Jean 4

Cecoc e aimihatc Samarie iskwewa ka otciritci

1 Pharisien iriniwok ki petakewakopan e itatisokatakaniwiritci Cecoca, kirawe wir e nosanehwakaniwiritci patok Capatis, kaie kirawe wir e sikahatakeritci. 2Aric namaiew ni wir tipirawe Cecoc ka sikahatakespan. Owitcewakana ni ka sikahatakerispana. 3Ka petak Cecoc e itatisokaniwonik, ki nakatam Judée askiriw, nete Galilée askik e kiwetc. 4Kitci ki ici takocik nete, patima kata iti acockam Samarie askiriw.

5Aci iti takociniw pecotcik otenacik, Sychar ka icinikaterik, Samarie askik itekera, pecotcik kitikan askik. Enkweriw askiriw weckatc Cakop#4.5 Cakop: Jacob ka ki mirakopanen okosa Sosepa,#4.5 Sosep: Joseph 6neta e ici takonik Cakop otahipan. Aieskosiw Cecoc, kinowec e ki pimotetc. Apiw pecotcik otahipanik. Aci wiec apita kicikarikopan.

7Peikw iskwew, Samarie askik e otcitc, petcimotew e pe natopetc. Itiko Cecoca: “Pe minihici ke minikwehian.” 8Owitcewakana Cecoc otenak ki icawakopan e nta otapinakik mitcimiriw. 9Anahwe Samarie iskwew itew Cecoca: “Kir ki cota iriniwin! Kekwan wetci nataweritamawiin kitci minihitan, nin Samarie askik e otcian?” Nama meka ko wi aimihewok Samarie iriniwa cota iriniwok.

10Ki itew Cecoc: “Kecpin ki kiskeritaman e ici miriwetc Kice Manito, kaie kecpin ki kiskerimatc awin anahwe ka nataweritamask nipiriw e wi minikwetc, ki ta nataweritamawaw nipiriw. Ki ta tca mirikw nipiriw ka pimatisihiwemakanik.”

11Itew anahwe iskwew: “Okimaw, nama takon ke ki natopewakein, kirika kickaiaw ohwe otahipan. Tan ke ki totaman kir kitci ki otinaman anihe nipi ka pimatisihiwemakak? 12Kitaniskotape kimocominapan Cakop ni ki mirikotan ohweriw otahipaniw. Kaie wir ki minikwew aniheriw nipiriw, kaie okosa acitc omaritcenicima ki minikweriwa. Kit iteriten ia kir kirawe kit iteritakosin patok anahwe Cakop?”

13Cecoc itew: “Tato awik ke minikwetc aniheriw nipiriw kiapatc kata pakatamo. 14Anahwe aric ke minikwetc nipiriw nin ke mirak, nama wiskat awocamec kata pakatamo. Aniheriw meka nipiriw nin ke mirak mia nipi ka moskitciwok kata ispariniw opimatisiwinik, kakike pimatisiwin mocak kitci ki otci pimitciwok.”

15Itew anahwe iskwew: “Okimaw, mirici anihe nipi, aka awocamec kitci pakatamoian, kaie tca aka arimatc awocamec kitci pe natopeian ota.”

16Itiko Cecoca: “Matca nta wicami kinapem, minawatc tca pe iciwirakan ota.”

17“Nama taw ninapem,” itew anahwe iskwew.

Minawatc Cecoca itiko: “Ki tapwan e itein, aka e tatc kinapem. 18Aric niaraniwok kinapemak, kaie anahwe iriniw anotc ka witci tacikematc namaiew ni kinapem. Tapwe anihe ka itein.”

19Aci anahwe iskwew itew: “Okimaw, aci ni wapaten kir tapwe e nikan tipatcimoin. 20Kitaniskotape kimocominook Samarie iriniwok ki kicterimewok Kice Manitowa okititin anihe ka matinarik. Aric kirawaw ka cota iriniwiekw, kit itanawaw Jérusalem otenak kitci taci kicterimakaniwitc Kice Manito.”

21Itiko Cecoca: “Tapwetaci ohwe: kecko kata pe otcitciparin aka kitci taci kicterimekw Kotawino neta matinak, aka kaie nete Jérusalem otenak. 22Kirawaw Samarie iriniwok ki kicterimawaw anahwe aka ka kiskerimekw. Ninan e cota iriniwiak, ni kiskerimanan kaie ni kicterimanan. Cota iriniwiw meka anahwe ke akwacimiwetc. 23Aci aric kekatc kata otcitciparin, aci kaie ickwa pe takociparin: iriniwok tapwe ka kicterimatcik Kotawinowa e nipiskoctawatcik, Omanitomiriw acitc otapwewiniw kata tiperimikowok. Enko aniki towihik ka natawerimikotcik Kotawinowa kitci kicterimatcik. 24Manitowiw Kice Manito. Aniki tca ka kicterimatcik acteriw kitci kicterimatcik e tiperimikotcik Omanitomiriw acitc tapwewinik itekera.”

25Itew anahwe iskwew: “Ni kiskeriten kitci takocik anahwe ka ki iteritci Kice Manitowa kitci pe iciticohikotc kitci akwacimiwetc, Krist ka icinikatakaniwitc. Takocike tca wir, kaskina kekwariw ki ka witamakono.”

26Aci itiko Cecoca: “Nin meka, ni anahwe mekwata ka aimihitan.”

27Mia kotc nta owitcewakana Cecoc pe takociniwok. Micta kockowapamowok iskwewa e taci aimihatc Cecoc.#4.27 Micta kockowapamowok iskwewa e taci aimihatc Cecoc: Ani apitc tekaci nama mireritcikatekopan iskwew kitci aiamihakaniwitc neta e ici taritci kotakihi iriniwa. Kirawe kaie nama mireritcikaterikopan Samarie iskwew kitci aiamihakaniwitc, “ometciwiw” e iterimikokopanen cota iriniwa. Aric nama otci peikw neta e tacitcik wi kokwetcimew, kitci itatc: “Kekwan aniheriw ka nataweritamawotc?” kekotc: “Kekwan wetci aimihatc?”

28Minawatc anahwe iskwew nakatam nta onatope opotai. Ekoni e ici kiwetc otenak, e nta itatc iriniwa: 29“Petcimotekw. Pe natawapamakw nete iriniw ka ki witamawitc kaskina ka ki aitotamwak. Enko na pot anihi ka ki itespan Kice Manito kitci pe iciticohwatc ota askik kitci akwacimiweritci?”

30Ekoni e ici matcatcik neta otenak e natawapamatcik Cecoca.

31Mekwata Cecoc owitcewakana taci cikimiko kitci mitcisotc. “Kiskinohamake iriniw, mitci kekocic,” itiko.

32Itew Cecoc: “Nin takon ke mitcian, kirawaw aka ka kiskeritamekw.”

33Minawatc kokwetcimitowok aniki Cecoc owitcewakana, e itetcik: “Ki pe iciwitowakaniwiw ia ke mitcik?”

34Aci itew Cecoc: “Enko ohwe nimitcimim, kitci itotiskewak otiteritamowin anahwe ka ki pe iciticohwitc, kitci kictawak aniheriw otamirowiniw ka ki miritc kitci itotiskewak. 35Kit itanawaw ko: ‘New pisimwa e ickwa matce kitikaniwok kitikan, aci mirwacin kitci mawotcitakaniwok.’ Aric nin kit ititinawaw: miro kanawapatamokw kitikan aski. Aci kicikin kitikan! Aci mirwacin kitci mawotcitakaniwok! 36Anahwe anotc ka mawotcitatc kitikaniw aci pe otitiko aniheriw ka ki kanewitc. Anotc mekwata mawotcitaw aniheriw kitikaniw, kakike pimatisiwin otci, tapickotc kitci ki mireritakik anahwe ka ki matce kitiketc kitikaniw acitc anahwe ka ki mawotcitatc. 37Tapwe meka anihe ka itwaniwok: ‘Peikw iriniw kata matce kitikew, kotak tca kata mawotcitaw kitikaniw e ickwa kicikinik.’ 38Kitikan askik ki ki iciticohotinawaw kitci mawotcitaiekw kitikan aka kirawaw tipirawe ka ki ici matce kitikeiekw. Kotakihik ki otamirowok nete. Kirawaw tca ki mawotcitawanawaw aniheriw ka ki ici otamirotatcik.”

39Mitcet Samarie iriniwok neta otenak ki tapwerimewok Cecoca, osam anihi iskwewa e ki itikotcik: “Ni ki witamakw kaskina ka ki itotiskewak.” 40Ka natawapamatcik tca Cecoca, kaketin ki wicamewok kitci witci tacikemikotcik. Nicwo kickwa neta ki tacikeriw. 41Kirawe kiapatc iti mitcetiwakopan iriniwok ka tapwerimatcik, osam e ki petawatcik wir tipirawe e aiteritci. 42Kaie ki itewok anihi iskwewa: “Aci ni tapwerimanan, nama tepirak kir ka ki ici tipatcimoin, aric kaie ninan tipirawe e ki petawakitc. Ni kiskeritenan tca, enko anahwe tapwe Ke Akwacimatc iriniwa ota askik.”

Cecoc e kikehatc kice okimaw arotakana okosiriw

43Ka ickwa taciketc neta nicwo kickwa irikik, Cecoc ki matcaw, Galilée askik e icatc. 44Wir tipirawe ki itekopan: “Ka nikan tipatcimotc nama ko kicterimakaniwiw nete askik ka ki taci nitawikihakaniwitc.” 45Ka iti takocik Galilée askik, iriniwok neta ka taciketcik mireritamwakopan. Kaie wirawaw meka ki icawakopan nete Jérusalem otenak e aiamihe makocaniwonik, Pâque e icinikaterik, kaie ki wapamewakopan kaskina ka ki aitotamiritci neta mekwata aniheriw e mirwatcitcikaterik.

46Minawatc kiapatc Cecoc ki pe icaw nete Cana otenak, Galilée askik itekera. Ekota nete ka ki meckotcitaspan nipiriw, minicaporiw kitci takonik. Takopan neta peikw kice okimaw arotakan, e akosiritci peikw okosa Capernaüm otenak. 47Ka petaketc e ki takociniritci Cecoca Galilée askik, Judée askik e ototeritci, ki natawapamew, e pakoserimatc Capernaüm otenak kitci icaritci, kitci nta kikeharitci okosa, aci e powiritaritci. 48Itew Cecoc: “Nama wiskat ki ka kackitanawaw kitci tapwetowiekw, patoc kecpin e wapatamekw e mata kackitakaniwok kirika e matawi aitotiskaniwok!”

49Itew anahwe kice okimaw arotakan: “Okimaw, pe ica nimikiwamik epwamoci nipotc ninitcanic.”

50Itiko Cecoca: “Kiwe kimikiwamik. Kata miro pimatisiw kikosis.”

Anahwe iriniw ki tapwetam ka itikotc Cecoca. Ki matcaw. 51Mekwata e pimotetc e kiwetc omikiwamik, otarotakana pe nta nakickako, e itikotc: “Miro pimatisiw kikosis!”

52Ki kokwetcimew tan e tato tipahikanearikipan cowatc ka iti itiritci anihi okosa. “Peikwo tipahikan otakocik ka ickwa apita kicikarik ki iti acte kisiswapinew,” itiko anahweriw otarotakana.

53Kek mikawiw anahwe kice okimaw arotakan, ekoni mia apitc e tato tipahikanearikipan Cecoca ka itikotc: “Kata miro pimatisiw kikosis.” Aci tapwerimew Cecoca anahwe iriniw, acitc kaskina ka tacikeritci omikiwamik kaie wirawaw tapwerimewok.

54Ekoni ka ki ici mata kackitatc Cecoc, ka ickwa pe kiwetc Galilée askik, Judée askik e ototetc. Ekoni aci nicwaw e mata kackitaspan neta, kitci ki kiskeritakonik Kice Manitowa e ki pe iciticohikotc.

Currently Selected:

Jean 4: ATMK

Highlight

Copy