LÓʼKAS 6

Yə́sus alɛ nkúm ɛ kisúgiʼ kɛ́ Yúdɛn

(Maʼt 12.1-8; Mə́l 2.23-28)

1Wɔɔ́s ó kisúgiʼ kɛ́ Yúdɛn wúmmú, Yə́sus ayɛ́ɛ agosan yɛ́ a malɛ́m má ngəŋ. Paaʼkan pə́ə́ŋ pə́ə́bə́ə́ kosɔɛ́lɛla nto yɛ ngəŋ, pə́əfígilə na ɔmbɔg, páanɛ#6.1 Wɔɔ́s ó kisúgiʼ wúmmú: A pagálaʼtaʼ pə́mmú, kɛ́lɛ lɛ́: Kisúgiʼ kɛ́ annam ábaan kɛ́ a wəə́ ó na oʼto na oʼto. Kisúgiʼ kɛ́ɛg kɛ́yɛ́ɛ kíɛn ná kɛnɛŋ kɛ́ əmbug kɛándɛ ndúmiʼ. (Pódála náan tɛn a kálaʼtaʼ ɛ Ləf 23.5-14) …pə́əfígilə nto yɛ ngəŋ, páanɛ: Pódála náan tɛn a kálaʼtaʼ ɛ Tɛʼt 23.26 2Pafalɛsɛyɛ́ɛŋ pə́mmú pə́ə́bə́ə́ kosɔyɔ na pɔ́lɛ́ pɔ́nɔ́ əə: «Nkə aa kɛ́ɛg poágɛɛlɛ náan əə́? Adɛ́ poálɛŋ lɛ́ kɛ́lɛ kɛcɛm lɛ́ pɛ́ɛlɛ náan wɔɔ́s ó kisúgiʼ ə́#6.2 Kɛ́lɛ náan a kálaʼtaʼ yɛ Ɔsa 34.21 ?» 3Náa Yə́sus əə́buyúúlisini ɔnɔ́: «Podɛ́mbana nkə kɛ́ Tə́fid na pɔsɔ́g pá páyɛ́ɛ na nyɔ́lɛ́, páyɛ́ɛ́lɛ wɔɔ́s wó njaan ɛyɛ́boobány á? 4Kɛbán kɛ́ɛnɛ wɔnɔ́ ná yɛɛ́sɔ́d a uʼkóó ó Táán, əə́siəd pɛlɛ́ɛd pɛ́ pɛ́ɛ́fɔ́nyɛn Táán, páánɛ́ pɔ́lɛ́ piim na pɔsɔ́sɔ́g pə́ə́ŋ ə́! Ɔmbɔ́ ná moom móom móyɛ́ɛ kɛcɛm lɛ́ mɔɔd wɛndɛ́ŋ adɛnnɛ́ ná kɛ́sánɛn əgín lɛ́ payaaganɛʼ pɛfɔny pɔ́lɛ́bə́əsíŋ ə́#6.4 əə́siəd pɛlɛ́ɛd pɛ́ pɛ́ɛ́fɔ́nyɛn Táán: Kɛ́lɛ náan a kálaʼtaʼ ɛ 1Sa 21.2-7 …ná kɛ́sánɛn əgín lɛ́ payaaganɛʼ pɛfɔny pɔ́lɛ́bə́əsíŋ ə́?: Kɛ́lɛ náan a kálaʼtaʼ ɛ Ləf 24.9 ?» 5Náa Yə́sus əə́giiʼkini kusəə ɔnɔ́ na pɔ́lɛ́: «Mɛ, Mɔɔ́n o mɔɔd, ndɛ nkúm ɛ kisúgiʼ.»

Yə́sus ayóómɛ mɔɔd nyɔ́ ayɛ́ɛ abany ɛyɔgɛʼ

(Maʼt 12.9-14; Mə́l 3.1-6)

6A wɔɔ́s ó kisúgiʼ tɛn wúmmú, Yə́sus yɛɛ́sɔ́d a yoog ɛ pɛɔ́sɔ́gɔ́lɔ́n, əə́bə́ə́ kaaʼkananɛ pɔɔd. Mɔɔd nyummú ayɛ́ɛ kɔ a yoog ɛ pɛɔ́sɔ́gɔ́lɔ́n, ombɔg ó nɛnom uʼkuə́n. 7Palɛŋ pɛcɛm na Pafalɛsɛyɛ́ɛŋ páyɛ́modámɛn əngis agodála nga aagoómɛ mɔɔd wɔɔ́s ó kisúgiʼ ná pɔ́ɔŋ ɛgom ɛ́ komosɔ́mɛn lɛ́ agɛɛlanɛ kɔbɛ́. 8Kɛbán kímuʼ, Yə́sus yɛɛ́lɛŋɛn nkə kɛ́ páyɛ́ɛ afɛga a ntɛ́m yɔɔbɔn. Náa ɔnɔ́ na mɔɔd nyóon nyɔ́ ayɛ́ɛ abany ɛyɔgɛʼ: «Tɛ́ɛ́mɛn, wíim adɛ́lɛm áanɛ a udi o mɔɔd ungim.» Mɔɔd aáság kodɛ́ɛmɛn, əmíim adɛ́lɛm. 9Náa Yə́sus ɔnɔ́ na pɔ́lɛ́: «Ndəbuŋíən na pəŋi nyɔʼkɔ́ əə, kɛ́lɛ a pɛcɛm piə́s lɛ́ nkə ə́? Kɛ́lɛ lɛ́ mɔɔd yɛ́ɛlɛ kɔŋɛʼ wɔɔ́s ó kisúgiʼ oóm, yɛ́ɛlɛ kɔbɛ́ ə́? Kɛ́lɛ lɛ́ yɔ́ɔyɛ mɔɔd wɔɔ́s wóow oóm, ámoyóon ə́?» 10Yə́sus aáság kobodɛ́ʼtɛg pɔ́lɛ́ piim a nti. Náa ɔnɔ́ na mɔɔd: «Tə́ə́míni ombɔg.» Aáság kudə́əmini ombɔg, wándɛ kə́lə́ŋ. 11Náa, palɛŋ pɛcɛm na Pafalɛsɛyɛ́ɛŋ pááság koob ilúún kɛ́fɔlɛ́, pə́ə́bə́ə́ kɔɔ́cɔcɔb əguunə tuə́ áa pálɛɛ́ págɛɛlɛ na Yə́sus.

Yə́sus əmííyid pɔɔ́n pə́ə́ŋ pá maʼtom pówád na pábaan

(Maʼt 5.1; Maʼt 10.1-4; Mə́l 3.13-19)

12Əgín a mədúg móom, Yə́sus aáság kobag a oʼkon, agɛɛn ɔgɔɔ́sɔ́gɔlɔn Táán. Ayɛ́ɛ́lɛ udúg kilúd a pɛɔ́sɔ́gɔ́lɔ́n. 13A koany kaáyɛnɛ, aáság kodɔ́ŋɔnɔ paaʼkan pə́ə́ŋ, əmííyid kɔ nto yówád na ɛ́baan, aáság koboólog ɔnɔ́ «pɔɔ́n pə́ə́ŋ pá maʼtom.» 14Páyɛ́ɛ lɛ́: Simɔ́ɔŋ, (Yə́sus ayɛ́moólóg tɛn lɛ́ Píɛ), na móŋŋí Əndələ́ə, na pa Sɛ́ag pɔ́lɛ́ na Sɛ́aŋ, na Filíib, na Pəʼtələmíi, 15na Maʼtɛ́as, na Tómas, na Sɛ́ag mɔɔ́n wo Əlifə́ə, na Simɔ́ɔŋ nyɔ́ páyɛ́ɛ agodɔ́ŋɔn lɛ́ mɔɔ́n ó nigúu, 16na Siudáa mɔɔ́n ó Sɛ́ag, na Siudáa Ɛsɛʼkalɛyóod nyɔ́ yɛɛ́lɛ́g Yə́sus.

Yə́sus alɛ agaaʼkananɛ pɔɔd, aágoómanɛ pabámbany

(Maʼt 4.24-25; Mə́l 3.7-11)

17Ná Yə́sus əyíím ə́suu na pɔ́lɛ́, pɛ́ɛ́dám pádɛ́lɛm a kɛdɛ́gɛ́dɛ́n na paaʼkan pə́ə́ŋ na ɛ́fɔlɛ́ ɛ́ pɔɔd pá pə́yíím pádɛ́ɛman lɛ́ póonɛ a Siudə́ə ngim, pə́mmú a pálɛ́ɛg ɛ Yolósalɛm na a pabálɛ́ɛg pə́mmú lɛ́ na a Tíil, na a Sɛdɔ́ɔŋ. Pabálɛ́ɛg póob páyɛ́ɛ ndúmiʼ na noom nó ɛbá fiɛ́d. 18Ungim əyíím lɛ́ yíim agoob tɔgɛ́ɛ́ tó Yə́sus, áyɛboyóómanɛ a mabámbany mɔ́ɔ́bɔn. Pá məŋun má mabɛ́ máyɛ́ɛ əguyə́bi, pɛ́ɛ́dáá. 19Ungim ayɛ́ɛ əguunə lɛ́ ámodɔ́bɛd əgín komodɔ́bɛ́dáán lɛ́ toɛn tó tóyɛ́ɛ agolon a nkó yəəŋ tóyɛ́ɛ agoboyóómanɛ pɔ́lɛ́ piim a mabámbany mɔ́ɔ́bɔn.

Kɔŋɛʼ na pɔsɔ́g pə́mmú, maan na pə́mmú

(Maʼt 5.1-12)

20Yə́sus aáság kaágasɛ ná paaʼkan pə́ə́ŋ pálɛɛ́, náa ɔnɔ́ na pɔ́lɛ́:

«Kɔŋɛʼ na pəŋi pá polɛɛ́ na osog. Nɛlaamɛʼ nɛ́ Táán nɛ́lɛ nɛáŋan!

21Kɔŋɛʼ na pəŋi pá polɛɛ́ njaan nɛ́gɔŋ. Polɛ́ɛ́ kɛɛn na moom ilubənən!

Kɔŋɛʼ na pəŋi pá polɛɛ́ a ɔndɛɛ nɛ́gɔŋ. Polɛ́ɛ́ koŋɔnɔ!

22Kɔŋɛʼ na pəŋi pá pɔɔd pálɛɛ́ agoboóbɛnɛn, pə́əbuufə́nə, páaboodóga, páaboówag a oʼto wóonɛ lɛ́ poágɛn oʼto na mɛ Mɔɔ́n o mɔɔd. 23Pɔ́nyɔ́ga wɔɔ́s wóow, púsisən na tɔnyɔ́g lɛ́ pɛsáábɔ́n pɛ́ pɛgóʼkóón pɛ́lɛ agobooboŋ a mɔɛn. Əgín tɛn náan yoom ímuʼ aa pɛmbáa pɔ́ɔ́bɔn páyɛ́ɛ́lɛ na palɔɛgɛʼ pɛbán pá Táán#6.23 Pódála tɛn náan a kálaʼtaʼ ɛ 2Kni 36.16; Pig 7.52

24Náa, maan na pəŋi pá polɛɛ́ na tugúm, poɔ́ʼkɔɔŋ toáŋan tɔnyɔ́g.

25Maan na pəŋi pá polɛɛ́ nɛ́gɔŋ na moom mó konɛ tub. Polɛ́ɛ́ kaáyóób njaan!

Maan na pəŋi pá polɛɛ́ nɛ́gɔŋ a ɛŋɔn. Polɛ́ɛ́ koob ɔʼtɛ́m kogany, polɛ́ɛ́ kolɛɛ.

26Maan na pəŋi ná ungim alɛ agoboógany nɛ́gɔŋ. Náan tɛn aa pɛmbáa pɔ́ɔ́bɔn pɛ́ɛ́gány palɔɛgɛʼ pɛbán pá pɛfaa.»

Pɔ́nyɔ́ŋɛn pá páaboónɔɛyɛ pəŋi

(Maʼt 5.39-47)

27«Náa, mɛ ndabodɛ́anɛ nyɔʼkɔ́ na pəŋi pá polɛɛ́ agɛnjoob: Pɔ́nyɔ́ŋɛn pá páaboónɔɛyɛ pəŋi. Póɛlɛnɛ pá pálɛɛ́ agoboóbɛnɛn kɔŋɛʼ. 28Púŋíən na Táán lɛ́ pá pálɛɛ́ agoboófɛgan pəŋi kɔbɛ́, áboyɛ́ɛlɛnɛ pɔ́lɛ́ kɔŋɛʼ. Poɔ́sɔ́gɔlɔn a kidíídí kɛ́ pá pálɛɛ́ agoboówag pəŋi.

29«Mɔɔd amaʼkogosábɛn nɛbany a ombáŋ, sɛlɛ́gɛ́nɛ wúmmú yíiʼkini kogosábɛn nɛ́ndɛ́ŋ. Nyɔ́ alɛɛ́ anyɔ́ŋɛn lɛ́ ə́siəd lɛnkóod yaaŋ, odɛsáŋɛ́nɛ, ímudíin tɛn ɔmbɔ́ na síngílíid yaaŋ yɛ́ a kaadɛ kɛ́. 30Mɔɔd amaʼkogoyɔ́ɔŋɔn yoom, ɛ́moyɛ́ʼkɛn. Nyɔ́ alɛɛ́ anyɔ́ŋɛn lɛ́ ómofáŋɛ yoom, annyɔ́ŋɛnɛn kuguyúlisini, tí, udiyímuŋíən. 31Nkə kɛ́ wɛ olɛɛ́ anyɔ́ŋɛn lɛ́ pɔsɔ́g pɛ́ɛlɛ na wɛ, wɛɛ́nyɔ́amɔɛ́d tɛn ɛɛlɛ náan yoom ímuʼ na pɔ́lɛ́.

32«Pəŋi pomaʼkɛɛn lɛ́ poanyɔ́ŋɛn əgín pá pálɛɛ́ agobonyɔ́ŋɛn pəŋi, podɛnjábóŋɛ́ɛ́ na pɛsáábɔ́n lɛ́ ɔmbɔ́ tɛn pɛɛlɛ mabɛ́ pálɛ anyɔ́ŋɛn pá pálɛɛ́ agobonyɔ́ŋɛn pɔ́lɛ́! 33Pəŋi pomaʼkɛɛn lɛ́ poagɛɛlɛ kɔŋɛʼ əgín na pá páaboyɛ́ɛlɛ pəŋi kɔŋɛʼ, podɛnjábóŋɛ́ɛ́ na pɛsáábɔ́n lɛ́ ɔmbɔ́ pɛɛlɛ mabɛ́ tɛn pálɛ agɛɛlanɛ náan! 34Pomaʼkɛɛn lɛ́ poafáŋanɛ moom moáŋan əgín na pá polɛɛ́ agomɛna pɛda lɛ́ pə́əbuyúúlisini, podɛnjábóŋɛ́ɛ́ lɛ́ páboógany, lɛ́ ɔmbɔ́ pɛɛlɛʼ mabɛ́ tɛn pálɛ agofáŋanɛ na pɔɔd lɛ́ ná pə́buyúúlisini yoom ímuʼ! 35Náa, a pəŋi, pɔ́nyɔ́ŋɛn pá páaboónɔɛyɛ. Póboyɛ́ɛlɛnɛ kɔŋɛʼ, póbofáŋɛ podɛábóŋɛ́ɛ́ lɛ́ pə́buyúúlisini. Áay, pɛsáábɔ́n pɛáŋan pɛ́lɛ́ɛ́ kɛɛn pɛgóón. Poagɛɛn pɔɔ́n pá Táán nyɔ́ alɛɛ́ a mɔɛmɔɛ́n lɛ́ nyɔ́lɛ́ aádɛ́ɛ́ ɔʼtɛ́m na pá pɔ́dɛɔ́gɔ agolɛŋɛɛ́ kɔŋɛʼ kuə́ŋ, na pá pálɛɛ́ tɛn na ntɛ́m yɛ́ mbɛ́.»

Nɔŋáan na pɔsɔ́g

(Maʼt 5.48, 7.1-12, 15.14, 10.24-25, 7.3-5)

36«Pəŋi póŋáan tɛn wɔnɔ́ ná Sɛ waaŋan alɛɛ́ agoŋáan#6.36 Pódála tɛn náan a kálaʼtaʼ yɛ Ɔsa 34.6; Pɛʼk 86.15 37Agɛɛlɛ lɛ́ pádɛɛ́boóbɛ́n na koany, pəŋi tɛn podɛmbɛ́n pɔsɔ́g. Pəŋi, podɛyɛ́ʼkɛ́nan nsɔ́ɔ́ na pɔsɔ́g, agɛɛlɛ lɛ́ Táán adɛyɛ́boyɛ́ʼkɛn tɛn pəŋi nsɔ́ɔ́. Lisínəən pɔsɔ́g kɔbɛ́ koɔ́bɔn, ná Táán ə́buúlisin tɛn pəŋi. 38Ɛ́ʼkɛ́naan pɔsɔ́g, áay Táán alɛ́ɛ́ koboyɛ́ʼkɛn tɛn pəŋi. A nɔfɛg nólaŋ aa pálɛ́ɛ́ koboófɛgɛnɛɛ́, pə́əgin, páasɛga, múəsúsub pə́yibuúsuginin a kɛbalɛ́ kɛáŋan kɛ́ kɛgóón, kɛbalɛ́ kɛ́ kilə́ə́. Kɛ́lɛ lɛ́, əgín na nɔfɛg nó pəŋi polɛ́ɛ́ kofɛgɛnɛɛ́ pɔsɔ́g áa Táán alɛ́ɛ́ koboófɛgɛnɛɛ́ tɛn pəŋi.»

39Aáság kubuúsiədin tɛn nkaʼtɛ́n yɛ́ɛnɛ, ɔnɔ́: «Ə́lə́ə́ áa poáʼkodálaá ongwongwóg əə́dulə sɔ́g ongwongwóg? Pɔ́lɛ́ piim pə́diə́də́əŋ a niɛ́ á? 40Ongaaʼkan ɔmbɔ́ úmmuʼ ɔdɛɔ́gɔ ogobáʼkanan kɛlág kiə́ŋ. Náa, ongaaʼkan ungim nyɔ́ ayáʼkan kɔŋɛʼ alɛ́ɛ́ kɛɛn wɔnɔ́ kɛlág kiə́ŋ.

41«Kɛ́lɛ tuə́ na wɛ áa waáfɛda ɛyaa ɛ́ kiguŋ yɛ́ ɛ́lɛɛ́ a niis nɛ́ woómóŋŋí, kilumin kilúd kɛ́ kɛ́lɛɛ́ káanɛ a nɛáŋ niis oʼtála ə́? 42Tuə́ aa wɛ olɛɛ́ ogodɛ́anɛ na woómóŋŋí wɔʼkɔ́: “Móŋŋí, póŋ nkuúliogi kiguŋ kɛ́ kɛ́lɛɛ́ na wɛ a niis,” kɔmɔɛ́d lɛ́ kilumin kilúd kɛ́ kɛ́lɛɛ́ a nɛáŋ oʼtálan əə́? Yɔɔ́ŋɛ́ná pusú wɔnɔ́ wɛ! Yaŋ ogoóliogi kilumin kɛ́ kɛ́lɛɛ́ a niis nɛáŋ, áay waalɛŋ kodɛ́ʼtɛganan agɛɛlɛ lɛ́ úliogi kiguŋ kɛ́ kɛ́lɛɛ́ a niis nɛ́ woómóŋŋí!»

Na kiɛd na modámádám muə́ŋ

(Maʼt 12.33-37, 7.16-21)

43«Kiɛd kɛ́laŋ kídiə́guum modámádám mó móabany. Kɛ́ kɛ́abany tɛn kídiúm modámádám mó mólɛɛ́ mɔŋɛʼ. 44Kɛ́lɛ lɛ́, pálɛ agolɛŋ kiɛd kiim áa modámádám muə́ŋ: Pádɛ́agɛ́sa muliómíliómí a ɛŋɔlá, páʼkɛ́sa tɛn pɛʼpɔmá a kiliŋidiŋ. 45Mɔɔd nyɔ́ alɛɛ́ ɔŋŋɛʼ, alɛ alónɛ pɛbán pɛ́ pɛŋɛʼ pɛ́ pɛ́lɛɛ́ a ɔʼtɛ́m wə́ə́ŋ wó ɔŋŋɛʼ. Nyɔ́ alɛɛ́ tɛn ɔmbɛ́, alɛ alónɛ pɛbán pɛ́ pɛbɛ́ pɛ́ pɛ́lɛɛ́ tɛn a ɔʼtɛ́m wə́ə́ŋ wo ɔmbɛ́. Kɛ́lɛ lɛ́, nkə kɛ́ kɛ́lɛɛ́ a ɔʼtɛ́m ó mɔɔd a kaadɛ aa kɛ́lɛɛ́ agolon a unuʼ wə́ə́ŋ.

46«A igə aa poágɛʼtɔ́ŋɔnɔ poɔʼkɔ́ “Sə́dúk, Sə́dúk”, podiɛlɛ nkə kɛ́ ndɛɛ́ agobodɛ́anɛ ə́?»

(Maʼt 7.24-27)

47«Ndəbuúloodi ánɛ aa nyɔ́ amóób tɔgɛ́ɛ́ tóam, aágɛɛlɛ tɛn nkə kɛ́ tólɛɛ́ əgusəə, aáŋwáŋánan.

48«Alɛ wɔnɔ́ mɔɔd nyɔ́ ná ayɛ́ɛ əə́ndəgəə́bə́ə́ ongwáag wə́ə́ŋ, yiídímə a kɛgon miɛ́ɛ́ŋ, əə́ligígi noádɛʼ nuə́ŋ. Ná tɔɔ́ tuídə́əŋ, puní puə́yə́ə́gən, poáʼpɛs na toɛn a noádɛʼ. Núdiʼkə́əbugig lɛ́ nóyɛ́ɛ nowágáán kɔŋɛʼ.

49«Kɔmɔɛ́d lɛ́ nyɔ́ amóób tɔgɛ́ɛ́ tóam, adiɛlɛ nkə kɛ́ ndɛɛ́ əgusəə kɔ, nyóon alɛ wɔnɔ́ mɔɔd nyɔ́ yɛɛ́wáag noádɛʼ nuə́ŋ na mɔɛn na mɔɛn, andɛŋ kudímə nsí əguligigi noádɛʼ nuə́ŋ. Ná puní poɛ́ʼpɛs kɔ noáság kudə́əŋ a nsí bgulum, nuə́bumbúg nuim.»

Currently Selected:

LÓʼKAS 6: yatDBL

Highlight

Copy