Luk 24

Yisa kum ni neebu

(Matiu 28.1-10; Maak 16.1-8; Jɔn 20.1-10)

1Ka bakɔi piligu dali biɛɣu daa ti neerina, ka paɣiba maa zaŋ tulaale shɛli bɛ ni daa mali zal’ la chaŋ siliga maa gbini. 2Bɛ daa paaya nti nya ka kuɣili din daa yo siliga maa nol’ la biligimi ka chɛ di noli maa. 3Ka paɣiba maa kpe di puuni nti bi nya ti Duuma Yisa niŋgbuŋ; 4ka di gari ba pam ka bɛ na kpalim ʒiɛya. Di saha maa ka dɔbba ayi bɛn daa ye binyɛr’ nyɛlisira dii puhi zani paɣiba maa sani, 5ka dabiɛm kpe ba, ka bɛ zaŋ bɛ zuɣuri silim tiŋa. Ka dɔbba ayi maa bɔhi ba, “Bɔ n-niŋ ka yi bɔri ninvuɣ’ nɛɔŋ kpiimba ni? 6O lan ka kpe, o neei kum ni. Teemiya o ni daa na be Galili ka yɛli ya 7#Mat 16.21; 17.22-23; 20.18-19; Maak 8.31; 9.31; 10.33-34; Luk 9.22; 18.31-33 ni bɛ ni ti zaŋ Daadam Bia niŋ alahichinim’ nuu ni ka bɛ kpah’ o tabili dapulli zuɣu, amaa ni di daba ata dali o ni ti neei kum ni la.” 8Ka paɣiba maa daa teei Yisa yɛligu maa, 9ka ŋmaligi siliga maa gbini n-chaŋ ti yɛli Yisa nyaandoliba piniyini la mini bɛnkam pahi bɛ zuɣu binshɛlikam din daa niŋ maa zaa yɛla. 10Mariama ŋun daa yi Magdala na la mini Jɔana ni Jeemsi ma Mariama ni paɣ’ shɛb’ bɛn daa pahi bɛ zuɣu n-daa nyɛ bɛn yɛli Yisa tuumba maa di yɛla maa, 11amaa ka bɛ daa lihi paɣiba maa yɛligu maa kaman lahibal’ kpɛma, ka daa bi dihi li tabili. [ 12Ka Pita daa yiɣisi zo n-chaŋ siliga maa gbini nti kurim lihi di puuni n-nya ka kahiŋga kɔŋko n-doya; ka o ŋmaligi kuna, ka bɔhir’ o suhu din niŋ maa zuɣu.]

Yisa chirig’ o nyaandoliba ayi

(Maak 16.12-13)

13Dindali maa ka bɛ ni niriba ayi daa kuni tiŋkpan’ shɛli din yuli booni Ɛmaus, ka di mini Jɛrusalɛm daa nyɛ kaman maali ayopɔin la, 14ka tɔɣisiri binshɛɣukam zaa din daa niŋ maa yɛla. 15Bɛ ni daa tɔɣisiri di yɛla chani maa ka Yisa chirigi ba sol’ ni, ka bɛ min’ o doli chana; 16amaa ka bɛ daa bi tooi baŋ o. 17Ka o ti bɔhi ba, “Alizam’ bɔ ka yi lee diri chani maa?”

Ka bɛ kpalim zani ni suhugarigu. 18Ka bɛ ni yino ŋun yuli daa booni Kliɔpas la bɔh’ o, “A kɔŋko n-nyɛ sana Jɛrusalɛm ŋun na bi wum yɛl’ shɛŋa din yol’ niŋ nimaani daba ayi ŋɔ sunsuuni la?”

19Ka o bɔhi ba, “Yɛl’ bɔ?”

Ka bɛ yɛl’ o, “Nazarɛt do’ so ŋun yuli booni Yisa, ka o daa nyɛ anab’ titali o tumtumsa min’ o yɛtɔɣa ni zaŋ chaŋ Naawuni mini salinim’ zaa san’ la yɛla. 20Ka ti maligumaaniba kpamba mini tiŋ’ maa ni kpamba daa zaŋ o ti, ka bɛ di o saria n-yɛli ni bɛ kum’ o, ka bɛ daa kpah’ o tabili dapulli zuɣu. 21Amaa tinim’ daa niŋ tahima ni ŋuna n-yɛn tiligi Izraɛlnima; ka din pahi ŋɔ zaa ha zuɣu nyɛla, di ni niŋ maa zuŋɔ daba ata m-bɔŋɔ. 22Ka ti ni paɣ’ shɛb’ yɛl’ ti shɛli ka di gari ti pam: Asibaasi ŋɔ ka bɛ daŋ yibu chaŋ siliga maa gbini 23nti bi nya Yisa siliga maa ni; ka labina ti yɛli ti ni bɛ naɣ’ nyala malaikanim’ ʒii, ka malaikanim’ maa yɛli ba ni o neei kum ni. 24Ka ti ni shɛb’ chaŋ siliga maa gbini nti nya ka paɣiba maa ni yɛli shɛm maa nyɛla yɛlimaŋli, dama bɛ shiri bi nya o.”

25Di saha ka Yisa ŋmaligi yɛli ba, “Yinim’ suhutunanim’ bɛn bi niŋdi anabinim’ yɛligu yɛda ŋɔ! 26Ka daɣila di daa bi simdi ni Masia nya wahala ŋɔ zaa ka naanyi nya jilima?” 27Ka o daa piligi wuhiri ba Anabi Musa min’ anabinim’ zaa ha litaafinim’ ni daa yɛli ŋun’ Yisa yɛla shɛm.

28Bɛ ni daa ti miri tiŋkpan’ shɛli bɛ ni kuni maa, ka o ŋmani ŋun bɔri ni o garila tooni. 29Ka bɛ daa goog’ o yɛl’ o, “Kpalimmi ya ŋɔ n-gbe ti sani, dama wuntaŋ’ luya ka yuŋ zibira.” Ka o daa doli ba kpe bɛ yiŋa. 30Ka o mini ba daa ti ʒini ni bɛ di bindirigu, ka o zaŋ bɔrɔbɔro kpilli n-niŋ alibarika niŋ di ni ka ŋmahiŋmahi li tari ba. 31Di saha ka bɛ nina neei ka bɛ baŋ o, ka o daa dii bɔrigi ka chɛ ba ka bɛ bi lan nya o. 32Ka bɛ bɔhi taba, “O ni di tɔɣisiri ti yɛtɔɣa sol’ ni ka kahigiri Naawuni litaafinim’ wuhiri ti la, di di bi kpe ti suhuri ni pam?”

33Ka bɛ daa dii yiɣisi di saha maa lab’ Jɛrusalɛm nti nya ka Yisa tuumba piniyini maa mini ninvuɣ’ shɛb’ laɣim ʒiya 34yɛra, “Yɛlimaŋli ti Duuma shiri neei kum ni; hal o yi Saimɔn zuɣu.”

35Ka niriba ayi maa gba daa yɛli ba binshɛɣukam zaa din daa niŋ sol’ ni mini bɛ ni daa lan baŋ o shɛm o bɔrɔbɔro ŋmahibu ni la yɛla.

Yisa yi o nyaandoliba zuɣu

(Matiu 28.16-20; Maak 16.14-18; Jɔn 20.19-23; Tuma 1.6-8)

36Bɛ ni daa na kul tɔɣisiri lala maa ka Yisa maŋmaŋ’ dii zani bɛ sunsuuni yɛli ba, “Naawuni tim’ ya suhudoo!”

37Ka dabiɛm daa kpe ba ka bɛ ni sɔhira, dama bɛ daa tɛhiya ni alizini ka bɛ nya maa. 38Ka o bɔhi ba, “Bɔ n-lee muɣisi ya bee bɔ n-leei niŋ ka yi biɛhindi yi suhuri ni? 39Lihimiya n nuhi mini n naba, ka baŋ ni mani m-bala. Tabisimiya ma nya, dama alizini ka niŋgbuŋ mini kɔba ka n ni mali shɛm ŋɔ.”

[ 40O ni daa yɛl’ lala naai, ka o teeg’ o nuhi min’ o naba wuhi ba.] 41Bɛ ni daa na kul bi niŋ yɛda suhupiɛlli zuɣu ka biɛhindi maa ka o bɔhi ba, “Yi mali bindir’ shɛli kpe ka n ni di?” 42Ka bɛ daa zaŋ zahin’ shɛrili ti o; 43ka o zaŋ li ŋubi bɛ zaa nini maa ni.

Naawuni daalikauli Shia Kasi deebu

44Ka Yisa daa yɛl’ o nyaandoliba maa, “N ni daa be yi sani ka yɛri ya yɛtɔɣ’ shɛŋa la m-bɔŋɔ: Binshɛɣukam zaa din sabi Anabi Musa min’ anabinim’ litaafinim’ ni ni Yila litaafi ni zaŋ chaŋ n polo la daa kpami ni di zaa ha niŋ pali.” 45Di saha ka o daa neei bɛ nini ni bɛ baŋ Naawuni litaafinim’ maa gbinni. 46Ka yɛli ba, “Di sabi zali ni faashee Masia di wahala, ka lan neei kum ni daba ata dali; 47ka bɛ ti yihi tuuba niŋbu mini alahichi chɛ m-paŋ waazu ŋun’ Masia yul’ ni n-ti zuliya kam zaa, ka di piligu shee mi yɛn nyɛla Jɛrusalɛm zaŋ nti kpa luɣilikam. 48Yinim’ mi n-nyɛ n shɛhiranim’ dimbɔŋɔnim’ zaa ha ni. 49#Tuma 1.4 Nyamiya! N ni siɣisi ya m Ba Naawuni ni daa lɔn ya alikauli shɛl’ la na, dinzuɣu kul benya Jɛrusalɛm hal ti deei yiko shɛli din yɛn yi alizanda ni na maa.”

Yisa alizanda ni labbu yɛla

(Maak 16.19-20; Tuma 1.9-11)

50Ka Yisa min’ o nyaandoliba maa daa mali ti paai Bɛtani, ka o daa kpuɣ’ o nuhi zuɣusaa n-niŋ alibarika niŋ bɛ ni. 51#Tuma 1.9-11 O ni daa niŋdi alibarika niŋdi bɛ ni saha shɛli maa ka o daa yi bɛ sani lab’ alizanda ni. 52Ka bɛ daa jɛm o, ka lan lab’ Jɛrusalɛm ni suhupiɛlli 53nti kul be Naawuni jɛmbu duu m-paɣiri Naawuni.

Currently Selected:

Luk 24: RLDB

Highlight

Copy