Génesis 19
19
Kub' t-xitun Dios tnam Sodoma ex Gomorra
1Ch'ixtoq tok yupj tej kypon qe kab' anjel tuj Sodoma. Q'uqltoq Lot ttzi tlamel tnam. Tejtzun kyxi tke'yin, jaw we' k'molte kye, kub' ẍmeje', pon takl tib'aj twitz max twitz tx'otx', 2ex xi tma'n kye kyja':
—Chin kub'sale kywitze, Tat, kyxi'ye tuj njaye, aqine kymajene, ex kykyaj tene tuj aq'b'il lu. Atzun b'a'n tel kytx'jo'ne kyqane, ex nchi'jxi te prim b'a'n ttzyetl kyb'eye, chi Lot kye.
Atzun kye anjel kyma:
—Mi'n. Ax k'elex aq'b'il qeye tuj cay, che chi anjel.
3Atzunte Lot kub'sanxix kywitz, ex kub'tzun tuj kywitz tu'n kyxi' max tja. Tejtzun kypon tja Lot, ok ten Lot b'inchalte kywa, tb'incha pan minti' t-samel tuj, ex e wa'n.
4Na'nxtoq kykub' tan, b'aj kytxolb'an kyib' kykyaqil qe xinaq aj Sodoma ti'jele tja Lot, tza'nx qe ku'xun ax ikx qe tij xjal, 5ex e ok ten sch'il ti'j Lot in kyma'ntoq kyja':
—¿Jatum ate' qe xinaq ẍe ul tjaya te qonik'an ja'lo? Q'i'metza qe. Qajb'ile tu'n qkub' tane kyuk'il, che chi qe xinaq aj Sodoma.
6Etztzun Lot yolil kyuk'il, kyaj tlamo'n ja, 7ex xi tma'n kye:
—Aqeye wamiw, chin kub'sale kywitze, mi'n kyb'inchaye mya b'a'n lu. 8At kab'e nme'jele na'nx kylonte xinaq; che eletz wi'ne tu'ntzun kyb'inchanteye alkye kyajb'ile kyi'j. O'kx mi'n kyb'inchaye mya b'a'n kyi'j qe xinaq lu. Atzun til ma che ul wuk'ile tuj njaye, chi Lot.
9Tzajtzun kytzaq'we'n xjal:
—Laq'eb'ila. Aya jun stranjer xjal ma tzula najal tzalu ex ja'lo tajb'ila tu'n tkawina qib'aje. Ok qb'inchaye mas mya b'a'n ti'ja kywitz qe kab'e xjal ate'kx tuj tjaya, che chi.
E pon tilj ti'j Lot ex e pon laq'e' tu'n tokx kypa'n tlamel ja. 10Etztzun kynuqpi'n kyq'ab' qe xinaq ate'kxtoq tuj tja Lot, okx kyi'n tuj ja ex jurat naj etz kylamo'n tlamel ja. 11Atzun qe xjal ate'toq ttzi ja, b'i'x kub' moẍix kywitz kyu'n qe xinaq, tza'nx qe ku'xun ax ikx qe tij xjal, ex e takpaje'; kyja'tzun tten, minti'tl knet ttzi ja kyu'n. 12Tzajtzun kyma'n qe xinaq te Lot kyja':
—¿Atpe txqantl xjal tuk'ila tzalu? Qe tji'ya, qe tky'ajala, qe tme'jela, ex tkyaqilju at teya tuj tnam lu, q'i'mexa qe tzalu, 13porke kb'el qxitune tnam lu. O japun tuk'il Qman nimxix tqanil kyil xjal tuj. Tu'ntzun jlu ma qo tzaj sama'ne xitul te.
14Etztzun Lot q'malte kye tji', aqeju otoq b'ant ti'j tu'n kymoje' kyuk'il tme'jel, ex xi tma'n kye kyja':
—Chuxqeye ex kyexe tzalu, porke kb'el t-xitun Qman aju tnam lu, chi Lot.
Atzun kye tji' ok kyq'o'n qa noq in la'jintoq Lot.
15Tej tkub' q'ij, xi kyma'n anjel te Lot kyja':
—Chuxa, we'ktza, q'i'mexa t-xu'jila tzalu kyuk'ix qe kab'e tme'jela, qa mi'n taja tu'n tnaja ok tkub' tcastiw tnam lu qu'ne. 16Minti'x b'ant naj tten Lot. Tu'ntzun jlu, lach'o'n etz kyu'n qe xinaq, tuk'ix t-xu'jil ex qe kab'e tme'jel, tu'nju tzaj q'aq'an tk'u'j Qman ti'j. E je'tz q'i'n tu'n kyetz ti'jxi tnam tu'ntzun kyklet. 17Tejtzun kyetz ti'jxi tnam, tzajtzun tma'n jun kyxol qeju kab'e xinaq kyja':
—Tel oqa tu'ntzun tkleta. Mi'n tz'ajtz tke'yina ti'jtza ex mi'n kub' we'ya tuj tkyaqil chq'ajlaj lu. Txi'ya kywi witz tu'ntzun mi'n tnaja, chi xinaq.
18Xitzun tma'n Lot kye kyja':
—Mi'n. Chin kub'sale kywitze tat. 19Ma kyb'inchaye nim xtalb'il weye tu'nju ma chin kolpete kyu'ne. Mlay chinxe kywi witz, tu'nju mya yajku jaku nk'ulb'a'ye jun ti'xti mya b'a'n tuj b'e, ex axlo jaku chin kyime. 20Kyke'yinxe tal tnam niqayin ta' ma chixin. Jaku chinx oqe tuj. Kyq'o'ntze amb'il weye tu'n nxi'ye, tu'ntzun nklete tuj. ¿Myapelo ax tok ch'in tal tnam lu? Chi Lot.
21Tzajtzun ttzaq'we'n xinaq te kyja':
—Ax ikx b'a'n ma tz'e'la tuj nwitze aju tkub'sb'ila ti'j jlu, ex mi'n kub' nxitune aju tnam ma tmaya, 22ex jurat-x naj txi'ya klol tib'a ma chixin. Minti' kb'antel wu'ne akux na'nxtoq tpona ma chixin, chi xinaq.
23Otoq jawil q'ij tej tpon Lot tuj Zoar. 24Atzunte Qman tzaj tchitun q'aq' ex azufre kyib'aj tnam Sodoma ex Gomorra. Tzaj jlu twitz kya'j tuk'il Qman. 25E kub' t-xitun, tuk'ix tkyaqil chq'ajlaj, kyuk'ix kykyaqil qeju najl kyuj tnam, tuk'ix tkyaqilju in ch'iytoq twitz tx'otx'. 26Atzunte t-xu'jil Lot lepcho'ktoq ti'j, ajtz tke'yin ti'jtzi. Axtzun kyaj we', ex b'aj noj ti'j tu'n atz'an.
27Tuj juntl q'ij te prim, xi' Abraham jatum kub' ten yolil tuk'il Qman. 28Xi tke'yin tumlal Sodoma ex Gomorra, ex tuj tkyaqil chq'ajlaj o til in jawtoq sib', mer ik tza'n sib' in jaw tuj jun jorni. 29Kyja'tzun, tej tkub' t-xitun Dios qe tnam tuj chq'ajlaj, ul Abraham tuj t-ximb'etz, ex etz ti'n Lot tuj xitb'il kye tnam jatum otoq najan.
Tej kytzaj xe't qe aj Moab ex qe aj Amón
30Jax Lot najal tuj tiwitz tx'otx', ex e jax ti'n qe kab'e tme'jel tuk'il, ex tzaj t-xob'il ti'j tu'n tkyaj ten tuj Zoar. Atzun najan kyuk'il qe kab'e tme'jel tuj jun toy' pik. 31Xitzun tma'n tzikb'aj te tz'inb'aj kyja': Ma tijin qman, ex tuj tkyaqil tx'otx' lu mi a'l jun xinaq tu'n tmoje' quk'il, ik tza'n in b'ant kyu'n xjal. 32Tu'ntzun jlu, qq'o'nk vin te qman tu'n tchyo'n twi', ex e qkub' tan tuk'il tu'ntzun ttzaj tk'wa'l qi'j, chi tzikb'aj. 33Axtzun qonik'an ok kyq'o'n vin te kyman, ex kub' tan tzikb'aj ttxlaj tman. Atzunte mamb'aj minti' o tna' tej tkub' tan tme'jel ttxlaj, mi tej tjaw we'.
34Te juntl q'ij xi tma'n tzikb'aj te tz'inb'aj kyja': Qonik'an may' ma chin kub' tane tuk'il tat. Ax ikx qq'o'nk vin te tuj qonik'an ja'lo, jakutzun kub' tan teya tuk'il tu'ntzun ttzaj tk'wa'l qi'j, chi tzikb'aj. 35Axtzun qonik'an ok kyq'o'n vin te kyman, ex kub' tan tz'inb'aj ttxlaj tman. Atzunte Lot minti' o tna' tej tkub' tan tme'jel ttxlaj, mi tej tjaw we'. 36Kyja'tzun tten ok ten kyal qe kab'e tme'jel Lot tu'nx Lot. 37Ultzun itz'j tal tzikb'aj, Moab tb'i ok, aju kyxe'chel qe aj Moab, aqeju ate'x ja'lo. 38Ax ikx te tz'inb'aj ul itz'j tal, Ben-ammí tb'i ok, aju kyxe'chel qe aj Amón, aqeju ate'x ja'lo.
Currently Selected:
Génesis 19: MAMNO
Highlight
Share
Copy
Want to have your highlights saved across all your devices? Sign up or sign in
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
