Luk 5

Yisa ni tuui bol’ o nyaandoliba shɛm

(Matiu 4.18-22; Maak 1.16-20)

1Dahin shɛli ka Yisa daa ti ʒe Gɛnɛsarɛt Teeku noli, ka niriba pam kpaɣiri chan’ o sani ni bɛ ti wum Naawuni yɛligu. 2Ka o daa nya ŋarima ayi ka di ʒe duli; kulipalinima n-daa chɛ li zali ka chaŋ ti paɣiri bɛ lansi. 3#Mat 13.1-2; Maak 3.9-10; 4.1 Ka o daa kpe ŋariŋ shɛli din nyɛ Saimɔn din’ ni, ka balim o ni o tirisim’ li zal’ o tooni biɛla. Ka o daa ʒini ŋariŋ maa ni wuhiri niriba maa.

4O ni daa ti wuhi ba naai ka o yɛli Saimɔn, “Chamiya teeku ŋɔ bulli ni ha ti lab’ yi lansi maa gbahi zahim.”

5 # Jɔn 21.3 Ka Saimɔn yɛl’ o, “N dana, ti sa pun lab’ li mi yuŋ la zaa ka bi gbaai hal zin’ yino gba; amaa a ni kul yɛli ma shɛm ŋɔ zuɣu, n ni lab’ li.” 6#Jɔn 21.6 Ka bɛ daa niŋ lala shiri gbahi zahim pam, hal ka bɛ lansi maa ti pili chɛhibu; 7ka bɛ gahi bɛ kulipal’ tab’ nuu ni bɛ kana ti sɔŋ ba. Ka bɛ daa chaŋ ti sɔŋ ba, ka bɛ yihi zahim maa pali ŋarima ayi maa zaa hal ka di ti yɛn shim. 8Saimɔn Pita ni daa nya lala maa, ka o damdi Yisa tooni yɛr’ o, “N Duuma, m bi simdi ni m mir’ a, dama n nyɛla alahichilana.”

9Bɛ ni daa gbahi zahim maa shɛm maa zuɣu ka di daa niŋ Saimɔn mini bɛnkam zaa be o sani maa alahiziba pam. 10Ka di daa niŋ Zɛbidii bihi Jeemsi mini Jɔn bɛn daa nyɛ Saimɔn tumtumdi’ tab’ la gba alahiziba. Ka Yisa yɛli Saimɔn, “Di zɔri dabiɛm, a nyɛla kulipal’ ŋun gbahiri zahim, amaa zuŋɔ zaŋ chana, a ni leela ŋun vɔri ninsalinim’ tiri Naawuni.”

11Bɛ ni daa zaŋ bɛ ŋarima maa na ti zali duli, bɛ daa chɛla bɛ binshɛɣukam maa zaa ka doli Yisa.

Yisa tibi kɔŋlana

(Matiu 8.1-4; Maak 1.40-45)

12Yisa daa ti be tin’ shɛl’ ni, ka kɔŋ’ ni daa wuligi do’ so niŋgbuŋ zaa ka o sanna ti damd’ o tooni balind’ o yɛra, “N dana, a yi di saɣi, a naan chɛ ka n kɔŋ’ ŋɔ naai ka n kpe n tab’ ni.”

13Ka Yisa daa teeg’ o nuu shih’ o ka yɛli, “N saɣiya, di naama!” Ka o kɔŋ’ maa dii naai. 14#Lɛv 14.1-32 Ka Yisa kpah’ o zuɣu ni yɛli, “Miri ka a yɛli so di yɛla; amaa cham’ ti zaŋ amaŋ’ wuhi maligumaana, ka mali sara shɛli Anabi Musa ni daa sab’ zali zaŋ chaŋ kɔŋ’ tibbu polo la; dina n-ni niŋ a kpaŋbu maa shɛhira niriba sani.”

15Ka Yisa yuli daa maan du pam chaŋ haliya, ka salo pam daa laɣimna ni bɛ ti wum o yɛtɔɣa, ka nya bɛ dɔriti tib’ kpaŋ. 16Ka Yisa daa yi yiɣisiri bɛ sani chani mɔɣu ni ti suhiri Naawuni.

Yisa tibi Gbalikpimalana

(Matiu 9.1-8; Maak 2.1-12)

17Yisa daa ti lan wuhiri niriba dahin’ shɛli, ka Farisiinim’ mini Naawuni zaligubaŋdi’ shɛb’ daa ʒi m-mir’ o; bɛ daa yila Jɛrusalɛm mini Galili ni Judia tiŋkpansi na. Ka ti Duuma yiko din daa chɛ ka Yisa tibiri barinim’ maa daa be ŋun’ Yisa sani. 18Ka ninvuɣ’ shɛb’ daa zaŋ bar’ so ŋun gbaya zaa kpi n-niŋ amaŋka ni ʒi o kana ti bɔri soli ni bɛ zaŋ o ti sɔŋ Yisa tooni. 19Amaa ka salo galisim zuɣu daa chɛ ka bɛ kɔŋ o zaŋ kpe Yisa sani; ka daa dula duu zuɣusaa ti chib’ voli n-zaŋ o min’ amaŋka maa tiri voli maa ni siɣisi li ti sɔŋ Yisa tooni. 20Yisa ni daa nya ka bɛ niŋ o yɛda shɛm maa ka o yɛli bar’ maa, “Zɔri, n chɛ a daalahichi paŋ a.”

21Ka Naawuni zaligubaŋdiba mini Farisiinim’ maa daa bɔhiri bɛ suhuri ni yɛra, “Bɔ n-niŋ ka doo ŋɔ mɔri Naawuni shɛm ŋɔ? Ŋuni n-lee ni tooi chɛ niriba daalahichi paŋ ba ka pa ni Naawuni kɔŋko?”

22Ka Yisa daa baŋ bɛ suhuri ni tɛha maa ka bɔhi ba, “Bɔ n-niŋ ka yi bɔhiri yi suhuri dimbɔŋɔnim’ zuɣu? 23Yɛla ayi ŋɔ sunsuuni dini n-lee be asama ni nira yɛli: A yi yɛli so ni a chɛ o daalahichi paŋ o bee a yi yɛl’ o ni o yiɣisim’ chaŋ?” 24Ka lan yɛli ba, “Amaa m bɔrimi ni yi baŋ ni Daadam Bia mali yiko din chɛri niriba daalahichi paŋdi ba dunia ŋɔ ni.” Di saha ka o ŋmaligi yɛli doo ŋun gbaya kpi maa, “N yɛr’ a mi, yiɣisima n-zaŋ a daamaŋka kuli!”

25Ka doo maa dii yiɣisi zaŋ o daamaŋka maa yi bɛ zaa ninni n-kuni ka paɣiri Naawuni. 26Ka di daa niŋ bɛ zaa alahiziba, ka dabiɛm kpe ba pam, ka bɛ paɣiri Naawuni yɛra, “Ti nya alahiziba tuuni zuŋɔ.”

Yisa boli Lɛvi

(Matiu 9.9-13; Maak 2.13-17)

27Dimbɔŋɔ nyaaŋa ka Yisa daa yi nti nya farigudeer’ so ŋun yuli booni Lɛvi, ka o ʒi farigu deebu shee; ka Yisa yɛl’ o, “Yiɣisim’ doli ma.” 28Ka o daa chɛ binshɛɣukam ka yiɣisi dol’ o.

29Ka Lɛvi maa daa niŋ Yisa saani pam o yiŋa, ka farigudeeriba pam mini ninvuɣ’ shɛb’ daa pahi Yisa min’ o nyaandoliba zuɣu laɣim ʒiya diri bindirigu maa. 30#Luk 15.1-2 Ka Farisiinim’ mini Naawuni zaligubaŋdiba bɛn daa be bɛ ni galim Yisa nyaandoliba maa ka bɔhi ba, “Bɔzuɣu ka yi mini farigudeeriba ni alahichinim’ laɣim timdi diri ka nyura?”

31Ka Yisa daa yɛli ba, “Bɛn mal’ alaafee bi bɔri dɔɣite naɣila bɛn biɛra. 32Pa wuntizɔriba zuɣu ka n kana, amaa alahichinim’ tuuba niŋbu zuɣu ka n kana.”

Nol’ lɔbu yɛla

(Matiu 9.14-17; Maak 2.18-22)

33Ka bɛ daa yɛli Yisa, “Jɔn Baptaizira mini Farisiinim’ nyaandoliba lɔri noli waawaayili ka suhiri Naawuni, amaa ka nyin’ nyaandoliba bɛn’ kul diri ka nyura.”

34Ka o bɔhi ba, “Yi ni tooi chɛ ka aŋgo zɔnim’ lo noli aŋgo ni be bɛ sani saha shɛli? 35Amaa saha kanna ka bɛ ni ti yihi aŋgo maa bɛ sani, di dabisa maa puuni ka bɛ ni ti lo noli.”

36Ka o daa lan ŋahi ba ŋaha ŋɔ yɛli, “So na ʒi n-tooi binyɛr’ palli tani n-liɣi binyɛr’ kurili; dama o yi niŋ lala o cheei binyɛr’ palli maa, ka tam’ palli din liɣi binyɛr’ kurili maa mi ku ŋman’ li. 37So mi ku saɣi zaŋ da’ palli le da’ kol’ kura ni, dama o yi niŋ lala da’ palli maa ni chɛhichɛhi kol’ kura maa, ka dam maa kpaai bahi, ka kola maa gba saɣim. 38Dinzuɣu bɛ zaŋdi da’ palli lɛrila dakol’ pala ni. 39Ninvuɣ’ so ŋun nyu dam mili mi bi bɔri da’ palli, dama o yɛrimi ni da’ kurili ko n-nyaɣisi o sani.”

Currently Selected:

Luk 5: RLDB

Highlight

Copy