Ka ki aitotiskeritci Cecoc otarotakana 4
4
Pien kirika Jean e kokwetcimikotcik cota iriniwa Ka Kitci Tipaskonikeritci
1Pien kirika Jean kiapatc taci aimihewakopan iriniwa e mitcetiritci. Aci ki pe takociniwok makatewokorewok acitc anahwe ka tiperimatc iriniwa ka nanakatcitaritci kitci aiamihe mikiwamiriw, kirika Sadducéen iriniwok. 2Nama mireritamwakopan osam anahweriw Piena kirika Jeanwa e taci kiskinohamakeritci kirika e tipatcimoritci e ki apitciparitci Cecoca, minawatc tca kitci ki tapweritcikaterik tapwe kitci apitcipaniwonik. 3Ki makonewok kaie ki arewok kipohotowikamikok nac e iti kicepawonik. Aci meka osam otakocinipan. 4Aci aric mitcetiwakopan iriniwok neta e tacitcik ka ki petakik aniheriw tipatcimowiniw e tapwerimatcik Cecoca. Wiec niaranwaw kice mitato mitana iriniwok aci taciwakopan ka tapwerimatcik.
5Minawatc kecikarik, aci cota okimawok kirika cota aiamihe okimawok kaie ka kiskinohamaketcik cota aiamihe irakonikewiniw ki mawotcihitowok neta Jérusalem otenak. 6Enko anahwe kaie ka ki pe icatc, kitci makatewokorew, Hanne ka icinikasotc, acitc Caïphe, Jean, Arikisan,#4.6 Arikisan: Alexandre kaie kaskina iriniwok ka tcirowematcik anihi kitci makatewokorewa. 7Ki itewok kitci pe iciwirakaniwiritci anahweriw Piena kirika Jeanwa, kitci tca kokwetcimatcik: “Tante wetciparik anihe mackawisiwin ka ki apatcitaiekw kitci ki kikehekw awik, kekotc awin ka ki miritakw aniheriw ka ici kackitaiekw?”
8Aci Pien, e mockineckakotc Miro Manitowa, itew: “Okimawok kirika aiamihe okimawok: 9anotc ki kokwetciminan osam e ki miro totawakitc iriniw e maskisispan kirika e kokwetcimiak tan wetci ki kiketc anahwe iriniw. 10Aci actew kitci kiskeritamekw ohwe, kirawaw kaskina e taciekw, kaskina kaie Israël iriniwok kitci kiskeritakik: wetci miro pimatisitc anahwe iriniw ka witcikapowictatakw, osam e ki apatanik oticinikasowiniw e mackawisimakanik, Cecoc Krist, Nazareth ka otcitc. Enko anahwe ka ki tcictaskowatekw tcipaiatikok, minawatc Kice Manito ka ki apitcipahatc. 11Anaha Cecoc, enko anahwe asini ka arimomakaniwitc Kice Manito Omasinahikanik:
‘Anaha asini, kirawaw manike iriniwok ka ki wepinekw,
enko anaha aci ka mawotci kictapatisitc.’ Psaumes 118.22
12Wir tepirak Cecoc kata ki akwacimew awiriwa. Nama meka taw kotak awik ota askik ka ki pe iciticohikotc Kice Manitowa ke ki akwacimitokw.”
13Aniki iriniwok ka tipaskoniketcik cota iriniwok otci, Ka Kitci Tipaskoniketcik e icinikatakaniwitcik, micta mamiskaterimewakopan anihi Piena kirika Jeanwa. Wapamewakopan meka e sokeritamiritci, kirika e kiskerimatcik aka e ki otci kiskinohamasoritci, aka kaie e kitci iriniwiritci. Kiskerimewakopan kaie e ki pa witcewaritci Cecoca. 14Aric kaie wapamewakopan anihi iriniwa ka ki kikehakaniwiritci pecotcik e pa nanipowiritci. Nama tca miskamwakopan kekociciriw ke ki itetcik. 15Ki itewok Piena kirika Jeanwa kitci orowiritci neta ka ici mawotcihitoritci niheriw Ka Kitci Tipaskonikeritci,#4.15 Ka Kitci Tipaskonikeritci: Enko aniki cota makatewokorewok acitc Pharisien iriniwok Ka Kitci Tipaskoniketcik ka icinikatakaniwiwakopanen, e mawotcihitowakopanen ko kitci tipaskonatcik awiriwa, kecpin e cota iriniwiritci. wirawaw tepirak kitci aimihitotcik. 16Ki ititowok: “Tan ke totawikok aniki iriniwok? Kaskina meka Jérusalem otenak ka taciketcik wewerita kiskeritamok anahweriw iriniwa ka ki ici mata kackitaritci. Nama tca ki ka ki itanano kiraskinaniwon. 17Nama aric actew awocamec kitci petakaniwok e aiarimotcikatek anihe ka ki isparik. Ki ka tca kokwectasomanowok. Ki ka itananowok aka awocamec kitci arimomatcik Cecoca oticinikasowinik.”
18Minawatc ki wicamewok Piena kirika Jeanwa, kaketin e itatcik tekaci kitci ponitaritci e arimomaritci kekotc e kiskinohamakeritci Cecoca oticinikasowiniw otci. 19Aric Pien kirika Jean ki naskamawewok, e itatcik: “Kirawaw tipirawe orakonamokw e apitc nataweritamokwen Kice Manito wir kitci sapitowakaniwitc kekotc ma kirawaw kitci sapitatak! 20Aric ninan nama ni ka ki ponitanan e arimotamak anihe ka ki ici wapatamak kaie ka ki ici petamak.”
21Aniki iriniwok ka kitci tipaskoniketcik kiapatc ki kokwectasomewok, minawatc ki pakitinewok. Nama ki otci miskamawewok kekociciriw ke ki otci kicakonatcik. Kaskina meka iriniwok mirwatcimepanak Kice Manitowa aniheriw otci ka ki isparinik. 22Anahwe iriniw ka ki kikehakaniwitc awocamec nemitana tato piponesikopan.
E ici aiamihatcik ka tapwerimatcik Cecoca
23Kotc e ickwa pakitinakaniwitcik Pien kirika Jean, ki natawapamewok okwimesiwawa kirika ki atisokowewok kaskina ka ki aiteritci anahweriw cota makatewokorewa ka tiperitamiritci kirika cota aiamihe okimawa. 24Ka ickwa petakik ka itatisokwakaniwitcik, kaskina aniki ka tapwerimatcik Cecoca tapickotc ki aiamihawok ohweriw: “Teperitcikein, kir ka ki kiceritaman wakwek, aski, kaie kitcikami, kirika kaskina neta ka ici takok. 25Kir ka ki miratc nitaniskotape nimocominan, kitarotakan Okimaw Tapit, ke itespan, Miro Manitowa e ki miratc, kitci tca aitetc:
‘Kekwariw wetci micta kiciwasitcik iriniwok
kaskina wiec ota askik?
Kekwariw wetci natowi totakik kitci matci totakik,
aka tca wiec e irapatanik? Ceckwat nte totamokw!
26Kice okimawok ota askik nisawiwok kitci natoparitcik,
okimawok mamo witcihitowok
e wi cakotcihatcik Teperitcikeritci kirika anihi okimawa ka ki orapamaritci.’ Psaumes 2.1-2
27Tapwe ni okimawok Hérode kirika Ponce Pilate ki mawotcihitowok ota otenak kirika iriniwok aka ka cota iriniwitcik acitc Israël iriniwok, e wi witcihitotcik kitci cakotcihatcik anihi kitarotakana ka kitcitwawisiritci, Cecoca, anihi ka ki orapamimatc. 28Ani e ki itotisketcik aniki okimawok, ki kictawok kaskina kir ka ki ici nataweritamopan acitc nikan ka ki oreritamopan kitci pe iciwepak, e micta mackawisiin. 29Anotc tca, Teperitcikein, ki petawawok e kokwectatcihiwetcik, kirika miricinan ninan ka atoskectatak tekaci kitci sokerimoak e tipatatamak kititewin. 30Wapatahiwe kimackawisiwin kitci ki kikehakaniwitcik iriniwok, kitci mata kackitakaniwok kirika kitci matawi aitotiskaniwok, Cecoc oticinikasowin otci, kitarotakan e kitcitwawisitc.”
31Ka ickwa aiamihatcik, neta ka tacikewaspan ka ki ici mawotcihitowaspan ki aiatcipariniw. Kaskina e tacitcik ki mockineckakowok Miro Manitowa, kirika ki pa tipatcimowok Kice Manitowa otitewiniw e sokeritakik.
E wawitcihitotcik aniki ka tapwerimatcik Cecoca
32Kaskina neta e tacitcik iriniwok ka tapwerimatcik Cecoca tekaci mamweritakosiwakopan, tapickotc e iteritakik kirika e ici nataweritakik, nama otci peikw neta e tacitcik kitci itetc e ici tatak wircike e tiperitak. Aric kaskina e tacitcik itewakopan: “Kaskina e ici tataman, kaskina e taciikw tapickotc ki tiperitenano.” 33Cecoc otarotakana micta mackawerimowakopan e tipatcimowaspan e ki wapamatcik Teperitcikeritci Cecoca e ki apitciparitci. Kaskina tca mictahi ki cawerimikowok Kice Manitowa. 34Nama awik neta e tacitcik noteparikopan e ici kictapatcitatc. Kaskina meka aniki ka tatakik kitikan askiriw kekotc mikiwamiriw ki atawewok. Ki tca petawok aniheriw coriariw irikik ka ki isparinik e atawetcik, 35e miratcik Cecoca otarotakaniw. Minawatc papeikw matinamatowok aniheriw coriariw irikik wa apatcitatcik. 36Enko ohweriw towiriw e totamwakopanen: tapan neta peikw iriniw, Sosep e icinikasotc. Arica kaie ki icinikatakaniwiw Barnabas, Cecoca otarotakana e ki icinikatikotc. —Aniheriw oticinikasowin wi itemakaniw “Anahwe ka sokimiwetc.”— Anahwe Sosep cota iriniwipan, Lévite itekera ka ici apitcik aniki cota iriniwok, kirika neta otcikopan minictikok Chypre ka icinikaterik. 37Ki atawew okitikan aski e tatakipan. Minawatc ki petaw aniheriw coriariw, e miratc anahweriw Cecoca otarotakaniw.
Currently Selected:
Ka ki aitotiskeritci Cecoc otarotakana 4: ATMK
Highlight
Share
Copy
Want to have your highlights saved across all your devices? Sign up or sign in
Canadian Bible Society, 2014
