Лукара йибкьыд Шадды Хабар 24

Сагъды сагъдыбишик ки

1ГьӀафтидид сахьусды йыгъа, гьӀатирбыр на хӀаредбыр ки хана, йаӀкв кьатӀ йишир мадана, гьабыр дуруъура сырыы. 2Амма гьабишде сырыд ригихда хъивир ад духул хьуъ выъыр ана ывылгара. 3Ара дыхьыйне, ГьӀасад майит ахъылгаардиш. 4Хьыле суьтӀуьр гедгыр мадана, гьабишды уликлаа лаъ кьӀвар нур кеэреэдхьвад валыг гъад эдеми луьдуьлзере. 5Хьылеше, гичӀ йывхӀыр, улабыр саъ гьыъыйне, тимбише рухьура:

6– ВаӀ сагъдыбыйды дыркьыдбишды арыдаа ахтармиш гьидис гьаъад йиъи? Гьа миди адиш. Гьа сыраа лухъузур а. ЙикӀыы хъыгаъ, шыв хьурди Гьание ваӀде гьала Галилеяди марана. 7«Илсанашды Дух гунаабыр кидбишды хыле выси, дар-агъаджаа реъэси, амма хьибыдхьусды йыгъа Гьа сыраа лухъузаси», хьур, гьухьур а.

8Тимбишис ки йикӀыы хъӀугъӀуре Гьанийды чӀелбыр. 9Сырыыла хъидкьыр, гьабише гьа ихтилат гьаъара цӀысыннийис не мадды сиенебишис. 10Гьа хьыле диъий Мария Магдалина, Иоанна на Якьубды нин Мария. Мадды гьабишихьван гид хьылеше ки шагырташде гьааса рухьура ай. 11Амма гьабишды чӀелбыр шагырташис мыхьчаӀбыр калагури, хьылешыы инаамиш диширдиш. 12Петр гьади мадана сырыхда яхыри. Аъ гакъыд, гьанийс гьабгура са кафанбыр. ГьӀалаамат йишир, хъӀугъӀуре гьа хала.

Эммаусдид рыкъӀа

13Гьа йыгъа мутагьӀлимешиклаа кьӀвар Иерусалимдид бегеде хад Эммаус хьур мукъӀа диъина ай, 14йишид гвалахмыклаа далгара. 15Гьабишды ихтилатмыд на гьӀаджетмыд арыди ГьӀаса выдж руъура гьабишды бейде. Бегеде йиркьыр, Гьа ки тимбишихьван йирхьара. 16Амма тимбишды улабас бавыш йыхӀыд кал йиъий: гьабишис Гьа хъацӀаардиш. 17ГьӀаса гьалгара гьабишихьван:

– ВаӀ гьидиклаа и рыкъӀаӀ далгара ад?

18Тимбыр луьдуьрзере, хьесымбыр ки пашмална, Сабыйние, «Клеопа» хьур, рухьура ГьӀасада:

– Сиене Иерусалимдаа са вас име миди ми йыгъырма йишид кардимыклаа хабар адишды?

19– Шиви йишид? – хулкара ГьӀасара.

– Назарый ГьӀасас вишид гвалах, – рухьура тимбише. – Гьа Йинчид улихьде ки, илсанашды арыди ки кьуувет ад пайгъампар йиъий, 20амма ихьды сахьусды дибиреше не агъсакъаалаше Гьа йикьис выри: Гьа хачылыы риъири. 21Ес хьуйне, Гьанийдаа Израилдис куьмег йикисды калагур ай. Гьадыхьван ки бегьем диш: гьа гвалах вишир ад хьибыдхьусды йыгъ йиъина ай, 22ихьды хьылеше ес мадды гьӀалааматад ихтилат гьыъыйне. ЙаӀкв кьатӀ йишийне, дыхьыр а гьабыр сырыы. 23Амма майит аджыгыр, хъидкьыр, рухьура, джвершис малаикмар гьагури хьур. Гьаммыра гьухъури, хьва, «ГьӀаса сагъна мара» хьур. 24Ихьдыбишиклаа са-садбыр дыхьыйне сырыда, гьагур а хьылеше гьухьуд кал йиъид сиене. Амма выдж гьалысна гьагур адиш.

25– ВаӀ шудаъ гьакьалдаа сылды илсанар диъи? – рухьура ГьӀасара гьабишде. – Шудаъ четинене инаамиш дуруъурди гьай ваӀ пайгъампараше ваӀде гьухьудыы! 26Бес Мусудас гьа сиене гьӀазабыр гьагун лазим дишийме, Гьанийды дур идхьун бадаана?

27Хьели Гьание тимбишис джуклаа Диндид дахьвдарак кид духъунды джыгаабыр ачых гьаъара, Мыса-пайгъампараала каӀчӀур, мадды сиене пайгъампарашыы йыкьамаъ.

28Гьабыр диъина ад мукъӀуде ледыркьад гедеэне, ГьӀасара джуды рахъӀне хъӀугъӀус йигадбишдыбыр гьыъыри. 29Амма тимбыр сыдылхӀаӀре Гьанийыы, джвершихьван сукьа хьур:

– Сукьа ехьван. Йыгъ лаабтӀура а, гъаъ ки нахӀ и.

ГьӀаса хала аӀчӀур, гьабишихьван алгара. 30Гьабишихьван са устӀулахда сукьур, дугьӀа гьыъыр, кьатӀ выъыр хьыв, вылцӀара тимбишде. 31Хьели тимбишды улабаала бавыш сихъиибхьура – гьабишис хъацӀара ГьӀаса. Амма гьамыъ ГьӀаса уликлаа сухъулгара. 32Мибише са-сынийде рухьура:

– Бес ихьды йикӀ гьулхьара адишийме, Гьа рыкъӀа ехьван гьалгад гедеэне, Диндид дахьвдар хӀаар гьаъара ади?!

33Гьабыр гьади мадана луьхъуьздуьр, хъӀудире Иерусалимди. Гьабыр цӀыса шагырт на мадды мутагьӀлимер ад джигиди аӀчӀуйне, 34тимбише рухьура мибишде:

– Илагьи дугъридан лухъузур а сыраа. Гьа Симаныс гьагури.

35Хьели мибише ихтилат гьаъара, рыкъӀа шыв йиширди, шууна джвершис Гьа хъацӀырди Гьание хьыв кьатӀ ваъад джигиди.

ГьӀаса руъура джуды мытагьӀлимешихда

36Гьабише ихтилат гьаъара мадана, ГьӀаса выдж лубзура гьабишды арыдаа лаъ, мисе рухьура:

– Ассаламу гьӀалейкум!

37ГичӀ вырыхӀыре мибишис, гьӀаламат гьабгуд калагур.

38– ВаӀс гичӀере гьидис руъуд и? – хулкара ГьӀасара гьабишдаа. – Гьис выхьды йикӀбыр шаклы руъура? 39Гадакъ Изды гъилабахда-хылабахда – ми Зы йиъи. Кийкьаъ хыл Зак, ваӀс гьагуси гьӀаламатахда як-кьырыб адишды, Захда ад.

40Гьааса рухьура, гьагва гьаъара ГьӀасара мибишис хылаб-гъиляб. 41Тимбыр шадваӀлире инаамиш джидчӀир, гьӀаламат гьаъара гедылгара. Гьа гедеэне ГьӀасара хулкара гьабишдаа:

– ВаӀхӀде миди шыв-га улесды ама?

42Мибише Гьанийс йидже гьыъыр ад балгъуд тике вылцӀара. 43ГьӀасара лаӀшур, гьабишды улихьде улере.

44Хьели ГьӀасара рухьура гьабишде:

– Зы ваӀхьван ад гедеэне За гьухьуд чӀилмыд натыдже гьеми виъи: Мыса-пайгъампарад Къаанундик Заклаа шыв киди, мадды пайгъампараше кихьир адбыр, дугьӀамык кидбыр – сиене кьулуу йыкьасды йиъи. 45ГьӀасара хьели гьабишис Диндид дахьвдарак кидмыхьде гедкьас куьмег гьаъара. 46Гьание рухьура:

– Миди мисе ки: Мусудара джус кихьир ад гьӀазабыр летӀин лазим йиъи. Хьибыдхьусды йыгъа Гьа лухъузаси сыраа. 47Гьанийды дуруула гьухьун лазим йиъи сиене халкьмыда – Иерусалимдаа каӀчӀур: «гьӀумир кывырхӀа хъывыъыр, Йинчыы суьхъуьдкуьн лазим йиъи» хьур, Йинчире хыл луьвшун бадаана. 48ВаӀ сиене гьадид шийидер диъи. 49За хьуйне гьамыъ вылцӀара ваӀс Изды Диде выс хьур чӀел выр адбыйды. ВаӀ, хьуйне, шегьерди сыкьӀаӀ таа ки элаады кьуувет йибкьыр, ваӀс гудж вылцӀамаа.

ГьӀаса хӀалмыра йихире

50ГьӀасара гьабыр шегьердаа гъаъ дыгыр, гьабишихьван Вифаниядыы йыкьамаа руъура 51Хылабыр лаъ гьыъыр, гьание рухсат вылцӀара мибишис. Рухсат вылцӀара-вылцӀара, Гьа хырыдадире хырыда руъура, хьели лаъ хӀале леръэре каӀбчӀура.

52Мибыр Гьанийды улихьде джилимыс дырыхӀыре. 53Хьели, шадамерд дишир, гьабыр хъӀудире Иерусалимди. Балад гедеэне Йинчид Хала адылгара, Йинчихьде шукур ваъара.

Currently Selected:

Лукара йибкьыд Шадды Хабар 24: RUT

Highlight

Copy