Exodus 23
23
Kaiáneren Tánon Tkariwaiéri
1“Tó꞉sa tesateriwaréniaʼt nonówenhs, tánon tó꞉sa shieʼiénawas ne roʼtiníkon tóhsa sanówen nahontateriwiʼiósten. 2Tó꞉sa taʼsehriwáhwas ne iakotiokowáhnen nónen tenhonterientaʼwénhrie tó꞉ka ó꞉ni né enhontró꞉ri ne kahiótats ne kariwaʼkwahrishióntshera. 3Tó꞉sa shé꞉nest nahonthaʼseriwárakwe tsi nòkwah ne iakóten tsi tehiontatsiatorétha.
4“Tó꞉ka shí꞉ken ashéken ne tetsiatáʼtshons rahotshénen tsionónskwahron tó꞉ka ó꞉ni tewahóntes iotekwenhátie tsiéna tánon, hionshaʼtshiaténhaf ne tsík thoʼnónsohthe. 5Tó꞉ka ne raotshénen tewahóntes wakahiatiénenhne ne tsi nihiorieniákste iokéte, tsniénon ne tahonshaʼkáthane; tóhsa shaʼtohétstat.
6“Tó꞉sa sehiathonhníiens ne kariwaʼkwahrishióntshera ne iakóten nónen tsi teiehiatoʼrehtákwah iatenhiéthaʼne. 7Tóhsa othènen sheʼhianowénhten, tánon tó꞉sa ne iáh othènen teiakonhíkon nahionthaʼtenonwarhiákon, asèken kwáh enkheréwahthe nónhka ètho nenhiéreʼre ne kariwahétken. 8Tó꞉sa othènen sewahiéna ne taieʼtsiʼtsikhethároʼse, asèken né tahionthaʼthitsikhetharó꞉se iakahonnhniénhnis nonhkweshón꞉ʼa ne tahierónhweʼke tsi nòkwah ne tkariwaiéri tánon iakohetkenténhnis noriwaʼshónha tsi nihiákon ne iáh tehiakonhníkon.
9“Tó꞉sa sheiateweiennaksáten ne tihononhontsáte; shaʼteriénthare tsi ní꞉ioht ne thiʼiakahontsáte íken, tsioríwa tsi thiʼtsionhontsátekwe ne Egypt nónwe.
Ne Tsáta Niʼioseràke Tánon Ne Tsatákhaton Niwenhniserakéhaton
10“Né iá꞉iak nónta tsièntʼtho ne shonʼhontsàke tánon sheróhrok tsi nahó꞉ten entkáhawe. 11Ók ne tsatákhaton niʼiohserakéhaton sahtoriséntʼthos, tánon tó꞉sa othènen tsientʼthó꞉ko nahó꞉ten ne thóh nónwe niká꞉nios. Ne iakóten enwáhton nahónnheke nahó꞉ten né thóh nónhwe nentʼkhánio, ó꞉ni ne konhtírhios enwáhton nahónnheke ne iatenhiotátere. Thóh nónhne nátser ne tsi shaʼnenharaʼientʼthóhseron ó꞉ni ne shaʼronhthasónhas ne iakenhiewáhtha.
12“Iáh꞉iak nónta sahióten ne tsahiá꞉sehra, ók tó꞉sa enshaʼhióten ne tsatákhaton nónhta, né káti nahónton ne sahnhatserahó꞉kons ó꞉ni ne tihononhontsátes né ieshaʼhiótenhse tánon iekaníhare ne satʼtshenenhókons nahonthorísen.
13“Shaʼthahónshatat oriwakwékon tsi Í꞉i, ne Watiá꞉ner, wakonró꞉ri. Tó꞉sa roʼnonháke nónhwe nasaterenhnaiénsek ne thiʼkaniʼiosehrátes; akwékon tó꞉sa sehnáhton.
Né Ásen Niʼioriwáke Kowánens Tsi Akatʼkhwárake
(Exodus 34.18-26; Deuteronomy 16.1-17)
14“Sehwatenikonhró꞉ri náhsen niʼioríwake akakhwárake ne tsósehra né nasekʼkwéniensthe. 15Tsi niwenhnítes ne Abib, né wenhnitarákwe shaʼthontesewahiáʼkenhne ne Egypt, sewatenikonhró꞉ri ne katkhwáhere ne iáh tewatʼthenkwáhton kanátaro né꞉ne tsi ní꞉ioht tsi kwanháhon. Tó꞉sa othènen sewanáhtarak ne takaiéstonke ne iontʼtenkwáhtha tsi nikaríwes ne kí꞉ken tsáta nónhta kaʼkhwáhere. Tó꞉sa nonhwénhton tásehwe naskwasénhnaien ne iáh othènen tástsion.
16“Sewatenikonhró꞉ri ne tsi nihieientʼthókwas katkhwáhere né nónen ensewaientkwáko ne sewaientʼtóhtsheras.
“Sewatenikonhró꞉ri ne katkhwaráston tsi nensewateweiénton ne kanenaké꞉ne, né nónen ensewaʼhiáko ne kahiksónhas ne sewanenhaʼraientʼtónnions ó꞉ni ne tsi ioronhthóhtons ne kahiksónhas. 17Iatehioseráke kí꞉ken ne áhsen nihioriwàke ne katʼkhwaráston ratikwékon ne tionhkwétas ronhnónhkwe ónenk tsi entʼthónne nahionksenhnáien, ne Roiá꞉ner Sewaní꞉io.
18“Tó꞉sa ne thasewáiest ne kanátaro ne iontʼthenkwáhtha ionhniáton nónen ensewatsiatatʼtsáʼahthe ne katʼtshénen nakeriwá꞉ke. Nahorehsénh꞉tshera ne katʼtshénen thakwahtsaháten tsi nikaríwes kí꞉ken katkhwáhere tánon tó꞉sa othénnen aiohothaténronhke ne tsi ientsiórenhne.
19“Iatehiosehráke tasehwáhaf rahonónskon ne Roiá꞉ner sehwaʼNí꞉io né nenhtewatiérenhthe ensewaientkwáhko nonátsia.
“Tó꞉sa sewahwaráhrit ne ken nithoʼhiónha teiotinakaronhtónʼa tó꞉ka ó꞉ni ne kaiatákeras né꞉ne ronisténha ahonónhta ahísewatsʼthe.
Ne Karahrátsʼton Tánon Ne Karihonhnienhnítsheras
20“Kwáh enthihiaténienthe rahronhiakeró꞉non naiahéntense nahontaʼhiáʼne tsi natensatʼtháhakwe tánon tsi ienʼiaʼiaténhawe tsi nónhwe tsi niwatenátaien ne wakeweienentáon. 21Tsi sewakwénienst tánon tsi sewawénhnarat. Tó꞉sa tsi sewathonkwetatsá꞉ton, asè꞉ken Í꞉i iehihiató꞉rion, tánon kwáh iáh tashaʼkothakátsthathe né iáh tehiontewenhnaráhkwa. 22Ók tó꞉ka entsisewawenhnarákwen tánon oriwakwékon thóh nenhsewáhiere tsi niwáken, kwáh kíʼ rahthikwékon enhiakwateríio ne ietʼtshíshons. 23Nakeronhiakeró꞉non kwáh entsisewahéntenhse tánon tsi thoʼnonhontsáien ne Amorʼró꞉nons nientsisewahiaténhawe, ó꞉ni ne Hitró꞉nons, ne Perizró꞉nons, ne Canaanites, ne Hivró꞉nons, tánon ne Jebusites, tánon kwáh enkhehiáthonthe. 24Tó꞉sa teiettsiiatiákʼthons ne raotiniʼiohókons tó꞉sa ó꞉ni iettsisénhnaien, tánon tó꞉sa ó꞉ni sewahiéna ne raotiriwiiosthóntsheras 25Tó꞉ka enseksénhnaien, ne Watiá꞉ner Saní꞉io, Kwáh kíʼ ne enkonhiathaterísthaʼkwe ne kákhwa ó꞉ni nonékanos tánon akwékon èhren entkáwithe ne sannratarinétsheras. 26Né tionhontsáke iáh ónhka ne iónkwe tahonsahióti tsi kahá꞉we nahiowiraiénthaʼne tó꞉ka ó꞉ni ne iáh thahiowiraiénthake. Kwáh éntʼtsion nahitsionnhésonhkes.
27“Kwáh enkhehiónhnien nonhkweshón꞉ʼa ne hiesahiotátis nahionketsianíhsheʼke; kwáh tenkhehianithonhniáten nonhkweshón꞉ʼa tsi nikáien nensehwaterí꞉io, tánon kwáh rathikwékon enkhehiónhnien ne iesháshons ne tahonsahontkaraténi tánon nahiesatékwahse. 28Ne ietsíshons kwáh tenkheʼianikonhrhiákten; kwáh èhʼren enkhehiatenháwithe ne Hivró꞉nons, ne Canaanites, ó꞉ni ne Hitró꞉nons tsi nienhénse. 29Kwáh enkhehiatínekenwe ne tsósehra nióre; tó꞉ka thoʼnénhtiere, nohóntsa kwáh kíʼ ohhontsóskon enwáton, tánon ne konhtírhio sóhtsi enhonatsiokowáhna ne sariwáhke. 30Khèkok, kén nikonhátie tsi entkáterahthe, tsi nióre iatekaiéri tsi nensewatiókwahske nahisewatsiaʼthakweníiosthe nonhóntsa. 31Kwáh enkónhni ne tsi karisthatátie ne tionhontsákes ne iahónwe tsi tkanéksker ne Aqaba tsi nióre ne Mediterranean Kaniatarakheʼkówa ó꞉ni ne kahentakeʼkówane tsi nióre ne Euphrates Kaniatarahtátie. Entkónhion ne kashatsténsera nashehiatsiathakweníʼiosthe ne rahthinákere né nón nihionʼhóntsaien, tánon kwáh enshehiatínekenhwe tsi nienhénse. 32Kwáh tó꞉sa othènnen sewatsiaʼnerensehrónhni tsi natesewá꞉tere ne roʼnónha tó꞉ka ó꞉ni ne raotiní꞉ios. 33Tó꞉sa ieʼtsiríhon thíʼken onhkweshón꞉ʼas ne sewanakerahserákon ahatinákerehke; tó꞉ka thóh nensewáhiere, enhiesónhnien nahisewariwáhnerahke tsi nòkwah Í꞉i. Tó꞉ka enieʼtsisén꞉naien ne raotiníios, kwáh kenhéion tsi ní꞉ioht tsi enieʼtsihiaterístaien.”
Currently Selected:
Exodus 23: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
