Sɛ́aŋ 4

Pa Yə́sus pɔ́lɛ́ na ntóón ɛ Səməlíi

1Ná Yə́sus ayóób lɛ́ Pafalɛsɛyɛ́ɛŋ páʼkoób pɔɔd pɔ́ɔsɔyɔ lɛ́ nyɔ́lɛ́ aáʼkaáyɛn Sɛ́aŋ a ɔmban ó paaʼkan, alɛ agosɔgɛna tɛn pɔɔd kɛ́fɔlɛ́, 2(a fɔ́lɔ́b, Yə́sus nyɔ́lɛ́nyɔ́amɔɛ́d adɛʼkɛ́ɛ agosɔgɛna pɔɔd, paaʼkan pə́ə́ŋ áa páyɛ́ɛ agosɔgɛna) 3yɛɛ́dɛ́ɛ́mɛn áay a Siudə́ə, aáság kuúlini a Kalilə́ə. 4Náa, agɛɛlɛ lɛ́ yúúlini kɔ, yiígóodi lɛ́ ásan yɛ́ a nigúu nímmú pɔ́ɔdɔ́ŋɔn lɛ́ Səməlíi. 5Náan aa ayɛ́ɛ́n alon a pálɛ́ɛg yimmú yɛ́ a Səməlíi, pɔ́ɔdɔ́ŋɔn lɛ́ Sɛʼkáal. Pálɛ́ɛg yɛ́ɛy ɛyɛ́ɛ ndúmiʼ na kɛsom kɛ́ nsí kɛ́ Yáʼkɔb ayɛ́ʼkɛn na mɔɔ́n Yósɛb#4.5 Kɛ́lɛ náan a kálaʼtaʼ ɛ Siɛ 33.19; Yos 24.32 6Kɔ a pálɛ́ɛg yɛ́ɛy aa kiɛ́lɛ́ɛ́ kɛ́ məní kɛ́ Yáʼkɔb yiídím kɛ́yɛ́ɛ. Yə́sus aáság kodam ə́ləndin kɔ a ɛbá ɛ́ kiɛ́lɛ́ɛ́ kɛ́ɛg ogooyig lɛ́ ayɛ́ɛ aáʼkodɔm ongɛn. Kɛnɛŋ kɛ́yɛ́ɛ kɛándɛ yoom náanɛ wɔnɔ́ tóɛf.

7Alɛ anɛ́ɛ́n kɔ ogooyig ə, ntóón ɛ Səməlíi yimmú yaáság kiim ədúəd məní. Náa Yə́sus ɔnɔ́ na nyɔ́lɛ́: «Íyowó, ɛ́ŋŋá məní, ŋŋo.» 8Páyɛ́ɛ kɔ áay əgín nto yɔɔbɔn ɛ́baan lɛ́ paaʼkan pə́ə́ŋ páyɛ́ɛ́n a pálɛ́ɛg agɛɛn agooŋɛnɛ moom mó konɛ. 9Náa ntóón ɛ Səməlíi yɛ́ɛy yɔ́nɔ́ na Yə́sus: «Tuə́ áŋ! Wɛ mɔɔ́n ó Yúdɛn, mɛ ntóón ɛ Səməlíi, wɔʼkɔ́ nkoyɛ́ʼkɛn məní óŋo a!» Ɔʼkɛ́ɛd nyóon yiísə́ə́ náan lɛ́ pɔ́lɛ́ pɔɔ́n pá Səməlíi na Yúdɛn pádɛʼkɛ́ɛ əgusob. 10Yə́sus əyímuyúlísíni ɔnɔ́ na nyɔ́lɛ́: «Wɛɛ́lɛŋɛn nɔŋáan nó Táán, na ánɛ aa alɛɛ́ nyɔ́ alɛɛ́ əguguŋíən məní má koŋo, ná wɛ agá aa umə́muŋiə́n məní. Amɛ́ɛ ogooyɛ́ʼkɛn məní má máagɛɛ́ʼkɛnanan ɔlaa.» 11Náa ɔʼkɛ́ɛd ɔnɔ́ na nyɔ́lɛ́: «Osaá! Wɛ aa nyóon uʼkódií ɔmbɔ́ əgín kɛlongá kɛ́ɛnɛ lɛ́ údúəd məní. Na náan kɛ́, kiɛ́lɛ́ɛ́ kɛ́lɛ lóóŋ a nsí. Tuə́ áa waágɛɛlɛ anɛ́ɛ́n agɛɛlɛ lɛ́ wɔ́ɔŋ məní mágo má wɔʼkɔ́ máagɛɛ́ʼkɛnanan ɔlaa ó pɛnɛŋ piim əə́? 12Sɛʼkóón wəəs Yáʼkɔb aa əyíbidíín kiɛ́lɛ́ɛ́ kɛ́ɛnɛ. Nyɔ́lɛ́nyɔ́amɔɛ́d yɛɛ́ŋó kɛ́lɛ́, na pɔɔ́n pə́ə́ŋ kɛ́, na mudúg muə́ŋ kɛ́. A nɛáŋ omámoyáyɛn nyɔ́lɛ́ aa nyóon yi?» 13Náa Yə́sus ɔnɔ́ na nyɔ́lɛ́: «Ungim nyɔ́ aáŋo məní móonɛ, alɛ́ɛ́ kiiʼkini koob nɛŋɔ́ɛd. 14Kɔmɔɛ́d lɛ́ nyɔ́ alɛ́ɛ́ koŋóó məní má mɛ ndɛ́ɛ́ komoyɛ́ʼkɛnɛɛ́, nyóon adɛndɛ́ɛ́ kiiʼkini koob nɛŋɔ́ɛd kə́mmú. Məní má mɛ ndɛ́ɛ́ komoyɛ́ʼkɛnɛɛ́ málɛ́ɛ́ kaan na nyɔ́lɛ́, isim yɛ́ yáalónan a nsí pis pis pis. Máamoyɛ́ʼkɛn ɔlaa ó pɛnɛŋ piim#4.14 Pódála tɛn náan a kálaʼtaʼ yɛ Ɛsa 12.3; Siə 2.13; 17.13 »

15Ná ɔʼkɛ́ɛd ayóób náan, yiísə́ə́ ɔnɔ́ na nyɔ́lɛ́: «Osaá, ɛ́nyɛɛ́ʼkɛn məní mágo móom, nɛŋɔ́ɛd nídiyíʼkíni kɛmbany kə́mmú, ntiiʼkíni kəə́yə́bi tɛn kə́mmú nkó əgiim ədúədə məní áanɛ.»

16Náa Yə́sus ɔnɔ́ na nyɔ́lɛ́: «Tod əsiəd waaŋ onom, púim.» 17Ɔʼkɛ́ɛd əyímuyúlísíni ɔnɔ́ na nyɔ́lɛ́: «Ntɛɔ́gɔ na onom.» 18Náa Yə́sus ɔnɔ́ na nyɔ́lɛ́: «Ɛɛ́ɛ, kɛ́lɛ náan, omáwɛ́sɛ́ɛ́ kusəə lɛ́ ɔdɛɔ́gɔ na onom. Pɛdɔ́ʼtɔn pɛáŋ pɛándɛ pɛ́ʼtáan. Ɔmbɔ́ tɛn sɔ́g nyóon nyɔ́ polɛɛ́ na nyɔ́lɛ́ nɛ́gɔŋ, ɔdɛɔ́gɔ onom waaŋ.» 19Ɔʼkɛ́ɛd nyóon ayáfɛ́mɛ́ɛ́, ɔnɔ́: «Osaá, mbádála lɛ́ olɛ ɔndɔɛgɛʼ pɛbán o Táán nyummú. 20Mayɛ́bɛyásɛ́nɛn kɛbán kɛ́ɛnɛ anɛ́ɛ́n kɔŋɛʼ áŋ: Pasɛʼkóón pə́ə́s páyɛ́ɛ pɛɛnan anyáadɛ Táán a oʼkon a mɔɛn. Náa nɛ́gɔŋ yɛ́ɛnɛ pəŋi Yúdɛn poɔʼkɔ́ ndóo, a Yolósalɛm aa pɛ́ɛn amonyádɛɛ́ á#4.20 Pɔɔ́n pá Yúdɛn fiɛ́d kɔ ondáŋ na pɔ́lɛ́, Pasamalɛʼtɛ́ɛŋ pɛ́ɛ́wáág tɛ́mpɛl a oʼkon ó Kalisíim a mɔɛn, ndúmiʼ na pálɛ́ɛg ɛ Sɛsɛ́ɛm ɛ kalaʼ «…a Yolósalɛm aa pɛ́ɛn amonyádɛɛ́»: Pódála tɛn kɛ́ɛg náan a kálaʼtaʼ ɛ Pɛʼk 122.1-4 ?» 21Yə́sus yiísə́ə́ ɔnɔ́ na nyɔ́lɛ́: «Íyowó, ndagodɛ́anɛ a fɔ́lɔ́b, ə́líʼtíníí: Kɛnɛŋ kiə́ndəgiim kɛ́ pádɛndɛ́ɛ́ kiiʼkinií kɛɛn ɔmbɔ́ a oʼkon a mɔɛn, ɔmbɔ́ a Yolósalɛm agɛɛn anyáadɛ Paabá. 22Pəŋi pɔɔ́n pá Səməlíi, polɛ agonyáadɛ Táán podɛmoólɛ́ŋ. Kɔmɔɛ́d lɛ́ pəsi Yúdɛn, tɛlɛ agomonyáadɛ, tɛmámoólɛ́ŋ lɛ́ yiísə́ə́ lɛ́, agɛɛlɛ lɛ́ yɔ́ɔyɛ pɔɔd, a palaa Yúdɛn aa alɛ́ɛ́ kosánɛ́ɛ́#4.22 Pódála tɛn náan a kálaʼtaʼ yɛ Ɛsa 2.3; Ɔlɔ́ 9.3-4 23Náa, kɛnɛŋ kiə́ndəgiim. Kɛmɔɛ́d áa kɛ́ɛnɛ kɛándɛɛ́ kɔ. Kɛ́lɛ kɛnɛŋ kɛ́ Uŋun wó Ufúlúʼtú ólɛ́ɛ́ kodáŋananɛɛ́ panyáadɛʼ Paabá pá fɔ́lɔ́b pá pálɛ́ɛ́ komonyádɛɛ́ na pɛbán pɛ́ fɔ́lɔ́b lɛ́ ombod ó panyáadɛʼ wóow náan aa Paabá alɛɛ́ anyɔ́ŋɛn. 24Táán alɛ Uŋun. Náan aa pɔɔd pá páamonyáadɛ, pógódíí lɛ́ pámonyáadɛ wɔnɔ́ ná Uŋun wə́əbuúloodi, na a fɔ́lɔ́b.» 25Náa ɔʼkɛ́ɛd ɔnɔ́ na nyɔ́lɛ́: «Ɛɛ́ɛ, mbálɛŋ lɛ́ Məsíi, áay lɛ́ nyɔ́ Táán ayásóŋɛ́ɛ́ lɛ́ álaamɛ a pɛnɛŋ piim, alɛ́ɛ́ kiim. Ná alɛ́ɛ́ kiimií, alɛ́ɛ́ kɛbɛyásɛnan pɛbán piim.» 26Yə́sus əyímuyúlísíni ɔnɔ́ na nyɔ́lɛ́: «Mɛ ogo nyɔ́ olɛɛ́ əgusəə aa nyóonɛ ndɛɛ́ agosɔyɔ na wɛ.»

27A kɛnɛŋ kɛ́ɛg aa paaʼkan pə́ə́ŋ pə́yíím alon. Píígə́g ná páyɛ́mobóan náan ɔɔ́sɔyɔ na ɔʼkɛ́ɛd. Náa, ɔmbɔ́ úmmuʼ adɛʼkáagaáʼkɛ kumuŋíən lɛ́ əə: «Nkə aa waányɔ́ŋɛn na ɔʼkɛ́ɛd nyóon əə́?» Ɔmbɔ́ lɛ́: «Nkə aa olɛɛ́ agosɔyɔ na nyɔ́lɛ́ ə́?» 28Ɔʼkɛ́ɛd aáság kudi ə́mə́dí iyə́sə́n yə́ə́ŋ yɛ́ əyíím ədúəd məní na yɛ́lɛ́ kɔ áay, aáság kɛɛn anyama pɔɔd a pálɛ́ɛg, ɔnɔ́ na pɔ́lɛ́: 29«Mɛ́naan óo! Mɛ́naan adála mɔɔd taa! Əmíʼtəənən nkə kiim kɛ́ mbáʼkɛɛlɛɛ́ a ɔlaa wáam. Adɛ́njaŋ Məsíi aa ɛlɛɛ́ náan əə́!» 30Pálɛ́ɛg ngim yaáság kiim íbugig, əgiimən kɛnɔ kɛ́ Yə́sus ayɛ́ɛ.

31A kɛnɛŋ kɛ́go kɛ́ɛg, paaʼkan páyɛ́ɛ ɔgɔɔ́sɔ́gɔlɔn Yə́sus, pɔ́nɔ́: «Kɛlág, nɛ́ ɛyaa ɛ́ yoom yi!» 32Əyíbuyúlísíni ɔnɔ́ na pɔ́lɛ́: «Ndɛ na móam moom mó konɛ mó pəŋi podɛálɛŋɛɛ́.» 33Paaʼkan pə́ə́bə́ə́ kəə́ŋíənə kɔ pɔ́lɛ́ na pɔ́lɛ́ pɔ́nɔ́ əə: «Mɔɔd əə́díin yiim agá amoyáabɛn kɔ áanɛ a ngim yəəs óm?» 34Náa ɔnɔ́ na pɔ́lɛ́: «Moom mó konɛ móam mólɛ lɛ́ nyɛ́ɛlɛ nɛnyɔ́ŋɛn nɛ́ nyɔ́ əyíím yɛ́ʼtom, nyɛ́ɛn agaádɛ pigólí pɛ́ ayɛ́nyɛɛ́ʼkɛn. 35Adɛ́ pəŋibáamɔɛ́d polɛ əgusəə poɔʼkɔ́: “Məə́ máʼkolɔb mə́niʼ, ambáŋaʼ yə́bə́ə ə?” Náa mɛ, ndabodɛ́anɛ nyɔʼkɔ́: Púdə́əmini oʼto, pódála wɔnɔ́ ná moom moáʼkoman kogónɛ́ɛ́ a malɛ́m. Kiə́ndəguunə agá lɛ́ ambáŋaʼ yə́bə́ə. 36Pabáŋaʼ pándɛ na pɛsáábɔ́n pɛɔ́bɔn. Pándaagonya masáŋ mɔ́ɔ́bɔn agɛɛ́ngɛg a ɔlaa ó pɛnɛŋ piim. Náan, na pagónaʼ kɛ́ na pabáŋaʼ kɛ́, pɔ́lɛ́ piim páagɛɛn a tɔnyɔ́g. 37Nsab yɛ́ɛnɛ yɛ́ ɛlɛanɛɛ́ lɛ́: “Nyóonɛ əə́gud, nyummú aábáŋa” ɛmáás fɔ́lɔ́b. 38Mɛ, mbáboodóm a nɛbáŋaʼ a pɔlɛ́m pó podɛásɔɛ́lɛdɛnɛɛ́ kɛɔsɛn a pólɛ́. Pɔɔd pɛ́ndɛ́ŋ áa páyásɔɛ́lɛ́dɛ́ɛ́ kɛɔsɛn kɔ. Náa pəŋi poándanɛ́ɛ́ a kɛɔsɛn kɛɔ́bɔn.»

39Ɛ́fɔlɛ́ ɛ́ pɔɔd pá a pálɛ́ɛg ɛ Səməlíi yɛ́ɛy páyáág oʼto na Yə́sus a tɔgɛ́ɛ́ tó ɔʼkɛ́ɛd nyóon ayɛ́bodɛánɛ, ɔnɔ́: «Táá mɔɔd aa nyóonɛ əmíʼtəənən nkə kiim kɛ́ mbáʼkɛɛlɛɛ́ a ɔlaa wáam.» 40Kólɛ́ aa, ná pə́yíím əgiig kɛnɔ kɛ́ ayɛ́ɛ, páyɛ́moyɔ́sɔ́gɔ́lɔ́nɛ́ɛ́ lɛ́ yíim na pɔ́lɛ́, pɛ́ɛn a pálɛ́ɛg. Yə́sus aáság kodɛ́ɛmɛn, amɛ́ɛn na pɔ́lɛ́. Ayɛ́ɛ́lɛ kɔ na pɔ́lɛ́ mədúg mábaan. 41Ɛ́fɔlɛ́ ɛ́ pɔɔd yímmú ɛ́yáág oʼto na nyɔ́lɛ́ a oʼto ó tɔgɛ́ɛ́ tó páyóób ɔɔ́sɔyɔ nyɔ́lɛ́nyɔ́amɔɛ́d. 42Píísə́ə́ pɔ́nɔ́ na ɔʼkɛ́ɛd nyóon: «Nɛ́gɔŋ yɛ́ɛnɛ, adɛ́njaŋ əgín a nkə kɛ́ oyɛ́bɛdɛánɛ aa tɛmáág oʼto, ndóo. Tɛmáág oʼto lɛ́ tɛmóób pəsibáamɔɛ́d tɔgɛ́ɛ́ tuə́ŋ, tɛáʼkolɛŋ fɔ́lɔ́b fɔ́lɔ́b lɛ́ alɛ Ongɔɔyɛʼ pɔɔd pá a nsí yɛ́ɛnɛ.»

Yə́sus ayóómɛ mɔɔ́n ó kɛgóʼkóón kɛ́ mɔɔd nyummú

43A ngim ɛ mɔɔ́s mábaan má Yə́sus yɛɛ́sánɛ a kɛnɔ kɛ́ɛg, yɛɛ́dɛ́ɛ́mɛn əguúlini a Kalilə́ə. 44Yiísə́ə́ nyɔ́lɛ́nyɔ́amɔɛ́d na unuʼ wə́ə́ŋ ɔnɔ́: «Pádɛányáadɛ ɔndɔɛgɛʼ pɛbán o Táán a nigúu niə́ŋ nɛ́ nyɔ́lɛ́nyɔ́amɔɛ́d.» 45Náa, ná ayɛ́ɛ́n əgiig a Kalilə́ə, pə́yímusíəd kɔ kɔŋɛʼ lɛ́ pɔ́lɛ́ tɛn páyɛ́ɛ kɔ a Yolósalɛm a wɔɔ́n ó Páska. Pɛ́ɛ́dála nkə kiim kɛ́ Yə́sus ayɛ́ɛ́lɛ kɔ.

46Áay aa əyúúlíni a pálɛ́ɛg ɛ Kána a Kalilə́ə, kɛnɔ kɛ́ ayɛ́ɛ́lɛ məní mááság kaan maloʼ. Kɛgóʼkóón kɛ́ mɔɔd kímmú kɛ́ a Kaʼpɛlɛnáyum, kíígóodi mɔɔ́n nyɔ́ ayɛ́ɛ agomobányɛn. Kɛgóʼkóón kɛ́go kɛ́ɛg kɛ́yɛ́ɛ uʼkudin wo nkúm. 47Ná kɛgóʼkóón kɛ́ɛg kɛ́yóób lɛ́ Yə́sus əyíím ádɛ́ɛmɛn a Siudə́ə, aándɛ áay a Kalilə́ə, ayɛ́ɛ́n amoóboan a Kána, amámoyɔ́sɔ́gɔ́lɔ́nɛ́ɛ́ lɛ́ pə́suulənən a Kaʼpɛlɛnáyum, yíim agoómɛ mɔɔ́n wəəŋ nyɔ́ ayɛ́ɛ ɔɔ́ndɔɔʼkɔŋ kugu. 48Yə́sus aáság komodɛ́anɛ ɔnɔ́: «Pəŋi, polɛ lɛ́ poʼtálan pɛálɛ́ʼkán pɛ́ pɛ́mábosán oʼto, na mangán, pudiə́gəə́liʼtini.» 49Uʼkudin nyóon aáság kumuyúlisini ɔnɔ́: «Osaá sɛ́gɔɔ ə́bísígíí kiim wɔnɔ́ ná əgə́ligíí agɛɛsɛma!» 50Náa Yə́sus ɔnɔ́ na nyɔ́lɛ́: «Úúli a noádɛʼ, wɔɔ́mɔ́ɔ́n oóʼkoom.» Mɔɔd əyə́líʼtíníí nkə kɛ́ Yə́sus yiísə́ə́, aáság kusiəd ngə́ agɛɛn. 51Alɛ kɔ a ngə́ ɛ kuúli ə, aáság kəə́bun na pəgudin pə́ə́ŋ, pɔ́nɔ́ na nyɔ́lɛ́: «Wɔɔ́mɔ́ɔ́n oóʼkoom!» 52Aáság kubuŋíən ɔnɔ́ əə, a kɛnɛŋ igə aa mɔɔ́n amáyóbɛ́ɛ́ kɔŋɛʼ ə́? Náa pɔ́nɔ́ na nyɔ́lɛ́: «Puə́y, a unjə́ŋí úmmuʼ ó wɔɔ́s áa nkó koyáa iyə́muúlis.» 53Sɛ a mɔɔ́n aáság kaálɛŋ lɛ́ a kɛnɛŋ kɛ́go kɛ́ɛg aa Yə́sus ayɛ́modɛánɛ ɔnɔ́: «Úúli a noádɛʼ, wɔɔ́mɔ́ɔ́n oóʼkoom.» Əgəə́bə́ə a wɔɔ́s wóow, na nyɔ́lɛ́ na yoog yəəŋ ɛ pɔɔd ngim, pááság kaag oʼto na Yə́sus. 54Táá kiə́wúunəniʼ kɛ́ kɛbán kɛ́ annam ábaan kɛ́ Yə́sus ayɛ́ɛ́lɛ aa kɛ́ɛg ná yɛɛ́dɛ́ɛ́mɛn a Siudə́ə əgimbuúlini a Kalilə́ə.

Currently Selected:

Sɛ́aŋ 4: yatDBL

Highlight

Copy