Génesis 21
21
Tej tul itz'j Isaac
1Tzajtzun ke'yin Sara tu'n Qman, ex japun tyol Qman ik tza'n otoq tzaj ttziyan te. 2Oktzun ten tal Sara ex ul itz'j jun tal, te Abraham tky'ajal, tej otoq tijin Abraham. Ul itz'j tuj tq'ijlalil otoq tma Dios te. 3Isaac tb'i k'wa'l ok tq'o'n Abraham, aju ul itz'j ti'j Sara. 4B'aj t-sircunsidarin Abraham aju tky'ajal Isaac tb'i, tej otoq b'ant wajxaq q'ij tul-len itz'j, ik tza'nx otoq tma Dios te. 5Otoq tz'el Abraham twi' jun syent ab'q'i tej tul itz'j Isaac aju tky'ajal. 6Tmatzun Sara kyja': Ma chin jaw tze'ne tu'n Dios, ex alkyexju ok tb'i' ti'j jlu, ktze'l junx wuk'ile. 7Tmatl kyja': ¿Atpe jun o q'mante te Abraham qa attoq t-xiyil nq'o'ne kych'u' k'wa'l? Atzun ja'lo ma tzul itz'j jun tky'ajal Abraham wi'je ex ya ma tijin Abraham, chi Sara.
Etz lajo'n Agar tuk'ix Ismael tuj tja Abraham
8Ch'iytzun Isaac ex el q'i'n ti'j tch'u'. Aju q'ij tej tel q'i'n ti'j tch'u' ok jun nintz wa'n tu'n Abraham. 9O til Sara in xmayintoq Ismael ti'j Isaac. Ate Ismael tky'ajal Abraham ex tal Agar aju aj Egipto. 10Xitzun tma'n Sara te Abraham kyja': Lajon exa Agar aju majen, tuk'ix tal. Aju tal majen xu'j lu minti' toklen ti'j etzb'il junx tuk'il wale Isaac, chi Sara. 11Tzaj nim tb'is Abraham tu'nju yol tzaj tma'n Sara te, porke in yolintoq ti'j Ismael aju tky'ajal. 12Tzajtzun tma'n Dios te Abraham kyja': Mi'n b'isuna ti'j q'a mi ti'j tmajena xu'j. Nimanxa tkyaqilju in tma'n Sara teya, porke o'kx qe tk'wa'l Isaac che okel te tiyjila. 13Ax ikx ti'j tal tmajena xu'j k'elel itz'j jun nasyon wu'ne, tu'nju ax tk'wa'la jlu, chi Dios.
14Tuj juntl q'ij te prim wen, xi tq'o'n Abraham pan te Agar tuk'ix jun bols tz'u'm nojni tu'n a', jaw tq'o'n tkyaqil jlu tzal ti'j Agar, xi tq'o'n aju q'a tuj tkwent ex b'aj kyq'olb'en kyib'. Extzun Agar tuk'ix Ismael ex o b'etje' tuj tzqij tx'otx' Beerseba. 15Tejtzun tkub' b'aj a' tuj bols tz'u'm, kyaj tq'o'n Agar aju q'a tjaq' jun wi' tze', 16ex xi' qeb'el najchaq ch'in, ik tza'n jatum in pon tz'aq plech, tu'nju mi'n tajb'iltoq tu'n tke'yinte ok tkyim q'a. Tejtzun tkub' qe' Agar, ok ten oq'el. 17Tb'itzun Dios tq'ajq'ajel twi q'a in oq'toq. Tzaj q'ajt t-anjel Dios max twitz kya'j ex tzaj tma'n te Agar kyja': Agar, ¿alkye ma tzaj ti'ja? Mi'n xob'a, porke ma tb'i Dios aju tq'ajq'ajel twi q'a max jatum tkub'sa'n. 18We'ktza. Lach'o'n jawa q'a, ex tzyuma tu'n tq'ab'a, porke ti'j q'a lu kb'antel jun nintz nasyon wu'ne.
19Tzajtzun tyek'un Dios jun xoch te Agar. Xi' Agar nojsalte bols tz'u'm tu'n a' ex xi tq'o'n tk'a q'a. 20O ten Dios tuk'il q'a. O najan tuj tzqij tx'otx', o ch'iy ex ok te jun xo'l plech. 21O najan tuj tzqij tx'otx' Parán ex o moje' tuk'il jun xu'j aj Egipto, aju tzaj ti'n ttxu'.
B'ant ti'j jun yol tu'n Abraham ex Abimelec
22Tujx tq'ijlalil lu, xi' Abimelec yolil tuk'il Abraham, tuk'ix te Ficol xi' tuk'il, aju nejenel kye t-soldad. Xi tma'n Abimelec te Abraham kyja':
—Ate Dios at tuk'ila tuj tkyaqilju in b'ant tu'na. 23Ja'lotzun, ax tzalu q'mantza jun yol axix tok twitz Dios, qa mlay tb'inchaya mya b'a'n wi'je, mi kyi'j qe nk'wa'le, mi kyi'j qe wiyjile; noq o'kx tu'n tb'inchanteya b'a'n wi'je, ax ikx kyi'j qe xjal ate' tuj tx'otx' lu jatum najliya ja'lo, ik tza'n weye o nb'inchaye b'a'n ti'ja.
24Xi ttzaq'we'n Abraham kyja':
—Kxel nma'ne jun yol axix tok twitz Dios.
25Xi tma'n Abraham jun yol te Abimelec ti'j jun xoch otoq tz'el kyetzan qe tmajen Abimelec. 26Xitzun ttzaq'we'n Abimelec kyja':
—Minti' b'a'n wu'ne alkye o b'inchante jlu ex minti' o tzaj tma'na jlu weye. Matzun ja'lo ma nb'iye ti'j jlu.
27Tzajtzun ti'n Abraham qe ẍne'l ex wakẍ, ex e je'x tq'o'n te Abimelec. Atzun q'ij kyaj b'ant ti'j jun kyyol kykab'il. 28E je'l tpa'n Abraham wuq ttxu ẍne'l kyi'j qe txqantl talun. 29Xitzun tqanin Abimelec te kyja':
—¿Ti kyajb'en qe wuq ẍne'l ma che el tpa'na?
30Xi ttzaq'we'n Abraham kyja':
—Aqeju wuq ttxu ẍne'l lu, che xel nq'o'ne teya tu'n kyajb'en te jun yek'b'il, wu'ne b'ant xoch lu, chi Abraham. 31Tu'ntzun jlu, Beerseba#21.31 Beerseba. Tuj yol ebrey atzun in tma'n xoch jatum b'ant kyi'j yol. tb'i lugar lu ok q'o'n, porke atzun kyaj b'ant ti'j jun yol kyu'n kykab'il.
32Kyja'tzun kyaj b'ant ti'j jun yol kyu'n tuj Beerseba. Ajtzun meltz'aj Abimelec tuk'ix Ficol, aju nejenel kye t-soldad, ex e je'x tuj kytx'otx' aj Filisteo. 33Ku'x tawa'n Abraham jun wi' tze' tamarisco tuj Beerseba. Atzun o kub'san Abraham twitz Qman aju Dios te jumajx. 34O ten Abraham nim q'ij tuj kytx'otx' aj Filisteo.
Currently Selected:
Génesis 21: MAMNO
Highlight
Share
Copy
Want to have your highlights saved across all your devices? Sign up or sign in
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
