Yoohana 17

Yeesso ꞌdooꞌdiis iweesta

1Inkoo Yeesso waha yidah ka, serey yeye, Waakh wahte, wihi us yidah,

“Aabba, ibeen a yitah. Weelaah weynaay, ꞌdee Weelaah a kiweynaacho. 2Iꞌdi tahe at usu antohi us ꞌdooꞌdi harra tuumman kaanti a isiisse. Ulla ꞌdee ꞌdooꞌdi at kiis kayeesse tuumman, jiroti jirtuu imassan siicha. 3Enenyet la chuꞌus atihi kaldaye rumanka Waakhe kigarti, toro la Yeesso Kiriistohi at sooergatte garti, wahaas a jiroti jirtuu imassan. 4Hili goorat at dahanoheey soogelisse an massiche ka, harrata ka an a kiweynaache. 5Maantaka Aabbahaaw, weynaanti an geeddi at harra isoouumin kileekhabe ortaah ka iweynaay.

6“ꞌDooꞌdi at harrata ka soobahsatte at isiisse, eti at tahe a abche. ꞌDooꞌda kaahha eheete, at la ani isiisse. Icho la yeedaah a raaheen. 7Icho la toolla saggi wihi tuummane at isiisse ati ikaayimaateen a gartaan. 8Wori at isiisse iche anna icho siiche, icho la rummeesteen. Icho la saggi an rumanka ati ikaaimiy a gartaane, toro saggi at ani isooeregte laka a rummeestaan.

9“Icho a iweesda. ꞌDooꞌdi harra tuumman ma iweesdi, iꞌdaasenyi ꞌdooꞌdi at isiisse iweesda. Iꞌdi tahe icho a wahaahha. 10ꞌDooꞌdi tuummane an khabo a kaahha, ꞌdooꞌdi tuummane at khabto la a kaaya. Icho ka la ani a liiweynaache. 11An kola harra ma kasoojiro, iꞌdaasenyi icho uliba harra kajiraan. Aabbaheeyki munyee, miigti magahaahki at isiisse ka, magahaas ka bariiso, ꞌdee iꞌdi ani ichoow ati ba wohoo kalday inahuu, icho tuumman wohoo kalday a yitaaheen. 12Geeddi goorat an icho leejire, magahaas at isiisse ka, a toorribe bariisde. Ki goorat baabaa liigooche on menye, kichekoo kalday laka ma baabiin, ꞌdee wihi Chiirnaanneti Waakh ka lachiire labuuhicha.

13“Anna inti at kajirto amiit. Iꞌdaasenyi waha geeddi an harrata kajiro adeehe, ꞌdee saggi an ihamaado, icho laka hamaad rubeyohicho goya buuhicha. 14An woraah a siiche, ꞌdooꞌdi wahanyeyyohi harratane sussuuje raaho la icho a ꞌdiiꞌde. Iꞌdi tahe icho ki harrata mee, iꞌdi an laka ki harrata ieheynan u. 15Weysiheey ka wihi an kidaaho, atihi icho harrata kabihisso menye, iꞌdaasenyi a atihi Seytaanki uskeel leh kaholisso. 16Iꞌdi an laka ꞌdooꞌdi harrata kichokoo ieheynan u, icho laka ki harrata mee.

17“Runtaah ka icho munya kayeel. Yeedaah a ki rummaat. 18Saggi goorat at ani ꞌdooꞌdi harrata isooergatte, iche an laka icho ꞌdooꞌdi harrata iergade. 19Jeentetichuu la, an a ismunyaacha, ꞌdee icho laka, rumanka lamunyaacha.

20“Icho kalday ma iweesdi, ꞌdooꞌdi wori icho cheekaan ka ani irummeesti laka a iweesda. 21Aabba, a iweesda, ꞌdee icho tuumman wohoo kalday yateehiin, saggi ati ichoow ani wohoo kalday inahe, toro la ani ichoow ati wohoo kalday inahuu. Aabba, a iweesda ꞌdee icho ichoow inno ba wohoo kalday nateehe ꞌdee ꞌdooꞌdi harrata saggi at ani isooeregte rummeesta. 22Weynaanti at isiisse iche icho siiche, ꞌdee icho tuumman wohoo kalday yateehiin, iꞌdi toolla ati ichoow ani ba wohoo kalday inahuu. 23Ani ichoow icho ba a wohoo kaldaye, ati ichoow ani ba la a wohoo kalday. Icho ba tuum wohoo kalday yateehiine, ꞌdee ꞌdooꞌdi harrata saggi at ani isooeregte abta, toro la enenyet waha abta, geeddi at iꞌdoonto, geeddaase icho laka ꞌdoonta.

24“Aabbahaaw, at icho ani a isiisse. An la ichohi inti an kajiro icho laka kajiraane, ꞌdeeka weynaanti ati isiisse argaan iche ꞌdoona. Weynaantaas la a ti at isiisse jeenteti at ani geeddi harra liisoouumin laka iꞌdoontuu.

25“Aabbaheeyki fissan, chirri ꞌdooꞌdi harrata kigaran laka, an a kigarda, ꞌdooꞌda la saggi at ani isooeregte a garta. 26Eti at tahe icho a ibabbakkaahiche, toro la oreye isohda weyti eti at tahe ibabbakkaahicha, ꞌdee ꞌdooninti at ani ikhabto goycho a kijirto, ani la goycho a kijiro.”

Currently Selected:

Yoohana 17: rel

Highlight

Copy