Lik Ejiptơ 10
10
Bơta rung rài dơ̆ phàm: Srah nting
1Gen Yàng Jehôwa đơs mơ Môise lah: “Lòt tĕ tus hơ Pharaôn, bơh Añ neh lơh kră kơldang nùs khai dê mơ nùs ală cau kwang duh broă khai dê nàng Añ in lơh ală tềl krơi Añ jê digùl bol khai, 2tồ mê yal wơl ală kòn mơ sau mê in git mbe lơi Añ neh lơh bòl glar di cau Ejiptơ, mơ mbe lơi Añ neh lơh ală tềl is Añ jê digùl bol khai, nàng bol mê git lah Añ la Yàng Jehôwa.”
3Gen Arôn mơ Môise lòt tus hơ Pharaôn mơ đơs lah: “Yàng Jehôwa la Yàng Tom Trồ làng bol Hebrơ dê neh đơs be do: ‘Mê ò tơnliah să di đap Añ jơl tus di tŭ lơi taih? Lòi tĕ làng bol Añ jê lik lòt nàng bol khai duh khoai Añ. 4Dilah mê ò bài lòi bol khai in lik lòt, ngai hìng Añ rơp cèng srah nting tus tòm lơgar mê dê. 5Bol gơ rơp jơm gòm ù tian gơs cau ò rgơi sền gŏ ù tai. Bol gơ rơp sa roh jơh ală phan mìu piar lòi wơl; bal mơ ală chi hòn tòm ƀlàng sre bol mê dê. 6Bol gơ rơp mut bềng tòm ală hìu mê dê, tòm ală hìu jơh ală cau kwang duh broă mê dê, mơ tòm jơh ală hìu tum cau Ejiptơ dê; hơ̆ la dô bơta mơ mè bèp mơ ồng pàng bol mê dê kung òhềt tŭ lơi gŏ bơh tŭ bol khai neh ơm tòm lơgar do jơl tus di ngai do.’” Gen Môise wơlke mơ lik lòt bơh di Pharaôn.
7Ală cau kwang duh broă Pharaôn đơs mơ khai lah: “Cau do rơp gơlơh kung be dô nơm dă gơwèt mơ bol he jơl tus di tŭ lơi taih? Lòi tĕ làng bol hơ̆ in lik lòt, nàng bol khai duh khoai Jehôwa Yàng Tom Trồ bol khai dê. Bơtau òhềt đal git lah lơgar Ejiptơ kong tơnroh ò ơ?”
8Gen Môise mơ Arôn geh hòi tus wơl hơ Pharaôn. Pharaôn đơs lah: “Lik lòt tĕ duh khoai Jehôwa Yàng Tom Trồ bol mê dê. Mơya ală cau lơi pal lòt taih?” 9Môise ho lah: “Jơh tơl nă bol hi cau kra mơ cau pơnu rơp lòt bal, lam ală kòn klau mơ kòn ùr bol hi dê, mơ cèng ală kơnrồ mơ belàt sơl, tài bơh bol he rơp lơh dô bơta pơjum sa hòn chò di đap Yàng Jehôwa.” 10Gen Pharaôn đơs lah: “Yàng Jehôwa ơm bal mơ bol mê, dilah añ rơp lòi bol mê in lik lòt bal mơ ală bau kòn bol mê. Loh làng la bol mê kòñ lơh broă iơh! 11Ò! Mìng bol mê la cau klau lơm rgơi lik lòt duh khoai Yàng Jehôwa, hơ̆ la bơta bol mê neh dan.” Gen bol khai bơtrơh Môise mơ Arôn bơh di đap Pharaôn.
12Yàng Jehôwa đơs mơ Môise lah: “Pò tê mê dê hơđang Ejiptơ nàng srah nting rơp gơtras hơđang lơgar, mơ sa tơnroh jơh ală phan lơi hòn tòm ală ƀlàng sre, jơh ală phan mơ mìu piar lòi wơl.” 13Behơ̆, Môise pò gai kwềt khai dê hơđang Ejiptơ, mơ Yàng Jehôwa cèng tus dô ròs càl đah mattơngai lik gơkhồm hơđang lơgar tòm ngai hơ̆ mơ mang hơ̆. Tus àng drim càl neh cèng tus srah nting. 14#Yalt 9:2-3.Bol gơ ơm bềng làm jơh tòm lơgar Ejiptơ, mơ gơ mù oă ngan ò git nđò hơđang jơh ală kơnhwàl tòm lơgar. Bơh yau òr òhềt tŭ lơi gơs dô bơta rung rài bơh srah nting behơ̆, mơ tơnơ̆ tai kung ò tŭ lơi rơp gơs ndròm behơ̆ tai. 15Srah nting gơ jơm gòm làm jơh ù tiah tian gơs ù tiah gơlik jù. Bol gơ sa roh jơh ală phan gam wơl tơnơ̆ mơ mìu piar, jơh ală phan hòn tòm ală ƀlàng sre bal mơ ală plai hơđang ală chi. Ò gam nha tơlir hơđang chi che hala dô nơm tòm chi lơi tòm jơh lơgar Ejiptơ.
16Gen Pharaôn hòi Môise mơ Arôn tus mơ đơs lah: “Añ neh tìs glài mơ Jehôwa Yàng Tom Trồ bol mê dê, bal mơ bol mê tai sơl. 17Tŭ do, dan toh glài añ in dô dơ̆ tai; mơ hòi dan mơ Jehôwa Yàng Tom Trồ bol mê dê, nàng tă tơlik bơta rung rài chơt roh do bơh di añ.” 18Gen Môise lik bơh di Pharaôn, mơ hòi dan mơ Yàng Jehôwa. 19Yàng Jehôwa tòmgơl càl mơ cèng tus dô ròs càl pràn ngan đah mattơngai mut, gơkhồm pơrdô jơh ală srah nting tus tòm Dàlềng Pơrhê.#10:19 Js: Dàlềng Proh. Ò gam dô nơm srah nting lơi tòm tiah Ejiptơ. 20Mơya Yàng Jehôwa neh lơh kơldang nùs Pharaôn dê; khai ò bài lòi làng bol Israel in lik lòt.
Bơta rung rài dơ̆ sin: Bơta klam jơngo
21Gen Yàng Jehôwa đơs mơ Môise lah: “Pò tĕ tê mê dê hơđang trồ, tồ bơta klam jơngo gơ jơm gòm làm jơh Ejiptơ, dô bơta klam jơngo cau rgơi ƀư git.” 22#Đơs Crih 105:28; Yalt 16:10.Behơ̆, Môise pò tê khai dê hơđang trồ, gen bơta klam jơngo jơm gòm làm jơh Ejiptơ tòm pe ngai; 23Tòm pe ngai hơ̆ ò gơs cau lơi rgơi sền gŏ cau ndai hala rgơi ñă lòt bơh di tiah khai dê. Mơya ală cau Israel gơs bơta àng tòm tiah bol khai ơm.
24Gen Pharaôn hòi Môise tus mơ đơs lah: “Lòt tĕ duh khoai Yàng Jehôwa; ală cau ùr mơ ală kòn rgơi lòt bal mơ mê sơl; mìng lòi wơl tềng do ală mpồl belàt mơ kơnrồ bol mê dê lơm.” 25Mơya Môise đơs lah: “Bơtau pal lòi bol hi in gơs ală phan ơn duh khoai mơ phan ơn chu pơrguc Jehôwa Yàng Tom Trồ bol hi in. 26Ală mpồl phan poan jơng kung pal lòt jat bol hi sơl, ò lòi wơl dô nơm nđias lơi ò; bơh bol hi rơp ngui phan ƀà tòm ală mpồl hơ̆ nàng duh khoai Jehôwa Yàng Tom Trồ bol hi dê; bol hi ò git phan lơi bol hi pal ngui nàng duh khoai Yàng Jehôwa lài mơ tŭ bol hi tus tềng hơ̆.”
27Mơya, Yàng Jehôwa neh lơh kơldang nùs Pharaôn dê gen tàng khai ò bài ai làng bol Israel in lik lòt. 28Pharaôn đơs mơ Môise lah: “Dô lik tĕ bơh di đap mat añ! Bañ tŭ lơi tơlik mat di đap añ tai! Ngai lơi mê gŏ mat añ gen mê rơp chơt.” 29Môise ho wơl lah: “Di ngan be jơnau bơtau neh đơs, añ rơp ò tŭ lơi tơlik mat di đap bơtau tai.”
Currently Selected:
Lik Ejiptơ 10: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.
