Exodus 24
24
Ne Ateriwasehronhniátshera Ne Tekahneʼtohʼrará꞉kon
1Ne Roiá꞉ner wahawénhase ne Mahís, “Káts akonhàke nonhtáse kènʼen tsi iononhtáhere, íse tánon ne Aaron, Nadab, Abihu, tánon ne tsáta niwáhsen niháti ne sakotiʼhentènhse ne lsraerʼró꞉nons; tánon tsi ioʼtiesáonʼk shé꞉kon kwáh kén nióre théses, teshaʼtsháket saterénhnaien. 2Shonʼhaʼáhkok, tánon iáh ónhka ne ronáhtsiakes, né tsiatáktha nahontahónʼne. Nonhkweshón꞉á iáh nònhʼne tehiówenk nahontahatinonhtárahne.”
3Ne Mahís iashaʼkoró꞉ri nonhkweshón꞉ʼa akwékon tsi nahó꞉ten wenhénron ne Roiá꞉ner tánon oriwakwékon ne kaianerenserasónhas, tánon ratikwékon nonhkweshón꞉ʼa tsi wathatiriwasehráko, “Kwáh akwékon thóh nenhiakwáhiere tsi nahó꞉ten ne Roiá꞉ner wahénron.” 4Ne Mahís oriwakwékon wahaʼhiáton tsi nahoténson ne Roiá꞉ner wahénron. Oronhkéstsi nʼóhia sahiórenhne waʼrónhni ne ientsienharáhkwa tsi ionhnonhtoʼtáhon tánon tekeniʼiawénhre nikanénhiake wahanenhiotónhnion, né꞉ne skentaráʼtsions rahotiriwáke ne lsraerʼokónhke. 5Ethòne kén nithoʼtihiónsas iasakoténienthe, tánon wahonwenhtienkwaronhniáten ne Roiá꞉ner ó꞉ni tó꞉ka niháti wakonhwanatsaʼtaʼtsa꞉áhte ne tsionónskwarons né tsi sahotiríwa íken tsi iahatíthate. 6Ne Mahís asénhnon tsi níkon wahatinékʼkwah ne kaʼtshénens iahá꞉hawe tánon kaʼtsétakons waharónhnion; tánon ne asénhnon wahotátere tsi ietsienharakwáʼke né iahó꞉ti. 7Ethòne wahatʼtháwa ne kahiatónhsera nateriwasehronhniátshera, tsi nónhwe nikaiatónhnion ne Roiá꞉ner tsi nihotatíhon, tánon tahakwísron tsi wasakowenhnaʼnhóʼthase nonhkweshón꞉ʼa. Wahonníron, “Kwáh enshakwawénhnarahkwe ne Roiá꞉ner tánon thóh nenhiakwáhiere tsi niháwen.”
8Ethòne ne Mahís waháʼthawa né kátshe ne kanekwénhsare tánon wasakonekwenhsóhiake nonhkweshón꞉ʼa. Wahénron, “Ne kí꞉ken nonekwénhsa ne kanakentó꞉rens nateriwaseronhniátshera né tsi nihóson ne Roiá꞉ner nónen shontatshí꞉tson akwékon kí꞉ken kariwatáʼtsheras.”
9Mahís, Aaron, Nadab, Abihu, tánon tsáta niwáhsen niháti ne sakotiʼhentènse ne Israerʼró꞉nons iahatiʼnonhtárahre 10tánon wahonwá꞉ken ne SakoNí꞉io ne lsraerʼró꞉non. Ne tsi nónhwe niháʼrahte tsi í꞉ken ní꞉ioht ne akanetakwentáronke ne ohrónhia niwashoʼkóten ne kanenhianóron sapphire konwanatónkwa, kwáh ohrónhia ní꞉ioht tsi ní꞉ioht ne tsi iotsíkerahre. 11Ne Rawenni꞉io iáh tesakoʼkarewáhthon kí꞉ken sakotiʼhentènse ne lsraerʼró꞉nons; wahonwáken ne Ní꞉io, tánon ethòne skátke wathónthonhte.
Ne Mahís Tsi Tioʼnonhtáhere Ne Sinai Iéhres
12Ne Roiá꞉ner wahawénhase ne Mahís, “Thasehʼnontárahk akonháke nonhtáse, tánon tsi iotiesáonʼk kènʼen íhses, kwáh entkónhion tèkeni tekenstenrakwente, né kaháwe ne kaianerénseras tsi niwakʼkhetonhnion tsi nahiakorihónhnien nonhkweshón꞉á.” 13Ne Mahís ó꞉ni ne roʼsniénons Joshua wahiaʼthatewehienhnenhthàne, tánon Mahís tahatásawenh niahanontárahne. 14Mahís wahshakawénhase ne ohénton iehonhnéton, “Kénʼen thakwatheráhrat nathohsehráhkon tsi nióre thentsiáʼkwe. Aaron tánon ne Hur kénʼen sewakwékon; tánon káti nónhka tehiakoriwatíronhthe nakariwaʼsehronhníhake enwáton roʼnónha iaheʼtsihiatʼkhetóʼthas.”
15Ne Mahís iahanonhtárahne tsi ionónhthe ne Sinai, tánon kwáh íken tsi tehiotʼtsátaien. 16-17Tsi natehioʼkaráiakt ne kaswatʼthétshera ne tsi thóh íres ne Roiá꞉ner tsi thontahanonʼtátsnenhte. Né lsraerʼró꞉nons ne kaswatʼthétshera kwáh thóh ní꞉ioht tsi shí꞉ken ne ótsire iotékkha onontakéniaʼte. Nʼotshàta ne iorókthon ne tsi ionontáhere ne iáiak niʼwenniseráke, tánon ne tsaʼtákʼhaton shiʼwenhniseraké꞉haton oʼtshá꞉takon ne Roiá꞉ner thahonáton ne Mahís. 18Ne Mahís iahanonhtárahne iatatsaʼtaháwehiasthe. Thóh nónhwe iehenterónhtaʼkwe né꞉ne kaiéri niwáhsen nónhta tánon kaiéri niwáhsen niwasónhthake nikaríwes.
Currently Selected:
Exodus 24: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
