Genesis 22
22
Dios tsi' c'ajtibe Abraham i yalobil
1Che' bʌ tsa' ujti iliyi, Dios tsi' yʌc'ʌ ti prueba Abraham. Tsi' pejca: Abraham, che'en. Tsi' jac'ʌ: Wʌ' añon, che'en. 2Dios tsi' yʌlʌ: Pʌyʌyix majlel ch'iton bʌ a walobil, jini cojach bʌ a walobil Isaac mu' bʌ a c'uxbin. Cucu ti lum i c'aba' Moríah. Aq'ueñon a walobil cha'an pulbil bʌ c majtan ya' ti jump'ejl wits mu' bʌ caj c pʌsbeñet, che'en. 3Wen seb tsa' ch'ojyi Abraham ti sʌc'ajel. Tsa' caji' letsʌben i jatojlel burro. Tsi' pʌyʌ majlel cha'tiquil winicob yic'ot Isaac i yalobil. Tsi' xot'o si' cha'an pulbil bʌ i majtan Dios. Tsa' caji ti majlel ya' ba' tsi' sube Dios. 4Ti' yuxp'ejlel q'uin Abraham tsi' can q'uele pañimil. Tsi' q'uele jini ajñibʌl ti ñajtʌl. 5Abraham tsi' sube i winicob: Poj ajñenla ilayi yic'ot jini burro. Ya' samiyon quic'ot jini ch'iton. Mi caj c ch'ujutesan lojon Dios. Ti wi'il cha' talon lojon ba' añetla. 6Abraham tsi' ch'ʌmʌ jini si' cha'an mi' pulben i majtan Dios. Tsi' yʌq'ue i q'uech Isaac. Tsi' ch'ʌmʌ xutunte' yic'ot cuchillo ti' c'ʌb. Temel tsa' majliyob jini cha'tiquil. 7Isaac tsi' pejca Abraham i tat: C tat, che'en. Abraham tsi' jac'ʌ: Wʌ' añon calobil, che'en. Isaac tsi' yʌlʌ: Awilan, wʌ'an jini xutunte' yic'ot si'. ¿Baqui an jini tiñʌme' cha'an mi' pulel i majtan Dios? che'en. 8Abraham tsi' yʌlʌ: Calobil, Dios mi caj i chajpan tiñʌme' cha'an mic pulben i majtan, che'en. Temel tsa' majliyob.
9Tsa' c'otiyob ya' ba' tsi' yʌlʌ Dios. Abraham tsi' mele pulʌntib ya'i. Tsi' yotsʌbe i si'il. Tsi' cʌchʌ Isaac i yalobil. Tsi' ñolchoco ti' pam pulʌntib, ya' ti pam si'. 10Abraham tsi' ch'ʌmʌ cuchillo. Tsi' sʌts'ʌ i c'ʌb cha'an mi' tsʌnsan i yalobil. 11I yángel lac Yum am bʌ ti panchan tsi' pejca. Tsi' yʌlʌ: Abraham, Abraham, che'en. Tsi' jac'ʌ: Wʌ' añon, che'en. 12Tsi' yʌlʌ: Mach a tsʌnsan jini ch'iton. Mach ma' tic'lan, come cujilix wola' bʌc'ñan Dios. Tsa' wʌq'ueyon a walobil, jini cojach bʌ a walobil, che'en. 13Abraham tsi' can q'uele pañimil. Tsi' q'uele juncojt i tat tiñʌme' ya' ti' pat, joc'ol i xulub ti' xʌc' te'. Abraham tsa' majli. Tsi' chucu jini tiñʌme'. Tsi' yʌq'ue Dios pulbil bʌ i majtan. I q'uexolʌch i yalobil. 14Abraham tsi' yotsʌbe i c'aba' jini ajñibʌl: Lac Yum mi caj i yʌq'ueñonla lac majtan, che'en. Che'ʌch i c'aba' c'ʌlʌl wʌle. Mi' yʌlob: Ya' ti wits i cha'an lac Yum mi caj i yʌq'ueñonla lac majtan, che'ob.
15I yángel lac Yum tsi' pejca Abraham ti cha'yajlel. Tsa' loq'ui i t'an ti panchan. 16Tsi' yʌlʌ: Tij c'aba' tsac wersa ac'ʌ c t'an, cha'an tsa' jac'ʌ chuqui tsac subeyet. Ma'anic tsa' chʌclebeyon a walobil. Tsa' wʌq'ueyon jini cojach bʌ a walobil. 17Mi caj c wen aq'ueñet cutslel. Mi caj c wen p'ojlesʌbeñet a p'olbal jinto lajal ti tsicol che' bajche' ec' am bʌ ti panchan, che' bajche' ji' am bʌ ti' ti' colem ñajb. Mi caj i cha'leñob yumʌl ti' tojlel i contrajob. 18Winicob x'ixicob ti pejtelel pañimil mi caj i yʌq'uentelob i wenlel c t'an ti' tojlel a p'olbal, cha'an tsa' jac'beyon c t'an, che'en lac Yum. 19Tsa' cha' majli Abraham ba' woli' pijtañob i winicob. Temelob tsa' cajiyob ti majlel ti Beerseba. Ya' tsa' c'oti ti chumtʌl Abraham. 20-23Che' bʌ ya' chumul Abraham, tsa' caji i yubin añobix waxʌctiquil i yalobilob Nacor i yijts'in yic'ot Milca i yijñam. Jini ascuñʌl bʌ jiñʌch Uz. I yijts'iñob jiñobʌch Buz, yic'ot Kemuel (i tat Aram), yic'ot Quesed, yic'ot Hazo, yic'ot Pildas, yic'ot Jidlaf, yic'ot Betuel (i tat Rebeca). 24I c'aba' i majan ijñam Nacor jiñʌch Reúma. Tsi' yʌc'ʌ ti pañimil winicob ja'el: Teba yic'ot Gaham yic'ot Tahas yic'ot Maaca.
Currently Selected:
Genesis 22: CTU77
Highlight
Share
Copy
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
