Génesis 20
20
Abraham ex Abimelec
1Ik'tzun Abraham tuj lugar jatum najltoq ex pon tuj tx'otx' Néguev, kub' ten najal t-xol Cades ex Shur, ex mya nim q'ij o najan tuj tnam Gerar. 2Tej tten Abraham tuj tnam lu, xi tma'n kye xjal ti'j Sara aju t-xu'jil: Wanb'e aju xu'j lu, chi Abraham. Aju rey Abimelec tuj Gerar xi t-sama'n qe xjal q'ilte Sara tu'n tok te t-xu'jil; 3ex te qonik'an ok jun twitzik' Abimelec ex tma Dios te kyja':
—Kymela tu'n tlaj aju xu'j ma tzaj ti'na; ate xu'j lu at tchmil, chi Dios.
4Atzunte Abimelec na'nxtoq tkub' tan tuk'il Sara. Xitzun ttzaq'we'n kyja':
—Tat, ¿Maj chin b'el tb'yo'na kyuk'ix qe nxjalile ex minti' qile? 5Axte q'mante weye: Wanb'e aju xu'j lu, chi, ax ikx te xu'j tyol: Aju xinaq lu, nxib'ane, chi. Noq yalnix ti'j nnab'le ex minti' wile ti'j jlu, chi Abimelec.
6Tmatzun Dios te tuj witzik' kyja':
—B'a'n wu'ne ma tb'inchaya jlu noq yalnix ti'j tnab'la. Tu'ntzun jlu minti' xi ntzoqpi'ne tu'n tkub' tmojb'an tib'a tuk'il, tu'ntzun mi'n tb'inchana il nwitze. 7Atzun ja'lo, q'o'n aja xu'j lu te tchmil, tu'nju ate xinaq lu jun nsanjele, ex kna'l Dios ti'ja tu'n tanq'ina; qatzun mi'n tz'aj tq'o'na, ax tok kymela kyuk'ix qeju ate' tuj tjaya, chi Dios.
8Te prim te juntl q'ij, jaw we' Abimelec, e tzaj ttxko'n kykyaqil qe tmajen ex xi ttx'olb'a'n tkyaqil twitzik' kye. Tejtzun kyb'inte qe xinaq aju twitzik', tzaj nim kyxob'il. 9Tzajtzun txko'n Abraham tu'n Abimelec ex xi tma'n te kyja':
—¿Ti o tb'inchaya qi'je? ¿Alkye il o nb'inchaye twitza tu'nju ma tzaj ti'na jun matij il wib'aje ex kyib'aj qe xjal ate' tuj nkawb'ile? O tb'inchaya jun mya b'a'n wi'je, aju mya q'o'n tu'n tb'inchanteya. 10Ax ikx xi tma'n Abimelec te Abraham kyja': ¿Ti in ximantoqa ti'j tej tb'inchanteya tkyaqil jlu? Chi Abimelec.
11Xitzun ttzaq'we'n Abraham kyja':
—Tuj nnab'le minti' tchiylal Dios tuj lugar lu, ex jakulo chin kub' b'yo'ne tu'n tlaj nxu'jile. 12Ex ax tok, wanb'e tz'e'la xu'j lu tu'nju junx qmane, o'kx qtxu'ye part, ex in moje'ye tuk'il. 13Tej tok tq'o'n Dios qine te b'etin xjal najchaq ti'j tja nmane, xi nma'ne te nxu'jile kyja': Atzun xtalb'il lu ok tb'inchaya wi'je noq alkyex lugar ok qpon, kxel tma'na kye xjal wi'je kyja': Nxib'ane jlu, chikuya, chi Abraham.
14Tzajtzun ti'n Abimelec qe ẍne'l, wakẍ, majen xinaq ex majen xu'j, ex e je'x tq'o'n te Abraham. Ax ikx aj tq'o'n t-xu'jil aju Sara tb'i, 15ex tma Abimelec te Abraham kyja':
—Ke'yinxa, lu ntx'otx'e tkub' twitza. Najana jatum b'a'n tuj twitza.
16Ax ikx tma Abimelec te Sara kyja':
—Ma txi nq'o'ne jun mil tajlal saq pwaq te t-xib'ana. Atzun jlu k'ajb'el tu'n tik' tna'njtz aju mya b'a'n o b'inchanjtz kywitz kykyaqil qeju ate' tuk'ila. Mi a'l jun k-yolil mya b'a'n ti'ja, chi Abimelec.
17Oktzun ten Abraham na'l Dios ti'j Abimelec, ex o b'anix Abimelec tu'n Dios, tuk'ix t-xu'jil ex kyuk'ix qe tmajen xu'j. Tzajtltzun kyal, 18porke tu'n Qman b'i'x we' tu'n ttzaj kyal kykyaqil xu'j ate'toq tuj tja Abimelec, tu'n tlaj Sara aju t-xu'jil Abraham.
Currently Selected:
Génesis 20: MAMNO
Highlight
Share
Copy
Want to have your highlights saved across all your devices? Sign up or sign in
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
