Exodus 25
25
Nahontaʼieiésthe Tsi Nokwáh Ne Iotoʼkénti Ató꞉sehra
(Exodus 35.4-9)
1Ne Roiá꞉ner wahawénhase ne Mahís, 2“Seró꞉ri lsraerʼró꞉nons nahionkerohrók꞉se. Rahtiʼiéna kwáh tsi nahoténsons akénhake nónhka í꞉ienhre nahonthaʼhiontkaʼwíten. 3Kí꞉ken nenkaróhronhke né꞉ne: owistanóron, kawistaráken, tánon notsíʼnekwar karístaʼtsi; 4ne wahniatarí꞉io; orónhia niwasohkóten, ariwakonhnéha, tánon onekwéntara ohnonwé꞉ron; nʼoniatará꞉a ne ahionhniáton ne kaiatákeras raoʼnonwé꞉ronh; 5ne teiotinakaronhtón꞉ʼa rátsinn raoʼnhéhonk onekwéntara ahonthashó꞉honhke; né꞉ne kwáh ionétska kanhewí꞉io; né kwáh kaientanó꞉ron acacia; 6kènhie ne hionthaʼseroʼtákwa wátstha; kanonkwatsheraʼnó꞉ron né꞉ne iontatiatokáhstha ó꞉ni né kanetanó꞉ron iontsienkwaronhniaʼthákwa; 7Ó꞉ni ne kanenhiaʼnó꞉ron hioteherarónhnions#25.7 hioteherarónhnions: carnelians tánon ne ohiáshons nʼowistanoronhʼsón꞉has ne ahónsthonke ne Ephod né꞉ne rokháres rahotiniʼiontaʼtsheráke ó꞉ni ne wenhskweʼnàhke ahonstháʼnionke né tsi ionahtáʼtseronhte ne atinihiónta. 8Nonhkweshón꞉ʼa kwáh ónenk tsi enhionkhónnien ne iotokénti atóhshera, ne káti nahónton skátke ahiakwenteʼrónthake. 9Tsiónhni tánon akwékon tsi nihiéiens ne kanónskon sewá꞉ser tsi ní꞉ioht tsi enkwahnatónhase.
Naʼteriwaʼsehronhniátshera Oneró꞉kwa
(Exodus 37.1-9)
10“Ne nonorókwa tsiónhniat ne kaientanóron né꞉ne acacia nakaientó꞉ten, 45 nihionkaráhke níhions, 27 nihionkaráke natewathakáron, tánon 27 nihionkaráke nitiótʼthe. 11Aòskon owistanóron tesewanahnétha ne kanorókwahkon ó꞉ni nʼátsthe nokwáhti tánon owistanóron tewakwahtáset tsi tesewawáhnak. 12Kaiéri níkonh owistanóron teseʼwahwenónhnits tánon thóh tionhthónnion tsi kaʼshinónhton ne ká꞉ieri níkon, tekenísons ne tehiotweʼnonhniánion ne skatíson nokwáhti. 13Sewatenahwahathonhniánion né꞉ne káientanóron acacia tsiónhniat né áhonsthe tsi ahatíhawe owistanóron sewarohróks 14tánon thóh thetsohetst tsi iokaʼkwenthaniʼióntons ne skatíson nokwáhti nʼonoró꞉kwa. 15Né kanawahaʼtesónhas thóh ahiorókʼkhonke tsi iokaʼkwenhthentónhnion tánon kwáh tó꞉sa ahonsahiótshionhke. 16Ethòne thóh kaʼneróhkwahkon sewatárion ne tèkeni osténras né tkwáwi, tsi thóh nónhwe nikahiatónhnion ne kaianerenseratoʼkénti.
17“Né sewanónhtekt né owistaʼnoronhtsheʼróskon, 45 nihionkaráke níhions tánon 27 nihionkaráke natewatakáron. 18Tenihiáse kárhio owistanóronh nahó꞉ten ietʼtsihiatónhniat tahoʼtinerahontsiónhtake né꞉ne ieneʼkonhréstha ísehwatste tsi tsiónhni, 19skátʼtsions ne tsi ieiotʼtónhnions natenonhtékta. Tsi entsiónhni énskak khók iekénhak natenonhtékta. 20Ne tenineráhontʼtsionhte kárhios tehiatatkonhsakánerahke tsi iatehiohiaiákhon natenonhtékta, tánon tsi tehoʼnathehonnonkʼtsakaráhwenh ne akarorókthe. 21Kanerokwákon sewátha ne osténhras tanon é꞉neken tasewáhren natenontékta. 22Kwáh thóh nónhwe naʼtenʼtiatátken, tánon thóh é꞉neken natenontekʼtàke tsi natehiátere ne tèkeni teniʼnerahóntshonʼte ne tehnónne kwáh entkónion akwékon natianerénsheras né꞉ne lsraerʼró꞉nens raotiriwàhke.
Natekhwára Ne Kanà꞉taro Aoriwàhke Tsi Iahonwátatʼtshe Ne Rawenni꞉io
(Exodus 37.10-16)
23“Sewatheʼkhwaratsherónhni né꞉ne iokaraníronh né꞉ne acacia nakaientó꞉ten isehwastste, 26 nihionkaràke níhions, 18 iawénhre nihionkaràke natewathakáron, tánon 27 nihionkaràke nitiótʼte. 24Aòskon owistanóron sewanónhtek tánon owistanóron tesewashaʼtaront tewakwahtáset. 25Tsónhni 3 nihionkaràke natewatakáron tewakwaʼtáset tánon owistanóronh tesewasháʼtaronk ne tsi iotsiaʼtánen. 26Kaiéri níkon tsiónhni oshiaʼsónhas tehiotweʼnonhníhak owistanóron nahó꞉ten kénhak tánon thóh tionhtónhnion ne kaiéri natehiothiósates, tsi nónhwe nikashiʼnhó꞉tons. 27Ne tehiotweʼnonhniánions okakwentaʼsónhas né nenʼneʼe tsi nónhwe ne kanákares ienwatóʼrohke tsi enhatíhawe ne atekhwára thóh nónhwe nenkahʼkwatá꞉kwenhke ákta tsi iotiaʼthánenh. 28Ne kanakáres né꞉ne ioʼientaníronh acacia nahó꞉ten tsiónhniat tánon owistanóron sewaró꞉rokʼst. 29Sewatetsonhniánion, kátshes, ó꞉ni kakshoʼwánens né nenʼneʼe ahónsʼthonke onenʼharataseʼonhtsherákeri. Akwékon kí꞉ken né꞉ne owistaʼnorontsheróskon akénhake. 30Nʼatekhwára aohénton enkaiénthake nʼateriwasehrhonniátsera oneró꞉kwa, tánon natekhwaráʼne tiókonhte tsi thóh enkárahke ne kanatarotatokénti nakshéttats.
Ne Wathaserotaʼkwáhke
(Exodus 37.17-24)
31“Né wathaserotákwah owistanoronhtseʼróskon nahó꞉ten tsiónhniat. Né tsi tkenskwáhere ó꞉ni ne ionaʼtóntons ienekonhréstha ísehwats tsi tsiónhni; ne tsi iokʼsónhtons ó꞉ni nahonerathaʼsónhas tánon tekaʼtsitsaʼieronhnionháton, ó꞉ni ne tsi ioskwehiónton tánon ne iotsiʼtiónton, énskak khók iakénhake. 32Iá꞉iak nikanáʼthake enhionatóntonke ne aktóntie, áhsen ne skatísons. 33Né skanahatáʼtions áhsen níkon ne tekatsiʼtsaieronhnionhátons thóh nakaieronhtó꞉ten tsi ní꞉ioht ne almond ahotsítsa tsi ioskwehiónte ó꞉ni ioneráthonte. 34Ne tsi tekarenwá꞉nions ne wathaseranihiontákwa kaiéri níkon ahioiénthake ne tekatsitsaierónhnion thóh nahiotónhake tsi ní꞉ioht ne almond ahotsítsa tsi ioskwehiónton tánon tsi ioneratónton. 35Ók énska ioskwehióntak èhtaʼke ne áhsen nihioiánake ne ionahtóntons. 36Ne ioskwehióntons, ne ionathóntons, tánon ne wathaseroʼtákwa kwáh énskak khók iekénhak tsi akanekónre ne owistanóron. 37Tsáta nikahaseráke tsiónhni ne wathaserotáhkwah ahówenk tánon sewakwahtáko né꞉ne ohénton nónhwe tsi takaswaʼthéte. 38Ne tewaswenhtoʼraráktha tánon ne tewatetsanetákwah ne tsiónhniat ne ohwistanoronhtserós꞉kon. 39Tsáta niwáhsen nikakontseráke owistanoronhtseróskon ísehwast nahiʼtsiónhni ne watʼthaserotákwah tánon akwékon tsi niwatsʼtahshónhas. 40Tasewateweiénton tsi tsiónhni sehwáhser tsi natekenhnaʼríhton tsi nikwahnatónhni né kénʼen ionhnonhtáhere.
Currently Selected:
Exodus 25: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
