JUAN 10
10
Awatirimpi, ovejanakampi
1Jesusasti jupanakarux sänwa: “Qhanak sapxsma, khititix ovej uyuru, punku chiq jan mantki ukax, jalxatir lunthatawa. 2Ukampis khititix punku chiqa mantki ukax, ovej awatiriwa. 3Punku uñjiristi, awatirin mantañapatakiw uta punku jist'ari, awatiristi ovejanakarux sutipatkam jawsi, ovejanakasti awatirin arup ist'apxi, ukatsti awatirix uyut ansuraki, 4ovejanakan uyut taqpach mistxipansti, ovejanakan nayraqatap sari, ovejanakasti juparuw arkapxi arup uñt'apxatap layku. 5Ukampis mä jan uñt'atarux janiw arkapkiti, jan ukasti, jaltxapxiwa, uka yaqha jaqin arup jan uñt'apxatap layku.”
6Jesusasti aka uñtasïwimpiw amuyt'ayañ munäna, ukampis jupanakax janiw kunat parlatapsa amuyapkänti.
Jesusax suma awatiriwa
7Ukatsti Jesusax wasitatampiw sarakïna: “Qhanak sapxsma, nayätwa ovejanakan punkupaxa. 8Khitinakatix nayat nayra jutapkän ukanakax jalxatir lunthatanakäpxiwa,#10.8 Khitinakatix Cristor uñtatjama, ukatsti markan qhispiyiripjam uñstapkän ukanakxat Jesusax qhanañchäna (Jer 23.1-2; Ez 34.2-3). ukat ovejanakax jan yäqapkänti. 9Nayätwa punkuxa; naya tuqi mantirix qhispiyatäniwa. Kunjämatix mä ovejax uyuru manti, misturaki, ukatsti ch'ijinak jikxati, ukhamäniwa.
10“Lunthatax lunthatsuñataki, jiwayañataki, tukjañatakiw juti; ukampis nayax jakañanïpxañamatakiw jutta, jilarkir jakañanïpxañamataki. 11Nayätwa suma awatirixa.#10.11 Nayra Testamentonxa, mä awatirix pachpa Diosaru, jan ukax marka irpirir uñtatawa (Sal 23.1; Is 40.11; Jer 23.1-6; Ez 34.11-31; 37.24); Machaq Testamentonsti, Cristor uñtatarakiwa (Mt 9.36; 18.12-14; Mc 6.34; Lc 15.4-7; Heb 13.20; 1 P 2.25; 5.4; Ap 7.17), ukatsti khitinakatix Tatitun iglesiap irpirïpki ukanakaruraki (Jn 21.15-17; Hch. 20.28; Ef 4.11; 1 P 5.2). Suma awatirix jakañap ovejanakap laykux apt'asi; 12ukampis khititix qullqi laykuk awatki ukax, janiw suma awatirïkiti, janirakiw ovejanakas jupankkiti, qamaqir jutir uñjasax ovejanak anarpäwayasin jaltawayxi, qamaqisti munañaparuw ovejanak katurpayi, ukatsti taqi tuqiruw chhukhutatayi. 13Uka jaqix qullqi laykukiw awatïna, janiw ovejanak laykuti, ukat jaltawayxi.
14-15“Nayätwa suma awatirixa. Kamisatix Awkixax nayar uñt'kituxa, nayax Awkixar uñt'araktxa;#10.14-15 Mt 11.27; Lc 10.22. uka pachparakiw nayax ovejanakaxarux uñt'asta, ovejanakaxasti nayarux uñt'asirakituwa. Nayax ovejanakax laykuw jakañax apt'asirakta. 16Yaqha ovejanakax utjarakituwa; ukanakasti janiw aka tamankirïkiti;#10.16 Jn 11.52; 17.20; Ef 2.11-22; 1 P 2.25. ukanakarux anakiniñaxarakiwa. Jupanakax ist'apxitaniwa, ukatsti mä sapa tamakïniwa, mä sapa awatirinikiraki.
17“Nayax jakañax churta, wasitat jakañ katuqañataki, ukat Awkixax nayar munasitu. 18Janiw khitis jakañax apaqkituti, jan ukasti naya pachpaw munañaxat jakañax churta. Jakañax churañatakisa, wasitat katuqañatakis munañanïtwa. Uk lurañatakiw Awkixat katuqta.”
19Judionakax uka arunak ist'asin, wasitatampiw jupanakkam t'aqjtapxäna. 20Jupanakat waljaniw sapxäna:
—¿Kunatarak jupar yäqasipktasti? Jupax ñanqha ajayun luqhi jaqiwa —sasa.
21Mayninakasti sapxarakïnwa:
—Janiw khiti ñanqha ajayunis ukham parlkaspati. Janirakiw ñanqha ajayunix mä juykhur nayrap qullkaspati —sasa.
Jilïr judionakax Jesusaruw jiwayañ munapxi
22Thaya pachänwa, Jerusalén markansti Tatitun utap luqtäwi uru uruyasipkäna. 23Jesusasti Tatitun utapan sarnaqaskäna, Salomonan Jach'a punkupa satäkis ukawjana. 24Judionakasti Jesusar muyuntasaw jiskt'apxäna:
—¿Kunapachkamarak pächasiyapxitätasti? Jumatix Cristösta ukax, jichhpachay sapxita —sasa.#10.24 Jer 23.1-6; Ez 34.11-31; 37.24.
25Jesusasti jupanakarux sarakïnwa:
—Nayax niyaw sapxsma, ukampis jumanakax janiw iyawsapkistati. Kunanaktix nayax Awkixan munañapat lurkta ukanakax, sum qhanañchaski; 26ukampis jumanakax janiw iyawsapktati, jan nayan ovejanakäxatam layku. 27Ovejanakaxasti nayan arux sum uñt'i, nayas uñt'araktwa, ukat jupanakax nayar arkapxitu. 28Nayax wiñay jakañ churta, janiw kunapachas jiwapkaniti, janirakiw khitis amparaxat apaqkitaniti. 29Kuntix Awkixax churkitu ukax taqi kunat sipan juk'ampiwa, janiw khitis Awkixan amparapat apaqkaspati. 30Awkimpi nayampix mayakïpxtwa —sasa.
31Judionakasti qalanak irtasisin wasitatampiw k'upjañ munapxäna, 32Jesusasti jupanakarux sarakïnwa:
—Jumanak nayraqatan Awkixan ch'amapampix askinak lurta; ¿kawkïr lurataxatarak qalampi k'upjañ munapxistasti? —sasa.
33Judionakasti Jesusarux sapxarakïnwa:
—Janiw aski luratanakamat qalampi k'upjapkämati, jan ukasti, Diosar ñanqhachatamat k'upjapxäma.#10.33 Mt 26.65; Mc 14.64; Lc 22.70-71; Lv 24.15-16. Jumax mä jaqikïtawa, ukampis Diosaruw tukuñ muntaxa —sasa.
34Jesusasti jupanakarux sarakïnwa:
—Jumanakan kamachiman qillqatawa: “Jumanakax diosanakäpxtawa” sasa. 35Kuntix Qillqatan siski uk sum yattanxa, uk janiw ina ch'usar tukuyksnati; Diosasti, khitinakatix arunakap katuqki ukanakarux “diosanaka” sasaw sutichäna. 36Dios pachpatix nayar ajllisin akapachar khithanchitu ukaxa,#10.36 Jn 17.19; Heb 5.5. ¿kunatarak jumanakasti “nayax Diosan Yuqapätwa” sataxampi Diosarus ñanqhachkirista ukham amuyapxtasti? 37Janitix nayax Awkixan luräwinakap lurksta ukax, jan iyawsapxistati. 38Ukampis luräwinakap lurstxa ukax, janis nayarux iyawsapkita, jan ukasti, luräwinakaxar iyawsapxam, ukhamat Awkix nayankatapa, nayasti Awkinkataxarak mäpit yatipxäta —sasa.#10.38 Jn 14.10-11; 17.21; 1 Jn 3.24; 4.15.
39Jaqinakasti wasitatampiw katuntañ munapxäna, ukampis Jesusax jaltxänwa.
40Jesusasti Jordán jawir khurkataruw kutt'awayxäna, kawkhantix Bautisir Juanax bautiskatayna ukawjaruw qhiparäna.#10.40 Jn 1.28. 41Ukawjarusti walja jaqipuniw Jesusar uñjir sarapxäna, ukatsti sapxarakïnwa:
—Chiqpachansa, Bautisir Juanax janiw kuna muspharkañ unañchanaksa lurkänti, taqi kuntix jupax aka jaqit yatiykän ukax#10.41 Jn 1.26-36. chiqäskapuniwa —sasa.
42Ukawjansti waljaniw Jesusar iyawsapxäna.
Currently Selected:
JUAN 10: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
