Lik Ejiptơ 8
8
Bơta rung rài dơ̆ bàr: Kit
1Gen Yàng Jehôwa đơs mơ Môise lah: “Lòt tĕ hơ Pharaôn mơ đơs mơ khai lah: Yàng Jehôwa neh đơs be do: ‘Lòi tĕ làng bol Añ jê lik lòt, nàng bol khai duh khoai Añ. 2Dilah mê ò bài lòi bol khai lik lòt, Añ rơp tơndùh rung rài la gơs kit bềng lìu tòm làm jơh lơgar mê dê. 3Hiòng Nil rơp gơs oă ngan kit. Gơ rơp mut tòm gơlang mê dê, tòm ơdŭ bic mê dê, mơ hơđang cơnòng bic mê dê, mut tòm ală hìu ală cau kwang duh broă mê dê, mơ hơđang làng bol mê dê, tòm glah hồl piang lă mơ di tiah bơcă kơmbuh phe lơh ƀañ mê dê. 4Ală kit rơp sơnđoh hơđang să mê, hơđang să làng bol mê dê mơ hơđang kòp nă cau kwang duh broă mê dê.’”
5Gen Yàng Jehôwa đơs mơ Môise lah: “Đơs tĕ mơ Arôn: ‘Pò tĕ tê at gai kwềt bi dê hơđang ală hiòng, ală croh, mơ ală tơnau, lơh oă ngan kit gơhào guh hơđang lơgar Ejiptơ.’” 6Behơ̆, Arôn pò tê khai dê hơđang ală dà Ejiptơ dê, mơ gơs oă ngan kit gơguh làm hơđang ù tiah Ejiptơ dê. 7Mơya ală cau juh proh kung kơnòm di bơta chài rgơi ndơp ndơr bol khai dê nàng lơh tòm toh behơ̆, bol khai lơh gơs oă ngan kit gơguh làm hơđang ù tiah Ejiptơ dê.
8Pharaôn hòi Môise mơ Arôn tus mơ đơs lah: “Hòi dan tĕ mơ Yàng Jehôwa, nàng Kơnràñ tă sang kit ngài bơh di añ mơ làng bol añ jê; gen añ rơp lòi làng bol mê dê lik lòt ơn phan duh khoai Yàng Jehôwa in.” 9Môise đơs mơ Pharaôn lah: “Añ lòi bơtau in gơs gơnoar lơh nền tŭ lơi añ rơp hòi dan bơtau in, ală cau kwang duh broă bơtau in, bal mơ làng bol bơtau dê nàng bơtau mơ ală hìu bơtau dê rgơi geh klàs bơh di ală kit, lòi mìng tòm hiòng Nil lơm.” 10Pharaôn đơs lah: “Ngai hìng.” Môise ho lah: “Rơp gơlik gơs jat be bơtau đơs, nàng bơtau in git lah ò gơs yàng lơi ndai tòm toh kung be Yàng Jehôwa la Yàng Tom Trồ bol hi dê. 11Ală kit rơp ò gam tai mơ bơtau, tòm ală hìu bơtau dê, ală cau kwang duh broă bơtau dê, bal mơ làng bol bơtau dê; gơ gam mìng tòm hiòng Nil lơm.” 12Tơnơ̆ mơ tŭ Môise mơ Arôn lik bơh di Pharaôn, Môise rac dan mơ Yàng Jehôwa bơh ală kit mơ Kơnràñ neh sồr tus hơ Pharaôn. 13Mơ Yàng Jehôwa lơh tòm toh be jơnau Môise neh dan. Ală kit tòm ală hìu, tòm ală ƀlàng hìu mơ tòm ală ƀlàng sre gen chơt jơh. 14Cau tơrgòm ală kit gơs ală gơnru dờng, mơ ƀô ồm làm jơh lơgar 15Mơya tòm tŭ Pharaôn gŏ khai neh geh ơm lơngai rau, gen kơldang nùs, ò iat jơnau Môise mơ Arôn dê, tòm toh jat be jơnau Yàng Jehôwa neh đơs.
Bơta rung rài dơ̆ pe: Sơmac
16Gen Yàng Jehôwa đơs mơ Môise lah: “Đơs tĕ mơ Arôn lah: ‘Pò tĕ gai kwềt bi dê mơ pòng thul di ù, gen thul tòm làm lơgar Ejiptơ rơp gơlik gơs sơmac.’” 17Bol khai lơh behơ̆, mơ tòm tŭ Arôn pò tê mơ gai kwềt khai dê pòng thul di ù, gen gơlik gơs sơmac tus hơđang cau mơ phan poan jơng. Jơh ală thul tòm làm lơgar Ejiptơ neh gơlik gơs sơmac. 18Mơya tòm tŭ ală cau juh proh kòñ ngui bơta chài rgơi ndơp ndơr bol khai dê nàng lơh gơs sơmac gen bol khai ò rgơi lơh. Behơ̆ sơmac ơñùm di cau mơ di ală phan poan jơng. 19#Luk 11:20.Ală cau juh proh đơs mơ Pharaôn lah: “Hơ̆ la ràs tê Yàng Tom Trồ dê.” Mơya nùs Pharaôn neh kră kơldang, khai ò iat jơnau Môise mơ Arôn dê, tòm toh be jơnau Yàng Jehôwa neh đơs.
Bơta rung rài dơ̆ poan: Rhài
20Tơnơ̆ mơ hơ̆, Yàng Jehôwa đơs mơ Môise lah: “Guh gòñ tĕ tòm àng drim mơ lòt tòm mat mơ Pharaôn tòm tŭ khai lòt tus di gah hiòng, mơ đơs mơ khai lah: Yàng Jehôwa neh đơs be do: ‘Lòi tĕ làng bol Añ jê lik lòt, nàng bol khai duh khoai Añ. 21Dilah mê ò lòi bol khai in lik lòt, Añ rơp sồr ală mpồl rhài#8:21 rhài: Cil: sơmac me, Làc: sơmac. tus kung be ală puk mhwal tus hơđang mê, hơđang ală cau kwang duh broă mê dê, hơđang làng bol mê dê, mơ hơđang ală hìu mê dê. Ală hìu cau Ejiptơ dê rơp gơs bềng rhài, mơ làm jơh ù tiah sơl. 22Mơya tòm ngai hơ̆, Añ rơp cah is lơgar Gôsen, la tiah làng bol Añ jê ơm, ò gơs dô mpồl rhài lơi tus tềng hơ̆, tồ mê in git Añ la Yàng Jehôwa, gơs mat tòm lơgar do 23Añ rơp cah is#8:23 Sră Hebrơ: Añ rơp lòi bơta dong tơwài. làng bol Añ jê mơ làng bol mê dê. Tềl krơi do rơp gơlik gơs tòm ngai hìng.’” 24Mơ Yàng Jehôwa neh lơh behơ̆. Ală mpồl rhài gal ngan gơ par tus kung be ală puk mhwal tus tòm gơlang Pharaôn dê, tòm hìu ơm ală cau kwang duh broă khai dê, mơ ù tiah làm lơgar Ejiptơ gơkòl rhài phà tơnroh jơh.
25Gen Pharaôn hòi Môise mơ Arôn tus mơ đơs lah: “Lòt tĕ ơn phan duh khoai Yàng Tom Trồ bol mê in tềng do, tòm lơgar.” 26Mơya Môise đơs lah: “Lơh behơ̆ ò di, ală phan ơn mơ bol hi ơn Jehôwa Yàng Tom Trồ bol hi in, gơwèt mơ cau Ejiptơ la dô bơta cù kìr. Mơ dilah bol hi ơn ală phan ơn cù kìr di đap mat cau Ejiptơ, bol khai rơp ò cơm lŭ di bol hi ò ơ? 27Bol hi pal lòt gùng tòm pe ngai, tus tòm ƀlàng ngềt ngơt, mơ ơn phan ơn Jehôwa Yàng Tom Trồ bol hi in jat be jơnau sồr Kơnràñ dê.”
28Gen Pharaôn đơs lah: “Añ rơp lòi bol mê lòt ơn ală phan duh khoai Jehôwa Yàng Tom Trồ bol mê dê tòm ƀlàng ngềt ngơt, mơya bañ lòt ngài rlau. Tŭ do, hòi dan tĕ añ in ƀà!” 29Môise ho lah: “Di di tŭ añ lik lòt bơh di bơtau, añ rơp hòi dan mơ Yàng Jehôwa; mơ ngai hìng rhài rơp dô ngài bơh di bơtau, di ală cau kwang duh broă bơtau dê, mơ bơh di làng bol bơtau dê. Mơya dan bơtau bañ pơrlồm bol hi tai mơ ò lòi làng bol in lik lòt nàng ơn ală phan duh khoai Yàng Jehôwa in.” 30Gen Môise lik lòt bơh di Pharaôn, mơ hòi dan mơ Yàng Jehôwa; 31Gen Yàng Jehôwa neh lơh jat be jơnau Môise neh dan, rhài dô ngài bơh di Pharaôn, bơh di ală cau kwang duh broă khai dê, mơ bơh di làng bol khai dê, ò gam wơl dô nơm rhài lơi. 32Mơya dơ̆ do, Pharaôn lơh kơldang nùs khai dê tai, ò ai làng bol in lik lòt.
Currently Selected:
Lik Ejiptơ 8: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.
