Jean 5

Cecoc e kikehatc iriniwa ka niponesiritci

1Minawatc kecikarik Jérusalem otenak ki icaw Cecoc, mekwatc e aiamihe makoceritci cota iriniwa. 2Neta waska otenak takonokopan kipwaskohikan. Ickwatema aitakonokopan nete kitci ki pitakaniwonik otenak, papitoc e aicinikateki. Peikw anihe, Maritcenici Ickwatem icinikatekopan. Pecotcik neta takonokopan kapacimo orakan. Bethzatha icinikatekopan anihe kapacimo orakan, hébreu e ici arimwaniwok, cota iriniwok e ici arimwetcik. Niarananokopan neta e ntisketakak kapacimo orakanik. 3Ekota neta e taci mackociniwakopanen ka akositcik e mitcetitcik: aka ka wapitcik acitc ka maskisitcik kaie ka niponesitcik. [Wetci tacikewakopanen aniki, petawakopan kitci aiatakamipirinik nipiriw kapacimo orakanik ka ici takonik. 4Nanikotino meka pe racirerikopan Teperitciketc otacerima kitci aiatakamiparitaritci aniheriw nipiriw. Anahwe nictam ka akositc ke pakopespan e ickwa aiatakamiparinik nipiriw ki kikew, kotc e ici akositc.]#5.4 Ohwe ka masinatek (3b-4) nama takon mitcet weckatc masinahikanik.

5Peikw iriniw kaie wir neta tacikekopan, nicto mitana acitc nicwaso#5.5 nicto mitana acitc nicwaso: (38) pipona esko itapinekopanen. 6Cecoc ka wapamatc anihi iriniwa e miciniritci, kirika e kiskeritakipan aci weckatc e ki itiritci, aci kokwetcimew: “Ki nataweriten ia kitci mirwatisiin?”

7Itiko anihi ka akosiritci: “Okimaw, nama taw awik ke ki witcihitc, kitci pakopehitc neta nipik kipacimo orakanik, aiatakamiparike nipi. Mekwata ko e kokwetcitaian kitci pakopeian, kotak ka akositc wirctam pakopew epwamoci nin.”

8Aci itew Cecoc: “Pasiko! Otapina kitetaskonikan! Pimote tca!” 9Tecikotc kikew anahwe iriniw. Otapinam otetaskonikan e iti pimotetc.

Ani apitc arwepi kicikakopan. 10Cota okimawok ki itewok anihi iriniwa ka ki kikehakaniwiritci: “Arwepi kicikaw anotc. Nama actew kitci otapinaman kitetaskonikan.”#5.10 Nama actew kitci otapinaman kitetaskonikan: Ekoni meka e masinatek cota aiamihe irakonikewinik, aka kitci otamironaniwonik, aka ni kaie awik kitci otapinak otetaskonikan e mekwa arwepi kicikarik.

11Naskamawew e itatc: “Anahwe ka ki kikehitc ni ki itikw: ‘Otapina kitetaskonikan! Pimote tca!’”

12Aci kokwetcimewok: “Awin na anahwe ka ki itisk kitci otapinaman kitetaskonikaniw acitc kitci pimotein?”

13Aric anahwe ka ki kikehakaniwispan nama ki otci kiskerimew anihi ka ki kikehikotc. Ekoni ka ici matcarikopanen Cecoca, osam e mitcetinaniwonikopanen.

14Minawatc neta kitci aiamihe mikiwamik Cecoc ki mekwackawew anihi iriniwa ka ki kikehatc. Aci itew: “Aci ki mirwatisin. Aka minawatc pactatikan, aka tca wiec kitci iciwepasiin kirawe e maratak.”

15Aci matcaw anahwe iriniw, e nta witamawatc anahweriw cota okimawa, e itatc: “Wir Cecoc ka ki kikehitc.” 16Ekoni tca wetci iti arimihikokopanen Cecoc anahweriw cota okimawa, osam e ki kikehiwetc e mekwa arwepi kicikarik.

17Ki itew Cecoc: “Mocak otamiro Notawi, kaie nin tca actew mocak kitci otamiroan.”

18Ekoni tca wetci kirawe awocamec nanto kiskeritamwakopanen aniki cota okimawok ke ki totcikaterik kitci ki nipahakaniwiritci Cecoca, nama osam tepirak e ki pikotaritci aniheriw aiamihe irakonikewiniw e arwepi kicikarik, aric kaie e ki icinikataritci Kice Manitowa “Notawi,” acitc tapickotc kitci asiteritakosiritci kirika Kice Manito, e ititakosiritci.

Kice Manito Okosa otiperitamowin

19Aci Cecoc ki naskamawew anahweriw cota okimawa, e itatc: “Ohwe ka witamatakok, tapwe ni icinakon: Kice Manito Okosa nama wiskat wircike kata ki totam kekociciriw. Tepirak kotc e ici wapamatc Otawiwa, ekoni e itotisketc kaie wir. 20Sakihiko meka. Wapatahiko tca kaskina e aitotamiritci. Kirawe kaie kiapatc e micarik ke totak kata wapatahiko. Ki ka micta mamiskateritenawaw wapatamekwe. 21Tapwe Notawi apitcipahew ka niporitci, pimatisiwiniw e miratc. Peikon kaie wir Okosa mireriw pimatisiwiniw anahweriw ka wi miraritci. 22Nama awiriw tipaskonew Notawi wir tipirawe. Okosa ki mirew tiperitamowiniw kitci tipaskonikeritci, 23kaskina awiriw kitci ki kicterimikoritci, mitowi wir ka ici kicterimakaniwitc anahwe Notawi. Awik aka ka kicterimatc Okosiriw, nama kaie kicterimew Notawiwa, anihi ka ki pe iciticohikotc.”

24“Ohwe ka witamatakok, tapwe ni icinakon: anahwe ka natotak e itewak, acitc ka tapwetowatc anihi ka ki pe iciticohwitc, kakike pimatisiwiniw aci ici tatam acitc nama kata anwerimakaniwiw. Mia mitowi aci e ki pimotetc nipowinik, kitci ki tca kakike pimatisitc. 25Ohwe ka witamatakok, tapwe ni icinakon: aci kekatc kata otcitciparin, aci kaie ickwa pe takociparin, ka nipotcik kitci petawatcik Kice Manitowa Okosiriw e pe petakosiritci. Kaskina ke petawatcik kata pimatisiwok. 26Notawi, enko anahwe ka pakitinak pimatisiwiniw. Ki mirew kaie wir Okosa kitci pakitinamiritci pimatisiwiniw. 27Ki mirew kaie tiperitamowiniw kitci tipaskonikeritci, osam meka wir Ka ki pe iriniwihitisoritci. 28Aka kockoparikw ohwe: aci kata pe otcitciparin kaskina aci ka ki rikwaskatakaniwitcik kitci petawatcik. 29Kata orowiwok omatikowociwak. Aniki ka ki miro totakik kata apitcipawok, kakike pimatisiwiniw kitci mirakaniwitcik. Aniki ka ki matci totakik kaie wirawaw kata apitcipawok, aric kitci anwerimakaniwitcik.”

30“Nama kekocic ni ka ki itotiskan nircike. E tipaskonikeian, nit aitotiskan kotc e ici witamawitc Kice Manito. Mia nit ici tipaskonikan. Nama meka ni nantowapaten kitci totaman nin tipirawe e aiteritaman. E iteritak anahwe ka ki pe iciticohwitc, ekoni e totaman.

E miro tipatcimakaniwitc Cecoc

31Kecpin nin tipirawe e miro tipatcimitisoian, nama sokiteritakon anihe nitipatcimowin. 32Taw aric kotak e miro tipatcimitc. Ni kiskeritamwan kaskina aniheriw otipatcimowin e tapwemakanik. 33Ki ki iciticohwawok iriniwok kitci natawapamatcik Capatisa. Tapwewiniw ki tipatatamakowok. 34Nama ni wi itwan, ni nantowapaten kitci miro tipatcimitcik iriniwok. Aric wetci iteian ohwe, tepirak kitci ki akwacimikoiekw. 35Anahwe Capatis, mitowi wactenamakan iteritakosipan, e iskahikatek kitci miro wactek. Memacic ki ki naheritenawaw kitci mireritamekw e waskorek. 36Takon aric nin kekocic kirawe e sokiteritakok patok aniheriw Capatis ka ki ici tipatcimitc. Kaskina e aitotiskeian, ka ki ici miritc Notawi kitci itotiskewak, ekoni ka otci miro kiskeritakok tapwe Notawi e ki pe iciticohwitc. 37Peikon kaie wir ni miro tipatcimikw Notawi, anahwe ka ki pe iciticohwitc. Nama wiskat ki ki otci petawawaw e ititakositc. Nama kaie wiskat ki ki otci wapamawaw e icinakositc. 38Nama kaie ki kanaweritamwanawaw otitewin kitehiwak, osam aka e tapwerimimekw anihi ka ki pe iciticohwatc. 39Wewerita ki kiskinohamasonawaw Kice Manito Omasinahikanik, e iteritamekw, ‘Ekota nta ke otci miskamak kakike pimatisiwin.’ Ekota aric ni mia neta masinahikanik ka ici tipatcimikoian! 40Nama aric ki wi pe natawapaminawaw, tapwe pimatisiwin kitci ki mirikoiekw.”

41“Nama ni wi mirwatcimikosin. 42Aric ki kiskerimitinawaw kirawaw. Ni kiskeriten aka e sakihekw Kice Manito. 43Notawi ni ki mirikw kitci pe icawak ota askik, wir otci. Nama aric ki wi tapwetowinawaw. Kecpin aric kotak awik e iteritak wir tipirawe kitci pe icatc, tecikotc ki tapwetowawaw. 44Ki mireritenawaw e mirwatcimitoekw. Nama aric ki nantowapatenawaw kitci mirwatcimitakw Kice Manito e peikocitc. Tan tca ke ki otci tapwetowiekw? 45Aka iteritamokw kitci itactahoritakok, Notawi kitci ici arimomitakok. Wir Moïse ki ka itactahorikowaw, anahwe tekaci ka ki asperimoekw. 46Kecpin aric tapwe ki tapwetowekw anahwe Moïse, kaie nin ki ta tapwetowinawaw. Ni ki meka pe arimomikw ka pe masinahak aniheriw omasinahikan. 47Aric aka tekaci e tapwetamekw aniheriw ka ki pe ici masinahak, nama kaie ki ka ki tapwetenawaw nin e iteian.”

Currently Selected:

Jean 5: ATMK

Highlight

Copy