Лукара йибкьыд Шадды Хабар 23
23
Пылатды кьатӀлаама
1Гьа гедеэне сиене джамагьӀат лувзур, гыргара ГьӀаса Пылатыхда. 2Гьабише Минийыы субут гьаъара кадгъӀуре:
– Ес ми эдемиере халкьдик чыкӀ кийтере гьагури, – рухьура гьабише. – Гьание кӀайсарыс кире выс вылцӀаардиш, выдж ки «Мусуд йиъи» рухьура, ПагьӀчаа ене.
3– Гьааса йишийне, вы – «джавыдашды ПагьӀчаа» йиъиме? – хулкара Гьанийдаа Пылата.
– Гьааса ва рухьура а, – джываб вылцӀара ГьӀасара.
4– Задаа минийклаа са тахсир ки алгаардиш, – рухьура Пылата сахьусды дибирешде не илсанашды кӀабалада.
5– Гьание чӀирине хӀаар гьаъара сиене Иудеядид илсан, Галилеядаа каӀчӀури, гьамыъ миди ки йиркьыр а, – рухьура тимбише хъӀахъӀджаачӀур ГьӀасахълаа.
6– Гьа эдеми Галилеяшура йиъиме? – гьадид ун йишийне, хулкара Пылата.
7Гьа Иродды хылихьде гид вилаетдаады йиъид гьацӀыйне, хахъына ГьӀаса сихъдилгара Иродыхда, ти ки гьа йыгъырма Иерусалимди руъура.
8Ирод, ГьӀаса гьагуйне, эккене шад руъура: гьанийс мысъидаа хъуъ йигара ад йиъий ГьӀасахда гакъас. Иродыы балад хабарбыр лийкьыр ай ГьӀасаклаа, гьадыыла тинийис Миние шыв-га гьӀунар гьаъад гедеэне гакъас йигара ай. 9Ирода ГьӀасас балад суалбыр вылцӀара, амма Тиние гьанийс джываб хъывылцӀаардиш. 10Сахьусды дибиреше не Диндид магьӀалимеше гьа арыдыы ГьӀаса нагьакь гьаъара гимадай, хъӀахъӀджаачӀур. 11Ирод ки, джуды эскерер ки хъуна, ГьӀасаклаа иянатбыр гьаъара кадгъӀуре, хьели лыъыр Гьанийыы бытӀрад валыг ки, Пылатыхда джухда сихъилгара. 12Гьа йыгъаала хъуъ садаки гъеджлебед Ирод на Пылат хыдиймар дуруъура.
13Пылата, сес выъыр сахьусды дибирер, агъсакъалар, халкь, 14рухьура гьабишде:
– ВаӀ изды бегеде гьеми эдеми хана йидкьыр а, «гьание халкь чӀирине хӀаар ваъара» хьур, амма зада гьанийклаа са тахсир ки агырдиш, выхьды улихьде суалбыр выйне. 15Иродда ки агыр адиш Гьанийклаа тахсир, гьадыыла гьание Гьа яхда хъургъа хъыъыр а. Гьа дар-агъаджаа реъэсды себеб адиш. 16-17За Гьанийис кӀар гъихьир, сихъигас выси.
18Гьа гедеэне сиенебише, са ггаӀляа кал, лал ваъара:
– Гумаъ гьа! Ес Варывый сихъигаъ! (19Гьа «шегьерди ад илсанар лаъ ледири» хьур на эдеми йыхӀыри хьур хакьыр ад эдеми йиъий.)
20Маа гьалгара гьабишихьван Пылат, ГьӀаса сихъигас йигара.
21Амма тимбишды аӀъ ай:
– Дар-агъаджаа реъ Гьа! Дар-агъаджаа реъ! 22Хьибыдхьусды хылис рухьура гьабишде Пылата:
– Йидж шыв писвалды виъи Гьание ваӀс выъыр ад? Зас Гьанийклаа уьлуьмес лейихды са тахсир ки гьабгурдиш. За Гьа етес выр, сихъигаси.
23Амма тимбишды хъӀахъӀджаачӀур, лал ай, «ГьӀаса Дар-агъаджаа реъ» хьур, аӀъаӀре Пылатды ун каджагъур. 24Пылата ки гьабишис выгад гвалах ваъара: 25гьабише хъӀагъӀаре ад эдеми йыхӀыд не шегьерди илсан лаъ лийидбыйды гъаъ сихъилгара, ГьӀаса джвершис шыв йигаарди гьаъас вылцӀара.
«Медеш захда!»
26ГьӀаса дар-агъаджаа хад гедеэне, Гьанийды джыбра хач йихис вылцӀара са Кирендаады «Симан» хьур эдемиеде, гьа арыди хуйяа хъиъид.
27ГьӀасад джыбра са гьӀараасат хъуй, гьади хьыле ки кий, джвер джухьды мыхыр ветере, кьвакь-кьул ветере, ГьӀасахда дешере ад. 28ГьӀасара, гьабишихда сукур, рухьура:
– Медеш Захда, гьай Иерусалимдид хьыле!
ВаӀхӀде не выхьды хынимешихда деш!
29Гьамыъ йиъина а йыгъбыр, мисе гьухьусды:
«Шудаъ бахтлыер диъи велед джившидбыр на джуьдхуьдбыр
на тӀитӀ кыджывыдбыр!»
30Гьа гедеэне банымыда гьухьуси:
«Яа сыхӀ!» –
тӀуьнтӀуьймыда гьухьуси:
«Е гидиркӀа даъ!»
31Емиш выгыргад хукас гьааса гьаъад,
къурудис шыв гьаъаси?
Хыл лювуш гьабишыыла
32Гьанийхьван сытӀаъна дар-агъаджаа хай мадды кьӀвар хъачах ки, 33гьабыр сиене «ГаӀвгаӀвый» хьур дур гъад джигиди ледкьыйне, дар-агъаджаа риъири гьади ГьӀаса, – хъачахар ки, са – Гьанийды гьӀарчед хылыы, са – гадыхъды.
34ГьӀасара рухьурай:
– Джан дид! Хыл лювуш гьабишыыла, гьабишис джвер шивди гьаъара ад гьацӀара адиш!
35Лыдж ивир, гьабише ГьӀасад валыг ки джвершис гетӀва гьаъара. Халкь лувзур, гывкъара ай. Агъсакъалаше ки яхъӀбыр гьаъара Гьанийыы, рухьура ай:
– Маддыбишис куьмегбыр гьаъарай, гьамыъ джу джус куьмег гьыъыхь мын, нагагь выдж Аллагьара кеэръир ад Мусуд йиъинехъун!
36Эскереше ки Гьанийклаа иянатбыр гьаъара ай. Бегеде дуруъура, гьабише ГьӀасас чӀырчӀыма хъишид чахыр вылцӀарай, 37мисе рухьура:
– Нагагь Вы джавыдашды ПагьӀчаа йиъинехъун, ва вас куьмег гьаъ!
38Гьанийды уула гъаъ кихьир ай:
«Ми джавыдашды пагьӀчаа йиъи!»
39Сабыйды хъачахара, Гьанийхьван хачылыы хъийхыр ад, Гьанийхда себыр гьаъара:
– Гьаада, Вы гьакьды Мусуд йиъид гедеэне, ес ки вас ки куьмег гьис джаъад?!
40КьӀвархьусды гьа гиихье гьаъас чалыш руъура ай:
41– Йишири, вас Йинчыыла гичӀеэрдишме? Вы ки хачылыхда хъудишме?! Амма ес гьааса йыха йиъи, еде ес лейихды йиъи выр ад. Гьание шешин нагьакьды гьыъыр адиш. – 42Хьели гьание ГьӀасада рухьура: – ГьӀаса, Вы ПагьӀчаана хъиркьыйне, зы йикӀыы хъыгаъ!
43– За вада чӀел вылцӀара, вы гъиигъа мадана Захьван, сытӀаъна, дженнетди йикиси, – джываб вылцӀара ГьӀасара.
44Гъаъ гьанкьууды виъий. Садахьурка виригъ хывкьыри. Сиене дуьнйа мыӀчӀахъа вишири йыгъад сагьӀат хьибдыы йыкьамаъ духъунды. 45Илагьиед хала ад перде кьӀундиъне, чӀирх хьур, сур вишири. 46ГьӀасара гъигъене лал ваъара:
– Гьай Дид! Выды хыле вылцӀара Изды рухӀ! – Гьа чӀилихьван ГьӀасад ил киибхьура.
Халкьдисды ух
47Центурионыс гьагуйне, шууды карбыр йиширди, хьесымаала саъ хыл йыгыр, рухьура:
– Валлагь, гьеми эдемиек тахсир кидишды кал ий!
48Сиене гьӀараасат, тамашедис ягъмиш вишир ад, шыв йиширди гьагуйне, мыхыр ветере халма хъӀувгъӀуре. 49Сиене ГьӀаса гьацӀад духъундыбыр хырыда луьздуьр, гадкъара ай. Гьабишик Гьанийхьван Галилеядаа йидкьыд хьыле ки кий.
ГьӀаса кирхьере
50-51Гьади руъура «Йисухь» хьур эдеми, Иудеядид «Аримафея» хьур шегьердаады. Гьа гъӀыдилды йикӀ ад на гьакь гуьзет гьаъад эдеми йиъий, Аллагьад ПагьӀчаалыгъ мыс вуруъурди гакъара ад. Гьа, выдж ки МеслагьӀатмык кид сабыйды йиъийнехъунки, рази диший МеслагьӀатере гьыъыр адыы. 52Пылатды бегеде йыхьыр, Йисухьа ГьӀасад майит кихьис ихтияр вагъӀаре. 53СехъетӀир майит, аркӀа гьыъыр кафныма, илхьере Гьа дагьра адхъӀур ад сыра, – гьади гьала вышне кихьир ад диший. 54Улджумад йыгъ йиъий, каӀбчӀура ай кишды йыгъад нахӀ. 55ГьӀасахьван Галилеядаа йидкьыд хьылешис, Йисухьды джыбра хъуна дыхьыр, сиене гьабгура – сыр ки, шууна Гьа кихьирди ки. 56Хъуьдуьргъуьр, халма хъидкьыр, гьабише гьӀатирбыр на бытӀрад ил кид хӀаредбыр гьӀазыр гьаъара.
Кишды йыгъа гьабише шешин гьаъаардиш, Къаанунара рухьуд кал.
Currently Selected:
Лукара йибкьыд Шадды Хабар 23: RUT
Highlight
Share
Copy
Want to have your highlights saved across all your devices? Sign up or sign in
© Библие мадды чӀилмыы хъывгад Институтара, 2004
