Luk 6

Vuhim Dabisili dali yɛla

(Matiu 12.1-8; Maak 2.23-28)

1 # Zal 23.25 Di daa ti lu Vuhim Dabisili dali, ka Yisa min’ o nyaandoliba tim so puu ni garita, ka o nyaandoliba maa piligi kabisiri chi ŋmɛmdi bɛ nuhi ni ŋubira. 2Ka Farisiinim’ shɛb’ daa bɔhi ba, “Bɔ n-niŋ ka yi tumdi din chihiri Vuhim Dabisili dali?”

3 # 1 Sam 21.1-6 Ka Yisa bɔhi ba, “Yi na ʒi n-karim Naa Dauda ni daa niŋ shɛm kum ni daa ti wum o mini bɛn be o san’ la yɛla? 4#Lɛv 24.9 O daa chaŋ ti kpɛla Naawuni jɛmbu duu nti ŋub’ sara maligu bɔrɔbɔro shɛŋa din daa chihiri ni so ŋubi naɣila maligumaaniba kɔŋko la, hal ka daa pii li ti ti bɛn daa be o sani maa.”

5Ka lan yɛli ba, “Daadam Bia n-su Vuhim Dabisili dali gba.”

Yisa tibi bɔɣukpiŋlana

(Matiu 12.9-14; Maak 3.1-6)

6Ka di daa ti lu Vuhim Dabisili dali yaha ka Yisa lan kpe Yɛhudianim’ jɛmbu duu ti wuhiri niriba, ka do’ so ŋun nudirigu bɔɣu kpi daa beni. 7Ka Naawuni zaligubaŋdib’ mini Farisiinim’ daa kpahindi Yisa ni bɛ nya o ni tib’ o Vuhim Dabisili dali maa bee o ku tib’ o, dama bɛ daa bɔri ni bɛ nyala o taali ka fiɣis’ o. 8Amaa ka Yisa daa baŋ bɛ tɛha maa ka yɛli bɔɣukpiŋlan’ maa, “Mirimina ti zani kpe.” Ka o dii yiɣisi zani niriba maa ni. 9Ka Yisa daa yɛli Farisiinim’ mini Naawuni zaligubaŋdib’ maa, “M bɔhiri ya mi, tuun’ dini n-lee simdi tumbu Vuhim Dabisili dali? Tuun’ viɛlli bee tuun’ biɛɣu? Din ni tiligi ninsal’ nyɛvili bee din ni di li?” 10Ka ŋmaligi yuli bɛ zaa ti tuui taba ka yɛli doo maa, “Teem’ a nuu maa.” Ka o teei li, ka di dii kpaŋ zaa.

11Ka di daa ku ba suli pam ti yaɣi, ka bɛ piligi tɔri jina ni bɛ gbaai bɛ ni yɛn niŋ Yisa shɛm.

Yisa piig’ o tuumba

(Matiu 10.1-4; Maak 3.13-19)

12Di saha ka Yisa daa du zo’ shɛli zuɣu ni o ti suhu Naawuni, ka daa kpalim be nimaani yuŋ zaa suhiri Naawuni. 13N-yi biɛɣu ka o daa bol’ o nyaandoliba na nti pii bɛ ni ninvuɣ’ pinaayi m-boli ba tuumba. 14Bɛ yuya m-bɔŋɔ: Saimɔn, Yisa ni daa ti so yuli Pita la min’ o tizo Anduru ni Jeemsi mini Jɔn ni Filip mini Baatolomiu 15ni Matiu mini Tomas ni Jeemsi Alifius bia mini Saimɔn ŋun daa nyɛ bɛn bɔri ni bɛn’ Izraɛlnim’ su bɛmaŋ’ la ni yino 16ni Judas Jeemsi so bia mini Judas Isikariɔt ŋun daa ti leei nyaanyira la.

Yisa wuhibu min’ o dɔriti tibbu

(Matiu 4.23-25)

17Ka Yisa min’ o tuumba maa daa yi zoli maa zuɣu siɣina, ka bɛ min’ o nyaandoliba pam ti laɣim ʒe tintani ni. Ka salo pam bɛn daa yi Judia mini Jɛrusalɛm ni Taai mini Sidɔn tin’ shɛŋa din be teeku nol’ la daa ka o sanna ni bɛ ti wum o yɛtɔɣa, ka nya bɛ dɔriti tib’ kpaŋ. 18Alizin’ biɛri ni daa nahindi shɛb’ zaa gba daa nya alaafee. 19Ka salo maa zaa daa daari taba ni bɛ paag’ o shihi, dama o niŋgbuŋ ni ka tibbu yiko maa daa yirina n-chɛ ka bɛ zaa kpaŋda.

Suhupiɛlli mini suhusaɣiŋgu yɛla

(Matiu 5.1-12)

20Di saha ka Yisa daa duh’ o zuɣu yul’ o nyaandoliba maa ka yɛli,

“Yinim’ bɛn nyɛ nandaamba ŋɔ mal’ alibarika,

dama Naawuni nam nyɛla yi dini.

21 Yinim’ bɛn kpiri kum pumpɔŋɔ ŋɔ mal’ alibarika,

dama yi ni ti tiɣi.

Yinim’ bɛn kumdi pumpɔŋɔ ŋɔ mal’ alibarika,

dama yi ni ti la.

22 # 1 Pita 4.14 “Yi mal’ alibarika saha shɛli niriba yi ti jɛn ya, ka gaŋdi ya, ka turi ya, ka saɣindi yi yuya yɛri ni ninvuɣ’ biɛri n-nyɛn ya Daadam Bia zuɣu. 23#2 Yɛl 36.16; Tuma 7.52 Bɛ yi ti niŋdi ya lala, yin’ chɛliya ka yi suhuri paligi dindali maa, ka yiɣimiya jɛmmi ni suhupiɛlli, dama yi laara galisiya alizanda ni. Lala ka bɛ yaannim’ daa pun niŋ anabinim’ gba.”

24Ka lan yɛli;

“Mbusim be yinim’ bundaannim’ ŋɔ zuɣu,

dama yi pun di yi nyaɣisim.

25 Mbusim be yinim’ bɛn pun tiɣi pumpɔŋɔ ŋɔ zuɣu,

dama kum ni ti wum ya.

Mbusim be yinim’ bɛn lari pumpɔŋɔ ŋɔ zuɣu,

dama yi ni ti kum ka fabili.

26 “Mbusim be yinim’ gba zuɣu sokam yi ti paɣiri ya saha shɛli, dama lala ka bɛ yaannim’ daa pun niŋ anab’ ʒirinim’ la.”

Dimnim’ yubu

(Matiu 5.38-48; 7.12a)

27Yisa daa lan yɛli ba, “N yɛrila yinim’ bɛn wumdi n yɛligu ŋɔ, yumiya yi dimnima, ka niŋmiya bɛn jɛn ya la zaɣ’ viɛlli. 28Suhimiya alibarika tim’ bɛn yɛri ya zilima; ka suhimiya Naawuni tim’ bɛn turi ya la. 29So yi lab’ a tapaɣa, nyin’ lɛbigim’ din’ la gba pah’ o; ka so yi fa a binyɛrigu, nyin’ di mɔŋ o a chinchini gba. 30Ŋunkam suh’ a, nyin’ tim o; ka ŋun kpuɣ’ a nɛma, nyin’ di lan bɔh’ o di yɛla. 31#Mat 7.12 Ka yi ni bɔri ni niriba niŋdi ya shɛm, yi gba niŋmiya ba lala.”

32Ka o daa lan ŋmaligi bɔhi ba, “Yi yi yurila bɛn yuri ya ko, paɣiri bɔ ka yi lee yɛn nya? Dama alahichinim’ gba yurila bɛn yuri ba. 33Ka yi yi niŋdila bɛn niŋdi ya viɛnyɛliŋga zaɣ’ viɛlli, paɣiri bɔ ka yi lee yɛn nya? Dama alahichinim’ gba niŋdila lala. 34Ka yi yi mali yi bina m-paŋdila ninvuɣ’ shɛb’ yi ni tɛhiri ni yi ti lan dee’ li bɛ sani yaha, paɣiri bɔ ka yi lee yɛn nya? Dama alahichinim’ gba paŋdila bɛ daalahichilan’ taba ni bɛ ti lan deei bɛ ni paŋ ba shɛm maa tariga. 35Amaa yinim’ yumiya yi dimnima, ka tummiya ba tuun’ suma, ka bɛn bɔri ni bɛ paŋ yi bina, yin’ paŋmiya ba, ka di tɛhiriya ni yi ni ti lan dee’ li bɛ sani yaha. Ka yi laara ti galisi, ka yi niŋ Zallakudura Naa bihi, dama ŋuna n-kul niŋdi gutulinim’ mini zunyuŋnim’ gba nirilim. 36Dinzuɣu zomiya nambɔɣu kaman yi Ba Naawuni ni zɔri nambɔɣu shɛm.”

Tab’ saria karibu

(Matiu 7.1-5)

37Yisa daa lan yɛli ba, “Di karitiya tab’ saria, ka Naawuni ti ku kari yi gba saria; di zaŋdiya tab’ taali, ka Naawuni ti ku zaŋ yi gba taali; chɛliya yi tab’ taali paŋmi ba, ka Naawuni ti chɛ m-paŋ yi gba. 38Timiya pini, ka Naawuni ti yi gba; ka yi ni yɛn deei shɛli maa ni pali yi nuhi hal ti puuri bahira; dama yi ni zahindi binyara shɛm tiri yi taba, lala ka Naawuni ni ti zahim ti yi gba.”

39 # Mat 15.14 Ka o daa lan ŋahi ba ŋahili ŋɔ bɔhi, “Zom’ ni tooi vo o zoon’ kpee ka bɛ zaa ti ku lula bɔɣili ni? 40#Mat 10.24-25; Jɔn 13.16; 15.20 Karimbia bi garit’ o karimba; amaa karimbia ŋun nya wuhibu viɛnyɛliŋga, o baŋsim min’ o karimba baŋsim ti saɣirila taba.”

41O daa lan bɔhi, “Bɔ n-niŋ ka a nya bimburiginli a mabia ninni, ka daantaliga lee sa amaŋmaŋ’ ninni ka a bi nya li? 42Bee wula ka a ni tooi yɛl’ a mabia ni o chɛ ka a yihi bimburigin’ shɛli din be o ninni ka lee bi nyari daantaliga din sa amaŋmaŋ’ ninni maa? Nyin’ bilikɔɣindan’ ŋɔ! Vuɣim’ daantaliga din sa amaŋmaŋ’ ninni maa ka nyari viɛnyɛliŋga pɔi, ka naanyi yihi bimburigin’ shɛli din be a mabia maa ninni maa.”

Tia mini di wala

(Matiu 7.16-20; 12.33-35)

43Yisa daa lan yɛli ba, “Ti’ suŋ ku wali wal’ biɛri, ka ti’ biɛɣu mi ku wali wal’ suma. 44#Mat 12.33 Bɛ baŋdi tia kam la di wala ni; dama nir’ na ʒi m-pɔhi fiig tia wala goo zuɣu, ka so mi na ʒi m-pɔhi gaya pirinkpaŋ zuɣu. 45#Mat 12.34 Ninvuɣ’ suŋ ŋun suhu pali bin’ suma yihirila bin’ suma o suhu maa ni na, ka ninvuɣ’ biɛɣu ŋun mi suhu palli bin’ biɛri yihirila bin’ biɛri o suhu maa ni na, dama din be sal’ suhu ni, dina n-yir’ o nol’ ni na.”

Tammɛriba ayi

(Matiu 7.24-27)

46Yisa daa lan bɔhi ba, “Di chaŋ wula ka yi booni ma yi Duuma, yi Duuma, ka lee bi tumdi tuun’ shɛŋa n ni wuhi ya ni yi tum? 47Ŋunkam zaa ka n sanna ti wum n yɛligu ka dol’ li, n ni wuhi ya o ni ŋmani so. 48O ŋmanila tammɛr’ so ŋun daa gbi tiŋa n-zal’ o yili tampiŋ zuɣu. Ka kom daa ti kpe n-gili yili maa ka bi tooi dam li la, dama di daa me n-tamla tampiŋ zuɣu. 49Amaa ŋunkam wumdi n yɛligu ka bi dol’ li, dilan’ ŋmanila tammɛr’ so ŋun daa bi gbi tiŋa n-zal’ o yili tampiŋ zuɣu. Ka kom daa ti kpe n-gil’ li ka di dii lu zaa, ka di lubu maa bie pam la.”

Currently Selected:

Luk 6: RLDB

Highlight

Copy