Exodus 11
11
Ne Mahís Wahoʼronhkáten Ne Ronhnonhtí꞉io Nentewatié꞉rente Enrenhnákerahte Ne Roskenrahké꞉te Tsi Enrénheʼie
1Ethòne ne Roiá꞉ner wahawénhase ne Mahís, “Ènska khók shé꞉kon iesewáhteratsʼte ienskaʼténieʼte ne karewaʼtáʼtshera rahonhàke ne Egypt ronhnonhtí꞉io ó꞉ni ne rahonkwetashón꞉ʼa. Nenwató꞉hetste entsisewaʼríhon nahisewahiákenʼne. Kwáh kíʼ ó꞉ni, sewakwé꞉kon entsisewahiaʼtínekenʼwe ne kènʼen. 2Ó꞉nen kíʼ ietsiʼtháras nonkweshón꞉ʼas ne lsraeró꞉nonke tánon ratiʼkwékon iettsiró꞉ri nasakotiʼriwaʼnón꞉tonʼse ne tehonʼnonsaʼnekʼkhánion nowistanó꞉rons ó꞉ni ne kawistaràhkens owistanoronhʼsónhas.” 3Ne Roiá꞉ner wasakahónnien ne Egyptró꞉nons nasakotiʼkwéniensʼte ne lsraeró꞉nons. Kwáh íken, ne ronaterihóntons ó꞉ni nonhkweshón꞉ʼa wathaʼtihiaʼtórehʼthe ne Mahís tsi ronhkwetoʼwánen.
4Ne Mahís ethòne wahawénhaʼse ne ronhnonhtí꞉io, “Ne Roiá꞉ner ráton, ‘Tó꞉ka asóntʼthen kwáh Egypt iehkatóʼhetste, 5tánon kwáh tsi niháti ne thonaʼtierénton ronahnakeráhton ne rotiskenrakéte enhonhníheie, né꞉ne ronhnonhtí꞉io roiénha enthahénthe, tsi nikáien nensaʼtenonʼtí꞉iosthe, ó꞉ni ne kanhátshera roiénha tsi nikáien ne katʼthétha nonátsia, ó꞉ni nenhtewatiérenʼte enkonhtiʼwíraien ne tionnónskwarons kwáh nónhne enhonhníheʼie. 6Kwáh íken tsi iorahkaréni tsi tenhionsentʼthósehron atenahthakwékon ne Egypt nónhwe, tsi iáh nonwénhton ètho tetsawénhon iáh ó꞉ni nonhwénhton shé꞉kon ètho tahonsaʼiáwenhne. 7Ók iáh shé꞉kon ne èrhar thaʼsakotí꞉nihe nʼIsraerʼró꞉nons ó꞉ni ne rahotiʼtshenenhókons. Ethòne kí ensewateriéntaʼrahne tsi Í꞉i, ne Watiá꞉ner, wakénesthe tsi nateʼhontʼtíhen ne Egyptró꞉nons ó꞉ni ne lsraeró꞉nons.’” 8Ne Mahís iahá꞉sa tsi nihatónhnionsʼkwe, “Ratikwékon ne shonkweʼtashónʼa akonhàke nentʼthónhʼne tánon akénton tenhionʼkatentʼtsóhʼthase, tánon enhionkaʼtenekarónhkwen ratikwékon iekhehiaʼténhaf nakonhkwetashón꞉á tánon èhren iákwet. Nenhwatóʼhetste, kwáh èhren ènkethe.” Ethòne kwáh íken tsi ronahkwénʼen ne Mahís thonsahiatekʼkhási ne ronhnonhtí꞉io.
9Ne Roiá꞉ner rohroʼríhʼne ne Mahís, “Ne ronhnonhtí꞉io ienhathasónhteren nahaʼterahiáʼthaʼkwe nahiathahónsaʼthathe, né nahónton nakateriwaʼténtiaʼthe ne ioriwanerakwahʼténions ne Egypt nónwe.” 10Ne Mahís ó꞉ni ne Aaron wahiateriwaʼténtiaʼthe kí꞉ken ioriwanerakwahténion rahohénton ne ronhnonhtí꞉io, ók kíʼ ne Roiá꞉ner wahoʼnontsistanírahʼte, tánon iáh kíʼ tesakoriwáhʼwi ne lsrearó꞉nons nahotiʼhiakénʼen ne rahonakerasehrákon.
Currently Selected:
Exodus 11: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.