Lik Ejiptơ 5

Lơh gac ò gơs rhe

1Tơnơ̆ mơ hơ̆, Môise mơ Arôn lòt tus hơ Pharaôn mơ đơs lah: “Jehôwa Yàng Tom Trồ Israel dê neh đơs be do: ‘Lòi tĕ làng bol Añ jê lik lòt, nàng bol khai prap gàr dô ngai pơjum sa Añ in tòm ƀlàng ngềt ngơt.’” 2Mơya Pharaôn ho lah: “Jehôwa la ñcau mơ añ pal dòn bơr khai mơ lòi làng bol Israel lik lòt taih? Añ ò git Jehôwa mơ kung rơp ò lòi cau Israel lik lòt.”

3Gen Môise mơ Arôn đơs lah: “Yàng Tom Trồ cau Hebrơ dê neh tus mơ bol hi. Tŭ do lòi tĕ bol hi lòt gùng tòm pe ngai tus tòm ƀlàng ngềt ngơt, nàng ơn ală phan duh khoai Jehôwa Yàng Tom Trồ bol hi in, rngòt Kơnràñ đùh bơta pluh plàng hala pềs tà tơnroh bol hi!” 4Mơya bơtau lơgar Ejiptơ đơs lah: “Ơ Môise mơ Arôn, ñchi bơh tài bol mê tă tơlik làng bol bơh di broă lơh bol khai dê taih? Rê wơl tĕ lơh broă bol mê dê!” 5Mơ Pharaôn đơs tai lah: “Sền ne, làng bol tòm lơgar tŭ do neh gal ngan, mơ bol mê kòñ kơryan bol khai lơh broă ơ!”

6Tòm ngai hơ̆, Pharaôn ai jơnau sồr ală cau at bồ cau dĭ mơ ală cau at bồ cau lơh broă tòm làng bol lah: 7“Bol mê bañ phàt rhe làng bol in lơh gac be lài tai; lòi bol khai lòt jòi is rhe bol khai dê. 8Mơya bol mê pal lơh nền khà gac pal lơh gơs be lài, bañ pơndut dô êt lơi. Bol khai lơh alah, tài bơh hơ̆ tàng bol khai hòi driau lah: ‘Bol he lik lòt tĕ nàng ơn phan duh khoai Yàng Tom Trồ bol he in!’ 9Sồr tĕ bol khai lơh broă kơnjơ̆ rlau tai tồ bol khai giga lơh broă mơ ò ơn nùs di ală jơnau blac pơrlồm.”

10Gen ală cau at bồ cau dĭ mơ ală cau at bồ cau lơh broă lòt đơs mơ làng bol lah: “Pharaôn neh đơs be do: ‘Añ rơp ò ai rhe bol mê in tai. 11Lòt tĕ jòi is rhe bol mê dê tòm tiah lơi bol mê rgơi jòi; mơya ò pơndut broă bol mê dê dô êt lơi.’” 12Behơ̆ làng bol lòt làm jơh tòm lơgar Ejiptơ nàng jòi tòm rhe ala rhe. 13Ală cau at bồ cau dĭ sồr bơklơn bol khai mơ đơs lah: “Lơh tơl tĕ sir broă bol mê pal lơh kòp ngai, kung be tòm tŭ bol mê neh geh cau phàt rhe.” 14Ală cau Israel at bồ cau lơh broă mơ ală cau at bồ cau dĭ Pharaôn dê neh pồ bơtào, kong pù lơh mơ lah pơrhơng lah: “Ñchi bơh tài ngai òr mơ ngai do bol mê ò lơh tơl khà gac neh lơh nền kung be lài taih?”

15Gen ală cau Israel at bồ cau lơh broă lòt tus hòi rac mơ Pharaôn lah: “Ñchi bơh tài bơtau gơwèt mơ ală dĭ gơna bơtau dê behơ̆ taih? 16Cau ò phàt rhe ală cau dĭ gơna bơtau in, mơya kư̆ sồr bol hi lah: ‘Lơh gac tĕ!’ Ală dĭ gơna bơtau dê kong pù lơh, mơya bơta tìs la tài bơh làng bol bơtau dê.” 17Mơya Pharaôn đơs lah: “Bol mê la cau alah, cau alah! Tài behơ̆ tàng bol mê kư̆ đơs lah: ‘Bol he lòt lă mơ ơn phan duh khoai Yàng Jehôwa in!’ 18Tŭ do lòt lơh broă tĕ, cau rơp ò phàt rhe tai, mơya bol mê pal jào tơl khà gac neh lơh nền.”

19Ală cau Israel at bồ cau lơh broă đal git lah bol khai gơtìp bơta kalke tòm tŭ cau sồr bol khai lah: “Bol mê ò geh pơndut khà gac neh lơh nền pal lơh gơs kòp ngai.” 20Tòm tŭ bol khai neh lik lòt bơh di Pharaôn gen bol khai tìp Môise mơ Arôn ơm gơn nàng tòm mat mơ bol khai, 21gen bol khai đơs lah: “Dan Yàng Jehôwa sền sơwì ală ồng mơ cahrña ală ồng! Ală ồng neh lơh bol hi in gơlik gơs kung be bơta ƀô ồm di đap mat Pharaôn mơ ală cau duh broă khai dê, mơ ơn đào tòm tê bol khai nàng tơnchơt bol hi.”

22Gen Môise rê wơl hơ Yàng Tom Trồ mơ đơs lah: “Ơ Yàng! Ñchi bơh tài Yàng đùh bơta bòl glar hơđang làng bol do taih? Hơ̆ la tơnggume mơ Yàng sồr añ lòt tus sơl ơ? 23Bơh di tŭ añ lòt tìp mat mơ Pharaôn nàng ai sơnđan Yàng mơ đơs gen khai neh lơh bòl glar wơl di làng bol do, mơ Yàng ò dong tă làng bol Yàng dê.”

Currently Selected:

Lik Ejiptơ 5: KPM2018

Highlight

Copy