LUCAS 5

Walja chawllanak katsupxatapa

(Mt 4.18-22; Mc 1.16-20)

1Mä kutix Jesusax Galilea quta thiyankaskänwa; ukarusti walja jaqipuniw tantthaptanïna, juparux uksat aksat ñiqjapxäna, Diosan arunakap ist'añataki.#5.1 Mt 13.1-2; Mc 3.9-10; 4.1-2. 2Ukatsti Jesusax uka quta thiyan pä ch'usa bote uñjäna. Chawlla katurinakax uka botenakat mistunisin qänanakap t'axsusipkäna. 3Jesusasti mä boteruw mantäna, uka botex Simonankänwa, juparusti quta lakat manqhawjar jithintayañapatakiw mayïna. Boter qunt'asisinsti, ukawjatpach jaqinakar yatichäna. 4Yatichañ tukuyxasinsti Simonaruw säna:

—Jichhax aka bote juk'amp manqhar irpaqam, ukatsti chawlla katsuñatak qänanakam jaquntam —sasa.

5Simonasti Jesusarux sänwa:

—Yatichiri, arum paqariw irnaqapxta “chawlla katsuñäni” sasa, ukatsti janiw kunsa katupkti; ukampis juman arsutamaruw qänanak jaquntä —sasa.

6Jaquntasinsti, walja chawlla katsupxäna, qänanakasti niya ch'iyjtirjamänwa. 7Ukat yaqha botenkaskirinakar khiwnaqas jawsapxäna, yanapir jutañapataki. Jupanakasti jutasinxa, paypach boteruw phuqt'apxäna, botenakasti niyapuniw umarux utjantäna. 8Uk uñjasinsti, Simón Pedrox Jesusan nayraqatapar killt'asisin säna:

—¡Tatay, nayat jithiqtita, jucharar jaqïtwa! —sasa.

9Simonampi, mayninakampisti ukataq chawlla katsupxatap laykux, wali mulljatäpxänwa. 10Zebedeon yuqanakapa Santiagompi Juanampis wali mulljatäpxarakïnwa, jupanakasti Pedromp chik irnaqirinakänwa. Jesusasti Simón Pedrorux sänwa:

—Jan axsaramti, jichhat uksarux jaqinak katüta —sasa.

11Ukatsti quta thiyar botenak apasinxa, taqi kun apanukusaw Jesusamp sarxapxäna.

Jesusax lepra usun jaqiruw k'umaraptayi

(Mt 8.1-4; Mc 1.40-45)

12Mä urusti, kunapachatix Jesusax mä markankaskän ukkhaw lepra usun mä jaqix jupan ukar purinïna; Jesusar uñkatasin uraqkam ajanup alt'asaw achikt'asïna:

—Tatay, munasmaxa, qullt'asitasmawa —sasa.

13Jesusasti juparux amparapampiw llamkt'äna, akham sasa:

—Muntwa, q'umachatäxam —sasa.

Ukspachaw lepra usupax chhaqtawayxäna.#5.13 Lepra usu: Uka usux jaqin janchiparuw llixtiptayäna, khititix uka usunïkän uka jaqix q'añu jaqit uñt'atänwa. 14Jesusasti juparux iwxt'änwa:

—Janiw khitirus uk yatiyätati, jan ukasti sacerdoter uñstir saram. Kunjämatix Moisesan arsutaparjam k'umaraptasin luqta churañäkix ukham churam, ukhamat sacerdotenakan usumat k'umaräxatam yatxañapataki —sasa.

15Ukampis Jesusan taqi ukanak luratapax juk'ampiw yatisïna, ukatsti walja jaqirakiw jupar ist'irix jutapxäna, ukhamarak usunakapat qullatäñatakisa. 16Ukampis Jesusax ch'usawja chiqanakaruw Tatitur mayisir saräna.#5.16 Mc 1.35.

Jesusax mä suchu jaqiruw k'umaraptayi

(Mt 9.1-8; Mc 2.1-12)

17Mä urux, Jesusax yatichaskänwa, ukansti fariseonakampi, kamachi yatichirinakampiw qunt'atäsipkäna; jupanakasti Galileata, Judeata, Jerusalenat jutapxatayna. Tatitun ch'amapasti usutanak k'umaraptayañ tuqiw Jesusxan uñstäna. 18Ukatsti mä qawqha jaqinakaw mä suchu jaqir Jesusan ukar kallanipxäna. Jupanakasti uta manqhir kallantasin Jesusan nayraqatapar puriyañ munapxäna, 19ukampis janiw kawki chiqas kallantañjamäkänti, jaqin phuqhantatätap layku; ukhamasti uta pataruw mistupxäna, uta pata p'iyantasinsti suchu jaqirux Jesusan nayraqataparuw warkuntapxäna. 20Jesusasti jupanakan iyawsañanïpxatap yatisinxa, suchu jaqirux sänwa:

—Jilata, juchanakamax pampachatäxiwa —sasa.

21Uk ist'asinsti, kamachi yatichirinakampi, fariseonakampix akham sasaw lup'ipxäna: “¿Khitirak aka jaqisti ukham ñanqha arsuñapatakisti? Dios sapakiw juchanak pampachaspaxa” sasa.

22Ukampis kuntix jupanakax lup'ipkän uk Jesusax yatïnwa, ukat sarakïna:

—¿Kunatsa jumanakax ukham lup'isipkta? 23¿Kawkïris juk'amp jasakixa: “Juchanakamax pampachataw” sañati, jan ukax, “Sayt'asim ukat sarxam” sañacha? 24Ukhamasti, Jaqin Yuqapan#5.24 Jaqin Yuqapa: uka sutimpiw Jesusax jupapach sutichasïna. akapachan juchanakat pampachañatak ch'amanïtap jumanakarux uñacht'ayapxäma —sasa.

Ukat uka suchu jaqirux säna:

—Jumaruw sisma, sayt'asim, ikiñam apxarusis utamar sarxam —sasa.

25Ukspachaw jupanakan nayraqatapan uka suchu jaqix sarthapïna, ikiñap apxarusisin Diosar yupaychasaw utapar sarxäna. 26Uk uñjasinsti, taqiniw muspharat uñjasipxäna, Diosaruw yupaychapxarakïna, ukatsti wali axsart'asaw sapxäna:

—Jichhürux wali muspharañanakpun uñjtanxa —sasa.

Jesusax Mateoruw jawsi

(Mt 9.9-13; Mc 2.13-17)

27Aka qhipatsti, Jesusax ukawjat mistusin Roma markatak qullqi apthapir mä jaqiruw uñjäna. Jupax Mateo satänwa, qullqi apthapiñäkis ukkhan qunt'atäskänwa. Ukat Jesusax jupar säna:

—Arkita —sasa.

28Ukat jupax sartasin, taqi kun apanukusaw Jesusamp chik sarawayxäna.

29Ukxarusti Mateox utapan mä jach'a manq'añ Jesusatak wakichayäna; Roma markatak qullqi apthapirinakampi, yaqha jaqinakampi kunaw uka chiqan manq'asiñatak qunt'asipxäna. 30Ukampis fariseonakampi, kamachi yatichirinakampix, Jesusan yatiqirinakaparuw jisk'achapxäna. Ukat jupanakarux sapxarakïna:

—¿Kunatarak jumanakasti qullqi apthapirinakampi, juchararanakamp manq'asipkta, umasipktasti? —sasa.

31Jesusasti jupanakarux sänwa:

—K'umar jaqinakax janiw qullir munapkiti, jan ukasti, usutanakaw qullir munapxi. 32Janiw nayax aski jaqinak jawsir jutkti, jan ukasti juchan jaqinak jawsiriw jutta, jupanakan juchanakapat Diosar kutikipstañapataki —sasa.

Jesusarux ayuno lurañxat jiskt'apxi

(Mt 9.14-17; Mc 2.18-22)

33Jupanakasti Jesusaruw sapxäna:

—Bautisir Juanan arkirinakapampi, fariseonakan arkirinakapampix wal ayunapxi, Tatiturus wal mayisipxaraki, ukampis yatiqirinakamax manq'asipki umasipki ukhamakïsipkarakisä —sasa.

34Jesusasti jupanakarux sarakïnwa:

—Jumanakasti ¿jaqichasir waynan ukankkipan jaqichasïwir jawsatanakar ayunayapxasmati? 35Ukampis jaqichasir waynar irpasxañ urux purininiwa,#5.35 Uka arumpix Jesusan jiwañapat parlaskäna. ukkhaw jawsatanakax ayunapxani —sasa.

36Ukhamarakiw aka amuyt'äwi churäna:

—Janiw khitis machaq isit khuchhuqas ukampix mirq'i isir ch'ukxatkiti. Ukham luran ukkhasti, machaq isix jan kunatak askïniwa, ukhamarus machaq isit khuchhuqatampi mirq'i isir ch'ukxatatax jan wal uñnaqayaspa. 37Janirakiw khitis machaq vino mä mirq'i lip'ichit lurata vino wayaqarux warantkaspati, ukham luraspa ukax chhuyu vinox mirq'i lip'ichit lurata wayaqarux phallayaspawa, ukatsti vinosa, lip'ichis inamayaruw tukusispa. 38Ukatpï chhuyu vinox machaq lip'ichit lurat wayaqar imañax wakisixa. 39Janirakiw khitis jayan vino umt'asax chhuyu vino munkaspati, jan ukasti siwa: “Jayan vinox juk'amp sumawa” —sasa.

Currently Selected:

LUCAS 5: AYOPD

Highlight

Copy