Exodus 22
22
Tsi Niʼioianerenseró꞉tens Ne Kaientátsheras
1“Tó꞉ka ónhka enhieʼnaskwahʼnénsko ne tioʼnonskwáhron tó꞉ka ó꞉ni teiotinakaronhtónʼa tánon enhaʼwénhtho tó꞉ka ó꞉ni enhatenhnínon, ónenk tsi wísk nikónhti enhsháien né skaiáta iatehionénon tionónskwahron tánon kaiéri niháti teiotinakaronhtónʼa enhsháien ne skaiáta iatehionénon teiotinakaronhtónʼa. 2-4Ónenk tsi enhaʼkárhiaʼke tsi nahó꞉ten ronénskwen. Tó꞉ka iáh othènnen tehó꞉ien, ónenk kíʼ tsi enhonwatenhnínon tsi ní꞉ioht ne rahnhátshera nahaʼkhárhiaʼke tsi nahó꞉ten roʼnénskwen. Tó꞉ka ne kanaskwahʼnénskwen, tó꞉ka tionónskwahron, tewahóntes, tó꞉ka ó꞉ni teiotinakaronhtónʼa, enhkonwahiaʼtatsénri hiónnhe tsi ratsenawáston, ónenk tsi tekenihiáse tsi ní꞉ionht tsi enhakhárhiaʼke né skaiáta iatehionénon.
“Tó꞉ka ne ranénskwas enhonwahá꞉rase kanónskon niaʼhawenonhátie ne tsi niwasónhtes tánon wahonwanonhwahrhiákon, tsi nikáien ne wahoʼnonhwarhiákon iáh kíʼ tahoʼnhitseraiénthaʼne tsi wahósehthe. Ók tó꞉ka tsi niwenhnísehres ètho naháwenhne, wahó꞉nhike kíʼ tsi washaʼkósehthe.
5“Tó꞉ka ónhkak ensakoríhon ne rahoʼtsenenhókons kahentàke thakonʼskáhon tó꞉ka ó꞉ni ne tsi kanenharaientʼthósehron tánon kènk tsiaʼkónhne tánon wakónhneke ne kaientʼthósehron né onhkak akóren akohénthake, ónenk tsi ensariwasehrónhni tsi né enshá꞉ien tsi nahó꞉ten tkànios ne rahohentàke ó꞉ni ne tsi ranenhaʼraienʼthótha.
6“Tó꞉ka ónhkak enhaʼtsiróten ne rahohentàke tánon waʼkatsiraniákenʼne nohoʼthonkónhsons niahá꞉he nakorénsons akohentàkes tánon hontsahá꞉te ne onátsias né kaiénthon tó꞉ka ó꞉ni nónen kaiákons ó꞉ni kakthoʼkwakwenonhniánions, tsi nikáien né rotsírohte né kíʼ enhakárhiake tsi nahontʼkarónhni nakorénhsons.
7“Tó꞉ka ónhkak enheriwanónhwene nahiontaʼteweientónhase nakóren akowístha tó꞉ka ó꞉ni knahótenk ne kanorónhsons ne iakóien tánon waʼhenénsko ne rahononskon, ne ró꞉nenskwe, tó꞉ka enhonwahiataʼtshénri, thenshaʼhiásere kíʼ tsi enshá꞉ien. 8Ók tó꞉ka iáh tahonwahiaʼtatsénri ne ranénskwas, tsi káti nikáien ne sakoteweientónhni ne kanorónhsons ienhonwahiaténhaʼwe ne tsi tsionterenhnaientákwa tánon ónenk tsi enhariwanírahthe tsi iáh rahónʼa tehonénskwen nakóren akoientátshera.
9“Né kwáh tsi niatehioriwá꞉ke ne tekariwaʼtí꞉ronhthe ne kaienthá꞉tshera, tó꞉ka ken tsionónskwahron akénhake, khés ne tewahóntes, teiotinakarontónʼa, ahtsherónhniat, ó꞉ni nóia nahorihoténsons akénhake, né tenihiáse ne ronaskhénen ne kaientátshera ienhonwatihiaténhawe tsi tsionterenhnaientákwa. Tsi nikáien ne Rawenni꞉io enhohiataʼtshénri ne ronhíkon ónenk tsi tenhaʼhiásere tsi enhokárhiakse nóia.
10“Tó꞉ka ónhka enhieriwanónhwene nakonhwateweiénton nónhkak akóren akotshénen tewahóntes, tionnónskwahron, teiotinakaronhtónʼa, khés ne óia nakanaskóten akènhake nahonwatenhnikonhráhraʼse, tánon ne katshénen waʼkénheie khés ne waʼhokaréwahte khés thonʼtaiawénstsi iahonwahiaténhawe, tánon tó꞉ka iáh ónhka tehonwá꞉ken, 11né rónhkwe ónenk tsi tionterenhnaientákwa nienhénre tánon enhaʼriwanírathe tsi iáh tehonaskwahnénskwen nètho rónhkwe, né rahotshenenhkénʼen kwáh kíʼ ienhaʼnekwahne tsi wahó꞉ti, tánon noia rónhkwe iáh kíʼ thatehiothonwenhtsóhon nahonsahakharhiake; 12ók kíʼ tó꞉ka kanénskwen hiotónhʼon ne katshénen, né rónhkwe ónenk kíʼ tsi ensotʼkárhiakse ne rahotsenenkenʼen. 13Tó꞉ka kíʼ kontírhio konwárhio, né rónhkwe ónenk kíʼ tsi entʼtháhawe ne iotaténron nakariwaniráhthonke; iáh tehotiriwahiénhni nahonsahaʼkárhiaʼke nahó꞉ten ne kontírhio ionataʼwénhthon.
14“Tó꞉ka ónhkak ahionʼthanenáskwahni tánon wahokaréwathe tó꞉ka ó꞉ni wakénheie nónen ne rahotshénen iáh ètho tèreskwe, ónenk kíʼ tsi enhakárhiaʼke. 15Ók tó꞉ka thóh nenhiáwenhne nónen ne rahotshénen thóh íres, iáh thatehiothonwenhtsóhon nahakhárhiaʼke. Tó꞉ka ronhwanaskwahníhen, tsi waʼkahiatáton né kíʼ enwakʼkharhiákʼthe tsi nihoʼthináton tsi ronhwanaskwahníhen.
Tsi Nikaianerenseró꞉tens Ne Tsi Iakónnhe
16“Tó꞉ka ne rónhkwe tensakonikonhrakénhni ne arèko tehiakoniákon né꞉ne iáh arèko tehiakoteriwaʼsherónhni, tánon skátke wahiárahthe, ónenk tsi èntronh ne kaniákʼtshera naón꞉ha tánon enshaʼkokárhiakse, ó꞉ni enhotíniake. 17Ók kíʼ tó꞉ka ne ronhwaníha iáh thahatʼthóntate nahoríhon nahotíniake ne shaʼkoiénha, ónenk tsi enhokárhiakse ne kanísera satàkenasʼke ne kaniákʼtshera ne iáh tekanakwahientéri.
18“Enkonwanonwahrhiákon ónhka ne iónhkwe kén niekahiéra natenʼennarátshera.
19“Enhonwanonwahrhiákon ne rónhkwe tó꞉ka rónhrats ne kontitshénens.
20“Enhonwaríwenhthe nahonwanonwarhiá꞉kon nónhka nahaʼtsatátshaʼahthe ne katshénen niaʼsakotátʼtse ne kahiaʼthonhnisónhas, ók kwáh nék khók Ní꞉i, ne Watiá꞉ner.
21“Tó꞉sa sehiateweienʼnaksáten ne tiʼhononhontsátes; sewehiárak tsi íse ó꞉ni thitionhontsátesʼkwe ne Egypt nónwe. 22Tó꞉ka sehiateweiennaksáten ne ionateréhons ó꞉ni ne tehonthonnakárhias ratiksahokónhas. 23Tó꞉ka thóh nénhshiere, Í꞉i, ne Watiá꞉ner, tekheriwaserákwahse nónen akonhàke iatenhonsénhtho nakheiénawase, 24tánon kwáh íken tsi enwakenákwen tánon enkonhnonwarhiákon ne tsi waterí꞉io. Ne shenhiniákon enhiakoteréhonske, tánon ne sehienhokónha iáh tahonsahotiʼnisénhtake.
25“Tó꞉ka enshewísthani tsík ónhka naʼkonhkweʼtasónhas ne rotíten, tó꞉sa thóh nashatátser tsi shí꞉ken ní꞉ioht ne shewisthaníhas akénhake tánon natsheriwanóntonse nahakárhiake ne watehiárons. 26Tó꞉ka iénsawe nónhkak akotewehiaráhkwa nahionkaraiéntakwe ne tsi enshiakáriakʼse, ónenk tsi thenthetshion nohénton iakarákwenhne, 27tsioríwa tsi thóh khók níhiot tsi rotiatawiʼtsheráien nahohiathataríhathe. Nahó꞉ten nóia áratsthe tsi ahóthawe? Nónen iathohoʼhénrethe nakonhàke nahiʼiénawaʼse, kwáh kíʼ tenhiriwaʼserákwahse tsioríwa tsi wakathanitenrátskon.
28“Tó꞉sa thènnen tshiénhas ne kariwahétken ne Rawenni꞉io, tánon tó꞉sa thetsiʼtionnharíkʼkhon ne sakohenténhse ne tsionkwetashónʼa.
29“Táskon tsi níststats ne sanhátsia, ne sanéka ne onenharataʼsehonhtsherákeri, tánon ne sáwenk iakeniewáhtha kènie nónen ienkáhewe.
“Táskon ne entewatiérenthe enhonnákerathe ne rotiskenrakéte sehiohokónha. 30Táskon nenthewatiérenthe enhontewírahien ne satsheʼnenhó꞉kons tionónskwaron ó꞉ni né teiotinakaronhtónʼa. Seríhon tsáta nikaríwes skátke ratiterónhtat né konhwanisténʼa nenkthontiérenthe enhonnákerate ne ratítsinn, tánon ne sateʼkónhaton niwenhniserakéhaton Í꞉i tákʼtats.
31“Í꞉se nakonhkwetashón꞉á, káti tó꞉sa sewaʼwárak né tsik nakarhioʼtóten né꞉ne konhtírio konhwá꞉rhio; khèʼkok, èrhar tahietʼtshíhion.
Currently Selected:
Exodus 22: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
