Luk 4

Sintani ni zahim Yisa shɛm

(Matiu 4.1-11; Maak 1.12-13)

1Naawuni Shia Kasi daa palila Yisa ka o yi Jɔɔdɛn mɔɣili polo na, ka Naawuni Shia Kasi maa daa zaŋ o chaŋ mɔɣu ni 2ka o ti niŋ ni biɛɣ’ pihinahi; ka Sintani daa ti zahim o. Yisa daa bi di shɛli di dabisa maa ni, ka di dabisa maa daa ti gari ka kum wum o.

3Ka Sintani daa yɛl’ o, “A yi shiri nyɛla Naawuni Bia, nyin’ chɛ ka kuɣili ŋɔ leei bindirigu.”

4 # Zal 8.3 Ka Yisa yɛl’ o, “Di sabiya, ‘Pa bindirigu kɔŋko zuɣu ka daadam be.’ ”

5Ka Sintani daa zaŋ o du zo’ shɛli zuɣu nti wuh’ o dunia ŋɔ nama zaa nini kahimbu ni neebu yim ni 6ka yɛl’ o, “N ni zaŋ nama ŋɔ sulinsi mini di jilima zaa ti a, dama mani n-su li ka ni tooi zaŋ li ti n ni bɔri so. 7Dinzuɣu a yi ni jɛm ma, di zaa ni leeg’ a dini.”

8 # Zal 6.13 Ka Yisa garigi yɛl’ o, “Di sabiya, ‘Sal’ kul ni jɛmla o Duuma Naawuni kɔŋko, ka pa ni so yaha.’ ”

9Di nyaaŋa ka Sintani daa zaŋ o chaŋ Jɛrusalɛm ti du tam Naawuni jɛmbu duu zuɣusaa kpaakpaanyom ni ha ka yɛl’ o, “A yi shiri nyɛla Naawuni Bia, nyin’ bahim’ amaŋ’ lu tiŋ’ sa; 10#Yila 91.11 dama di sabiya, ‘Naawuni ni bah’ o malaikanim’ noli ka bɛ gbib’ a ka gul’ a.’ 11#Yila 91.12 Di lan sabi yaha, ‘Bɛ ni gbib’ a bɛ nuhi ni, ka a napɔŋ ku tuui kuɣili kam.’ ”

12 # Zal 6.16 Di saha ka Yisa garigi yɛl’ o, “Di mi lan sabi yɛli, ‘Miri ka a zahim a Duuma Naawuni.’ ”

13Sintani ni daa zahim Yisa zahimbu balibu kam ŋɔ zaa naai ka o daa na chɛ o, ka lan bɔri so’ shɛli yaha.

Yisa pilig’ o tuma

(Matiu 4.12-17; Maak 1.14-15)

14Naawuni Shia Kasi yiko ni ka Yisa daa lab’ Galili tiŋgbɔŋ ni, ka bɛ daa mol’ o yɛla gili di tiŋgbɔŋ maa ni zaa. 15Ka o daa kpɛri bɛ jɛmbu duri ni ti wuhiri ba, ka sokam zaa daa tibigir’ o pam.

Yisa ya Nazarɛtnim’ zaɣis’ o

(Matiu 13.53-58; Maak 6.1-6)

16Yisa daa ti chaŋ Nazarɛt bɛ ni daa wubis’ o tin’ shɛl’ ni la n-daa ti chaŋ Yɛhudianim’ jɛmbu duu Vuhim Dabisili dali kaman o ni daa yi pun niŋdi shɛm la. Ka o daa ti yiɣisi zani ni o karim, 17ka bɛ zaŋ Anabi Aizaia litaafi ti o, ka o kpabigi li bo n-nya luɣ’ shɛli din daa sab’ yɛli,

18 # Aiz 61.1-2 “Ti Duuma Shia Kasi be n zuɣu,

dama o pii ma ni

n yihi lahibal’ suŋ waazu ti tarimba.

O tim ma na ni n ti chɛ ka

bɛn nyɛ daba la yi dabitim ni,

ka chɛ ka zoomba nina neei,

ka fa bɛn be muɣisigu ni la bahi,

19 ka mol’ ti Duuma faako tibu saha molo.”

20Ka o daa kpab’ litaafi maa zaŋ li labisi ti jɛmbu duu maa sɔŋda so ŋun ʒe nimaani ka naanyi ʒini. Ka bɛnkam daa be jɛmbu duu maa ni kpaai bɛ nina kpa o. 21Ka Yisa daa piligi yɛri ba, “Yɛla ŋɔ yipa niŋ pali yi sani zuŋɔ dabisili ŋɔ.” 22Ka di daa gari bɛ zaa, ka bɛ paɣir’ o yɛtɔɣ’ suma din yi o nol’ ni na maa zuɣu, ka bɔhiri taba, “Pa Yisifu dapal’ la m-bala?”

23Ka Yisa yɛli ba, “M pun mi ni yi ni ŋahi ma ŋahili ŋɔ yɛli, ‘Timlana, tibim’ amaŋa!’ Ka ni lan yɛli ma, ‘Niŋmi ti ni daa wum ni a niŋ shɛm Kapɛrinium la amaŋmaŋ’ ya ŋɔ!’ ” 24#Jɔn 4.44 Ka lan yɛli ba, “Achiikatim, yɛlimaŋli ka n yɛri ya, anabi kam maŋmaŋ’ yanim’ pun bi deer’ o. 25#1 Nan 17.1 N yɛri ya mi ni Anabi Ilaija saha sanzali ni daa zani yuma ata ni chira ayɔbu ka kum lu luɣilikam, ka pakoya daa yam Izraɛl tiŋgbɔŋ ni la, 26#1 Nan 17.8-16 Naawuni daa bi chɛ ka Anabi Ilaija chaŋ bɛ so sani; amaa pakol’ so ŋun daa be tin’ shɛli din yuli booni Zarɛfat Sidɔn tiŋgbɔŋ ni la sani kɔŋko ka o daa chɛ ka o chaŋ. 27#2 Nan 5.1-14 Anabi Ilaisha saha la kɔnsi pam daa be Izraɛl tiŋgbɔŋ ni, amaa bɛ so daa bi nya tibbu; Siria do’ so ŋun yuli daa booni Neeman la kɔŋko n-daa nya tibbu.” 28Ka suli daa ku bɛnkam zaa be jɛmbu duu maa ni n-wum Yisa ni yɛli shɛm maa. 29Ka bɛ daa yiɣisi daag’ o yihi bɛ tiŋ’ maa tariga nti zaŋ o tam bɛ tiŋ’ maa ni daa me n-tam zo’ shɛli zuɣu naŋgbaŋgbiriŋ ni bɛ daag’ o luhi zoli maa lɔŋni sa ka o kpi. 30Amaa ka o daa tim bɛ sunsuuni gari chaŋ o chandi.

Alizin’ biɛɣu ni ʒi do’ so zuɣu yɛla

(Maak 1.21-28)

31Ka Yisa daa chaŋ ti kpe Galili tiŋgbɔŋ ni fɔntin’ shɛli din yuli booni Kapɛrinium la, ka Vuhim Dabisili dali daa ti paai ka o gbaai niriba wuhibu. 32#Mat 7.28-29 Ka o ni daa wuhiri ba shɛm maa daa gari bɛnkam wum li pam, dama o yɛtɔɣa maa daa nyɛla din mali yiko. 33Di saha ka do’ so ŋun daa be jɛmbu duu maa ni ka alizin’ biɛɣu ʒi o zuɣu kuhi pam yɛli, 34“Mbayooi! Ti min’ a bɔ ni, nyin’ Yisa Nazarɛt nira ŋɔ? A kamina ni a ti bahi ti yoli? M mi a ni nyɛ so: A nyɛla Naawuni Ninvuɣ’ Suŋ so o ni tim na.”

35Ka Yisa daa tahi alizin’ biɛɣu maa zuɣu yɛli, “Fom’ a noli ka wara!” Ka alizin’ biɛɣu maa daa luhi doo maa bɛ sunsuuni, ka chaŋ ka chɛ o, ka bi ti o daŋa.

36Ka di daa niŋ niriba maa alahiziba pam ka bɛ bɔhiri taba, “Yɛtɔɣ’ bɔ ka doo ŋɔ lee yɛli ŋɔ? O mali yiko ka su fukumsi hal ka alizin’ biɛri ti deer’ o noli ka zɔri ka chɛri bɛ ni ʒi shɛb’ zuɣu.” 37Ka o yɛla daa moli gili di tiŋgbɔŋ maa ni zaa.

Yisa tibi barinima

(Matiu 8.14-17; Maak 1.29-34)

38Yisa daa yiɣisi bɛ jɛmbu duu maa ni yi n-chaŋ ti kpɛla Saimɔn yiŋa; ka Saimɔn deempaɣa niŋgbuŋ daa bii pam, ka bɛ balim Yisa ni o chɛ ka o kpaŋ. 39Ka o daa zani paɣ’ maa zuɣusaa n-tahi dɔro maa zuɣu, ka paɣ’ maa niŋgbun’ biisim maa maai, ka o dii yiɣisi niŋ ba saani.

40Wuntaŋ’ ni daa ti lura, ka sokam zaŋ bɛ bar’ shɛb’ dɔro balibu kam ni mali tahi Yisa sanna; ka o daa zaŋ o nuhi pa bɛ zaa zuɣu ka bɛ kpaŋ. 41Ka alizin’ biɛri gba daa zo ka chɛ niriba pam ka kuhiri yɛra, “A nyɛla Naawuni ŋun be ŋɔ Bia!”

Alizin’ biɛri maa daa mi ni ŋuna n-nyɛ Masia, dinzuɣu ka Yisa daa tahiri bɛ zuɣu ka bi tiri ba soli ni bɛ yɛli shɛli yaha.

Yisa yihi waazu Yɛhudianim’ jɛmbu duri ni

(Maak 1.35-39)

42N-yi biɛɣ’ asibaasi, ka Yisa daa yiɣisi chaŋ mɔɣu ni. Ka niriba maa daa kar’ o naba nti bo n-nya o, ka bi saɣi ni o lan woligi ba; 43amaa ka o yɛli ba, “Di nyɛ ma la talahi ni n chaŋ tin’ shɛŋa gba ni ti yihi ba Naawuni nam lahibal’ suŋ waazu, dama di zuɣu ka Naawuni tim ma na.”

44Ka o daa chani gindi Judia tiŋgbɔŋ ni zaa yihiri waazu Yɛhudianim’ jɛmbu duri ni.

Currently Selected:

Luk 4: RLDB

Highlight

Copy