Lik Ejiptơ 4

Ală tềl ai Môise in

1Môise ho wơl lah: “Ñchi añ pal lơh taih, dilah làng bol ò dòn añ hala ò iat jơnau añ mơ đơs lah: ‘Yàng Jehôwa ò gŏ tơlik mat mơ mê ò.’” 2Gen Yàng Jehôwa đơs mơ khai lah: “Ñchi phan mê at tòm tê mê dê taih?” Khai ho lah: “Dô nơm gai kwềt.” 3Yàng Jehôwa đơs lah: “Sơrbì tĕ gơtòm tiah.” Môise sơrbì gơtòm tiah mơ gơ gơlik gơs dô nơm bơs; Môise ntoat dô bơh di gơ. 4Gen Yàng Jehôwa đơs mơ khai lah: “Pò tĕ tê mê mơ at di tiang gơ.” Behơ̆ Môise pò tê mơ at bơs, gen gơ gơlik wơl gai kwềt tòm tê khai dê. 5Yàng Jehôwa đơs lah: “Hơ̆ nàng lòi bol khai in dòn lah Jehôwa Yàng Tom Trồ ồng pàng bol khai dê, la Yàng Tom Trồ Abraham, Yàng Tom Trồ Isak, mơ Yàng Tom Trồ Jakôp dê, neh tơlik mat mơ mê.”

6Gen Yàng Jehôwa đơs lah: “Ơn tĕ tê mê dê tòm dơlam ào jrùh.” Behơ̆ Môise ơn tê khai dê, mơ tòm tŭ khai tă tơlik tê gen gơ gơs dun bò be piar. 7Chòp, Kơnràñ đơs lah: “Tŭ do ơn wơl tĕ tê tòm ào jrùh mê dê.” Behơ̆ Môise ơn wơl tê khai dê tòm ào jrùh khai dê, mơ tòm tŭ khai tă tơlik tê gen gơ gơs wơl be òs, be poac ndai tòm să khai. 8Gen Yàng Jehôwa đơs lah: “Dilah bol khai ò dòn mê hala ò ơn nùs tồr dê tềl krơi sơnròp, gen bol khai rơp dòn tềl krơi dơ̆ bàr. 9Mơya dilah bol khai ò dòn jơh bàr bơta tềl krơi do, mơ ò iat jơnau mê, gen ai tĕ dô êt dà tòm hiòng Nil mơ tuh gơ hơđang ù rañ rsơh. Dà mơ mê neh ai bơh tòm hiòng hơ̆ rơp gơlik gơs mhàm hơđang ù.” 10Môise đơs mơ Yàng Jehôwa lah: “Khoai Yàng Jehôwa, añ òhềt tŭ lơi la cau jak đơs, bơh tòm yau òr, hala bơh di tŭ Yàng tòmbơhbơr mơ cau duh broă Yàng dê. Añ la cau gơs lơmpiat đơs ò loh làng.” 11Gen Yàng Jehôwa đơs mơ khai lah: “Ñcau neh ai kòn mơnus in gơs bơr taih? Ñcau lơh khai in tĭ hala kloat taih? Ñcau ai khai in sền gŏ hala lơh mat khai in jơngo taih? Ò di la Añ, la Yàng Jehôwa ò ơ? 12Behơ̆ tŭ do, lòt tĕ; Añ rơp dong mê tòm tŭ mê đơs, mơ bơto mê ñchi jơnau mê pal đơs.” 13Mơya Môise đơs lah: “Khoai Yàng, dan Yàng sồr cau lơi ndai nàng lơh broă hơ̆.” 14Gen Yàng Jehôwa gơhào nùs di Môise mơ Kơnràñ đơs lah: “Mbe mê kơlôi bơh bi mê dê la Arôn, cau Lebi taih? Añ git cau hơ̆ chài rgơi đơs. Ne, khai lòt tus nàng tìp mơ mê; nùs khai rơp chò hòp tòm tŭ tìp mê. 15Mê rơp đơs mơ khai, mơ ơn ală jơnau đơs tòm bơr khai dê. Añ rơp dong kòl bàr nă bol mê tòm tŭ đơs, mơ rơp bơto mê bơta pal lơh. 16Khai rơp ala mê nàng đơs mơ làng bol, khai rơp gơlơh kung be bơr mê dê, ai mê rơp gơlơh kung be Yàng Tom Trồ gơwèt mơ khai. 17Mơya at tĕ gai kwềt do di tê nàng ngui lơh gơs ală tềl krơi.”

Môise rê wơl hơ Ejiptơ

18Gen Môise rê wơl hơ Jetrô, po bèp khai dê, mơ đơs lah: “Dan bèp ai añ in rê wơl hơ làng bol añ jê tòm lơgar Ejiptơ nàng sền gơs cau lơi tòm bol khai gam kis hala ò.” Jetrô đơs mơ Môise lah: “Kòn lòt tĕ lơngap lơngai.”

19Mơ tai, Yàng Jehôwa neh đơs mơ Môise tòm lơgar Midian lah: “Mê rê wơl tĕ hơ lơgar Ejiptơ, bơh ală cau jòi tơnchơt mê chơt jơh rau.” 20Môise yò bau ùr mơ ală kòn khai dê hào alàng, mơ rê wơl hơ lơgar Ejiptơ. Khai kung at gai jra Yàng Tom Trồ dê tòm tê khai. 21Yàng Jehôwa đơs mơ Môise lah: “Tòm tŭ mê rê wơl hơ lơgar Ejiptơ, lơh tĕ di đap Pharaôn ală bơta krơi Añ neh ai mê in gơnap gơnoar nàng lơh; mơya Añ rơp lơh khai in kơldang nùs, khai rơp ò ai làng bol in lik lòt. 22Behơ̆, mê đơs tĕ mơ Pharaôn lah: Yàng Jehôwa đơs be do: ‘Israel la kòn klau tơnhoa Añ jê, 23#Lik 12:29.mơ Añ neh sồr mê lah: Lòi tĕ kòn klau Añ jê lik lòt nàng khai duh khoai Añ. Mơya mê neh ò lòi khai in lik lòt; behơ̆ Añ rơp tơnchơt kòn klau tơnhoa mê dê.’”

Môise siat gơltau kòn klau khai in

24Tòm dô nơm hìu rlô ing tòm tŭ lòt gùng, Yàng Jehôwa tơlik mat mơ Môise#4:24 Rct: kòn Môise dê, tòm jơnau Hebrơ cih lah: khai. mơ mòr tơnchơt khai. 25Mơya Jiphôra ai dô nơm pềs lŭ ồs, siat gơltau kòn klau khai dê, mơ sang di jơng Môise, mơ đơs lah: “Ngan, mê la dô nă bau klau mhàm gơwèt mơ añ!” 26Behơ̆, Yàng Jehôwa lòi khai in kis. (Tòm rài hơ̆, jơnau “bau klau mhàm” sơnio bơh bơta siat gơltau).

27Yàng Jehôwa đơs mơ Arôn lah: “Lòt tĕ hơ ƀlàng bràs nàng rò Môise.” Gen Arôn lòt mo, mơ tìp Môise di mơnơm Yàng Tom Trồ dê mơ cum khai. 28Môise yal wơl Arôn in ală jơnau Yàng Tom Trồ bơto bal mơ jơh ală tềl krơi mơ Kơnràñ neh sồr khai lơh. 29Gen Môise mơ Arôn hòi pơjum jơh ală cau kwang kra Israel dê, 30mơ Arôn yal bol khai in jơh ală jơnau Yàng Jehôwa neh đơs mơ Môise. Khai kung lơh ală tềl krơi di đap làng bol, 31mơ bol khai dòn. Mơ tòm tŭ bol khai neh kơno lah Yàng Jehôwa neh wèt sền bol khai, mơ neh gŏ bơta dồn sa bol khai dê; bol khai kun bồ mơ duh khoai.

Currently Selected:

Lik Ejiptơ 4: KPM2018

Highlight

Copy