Lik Ejiptơ 9
9
Bơta rung rài dơ̆ pram: Phan poan jơng chơt pluh
1Gen Yàng Jehôwa đơs mơ Môise lah: “Lòt tĕ tơlik mat mơ Pharaôn mơ đơs lah: ‘Yàng Jehôwa la Yàng Tom Trồ làng bol Hebrơ dê, neh đơs be do: Lòi tĕ làng bol Añ jê lik lòt nàng bol khai duh khoai Añ. 2Dilah bơtau ò bài lòi bol khai in lik lòt mơ kư̆ kup bol khai ơm wơl, 3gen tê Yàng Jehôwa rơp cèng dô bơta pluh plàng iơh rmơh ngan tus hơđang ală phan poan jơng bơtau dê tòm ƀlàng sre, hơđang ală ơseh, alàng, làkđa, kơnrồ, belàt mơ be. 4Mơya Yàng Jehôwa rơp cah is phan poan jơng cau Israel dê bơh di phan poan jơng cau Ejiptơ dê, mơ ò gơs dô nơm phan poan jơng lơi gơrê bal mơ làng bol Israel rơp chơt.’” 5Yàng Jehôwa lơh nền tŭ tơngai mơ đơs lah: “Ngai hìng, Yàng Jehôwa rơp lơh gơs bơta hơ̆ tòm lơgar.” 6Mơ ngai tơnơ̆, Yàng Jehôwa lơh bơta hơ̆: Jơh ală phan poan jơng cau Ejiptơ dê chơt jơh, mơya phan poan jơng gơrê mơ cau Israel ò chơt dô nơm lơi. 7Pharaôn sồr cau lòt sền sơwì, mơ ò gŏ dô nơm phan poan jơng lơi cau Israel dê chơt ò. Bulah behơ̆, nùs Pharaôn dê kư̆ kră kơldang, mơ khai ò ai làng bol in lik lòt.
Bơta rung rài dơ̆ prau: Toh mồr
8Gen Yàng Jehôwa đơs mơ Môise mơ Arôn lah: “Kwà tĕ dô sơmbat bùh bơh di bơnhă ồs, lồc behơ̆ Môise sih gơ hơđang trồ, di đap mat Pharaôn. 9Gơ rơp gơlik gơs thul rhền làm jơh lơgar Ejiptơ, mơ tơnggơs toh mồr gơs ndơng hơđang cau mơ phan poan jơng tòm làm jơh lơgar.” 10#Yalt 16:2.Behơ̆, bol khai kwà bùh bơh di bơnhă ồs mơ ñă ntào di đap Pharaôn. Môise sih bùh hơđang pah gòi, gen gơlik toh mồr gơs ndơng hơđang cau mơ phan poan jơng. 11Ală cau juh proh ò rgơi ntào di đap Môise, tài bơh toh mồr neh gơs hơđang jơh ală cau Ejiptơ. 12Mơya Yàng Jehôwa neh lơh kơldang nùs Pharaôn gen khai ò iat jơnau Môise mơ Arôn dê, tòm toh be jơnau Yàng Jehôwa neh đơs mơ Môise.
Bơta rung rài dơ̆ poh: Mìu piar
13Gen, Yàng Jehôwa đơs mơ Môise lah: “Mê guh gòñ tĕ tòm tŭ àng drim, lòt tòm mat Pharaôn mơ đơs mơ khai lah: Yàng Jehôwa, la Yàng Tom Trồ làng bol Hebrơ dê, neh đơs be do: ‘Lòi tĕ làng bol Añ jê lik lòt, nàng bol khai duh khoai Añ, 14hala dơ̆ do Añ rơp cèng jơh pràn ală bơta rung rài Añ jê tòmdră mơ mê, tòmdră mơ ală cau kwang duh broă mơ làng bol mê dê, tồ mê in git lah tòm làm jơh plai ù ò gơs cau lơi ndròm be Añ. 15Mơ tŭ do, dilah Añ kòñ gen Añ rgơi pò tê Añ jê nàng đùh hơđang mê bal mơ làng bol mê dê dô bơta pluh plàng rgơi tơnroh mê bơh di plai ù. 16#Rôm 9:17.Mơya tơnggume Añ lòi mê in gam kis, hơ̆ la nàng sơnio mê in gŏ gơnap gơnoar Añ jê, mơ bơh hơ̆ sơnđan Añ geh pơnro làm jơh plai ù. 17Mê gam bơtào is să tòm mê nàng tòmdră mơ Añ, ò lòi làng bol Añ in lik lòt. 18Gen tàng ngai hìng, di di jơ do, Añ rơp đùh mìu piar dờng ngan, tian gơs tòm lơgar Ejiptơ bơh tŭ pa bơtào gơs jơl tus di ngai do ò gơs mìu lơi ndròm behơ̆. 19Behơ̆ tŭ do ai tĕ jơnau sồr cèng tơmut jơh ală phan poan jơng bal mơ jơh ală phan mê gơs tòm ƀlàng sre, tài bơh mìu piar rơp dùh hơđang kòp nă cau mơ phan poan jơng ò cèng tơmut mơ gam tòm ƀlàng sre, gen rơp chơt jơh.’” 20Ală cau lơi tòm mpồl cau kwang duh broă Pharaôn dê gơs nùs rngòt di jơnau đơs Yàng Jehôwa gen sơrbac sơrbang cèng tơmut tòm dơlam ală cau dĭ mơ ală phan poan jơng bol khai dê. 21Mơya cau lơi sang lòi jơnau đơs Yàng Jehôwa dê gen lòi ală cau dĭ bal mơ ală phan poan jơng bol khai dê tòm ƀlàng sre.
22Gen Yàng Jehôwa đơs mơ Môise lah: “Pò tĕ tê mê dê hơđang trồ nàng mìu piar rơp dùh hơđang làm jơh Ejiptơ, hơđang cau mơ phan poan jơng, mơ hơđang jơh ală phan tam tòm ƀlàng sre.” 23Tòm tŭ Môise pò gai kwềt khai dê hơđang trồ, Yàng Jehôwa ai ntơr kơnàs, mìu piar gơdùh, mơ puhlèp gơcrà hơđang ù. Behơ̆ Yàng Jehôwa đùh mìu piar hơđang lơgar Ejiptơ. 24#Yalt 8:7; 16:21.Mìu piar mơ ồs puhlèp kư̆ gơpơnjat sùm. Lơh gơs mìu piar rngòt rngơt ngan, bơh di tŭ Ejiptơ bơtào lơgar jơl tus tŭ do òhềt gơs behơ̆. 25Làm jơh Ejiptơ, mìu piar neh tơnroh jơh ală phan tòm ƀlàng sre, kòn mơnus bal mơ phan poan jơng. Gơ tơnroh jơh ală phan tam tòm ƀlàng sre, mơ lơh pă jơh ală chi che. 26Mìng dô bă tiah ò gơs mìu piar la Gôsen, la tiah làng bol Israel ơm.
27Gen Pharaôn sồr hòi Môise mơ Arôn tus mơ đơs lah: “Dơ̆ do añ neh tìs glài, Yàng Jehôwa la di; añ mơ làng bol añ jê la tìs. 28Hòi dan tĕ mơ Yàng Jehôwa, bol hi neh kong ò jai ntơr kơnàs mơ mìu piar. Añ rơp lòi bol mê in lik lòt, bol mê ò càng ơm jŏ dô êt lơi tai.” 29Môise ho lah: “Tòm tŭ añ neh lik bơh di ƀòn dờng, añ rơp pò tê hòi dan mơ Yàng Jehôwa. Ntơr kơnàs rơp thit, mìu piar rơp ò gam tai, tồ bơtau in git lah plai ù gơrê bal mơ Yàng Jehôwa. 30Mơya añ git lah bơtau mơ ală cau kwang duh broă bơtau dê òhềt rngòt di Jehôwa Yàng Tom Trồ.” 31(Chi dơmài mơ kòi màc gơkòl tơnroh jơh, bơh kòi màc gơlik gar mơ chi dơmài gơs bơkào. 32Ai kòi mi mơ kòi tràng ò gơkòl tơnroh tài bơh gơ dum tơnơ̆). 33Behơ̆, Môise lik bơh di Pharaôn mơ lòt bơh ƀòn dờng. Khai pò tê wèt hơ Yàng Jehôwa; ntơr kơnàs mơ mìu piar ơm thit, mơ mìu ò dùh tai hơđang lơgar. 34Tòm tŭ Pharaôn gŏ mìu, mìu piar mơ ntơr kơnàs neh jơh rau. Khai neh tìs glài tai. Khai mơ ală cau kwang duh broă khai dê neh lơh kơldang nùs bol khai dê. 35Behơ̆ nùs Pharaôn dê neh kră kơldang, khai ò lòi làng bol Israel in lik lòt, tòm toh be jơnau Yàng Jehôwa neh kơnòm di Môise mơ đơs.
Currently Selected:
Lik Ejiptơ 9: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.
