Luk 1

Daliri din chɛ ka Luk sabi yɛli Yisa yɛla

1Niriba pam daa sab’ yɛl’ shɛŋa din daa pun niŋ ti sani 2kaman bɛ ni daa nya li di piligu ni shɛm, ka moli di lahibal’ la. 3N dan’ Tiɔfilus, ka mmaŋmaŋ’ gba bɔhi baŋ dinkam daa niŋ maa zaŋ kana zuŋɔ, dinzuɣu ka n tɛhi ni di simdi ni n gba sab’ di yɛla ti a, 4ka di chɛ ka a baŋ yɛlimaŋli zaa zaŋ chaŋ bɛ ni pun yɛl’ a shɛlikam la polo.

Naawuni kahigi Jɔn dɔɣibu ni yɛn nyɛ shɛm wuhi

5 # 1 Yɛl 24.10 Naa Hɛrɔd ni daa diri Judia#1.5 JUDIA: Kpe ŋɔ di gbinni nyɛla Palɛstan tiŋgbɔŋ zaa bee Izraɛl tiŋgbɔŋ. saha shɛl’ la, ka maligumaani’ so daa beni ka o yuli booni Zakaria. O daa nyɛla Abija daŋ ni nira, ka o paɣ’ mi daa nyɛ Aduna daŋ ni nira, ka o yuli booni Ɛlizabɛt. 6Bɛ niriba ayi maa zaa daa nyɛla wuntizɔriba, ka daa doli ti Duuma Naawuni fukumsi zaligunim’ mini adiini soli kaya zaa ka ka galimi shɛli, 7amaa bɛ daa ka bia, dama Ɛlizabɛt daa nyɛla paɣiŋoo m-pahi ka bɛ niriba ayi maa zaa daa lan kurigi pam.

8Zakaria min’ o maligumaanitab’ daa yi tumdila maligumaanitali tuma deeri taba, 9ka di daa ti paag’ o ni o kpe Naawuni jɛmbu duu ti tuɣili tulaale zim kaman bɛ daadiini soli ni daa zali shɛm. 10Ka salo zaa daa kpalim samban’ ni suhiri Naawuni tulaale zim maa tuɣilibu saha. 11Ka ti Duuma malaika daa ti puhi zani Zakaria sani n-ʒe tulaale zim maa tuɣilibu shee nudirigu polo. 12Ka Zakaria daa nya malaika maa ka di gar’ o, ka dabiɛm lan gbaag’ o pam. 13Ka malaika maa yɛl’ o, “Zakaria, di chɛ ka dabiɛm mal’ a; Naawuni deeg’ a suhigu, ka a paɣ’ Ɛlizabɛt ni niŋ pua dɔɣi bidibiga, ka a ti bol’ o yuli Jɔn. 14A ni ti nya suhupiɛlli ka di niŋ a nyaɣisim, ka niriba pam gba suhuri ti paligi bia maa dɔɣibu zuɣu; 15#Kal 6.3 dama o ni ti nyɛla ninvuɣ’ titali ti Duuma sani. O ti ku nyu wain bee binnyura din mali kpiɔŋ. Ka Naawuni Shia Kasi ni ti pal’ o la saha shɛl’ o ma ni dɔɣ’ o. 16O ni ti labisi Izraɛlnim’ pam bɛ Duuma Naawuni sani yaha. 17#Mal 4.5-6 Ka o ni ti mali biɛrisuŋ mini yiko kaman Anabi Ilaija ni daa mali shɛm, ka o ni ti daŋ tooni ti lɛbigi bihi banim’ suhuri ti bɛ bihi, ka lɛbigi tipawumlinim’ suhuri ka bɛ gba doli wuntizɔriba yɛm soli, ka chɛ ka niriba mali shili gu bɛ Duuma.”

18Ka Zakaria yɛli malaika maa, “N kurigiya, ka m paɣ’ gba kurigi pam. Ka wula ka n ni tooi niŋ yɛlli ŋɔ yɛda?”

19 # Dan 8.16; 9.21 Ka malaika maa lan yɛli Zakaria, “Mani n-nyɛ malaika Gabirɛl ŋun ʒe Naawuni tooni la, ka o tim ma na ni n ti ti a lahibal’ suŋ ŋɔ. 20Amaa a ni bi niŋ n ni yɛl’ a shɛm maa yɛda zuɣu, a ni leei birigu ka ku lan tooi tɔɣisi yɛtɔɣa faashee n yɛligu ŋɔ zaa ti niŋ pali; di mi ti kul yɛn niŋla pali saha shɛli Naawuni ni zal’ li maa.”

21Ka ninvuɣ’ shɛb’ bɛn daa kpalim ʒe samban’ ni maa daa guhi Zakaria je, ka di daa gari ba o ni yuui Naawuni jɛmbu duu maa ni shɛm maa zuɣu. 22O ni daa ti yina, o daa kɔŋla yɛtɔɣa tɔɣisibu, ka bɛ baŋ ni o nya ʒii Naawuni jɛmbu duu maa ni, dama o daa kul malila o nuhi buɣisira, ka ku lan tooi tɔɣisi yɛtɔɣa yaha.

23Ka o tuma dabisa daa ti naai ka o kul’ o yiŋa. 24Di dabisa maa nyaaŋa ka o paɣ’ Ɛlizabɛt daa niŋ pua, ka sɔɣir’ omaŋa hal ti paai chira anu ka yɛra, 25“N Duuma n-teegi n yɛla, ka niŋ ma ŋ-ŋɔ ni o yihi ma vi ni niriba sani maa.”

Naawuni kahigi Yisa dɔɣibu ni yɛn nyɛ shɛm wuhi

26Ɛlizabɛt puu maa chira ayɔbu ni ka Naawuni daa tim malaika Gabirɛl Galili fɔntin’ shɛli din yuli booni Nazarɛt la 27#Mat 1.18 paɣipiɛl’ so ŋun yuli daa booni Mariama la sani. Bɛ daa zaŋ Mariama tila Naa Dauda zuliya ni do’ so ŋun yuli daa booni Yisifu la. 28Malaika maa ni daa ti paai Mariama sani o yɛl’ o mi, “M puhir’ a nyin’ ŋun mal’ alibarika pam ŋɔ, ti Duuma be a sani! A mal’ alibarika paɣiba ni.”

29Ka yɛtɔɣa maa daa gari Mariama pam ka o bɔhir’ o suhu, “ka bɔ puhigu n-lee bɔŋɔ?” 30Ka malaika maa yɛl’ o, “Mariama, di chɛ ka dabiɛm mal’ a, dama a mali zuɣusuŋ pam Naawuni sani. 31#Mat 1.21 Nyama, a ni niŋ pua n-dɔɣi bidibiga, ka bɛ ti bol’ o yuli Yisa. 32O ni ti niŋ ninvuɣ’ titali, ka bɛ ni ti boon’ o la Zallakudura Naa Bia, ka ti Duuma Naawuni ni ti zaŋ o yab’ Naa Dauda nam ti o, 33#2 Sam 7.12, 13, 16; Aiz 9.7 ka o ti su Yaakubu zuliya sahakam, ka o nam ti ku mali bahigu.”

34Di saha ka Mariama yɛli malaika maa, “N na ʒi doo. Ka wula ka dimbɔŋɔ ni tooi nani?”

35Ka malaika maa garigi yɛl’ o, “Naawuni Shia Kasi ni ti siɣ’ a zuɣu na, ka Zallakudura Naa yiko mahim ti gil’ a; dinzuɣu a ni ti yɛn dɔɣi bi’ so maa, bɛ ni ti boon’ o la bi’ suŋ ni Naawuni Bia.” 36Ka lan yɛli, “Nyama, a biɛli Ɛlizabɛt so bɛ ni yi booni paɣiŋoo la gba mali pua o ninkurilim ŋɔ ni; di chira ayɔbu m-bɔŋɔ; 37#Pil 18.14 dama Naawuni ŋun’ sani binshɛɣukam nanda.”

38Ka Mariama yɛli, “Chɛ ka di niŋ mani ŋun nyɛ ti Duuma dabili ŋɔ kaman a ni yɛli ma shɛm maa.” Di saha ka malaika maa daa ŋmaligi chaŋ ka chɛ o.

Mariama chaŋ ti kaai Ɛlizabɛt

39Dimbɔŋɔ nyaaŋa ka Mariama daa yiɣisi chaŋ yomyom ti paai zoya ni tin’ shɛli din be Judia tiŋgbɔŋ ni la 40n-kpe Zakaria yiŋ’ ti puhi Ɛlizabɛt. 41Ɛlizabɛt ni daa wum Mariama puhigu maa ka ŋun’ Ɛlizabɛt bia dam o pul’ ni, ka Shia Kasi daa pali Ɛlizabɛt 42ka o kuhi yɛli Mariama, “A mal’ alibarika paɣiba ni, ka bi’ so ŋun be a pul’ ni ŋɔ gba mal’ alibarika.” 43Ka lan yɛli, “Ka m mi lee nyɛla ŋuni ka n Duuma ma ti kani n sanna? 44Dama n ni kul wum a puhigu maa, bia ŋun be m pul’ ni maa dii dammi ni suhupiɛlli. 45Ka nyini ŋun niŋ yɛda ni ti Duuma ni yɛl’ a shɛlikam zaa shiri ni niŋ pali ŋɔ gba mal’ alibarika.”

Mariama wumpaɣibo yilli

46 # 1 Sam 2.1-10 Ka Mariama daa yɛli,

“N tibigiri n Duuma n suhu ni,

47ka n suhu paligi pam Naawuni

ŋun nyɛ n tiligira ŋɔ ni,

48 # 1 Sam 1.11 dama n nyɛla tarim’ dɔɣirili,

amaa o bi chɛ ma piibu di zuɣu.

Ka zuŋɔ zaŋ chana,

ʒiɛmani kam nim’ ni boli ma alibarika paɣa;

49dama ŋun nyɛ yikolana

ka o yuli nyɛ kasi ŋɔ

tum ma tuun’ kara.

50Bɛn zɔr’ o,

bɛna ka o mi zɔri nambɔɣu

ʒiɛmani zaŋ ti kpa ʒiɛmani.

51O wuhi kpiɔŋ,

ka wurim karimbaannima

bɛ suhuri ni tɛhi’ biɛri zuɣu,

52 # Ayu 5.11; 12.19 ka yihi nanim’ bɛ nama ni,

ka tibigi tarimba,

53ka dihi bɛn kpiri kum bindir’ suma,

ka kari bundaannim’ ni nuzaŋa bahi.

54O teeg’ o nambɔzɔbo yɛla,

ka sɔŋ o dabili Izraɛl

55 # Pil 17.7 kaman o ni daa lo ti yaannim’

bɛn nyɛ Ibrahimma min’ o zuliya alikauli shɛli

hal ni saha din ka bahigu la.”

56Ka Mariama daa kpalim Ɛlizabɛt sani kaman chira ata laasabu, ka naanyi kul’ o ya.

Bɛ dɔɣi Jɔn Baptaizira

57Ka Ɛlizabɛt dɔɣibu saha daa ti paai ka o dɔɣi bidibiga. 58Ka o ʒiʒiinitab’ min’ o dɔɣiriba daa wum ti Duuma ni zo o nambɔ’ shɛli maa yɛla, ka di niŋ bɛ min’ o zaa suhupiɛlli pam.

59 # Lɛv 12.3 Ka bia maa dɔɣim dali naba daa ti tuui, ka bɛ laɣimna ni bɛ ti gun’ o. Bɛ daa bɔri ni bɛ zaŋla o ba yuli Zakaria la ti o. 60Amaa ka o ma daa bi saɣi ka yɛli ba, “Bolimiy’ o la Jɔn.”

61Ka bɛ yɛli Ɛlizabɛt, “So ka yi zuliya ni ka o yuli booni Jɔn.” 62Di saha ka bɛ daa buɣisi bɔh’ o ba Zakaria ni bɛ baŋ o ni bɔri ni bɛ bol’ o bia maa yu’ shɛli. 63Ka o mi buɣisi yɛli ba ni bɛ tim’ o gbaŋ; ka bɛ daa ti o gbaŋ maa ka o sab’ yɛli, “Bia maa yuli Jɔn.” Ka di daa gari sokam pam. 64Di saha maa ka Zakaria zilinjila daa dii lɔrigi, ka o nya noli gbaai yɛtɔɣa tɔɣisibu ka paɣiri Naawuni. 65Ka dabiɛm daa kpe bɛ ʒiʒiinitab’ maa zaa, ka yɛlli ŋɔ daa moli gili Judia zoya zuɣu tinsi zaa. 66Ka bɛnkam zaa daa wum li maa zaŋ li niŋ bɛ suhuri ni ka bɔhira, “Bɔtaa nira n-lee ti yɛn nyɛ bia ŋɔ?” Dama sokam daa baŋya ni ti Duuma zaɣa be o ni.

Zakaria daanabitali yɛtɔɣa

67Ka Naawuni Shia Kasi daa siɣina ti pali bia maa ba Zakaria, ka o tɔɣisiri anabitali yɛtɔɣa yɛra,

68“Paɣimiya Izraɛlnim’ Duuma Naawuni,

dama o kana ti kaag’ o niriba ka tiligi ba.

69O tim tiligira so ŋun nyɛ kpiɔŋlana

ŋun yi o dabili Naa Dauda zuliya ni na

70kaman o ni daa chɛ ka o daanab’ suma

yɛli shɛm kurimbuni la.

71Bɛ daa yɛliya ni ti ni ti tiligi ti dimnim’ nuu ni,

ka lan tiligi bɛnkam zaa je ti gba nuu ni.

72Ka Naawuni ni daa lo

ni o ni zo ti yaannim’

nambɔɣu shɛm la niŋ pali,

ka teeg’ o daalikauli suŋ

73din nyɛ o ni daa po pɔ’ shɛli

zaŋ chaŋ ti yab’ Ibrahimma polo la yɛla.

74O daa poya yɛli ni o ni chɛ

ka ti tiligi ti dimnim’ nuu ni,

ka jɛmdi ŋun’ ti Duuma Naawuni

ka ku lan zɔri dabiɛm;

75ka ni be kasitali

mini wuntitali ni o sani

hal ni ti nyɛviya tariga.

76 # Mal 3.1 “Ka nyini m bia,

bɛ ni ti boon’ a la

Zallakudura Naa daanabi,

dama a ni ti daŋ ti Duuma tooni

nti mal’ o soya gu o;

77ka o niriba ti baŋ tiliginsim ni nyɛ shɛli

bɛ taali chɛ m-paŋ puuni.

78Ti Duuma Naawuni nambɔzɔbo zuɣu,

o yi ti chɛ ka di biɛɣ’ maa neesim neei

yi alizanda ni na,

79 # Aiz 9.2 ka bɛn be zibisim ni mini kum mahim ni

ni ti nya neesim maa,

ka di ni ti wuhi ti ti ni

yɛn doli so’ shɛli nya suhudoo.”

80Ka bia maa daa ti zooi m-mali yaa, ka lan mali suhukpeeni pam, ka daa chaŋ ti be mɔɣu ni hal ka o saha ti paai, ka o naanyi yih’ omaŋ’ palo Izraɛlnim’ sani.

Currently Selected:

Luk 1: RLDB

Highlight

Copy