Exodus 30
30
Ne Ietsienharákwahke Iontienkwahronhniáʼtha
1“Tsiónhni ietienharákwah né꞉ne acacia nakaientó꞉ten, né nahiontienkwahronhniáthaʼkwe. 2Né꞉ne tahiotekerónhteke, 18 iawénre nihionkárake nahiónsonhke tánon 18 iawénhre nihionkárake natahonthakáronhke, tánon kíʼ 36 nihionkaráke nahontahiótʼtheke. Nahonikónhara ne tsi tekahiosakéron sháka khók iakénhake. 3Ne é꞉neken sewanónhtekt, akwékon ne kaiéri níkonh skatísons, tánon nahonikónhhara kwáh owistanoronhtseróskonk, tánon owistanóron tesewahwáhnak. 4Tékeni tetsiónhni nowistanó꞉ron tehiotkakwentakwenonhniánions tánon thóh tionhtónhnion èhtakes tsi tehiosátarons ne skatísons nokwáhti nahontiénawasthe ne ká꞉nias né꞉ne ahiéhasthe. 5Kí꞉ken kaná꞉kares Acacia nakaientó꞉ten tsiónhniat tánon owistanóron sewaró꞉rost. 6Áhstste nonharáhti thóh sehwáien ne ietsienharáhkwa né꞉ne thóh iorénton ohénton nateriwaʼsehronhniátshera oneró꞉kwah. Thóh nónhwe natentewatátken. 7Né iatehioronhketseráke nónen ne Aaron éntre nahakwahtáko ne kahá꞉sehras, thóh nónhwe nenhátʼtsahate ne wenhsehrákons iontsienkwahronhniatákwahs. 8Kwáh nónhne ehʼnenháiere nó꞉nen henhahaseró꞉ten nokarasnéha nikaháwi. Kí꞉ken watʼkáwenh ne iontsienkwahronhniatákwah né꞉ne iehiokonhtákwen kwáh iáh othénnen takahiótaʼte né꞉ne tsi nénhwe thóh nenhiotónhake. 9Tó꞉sa othènnen iasewáren kíʼ kénʼen ietsienharakwáhke ne thénnen kariwásthon natsienkwahronhniátshera, né sáka ne konhtitshénens, onátsia ó꞉ni, tánon tó꞉sa ó꞉ni tasehwanekáweron noʼnenharatasehtsherákeri nètho. 10Énska ne tsósehra ne Aaron thóh nenhá꞉iere tsi nihiorenhnáhon nahonsakanoharéke ne ietsienharáhkwah né kaiéri nikanikonharáhkes tsi ienhá꞉ren nonekwénhsa ne watʼtsahaʼtákwen ne kariwá꞉neren ahoriwàke. Né꞉ne kwáh iatehiosehráke kíʼ thóh nenhkaiérahke né꞉ne tsi nénhwe. Kí꞉ken ietsienhaʼráhkwah kwáh toʼkénʼen tsi enhiotoʼkentíke, né꞉ne Í꞉i iontsiathakweniʼióston, ne Watiá꞉ner.”
Noʼwístha Kakarhiákʼthon Naʼthosehratokénti Tsi Nón꞉we Ní꞉res Ne Roiá꞉ner
11Ne Roiá꞉ner wahawénhase ne Mahís, 12“Nó꞉nen ensehsenhnaʼrónhnion nonhkweshón꞉ʼas nʼIsraerʼró꞉nonke, sathiʼiatáttsions ne ronhnónhkwe tsi enhiontʼkhárhiakse tsi ronónhnhe, né káti ne tó꞉sa thènnen kariwaieshá꞉tshera ahotírahne tsi nikaríwes iontatʼtsenhnarónhnions. 13Kwáh onhkwetakwékon né thóh hiontatʼtsenhnarónhnions ónenk tsi enhiekáhrhiakʼke tsi nenwateriwaʼnónhton noʼwísta, enkaʼkonhtseriʼhárahke entsiohianénhawe né tkariwaʼiéri atenienténtshera. Onhkwetaʼkwékon ónenk tsi enhiekáʼrhiake né꞉ne tsi enhiónkon. 14Onhkweʼtakwékon ne hiontʼtathaʼséhton tsi iakotatʼtsénhnare, né tsi, iatehionkwétaʼke ne ronónhkwe ne tewásen natehoʼnosehrihiákons tó꞉ka ó꞉ni sénha thotíhions, enhionkʼkháʼrhiakʼse tsi nihioká꞉ra. 15Né roʼkwáhtse sénha kíʼ wèso enhakáʼrhiake, ók ne ró꞉ten iáh kíʼ sénha káron tahaʼkárhiakʼke, nónen enhatikárhiakʼke kí꞉ken kakaʼrhiákʼtshera ne tsi ronónhnhe. 16Kawistaróhrok nokwáh ne onkwehókon Israerʼró꞉nonhke tánon né skárhiakt nahontátie natóhsehra tsi nónhwe nikíteron. Kí꞉ken kawistarohrón né enkakaʼrhiákʼthonʼke tsi ronhnonʼnhéʼnions, tánon enkehiárahke nahontaʼkhène.”
Ne Teiotwístaron Otsínekwar Akéra
17Ne Roiá꞉ner wahawénhase ne Mahís, 18“Shaʼteksónhni né teiotwístaron otsínekwar né꞉ne teiotwístaron otsínekwar nahontenonhkwaren. Thóh ítsien tsi natetiátere ne atóhsehra tánon ne ietsienʼharáhkwah, tánon snéʼkaren. 19Ne Aaron tánon ne sakohiohʼokónhas né énhonsthe nahontsóhare tánon nahontashitóhareʼte 20nʼohénton natohsehrákon iahontáwehiaʼte tó꞉ka ó꞉ni ákta niahónʼne ne ietsienharáhkwah niahatíiesthe ne ká꞉khwa. Ethòne kíʼ iáh tahonwatiʼnonhwarhiákon. 21Ónenk tsi enhontsóhare tánon enhonthashitó꞉hare, ne káti ne tó꞉sa ahonnhíheie. Né kí꞉ken ne kaianerénsera tsi nikáien ne ronónha ó꞉ni tsi nienhontʼkwatsírine et nenhatihiérahke tsi nénhwe.”
Ne Hiontaʼtsiaʼthokástha Kènhie
22Ne Roiá꞉ner wahawénhase ne Mahís, 23“Iahá꞉saf né kwáh wenhienakonhónson—12 iawénhre nikakonhtseráke ne watneʼkonhniáton myrrh, 6 nikakonhtseráke ne wenhseráhkon cinnamon, 6 nikakonhtseráke ne wenhserákons cane, 24tánon 12 iawénhre nikakonhtseráke ne cassia (akwékon enkakonhtserihárake entioianénhawe ne tkariwaiéri atenienthénhtsera). Iasehwáiest skaweró꞉kwah ne iakeniewáthaʼkènhie, 25tánon tsiónhni ne iotokénti ionhtatsiatokástha kènhie, tesewaiesthánion tsi ní꞉ioht ne ionhtsiatakonhonsʼtákwah. 26Né ihsewast tsi entiókhaʼwe natóhsehra tsi nónhwe níkes, ne aterihwasehronhniátshera oneró꞉kwah, 27natekwáhra tánon akwékon tsi niwatsthasónhas, ne watʼthaʼsehrotákwah tánon tsi niwatsthasónhas, ne ietsienharáhkwah tsi nónhwe nihiontsienkwahʼronhniatákwah, 28ne ietsienharáhkwah, skátke ne tsi niwatsthasónhas, tánon ne hiontsiohaʼretákwah akèra skátke ne onónhkwah. 29Thóh kíʼ ní꞉ioht tsi sewathonʼnáheras noriwasónhas, tánon kíʼ kwáh íken tsi enhiotokentíʼne, tánon tó꞉ka ónhkak tó꞉ka ó꞉ni knahó꞉tenk iakaiéna kwáh kíʼ né enhiokarónhniathe ne kashaststénsera tsi iotokénti. 30Ethòne sehiathatoʼkéntist ne Aaron ó꞉ni ne sakohiohʼokónhas, tánon serihwanírats tsi ratitsihénsthatsis naiontsiótense. 31Sehiénʼhas nonhkweshón꞉ʼas ne Israerʼró꞉nonhke, ‘Kí꞉ken iotokénti ionthatsiatokástha kènhie né enwásthonke naiontsiotense tsi nènhwe. 32Iáh tehiówenhk nahontónweronhke ne thiʼkaniónk ónhkwe iehiáthake, tánon tó꞉sa né ihsewatst né꞉ne sahontenienténtshera akénhake né thènen tahisewáiesthe. Kwáh iotokénti, tánon kwáh sewáthen nikonhráren né tsi iotokénti. 33Ónhka né kwáh ètho ní꞉ioht tsi enhiakónhni tó꞉ka ó꞉ni né thènen áhionsthe nónhkak iehiatháke né꞉ne iáh tehietsihénsthatsi kwáh kíʼ iáh né tahonsakénhake Ní꞉i akonkwéta akénhake.’”
Né Ionhtsienkwahronhiatákwah
34Ne Roiá꞉ner wahawénhase ne Mahís, “Iahásaf ne kwáh sathahiotónhake ne skátsions ne wenhserákonhs—stacte, onycha, galbanum, tánon ne kwáh ahòskon íken kanetanóron, 35tánon sewatnetónhni ne kanetanóron, tesehwáiest kwáh né꞉ne hionʼtsiatakonhonstákwah. Tioiótsis iaʼsewáti né nenʼné꞉e akénhake enkanónhsthate tsi aòskon íken tánon tsi iotokénti. 36Sewaʼwáhek osthónha ohthésehra tsiónhni, atohsehrákon iasehwáhiont tsi nónhwe níkes, tánon ohénton tsi kanorókwahien nateriwaʼsehronhniátshera tesehwaʼtehsehró꞉kwat. Sewakwé꞉nienst kí꞉ken kanetanóron tsi kwáh íken tsi iotokénti. 37Tó꞉sa ne sáka tsi ahitsiónhni ne óia kanetanóron akénhake ne sewariwá꞉ke. Sewakwénienst tsi iotokénti íken tsi Í꞉i nakanonhnarhátshera íken. 38Tó꞉ka ónhka enhiaʼkónhni né kwáh nesáka akénhake tánon né áhionsthe nahiontsiatakonhónsthaʼkwe, kwáh kíʼ iáh né tahonsahotenahthónkwen Ní꞉i akonhkwéta akénhake.”
Currently Selected:
Exodus 30: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
