Maʼtɛ́as 23

Pudinjə́ən ongoo ó palɛŋ pɛcɛm na Pafalɛsɛyɛ́ɛŋ

(Mə́l 12.38-39; Lóʼk 11.43-46; Lóʼk 20.45-46)

1Yə́sus əə́bə́ə́ kosɔyɔ na paaʼkan pə́ə́ŋ, na kiʼtúú kɛ́ pɔɔd kɛ́ kíyə́yiilin kɔ áay, ɔnɔ́ na pɔ́lɛ́: 2«Pigólí pɛ́ palɛŋ pɛcɛm na Pafalɛsɛyɛ́ɛŋ pɛ́lɛ lɛ́ pábomoáŋɛnɛ pɛcɛm pɛ́ Moyíis. 3Pəŋi pugóódi lɛ́ póɛlɛ nkə kɛ́ páabodɛ́anɛ. Náa, kɛbán kímuʼ. Pəŋi pudinjə́ən ongoo wɔ́ɔ́bɔn lɛ́ pɔ́lɛ́báamɔɛ́d pɔ́dɛɔ́gɔ agɛɛlɛ nkə kɛ́ pálɛɛ́ əgusəə. 4Pálɛ agobonan agá pɔsɔ́g pɛnó pɛ́ pɛnasáŋ agobonyáŋɛnɛnɛ, pɔ́lɛ́báamɔɛ́d pɔ́ʼtɔ́bɔ konyáŋɛn pɛ́lɛ́ ɔmbɔ́ sɔɔŋ na ɛnoónó. 5Pɛbán pɛɔ́bɔn piim pɛ́ páagɛɛlanɛ, pálɛ agɛɛlanɛ pɛ́lɛ́ lɛ́ ná páboodála. Pálɛanɛ na pɛdám pɛ́ mɔlɛɛ́ndɛŋ a nkó yɔɔ́yɔɔ, pə́əgəə́níigən pɛlanda pɛ́ poʼtaa#23.5 Yúdɛn yɛ́ ɛyáyɛ́ʼkɛnɛn na toɛn a pɛbán pɛ́ kəə́liʼtiniʼ ɛyɛ́ɛ yaáyáábɛg kɛsaa kɛ́ kilə́ə́ wɔnɔ́ ɛlɛɛ́ndɛŋ a pilə́ə́ pɛɔ́bɔn. Kɛsaa kɛ́ kilə́ə́ kɛ́ɛg kɛ́yɛ́ɛ wɔnɔ́ yoom yɛ́ yáaboyáyóóŋɛnɛ pɛcɛm pɛ́ Táán. Kɛ́lɛ náan a kálaʼtaʼ yɛ Ɔmb 15.38-41 6A pɛsɛɛn na a puog pó pɛɔ́sɔ́gɔ́lɔ́n, pə́əguunə kuləndən əgín a mɔʼkɔɔ má yuudi lɛ́ ná páboodɛ́ʼtɛg. 7Páanyóŋɛnɛla lɛ́ kɛnɔ kɛ́ pálɛɛ́, pə́buúsoyidəni na nnyáádɛ́ ngim, pɔɔd páabodɔ́ŋɔnɔ pɔ́nɔ́: “Kɛlág! Kɛlág!” 8Náa a pəŋi, pudinjúúnílə lɛ́ páboodɔ́ŋɔnɔ náan: “Pɛlág! Pɛlág!” Ndóo. Pugóódi kɛlág əgín kímuʼ súg. Pəŋi piim polɛ pɔɔ́n pá mɔɔd úmmuʼ. 9Podɛʼtɔ́ŋɔn tɛn mɔɔd a nsí yɛ́ɛnɛ lɛ́ “Sɛ waaŋan” lɛ́ pugóódi Sɛ mmuʼ súg yɛ́ ɛlɛɛ́ a mɔɛn. 10Pudinjúúnə tɛn lɛ́ páboodɔ́ŋɔnɔ lɛ́: “Oʼtɛ́lɛm yuudi! Oʼtɛ́lɛm yuudi!” Ndóo. Pugóódi oʼtɛ́lɛm yuudi úmmuʼ súg, alɛ Məsíi. 11Nyɔ́ alɛɛ́ oʼkóʼkóón a kɛgaágadɛ kɛáŋan ogóódi lɛ́ yɛ́ɛn inə́mbí ɛ́ pɔsɔ́g. 12Nyɔ́ alɛ́ɛ́ kaábágɛdɛɛ́, pálɛ́ɛ́ kumuúsuuli. Náa, nyɔ́ alɛ́ɛ́ kəə́sulií nkó a nsí, pálɛ́ɛ́ komobágɛdɛ. 13Maan na pəŋi moɔ́ŋɛ́ná pusú móonɛ! Pəŋi palɛŋ pɛcɛm na Pafalɛsɛyɛ́ɛŋ. Polɛ ɔlɔg pɔɔd ngə́ lɛ́ pádɛsɔ́d a Nɛlaamɛʼ nɛ́ a mɔɛn, pəŋibáamɔɛ́d posɔ́d a nɛ́lɛ́, podɛáʼkɛ́nɛ tɛn lɛ́ pá pálɛɛ́ anyɔ́ŋɛn kosɔd kɔ, pɔ́sɔd. [ 14#23.14 A pagálaʼtaʼ pə́mmú pá kalaʼ pá píídílə na ombɔg, niɛŋ nímmú nɛ́lɛ kɔ nɛ́ níəsəə lɛ́: «Maan na pəŋi moɔ́ŋɛ́ná pusú móonɛ, pəŋi palɛŋ pɛcɛm na Pafalɛsɛyɛ́ɛŋ. Polɛ əgiiʼkini kobɔgɔ pidí pɛ́ pagɛ́ɛd nkə kɛ́ pógódíí, pɛɔ́sɔ́gɔ́lɔ́n pɛáŋan pombɔ́d kosom lɛ́ ná páboodála. Pəŋi póob náan polɛ́ɛ́ kɔɔŋ ntɔ́b yɛ́ ɛmábosán oʼto.»] 15Maan na pəŋi moɔ́ŋɛ́ná pusú móonɛ, pəŋi palɛŋ pɛcɛm na Pafalɛsɛyɛ́ɛŋ. Polɛ əgiim pómaŋ nsí ngim, na toom tuim agɛɛlɛ lɛ́ púsúid a ngə́ yaaŋan, mɔɔd nyɔ́ əə́ʼkəə́liʼtinií. Kɛnɛŋ kɛ́ aándɛɛ́ na pəŋi, póság komoyɛ́ɛlɛ lɛ́ yáán nyɔ́ Táán ándaʼpɔ́nɛsɛɛ́ a yug yɛ́ ɛgóón, agoboyáyɛn pəŋi pɛnɛŋ pɛ́baan! 16Maan na pəŋi powongwóg pá puə́dulə pɔsɔ́g. Polɛ əgusəə lɛ́ mɔɔd amaʼkaácɛma uʼkóó ó Táán, ncɛm yɛ́ɛy ɛlɛ iyó. Náa, amaʼkaácɛma kóol yɛ́ ɛlɛɛ́ a uʼkóó wóow, ncɛm yɛ́ɛy ɛlɛ nnasáŋ. 17Piyəg wɔnɔ́ pəŋi! Powongwóg! A moom móom móbaan lɛ́ na kóol na uʼkóó, ɛ́yaán áa ɛ́mááyɛn sɔ́g? Kóol oóm, uʼkóó wó ómɛ́ɛ́lɛ lɛ́ kóol yɛ́ɛy yɛ́ɛn nfúŋiə́n ə́? 18Polɛ əgusəə tɛn poɔʼkɔ́, mɔɔd amaʼkaácɛma kibóŋ kɛ́ pɛfɔny, ncɛm yɛ́ɛy ɛlɛ iyó. Náa, amaʼkaácɛma yoom yɛ́ pááfɔny a kibóŋ kɛ́ɛg, ncɛm yɛ́ɛy ɛlɛ nnasáŋ. 19Powongwóg wɔnɔ́ pəŋi! A moom móom móbaan ɛ́yaán aa ɛ́mááyɛn sɔ́g? Nkə kɛ́ kɛ́máfɔ́nyɛ́ɛ́ kɔ óm, kibóŋ kɛ́ kɛ́mɛ́ɛ́lɛ lɛ́ kɛfɔny kɛ́ɛg kíɛn kifúŋiə́n ə́? 20Lɛŋáan lɛ́ mɔɔd amaʼkaácɛma kibóŋ, amácɛ́máá lɛ́ na kibóŋ, na moom muim mó mólɛɛ́ kɔ. 21Áyaácɛma uʼkóó, amácɛ́máá lɛ́ na uʼkóó, na Táán nyɔ́ alɛɛ́ lɛ́ uʼkóó wóow ólɛ noádɛʼ nuə́ŋ. 22Nyɔ́ amácɛ́máá mɔɛn, amácɛ́máá oʼkɔɔ ó Nɛlaamɛʼ ó Táán. Amácɛ́máá Táán nyɔ́ alɛɛ́ a oʼkɔɔ ó Nɛlaamɛʼ wóow#23.22 Kɛ́lɛ náan a kálaʼtaʼ yɛ Ɛsa 66.1; na a ɛ Maʼt 5.34

23«Maan na pəŋi moɔ́ŋɛ́ná pusú móonɛ, pəŋi palɛŋ pɛcɛm na Pafalɛsɛyɛ́ɛŋ. Ɛɛ́ɛ, polɛ agɛɛ́ʼkɛn Táán kɛowád kɛ́ muyənjə́g mó moom wɔnɔ́ pisənduŋ, pondóŋ ndíg, pɛlog#23.23 Kɛ́lɛ náan a kálaʼtaʼ ɛ Ləf 27.30; na a ɛ Tɛʼt 14.22 Náa, puʼkóodi kɛnɛŋ na pɛbán pɛmɔɛ́d pɛ́ pɛgóón pɛ́ pɛcɛm pɛ́lɛɛ́ agɛbɛyáaʼkananɛ, náanɛ wɔnɔ́: “Pasáád, ɔʼtɛ́m ó kulisənən, kaag oʼto na Táán.” Táá nkə kɛmɔɛ́d kɛ́ puígóodi lɛ́ póɛlɛ aa kɛ́ɛg, poágɛɛlɛ tɛn pɛ́ʼkáanɛ. 24Pəŋi, powongwóg pá puə́súidə pɔsɔ́g. Polɛ agolɛŋ kodɛ́ʼtɛg məní mááŋan má koŋo agɛɛlɛ lɛ́ púliogi ɛyaa ɛ́ nomóny yɛ́ ɛ́lɛɛ́ kɔ a kaadɛ lɛ́ ná podɛmmɛ́n yɛ́lɛ́. Kɔmɔɛ́d lɛ́ kiʼtóg kɛ́ nnyam wɔnɔ́ sɛamóo, polɛ amɛn yɛ́lɛ́!

25«Maan na pəŋi moɔ́ŋɛ́ná pusú móonɛ, pəŋi palɛŋ pɛcɛm na Pafalɛsɛyɛ́ɛŋ! Pilən pɛáŋan na pəʼkúmbəʼ pááŋan pálɛ káanɛ a táán púyúŋ púyúŋ, kɔmɔɛ́d lɛ́ a kaadɛ, moom mó wiib aa múyə́giníí kɔ síɛ́ɛ́d, na pɛbán pɛ́ pɛbɛ́ pɛ́ pɛ́lɛɛ́ əgiim pɛ́lon a ntɛ́m yaaŋan. 26Ongwongwóg wɔnɔ́ wɛ, Falɛsɛyɛ́ɛŋ! Yaŋ ásog kilən kɛáŋ a kaadɛ ná a táán tɛn kɛ́móaŋ. 27Maan na pəŋi moɔ́ŋɛ́ná pusú móonɛ, pəŋi palɛŋ pɛcɛm na Pafalɛsɛyɛ́ɛŋ. Polɛ wɔnɔ́ pəgəəniʼ pá pálɛɛ́ fúlúʼtúʼtúʼtú lɛ́ pə́ə́wú ɔfɛ́m#23.27 Yúdɛn ɛyɛ́ɛ əguwúəŋən pəgəəniʼ pɔ́ɔ́bɔn na ɔfɛ́m fúlúʼtúʼtú agɛɛlɛ lɛ́ pádɛ́ʼtɛganan na udúg, mɔɔd adɛyágoɛ́lɛ́dɛ́ɛ́ pɔ́lɛ́. Lɛ́ kɛ́yɛ́ɛlanɛ lɛ́ wɛ nyɔ́ wɔɔ́dɔ́bɔ kəəniʼ waagaásɔgɛn lɛ́ wɔɔ́dɔ́bɔ yoom yɛ́ ɛ́lɛɛ́ kifuə́. Pálɛ agodɛ́ʼtɛganan kɔŋɛʼ a táán, kɔmɔɛ́d lɛ́ a kaadɛ, pigú pɛ́ pɛlóŋ pɛ́ pɔɔd aa pɛ́lɛɛ́ kɔ síɛ́ɛ́d na mbod ɛ pɛbɔnɔ́bɔ́nɔ́ pɛ́ moom ngim. 28Náan aa kɛ́lɛɛ́ yoom ímuʼ na pəŋi. A táán, puogoóloodi lɛ́ polɛ sáád. Kɔmɔɛ́d lɛ́ a ntɛ́m yaaŋan a kaadɛ polɛ moɔ́ŋɛ́ná pusú mólɛ́ na mólɛ́, polɛ əgín kɔbɛ́ na kɔbɛ́ kɛɛlɛ.

29«Maan na pəŋi moɔ́ŋɛ́ná pusú móonɛ, pəŋi palɛŋ pɛcɛm na Pafalɛsɛyɛ́ɛŋ. Polɛ amaaŋan pisig pɛ́ pəgəəniʼ pá palɔɛgɛʼ pɛbán pá Táán, poálɛŋ kusóboni pá pɔɔd pá páyɛ́ɛ sáád. 30Polɛ əgusəə poɔʼkɔ́, pəŋi poyɛ́ɛnɛn kɔ a kɛnɛŋ kɛ́ pasɛʼkóón pááŋan, ná podɛʼkɛ́ɛ ɔsɔd a ɛdɔɔgɛ ɛ́ koóna palɔɛgɛʼ pɛbán pá Táán. 31A niɛlɛʼ nɛáŋan nɛ́ɛn, polɛ əguloodi pəŋibáamɔɛ́d lɛ́ polɛ pɔɔ́n pá pɔɔd pá páyóóna palɔɛgɛʼ pɛbán pá Táán. 32Nkə anɛ́ɛ́n kímmú! Todáan yuudi, yibə́nəən nkə kɛ́ pɛmbáa pááŋan pə́yə́ʼtúmíí! 33Pəŋi nkud yɛ́ɛnɛ! Pəŋi ombod wó nfɛn! Poafɛga lɛ́ polɛ págɛɛlɛ lɛ́ podɛnjɛ́ɛ́n na nsɔ́ɔ́, pádɛyɛ́boodágɛ́dɛ a yug yɛ́ ɛgóón á! 34Kólɛ́ aa ádámɛ́gɛ́an, nyɔʼkɔ́ na pəŋi: Ndɛ́ɛ́ kiim mpodómɛn na palɔɛgɛʼ pɛbán pá Táán, na pɔɔd pá nsiŋ, na palɛŋ pɛcɛm pá fɔ́lɔ́b. Polɛ́ɛ́ koóna pə́mmú, póobaŋan pə́mmú a ɔmbásá. Pɔsɔ́g pə́mmú, polɛ́ɛ́ kobobááma na nsuə́ a puog poáŋan pó pɛɔ́sɔ́gɔ́lɔ́n, puə́buyə́njən a pálɛ́ɛg ngim yɛ́ páagɛɛn kɔ lɛ́ ná púbuúyəʼkəni. 35Áay anɛ́ɛ́n, maŋɔ́ má pɔɔd pá sáád piim pá páyóóna málɛ́ɛ́ kɛɛn a nto yaaŋan, Əgəə́bə́ə a maŋɔ́ má Ábɛl nyɔ́ ayɛ́ɛ sáád ɛ mɔɔd, agɛɛn əgiig a má Saʼkalɛ́as, mɔɔ́n ó Palasíi nyɔ́ poyóón a kɛgaágadɛ kɛ́ɛg lɛ́ na uʼkóó na kibóŋ kɛ́ pɛfɔny#23.35 Kɛ́lɛ náan a kálaʼtaʼ ɛ Siɛ 4.8; na a ɛ 2Kni 24.20-22 36Ndabodɛ́anɛ a fɔ́lɔ́b lɛ́ ndɛg yɛ́ɛnɛ ɛ́ nɛ́gɔŋ aa ɛlɛ́ɛ́ konyáŋɛnɛɛ́ pɔ́nɔ́ɔs ngim yɛ́ a pɛbán pɛ́ɛb.»

Yə́sus yɛɛ́lɛ́ɛ́ a kidíídí kɛ́ Yolósalɛm

(Lóʼk 13.34-35)

37«Əə́əy Yolósalɛm! Yolósalɛm, əə́əy na wɛ nyɔ́ olɛɛ́ agoóna palɔɛgɛʼ pɛbán pá Táán, pɔɔd pá Táán alɛɛ́ agodóman, waábodóan na aʼtáán lɛ́ pə́guə́ʼkən. Njúúnə lɛ́ nyágɔnyɛdɛn pɔɔ́n pááŋ a ɛbá yáam pɛnɛŋ wɔnɔ́ pɛnɛŋ, wɔnɔ́ ná ándɛ nsɛɛ yə́əgəə́gúlig pɔɔ́n a nfaáan yəəŋ. Náa pəŋi podɛʼkáagɛnyaáʼkɛnɛ! 38Táán alɛ́ɛ́ kobodóɛn uʼkóó wááŋan a kúfuʼ#23.38 Pódála tɛn náan a kálaʼtaʼ ɛ Siə 22.5 39Náa ndábodɛ́anɛ lɛ́, Əgəə́bə́ə nɛ́gɔŋ, podɛágɛʼtála kə́mmú súʼtə́ə́ ná polɛ́ɛ́ kusəlií poɔʼkɔ́: “Táán ágoyɛ́ɛlɛ kɔŋɛʼ, wɛ nyɔ́ alɛɛ́ əgiim a niiŋ nɛ́ Sə́dúk#23.39 Kɛ́lɛ náan a kálaʼtaʼ ɛ Pɛʼk 118.26 !” »

Currently Selected:

Maʼtɛ́as 23: yatDBL

Highlight

Copy