Génesis 25
25
Qe tiyjil Abraham ti'j tkab' t-xu'jil, Cetura tb'i.
1 Crónicas 1.32-33
1Moje' Abraham tuk'il juntl t-xu'jil, Cetura tb'i. 2Qe tky'ajal Abraham e ul itz'j ti'j xu'j lu, atzun qe jlu: Zimram, Jocsán, Medán, Madián, Isbac ex Súa. 3Ate Jocsán tman Seba ex Dedán. Qe tiyjil Dedán, atzun qe jlu: qe aj Asureo, qe aj Letuseo ex qe aj Leumeo. 4Qe tky'ajal Madián, atzun qe jlu: Efa, Efer, Hanoc, Abida ex Elda. Kykyaqil qe jlu tiyjil Cetura qe. 5Ate Isaac ok te tajwil tkyaqil tq'inumab'l Abraham. 6Atzun kye tky'ajal Abraham e ul itz'j kyi'j kab'etl xu'j, xi tq'o'n oyaj kye, ex tej itz'xtoq b'i'x e je'l tpa'n ti'j Isaac aju tky'ajal, ex e je'x t-sama'n tu'n kyxi' najal tuj tjawitz q'ij.
Kyim Abraham ex okx maqu'n
7O ten Abraham twitz tx'otx' 175 ab'q'i tu'n tkyaqil. 8Otoq tijin Abraham wen tej tkyim ex otoq ten nim ab'q'i twitz tx'otx'. Kyja'tzun tten o pon kyuk'il qe t-xe'chel. 9Okxtzun maqu'n tu'n Isaac ex Ismael aqeju tky'ajal tuj toy' pik tuj Macpela, tokx ti'jxi Mamre tuj tjawitz q'ij, tuj ttx'otx' Efrón aju tky'ajal Zohar aju aj Heteo. 10Atzun tx'otx' lu aju laq'et tu'n Abraham kye aj Heteo. Ax okx maqut Abraham junx tuk'il Sara aju qtzan t-xu'jil. 11Tkyimlenxi Abraham, kub' ky'iwla'n Isaac tu'n Dios. Atzun kyaj ten Isaac najal ttzi xoch tok tb'i: Xoch te Dios itz' ex in chin til.
Qe tiyjil Ismael
1 Crónicas 1.28-31
12Atzun tx'olb'ab'l lu kyi'j tiyjil Ismael aju tky'ajal Abraham ex tal Agar, aju tmajen Sara ex aj Egipto. 13Qe tky'ajal Ismael, atzun qe jlu: Nebaiot aju tnejel tky'ajal, Cedar, Adbeel, Mibsam, 14Misma, Duma, Massa, 15Hadar, Tema, Jetur, Nafis ex Cedema. 16Atzun kyb'i qe kab'laj tky'ajal Ismael, teyle te junjun ok te nejenel kyxol qe t-xjalil ex teyle te junjun ok tb'i ti'j ttx'otx' ex ti'j tnajb'il.
17Otoq japun Ismael twi' 137 ab'q'i tej tkyim ex pon kyuk'il qtzan t-xe'chel. 18Qe tiyjil Ismael e ul najal tuj tx'otx' t-xol Havila ex Shur, a tkub' jlu twitz Egipto tumlal kyja' qtzaj tuj Asiria. Atzun e najan kywitz kyerman.
Tej tul itz'j Jacob ex Esaú
19Atzun tx'olb'ab'l lu kyi'j tiyjil Isaac aju tky'ajal Abraham. 20Otoq japun Isaac twi' 40 ab'q'i tej tmoje' tuk'il Rebeca aju tme'jel Betuel ex tanb' Labán, aqe jlu aj Arameo, najltoq qe tuj Padan-aram. 21O kub'san Isaac twitz Qman ti'j t-xu'jil tu'nju mib'antoq alin. O tb'i Qman aju tna'j Dios, ex ok ten tal Rebeca. 22Ok q'oj kyu'n tal k'wa'l yo'ẍ tuj talb'il kytxu', ex tma Rebeca: Qa kukx kxe'l jlu ikju, ¿ti til tu'n wanq'intle? Chi Rebeca. Xi' b'ilte te Qman. 23Tzajtzun ttzaq'we'n Qman te kyja':
Kab'e nasyon ate' tuj talb'ila; kab'e tnam k'elel kypa'n kyib' jun ti'j juntl ax tuj talb'ila na'nx kyul itz'j. Jun tnam k'okel mas tipun twitz juntl, ex aju tzikb'aj k'okel te tmajen tz'inb'aj.
24Pon q'ij tu'n tul itz'j tal Rebeca, ex yo'ẍ qe tal e ul itz'j. 25Aju tnejel ul itz'j, kyaqnin ke'yin, tkyaqil ti'j nojnitoq tu'n xya'n, ex Esaú#25.25 Esaú. Tuj yol ebrey atzun in tma'n at nim xya'n ti'j. tb'i ok q'o'n. 26Ul naj itz'j titz'in, tzyu'n t-xe t-su'ẍ Esaú tu'n tq'ab', ex Jacob#25.26 Jacob. Tuj yol ebrey atzun in tma'n sb'ul. tb'i ok q'o'n. Otoq japun Isaac twi' 60 ab'q'i tej kyul itz'j tal Rebeca.
Xi tk'ayin Esaú aju toklen te tnejel k'wa'lb'aj
27E ch'iy qe k'wa'l. Ate Esaú ok te jun mejor kamb'al ex attoq tgan tu'n tten tuj kojb'il; atzunte Jacob jun xinaq mib'antoq lab't ex attoq tgan tu'n tkyaj ten ja. 28O k'ujlanjtz Esaú tu'n Isaac tu'nju in chyo'ntoq Isaac ti'j chib'j in kub' tub'antoq Esaú tuj kojb'il; atzunte Rebeca o k'ujlanjtz Jacob tu'n.
29At jun q'ij in b'inchantoq Jacob chib'j tej tul Esaú tuj kojb'il, otoq sikt wen. 30Xi tma'n Esaú te Jacob kyja':
—Chin kub'sale twitza, q'ontza nchi'ye ti'j ju in ttzq'ajsa'na, aju kyaqnin ke'yin, tu'nju ch'ix nkyime tu'n we'yaj, chi Esaú.
Tu'ntzun jlu, Edom#25.30 Edom. Tuj yol ebrey atzun in tma'n kyaq ke'yin. tb'i Esaú ok.
31Xi ttzaq'we'n Jacob:
—K'ayintza weye ja'lo aju toklena te tnejel k'wa'lb'aj.
32Xitzun tma'n Esaú te kyja':
—Ch'ix nkyime ex ¿ti til weye aju woklene te tnejel k'wa'lb'aj? Chi Esaú.
33Xi tma'n Jacob te:
—Q'mantza ja'lo jun tyola axix tok twitz Dios.
Xitzun tma'n Esaú jun tyol axix tok te Jacob, ex xi tk'ayin toklen te tnejel k'wa'lb'aj. 34Xitzun tq'o'n Jacob pan tuk'ix tchi chenaq'. Tejtzun tb'aj wa'n ex tej tb'aj k'an Esaú, jaw we' ex kub' b'e tu'n. Kyja'tzun tten tej tel tik'un Esaú toklen te tnejel k'wa'lb'aj.
Currently Selected:
Génesis 25: MAMNO
Highlight
Share
Copy
Want to have your highlights saved across all your devices? Sign up or sign in
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
