasti Joseatakix wal arusipxäna,#37.11 Hch 7.9. ukampis awkipax uka samkat wali lup'irakïna.#37.5-11 Aka pä samkasti, Josean Egipto markan jach'ar aptatäñap yatiyaskäna (Gn 41.44).
Joseax jilanakapan aljantataw uñjasi
12Mä urusti Josean jilanakapax Siquem tuqin awkipan ovejanakap awatisipkäna. 13Ukat Jacobux Josear säna:
—Jilanakamax Siquem tuqin ovejanak awatisipki. Jupanakar uñjt'ir sarasma —sasa.
—Saräxaya, kun janixa —sasaw Joseax säna.
14Awkipasti ukxaruw sarakïna:
—Ukhamax saramaya, uñjt'anim, kunjämäskis jilanakamasa, ovejanakasa, ukatsti jank'akiw nayar yatiyir kuttanïta —sasa.
Joseasti Hebrón qhirwat mistuwayasin Siquem chiqaruw purïna, 15ukampis uka pampan janiw jilanakapar jikxatkänti. Ukatsti mä jaqiw jupar jikxatasin jiskt'äna:
—¿Kunrak thaqtasti? —sasa.
16Joseasti sänwa:
—Jilanakaxaruw thaqhaskta. Jumach yatiskasma, ¿kawkhansa awatisipkpacha? —sasa.
17Uka jaqisti sarakïnwa:
—Aka chiqat sarxapxiwa, “Dotán tuqiruw anakipxä” siri ist'askäyäta —sasa.
Joseasti jilanakapar thaqhiriw saräna, ukatsti Dotán chiqan jupanakarux jikxatäna.#37.17 Dotán markax Siquem chiqat amsta tuqinkänwa, niya suxta tupunjama, uka chiqnämaw alakip luririnakax Egipto markar sarapxirïna. 18Jilanakapasti jayat jutkir Josearux uñjapxäna, ukatsti janïra jak'achasinkipan jupar jiwayañ amtapxäna. 19Jupanakkamaw sasipxäna:
—¡Uñtapxam, khayax uka samkasirix jutaski! 20Jutapxam, jiwayañäni, ukatsti mä p'iyaru liwintañäni, ukat mä pampankir animalaw manq'antaskpacha, sasaw sañäni. ¡Jichhaw uñjañäni, uka samkanakapax phuqhasiniti janicha! —sasa.
21Uk ist'asinsti, Rubenax jilanakapan amparapat Josearux qhispiyañ munäna, ukat jupanakar sarakïna:
—Janikuch jiwaykañäniti. 22Jan jiwayapxamti, aka wasarankir phuch'ur jaquntapxam, ukampis juparux jan kuns lurapxamti —sasa.
Rubenasti ukxa Josear qhispiyañatakiw säna, awkipan ukar kuttxañap munäna; 23ukampisa, kunapachatix Joseax jilanakapan ukar purkäna ukkhasti, jupanakax uka suma isip lluch'supxäna, 24katuntasinsti mä waña phuch'uruw jaquntapxäna. 25Uka qhipatsti jupanakax manq'asiriw qunt'asxapxäna.
Ukhamäkipan sarir jaqinak jutaskir uñjapxäna, uka jaqinakasti Galaad tuqit jutir ismaelita jaqinakänwa, jupanakasti suma q'apkir qullanaka, bálsamo, mirra ukanak camellonakapan khumt'at Egiptor apasipkäna. 26Ukat Judá satax mayni jilanakaparux säna:
—¿Kunarak jilasar jiwayasina, jiwatap imt'asasa jikxatañänisti? 27Walïspaw khaya ismaelita jaqinakar aljañasaxa, jiwayañat sipansa, kunäpas Joseax jiwasan jilasächixaya —sasa.
Uka amuyt'äwisti jilanakapatakix walikïnwa; 28ukhamasti, uka alakipa jaqinakax uka chiq sarakipkipansti, jilanakapax uka phuch'ut Josearux apsunipxäna, ukatsti uka ismaelita jaqinakaruw pä tunka qullqiru aljapxäna. Ukhamat Josearux uka alakipa jaqinakax Egipto markar irpasxapxäna.
29Rubenax uka phuch'ur kutt'ankäna ukkhasti, Josear ukan jan jikxatasax llakisiñat isip ch'iyanuqasïna. 30Jilanakapan ukar kuttasinsti, sänwa:
—¡Joseax chhaqhatarakisä! ¿Jichhasti kunarak lurästi? —sasa.
31Jupanakasti mä cabrito jiwayapxäna, ukatsti Josean isip katusin uka wilaruw chillsupxäna; 32ukatsti awkipan ukaruw uka isi apayapxäna, akham sasa: “Aka isi jikxatapxta. Uñt'asim, wawamankit janicha” sasa.
33Jacobusti uka isi uñxatasin jach'at säna: “¡Akax wawaxan isiparakisä! Kuna pampa animalay wawaxarux jisk'a jisk'a wikhanuqasin manq'antchi” sasa. 34Ukatsti Jacobux llakisiñat isip ch'iyanuqasïna, llaki isimpiw uchasïna, jupasti jaya urunakaw wawapan jiwatapat jachäna. 35Yuqanakapasa, phuchhanakapas chuymachasipkarakïnwa, ukampis Jacobux janiw chuymachaskänti, jan ukasti wawapat walpun jachäna, sarakïnwa: “Wawaxat llakiskäwiw sarnaqä, jiwatanak taypin jupampi jikisiñkama” sasa.
36Egiptor purisinsti, madianita jaqinakax Potifar sat jaqiruw Josear aljapxäna, uka jaqisti Egiptonkir faraón reyin uñjirinakapan jilïripänwa.
Currently Selected:
GÉNESIS 37: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
